CCPUR, May 30, 2019, Virthli (ONP): Hmar Literature Society (HLS) huoihawtna hnuoiah May 30, 2019 dar 1:00 PM khan Young Learners' School, Zenhang Lamka ah The 29th Liensangvung Award inhlanna hunser hmang a nih. Hun hmangna hi Pu Darsiemlien Ruolngul in a keithuoia, Pu L. Ruovel Pangamte, Secretary, HLS in keynote address hrilna a nei.
Hi huna hin kum 2019 a Board of Secondary Education Manipur in HSLC exam a huoihawt huna Manipura Hmar nauhai laia pasal le nuhmei a an sangtak ve ve - Mr. Mark L.F Tlau (81%), s/o Albert Lalhmingsang, Saikawt le Ms.
Maria Lalneihlim (88%), d/o Dr. John. H. Pulamte, Imphal hai kuomah ''Liensangvung Award 2019" hi Award Donors han inhlanna an nei. Awardee hai kuoma hin Rs. 15000+Memento inhlan ve ve an ni a, Rev. Ros Infimate in tukum a award dawngtuhai tawngtaipekna a nei. Liensangvung Award hi kum 1990 a'nthawk khan pawlsawm exam na a an sangtak kuomah inhlan tan a lo ni tah a, kum 2014 a inthawk khan pasal le nuhmei category siem tan niin, kum tin pasal le nuhmei a mark hmu insangtak hai kuomah inhlan tan a lo ni ta bawk. Tu chena Award recipient hi mi 36 lai an um ta a, kum 2000 khan a apply tu an um naw leiin sem a ni naw a, chu ti lo chu kum tin sem a la nih.
Hun hmangna a hin Award Donors tienga inthawkin Pu Laldatlien F. Tusing in thuhrilna hun a nei a, a pa (L) Pu Liensangvung-in faina le hriselna a ngaipawimawzie thu, lekha inchuk a ngaipawizie thu hai ursun takin a hril a, hi Award buotsai tu HLS hai kuomah lawmthu a hril bawk. Hi huna hin Special Guest dinga fiel a um- hun liem ta a Award recipient lo ni ta hai- Lalramsang Infimate, MCS (JAG), Derick L. Khawbung, MCS, Lalrobul Fimate, MCS, Zosanglur Zote, MCS, Lily Chote, Asst. Professor hai a'nthawk thu tha tak tak ngaithlak a nih.
Hi hunser hmangna a hin Pu H. Zaneisang-in tukum a awardee hai ta dingin hunser bik a hmang a, Pu Joseph Lalrothang, Prof. Lal Dena, Pu Thangsawihmang ha'n infuina thu tha tak tak an hril. Hi huna hin tukum a awardee sung-le-kuo hai khawma thuhrilna hun an nei a, hunser hmang a ni sung hin Nk. Lawmnakim Hrangate in hla mawi tak tak sakin mipui fekhawm hai an awi.
Lawmthu hrilna Pi Zosangkim, Chairman ,HLS in a nei zoin Pastor Varsanglur in hun khar tawngtaina le ruoi inhlanna a nei a, hunser hmang a ni zoin ruoi inhnik tak el kiltlang a nih
