Haflong, April 13, 2019, Virthli (ONP): Vawisun khan Pu. Amitabh Rajkhowa, Deputy Commissioner, DIma Hasao a chair na hnuoia District Administration, NHAI le N.C Hills Indigenous Student Forum (NCHISF) hai chun Joint meeting an nei. Hi meeting hi NH-154E (Package No. As-21 Jatinga-Silchar le As-22 Maibang-Jatinga) lampui sietna hai siem dinga NCHISF haiin ngenna an lo siem angin DC hin a ko a nih.
Meeting a hin ISF palai hai chun Chief General Manager, NHAI Regional Office Guwahati in September 2017 lai dai a Jatinga-Silchar lampui sietna hai site visit nei ani lai a 23 crores a siemna dingin sanction dinga an tiemna chu vawisun ni chena sukpuitling ani naw nasan NHAI hai chu indawn an nih. NHAI Palai hai chun AS-22 Maibang-Jatinga road chu hnina lo siem ang ngeiin 24 Crores chu sanction a lo ni tah a tender hai iengkim sukfel ani tah a chu sin tan na dingin Contractor kuoma Election Code of Conduct leiin work order pek dawk thei a la ni naw leiin sin hi tan a la ni naw thu an hrila, Deputy Commissioner chun sin hi tan ani thei dan ding lampui hi lo dap in state Government kuoma lo intlun dingin an tiem a nih.
Chun, AS-21 Jatinga-Silchar road thu a hin NHAI hai chun lampui siem that na dingin Estimate pahni 20 Crores le 49 Crores chu NHAI Head office Delhi a approval dingin an thawn ta thu an hril. Hi thu a hin ISF Palai hai chun 20 crore chu a sietna po po siem thei ani naw ding anih an ti leiin 49 Crore chu approval thaw lem dingin thuthlukna an siem a nih.
chun lampui hi a sie ta em leiin inzinmi hai ta dingin nasatakin harsatna an tlun tak leiin NHAI hai chun zinga 14/04/2019 anthawk repairing sin tan ngal dinga thuthlukna siem a nih. Chun, Head Office Delhi anthawk approval hmu hma po a dingin CGM in emergency fund a sanction thei 4 Crores chu lampui repairing thawna dingin sanction a tih. Project Director, NHAI Haflong office chun 4 crore estimate chu submit nghal dinga inhriettir ani bawk.
N.C Hills Indigenous Student Forum hai chun DC le Media hai kuoma chun hma an lakna ah nasatakin an thangpuina lei a puitling theia um a nih tiin lawmthu an hril bawk a nih.
