Responsive Ad Slot

LALPA'N A DIT CHE A NIH

Saturday, April 13, 2019

/ Published by Simon L Infimate
~ Jami Darngawn

Kum tina ei hmang/inser hlak Lal Isu chu hi khawvela a um lai khan vawikhat chauh chawimawina a dawng ni kha um zie nei tak le inchik tlak a ni reng a nih.

Sermon thiem tak tak hai le Bible thiem haiin an hril/ziek hai ei ngaithlak/tiem chun ngai nuom a umin Lalpa ropuina an lang zuol hle hlak niin ka hriet a, chulai kara chun nuhmei naupang khawmin dawng ei lo nei ve hai hi puongsuokna hun remchang ei chang hlak leiin inhawmthaw tak le inphalam pumin ei khek suok ve hlak chu a ni hih.


Luke 19:
31. Chun tukhawmin, ‘Iengdinga in sût am?’ tia an indawn cheu chun, hieng hin hril ro, ‘Lalpa'n a dit a nih,’ tiin.

32. Chun a tirhai chu an fe ta a, an kuoma a hril ang ngeiin an va hmu a.

33. Chun sabengtungte chu an sût lai chun, a neituha'n an kuomah, “Sabengtungte kha iengdinga in sût am?” an ta.

34. Chun anni chun, “Lalpa'n a dit a nih,” an ta.

Awleh, sabengtungte kha an thlungna sût/insuo a ngai angin nang le kei khawm suol Setanin ami hrentangna a'nthawka sût/insuo ei ni tak leiin, Amin tlantu Lal Isu chu ei chunga thuneitu le mi chawimawitu ding a nih.

Amiruokchu, sangbengtungte kha insût/insuotah lo ni sienkhawm a chungah Lal Isu a chuongchar khan nuom naw tlat sien chawimawiin um thei a tim? Ti chu ngaituo tham a nih.

Chuongang bawk chun nang le kei khawm suol Setan a'nthawka min tlantu Lal Isu thu ei awi nawa ei ni nuom dan dana ei fe a ni chun Lalpa ei chungah lungawi a tim?

Ransa laia sangbengtung hi ngainat/hlutsak um lo pawl niin mi ṭhenkhat chun an hril a, amiruokchu sabengtungte chungah Lal Isu a chuong zet khan chu hril a hlawin a ropui hle ang khan. Nang le kei khawm Lal Isu zarin Pathien nau ditum ei ni hi a ropui êm êm a nih.

Lalpa zar chauvin kei khawm sabengtungte ang el a hmusit um le thiemna/varna nei naw lang khawm Lalpa Israelhai Pathien ei Pathien zar chauvin ka phulovin ka mihriem chanpuihai lai ditsakna/ngainatna ka dawnghai hi "Lal Isu ka chunga a chuong lei a nih" ka ti ngam a, ani ngei Lal Isu ei chungah a chuong hin chu mani ditdan/nuomdan a um/fe hi a rem ta naw a nih.

Unau ditum nangkhawm Lalpa'n a dit che.
Lalpa'n chawimawi a nuom che.

PALM SUNDAY CHIBAI LE.
Don't Miss
© all rights reserved
made with by Simon L Infimate