Responsive Ad Slot

MoRTH in Tuivai leilak dawna ding Rs 8.16 cr sanction, tender insuo a ni tah

Monday, March 11, 2019

/ Posted by Ralsun Hmar
Aizawl, 11 March, 2019 (Virthli-ONP): Ministry of Road Transport & Highways (MoRTH) chun tulai hnai el khan Mizoram le Manipur inrina a Tuivai thir leilak (bailey bridge) dawna ding vaibelsie 8 le nuoi 16 a sanction.

Mizoram PWD a Chief Engineer (Highways) Pu Er. Lalmuankima Henry chun ei palai a hril danin sanction order hi March ni 8, 2019 khan ministry chun a suksuok a, Mizoram PWD secretary kuomah  thawn nisienkhawm official takin an la dawng naw thu a hril.

Pu Lalmuankima chun Tuivai leilak dawna ding hin sanction order hmu hma dai February thlatawp khan sawrkar chun tender an suo tah a, sienkhawm dawntu tukhawm an la um naw thu a hril.

Tender hi dawn a ni hunah sin hi ṭan thei dinga beisei a ni thu a hril sa bawk.

Tuivai hi Mizoram le Manipur inrina, New Vervek anthawka km 13 a hla National Highway-150 a um a ni na, hi leilak dawna dinga executive agency (sinthawtu ding) chu Mizoram PWD a nih..

PWD hotuhai hril danin Tuivai leilak hi a kum tel an lo buoipui tah niin February thlaa Mizoram Chief Minister Pu Zoramthanga in Delhi a zu sir ṭuma, Transport and Highways Minister Pu Nitin Gadkari leh an hohlimnaa an sanction order hi suksuok vat a ni ding thu Gadkari chun a lo hrila, sin inhmaw a ni leiin Pu Zoramthanga in sanction order suok hma a tender lo insuo el dinga a ngenna chu Pu Gadkari hin a lo remti a nih.

PWD hotu hai chun Tuivai le New Vervek infe pawna lawmpui (road component) a sietna lai bik km 10 vel siemṭhatna ding chu sanction order a la suok naw leiin siem a la ni nawh an ti a, Tuivai leilak hi sanction order a suok a'nthawka kumkhat sung siemzo hman dinga ti a ni bakah order a suok a'nthawk thla 6 sung sin ṭan hman an naw chun sanction order hi kirnawk (lapse) thei a ni thu an hril bawk.

Tuivai leilak hi dawtheia a lo um chun Mizoram abikin Sinlung Hills Council huomsung le Manipur Tipaimukh biel infepawna a awlsam ta ding a nih.

Tuivai leilak baka hin MoRTH chun tulai hnai khan leilak pahni-Lengpui airport panna Tlawng leilak le Hnathial bailey bridge bakah NH-6 a Khawzawl to Champhai le Keifang to Kawlkulh inkar lampui siemṭhatna ding a rengin Rs 101.48 crore chuong  a sanction  bawk a nih.

Don't Miss
© all rights reserved
made with by Simon L Infimate