~ Jami Darngawn
Ka naupanglai khan ke sei zelzûlin kan siengna ka Pa'n a mi puok hlaka, ka kum inruolpuihai chun an mi nuisan hlaka inzak um hle sienkhawm ka nina'n a zir tlat naw leiin mi nuizat bûr chu ka lo ni der el.
Ka Pa leh bazar kan fe hlaka ka Pa chun ka dit ang ang chu a mi'n chawk pek ve hlaka ka lawm hle hlak. Ka sanghai chun, inhnar/thik enin an mi en ngai nawh. Asan chu ka nina kha thik khawp ka ni naw lei a nih.
Ka Pa leh hlim taka kan fesuok pha lampuia chun ka Pa ruolhai chun "Lun-a, l fanu kha engnge a an?" an ti hlak a (An lungril tak chun thi dinga an mi sie kha ka nih) ka Pa chun "Hei a dam a lawm! " ti malam chun an mi en hlaka ka Pa ruolhai khawm chun an mi lunginsietin an mi lawm em em hlak a nih. Tuhin ka Pa le a ruolhaiin mi hmu hai sien hril ding ka hau awm de aw ka ti vawng vawng hlak a nih. Sienkhawm an ni hai chu hi khawvel a hin an hmel hmu ding an um ta sie nawh.
Ka Pa chu a chang chun zana rama fienriel ṭawngṭai nei dingin a fesuok hlaka, vawikhat chu ka Pa le a ruolpa fienriel ṭawngṭai fe tum chu ka phal ta naw tlata, ka ṭap pek a nih. Ka Pa chun a mi la hang puok te te a, ka Pa hnunga chun kan beia in/imu tehlem ka thaw peka, a min zaltir char chun ka ṭap pek hlaka, ka Pa ruolpa chun a mi hnam hle.(He he)
Mak tak chu ka Pa chun a hunlai khan mihai ta dingin a ṭawngṭai hlaka Lalpa'n ka Pa ṭawngṭaina chu dawnin mihai chun taksa damna an chang hlak a nih. Amiruokchu, a naunu kei a ta dinga a ṭawngṭaina chu a hunlai khan dawnin um naw angin inlang sienkhawm kum ieng zam a ni hnung a chun dawnin a um a nih.
Lalpa ropui raw seh.
Chuongchun, kum 20 vengvawng chu ka Nu le Pa'n an naunu kei hriselnaw tak hi hmangai tak le duot takin an thei tawkin an mi enkawla an chunga ka lawm hle a. Nu le Pa ṭhatak mi petu Lalpa chu kan pak a nih.
Chuongang bawk chun, ka phu lovin Lalpa'n pasal ṭhatak Ami peka, ka pasal le a sunghai zarin kum 23 mi ka ni'n ka naupang laia inthawka ka lo inkhawkpui (Ka ruol bannawna ti el inla indik tak a tih ie) ka lung (Heart) natna chu Pathienin khawvel doctor hai hmangin Ami sukdam taha, ka va lawm ngei de! Pathien le ka chunga thilṭha mi thawpektuhai popo chunga lawmthu ka hril mawl mawl a nih.
Feb 4, 2019. zingkar chun tûk dang ang bawkin ka pasal chun "Tho raw leh, doctor kuoma feng ei tih" a mi tia, (Hieng anghin vawithum 3 kan thawna an tah) kei khawm chun "Ka dam annawm fe a ngai nawh" ka tia, ka pasal chun ka thuhril chu a mi ringzonaw lei am a ni ding chu a mi hung hnaia a nakawr a hung daw a "Inthuok raw le" a mi tia kei khawm chun ana kawra chun kan thuok peka chuongchun kan thuokdan andik lei chun doctor kan fe nawk ta naw a nih. Ka pasal chun hienghin a hril "I mak ngei el doctor fe ding ei hril pha i dam pei a" a ti hiel a nih.
Hi tûka ka pasalin hmangai taka a mi enkawldan hi mawi le hlu ka va ti ngei de aw ! Lalpa'n A nauhai hmangai tak le duot taka Ami enkhawl dan le inang ka tia ropui ka ti hle a nih.
Ani ngei, hi khawvel ei inzinna ṭawngsephurna ram a hin a chang chun thuok inhawinaw le harsatna le bawrsawmnahai nei hlak lang khawm Lalpa'n ka tuor A phal leiin tuor hlak ka ta. Amiruokchu, Lalpa'n ka tuorna hi a thlawnin Amin tuortir naw ding ti chu ka hriet leiin ka lawm em em hlak a nih.
Sâm 139: 14.
I kuomah lawmthu hril ka ti che, ṭiumtak le maktaka siem ka ni si a; l thilthawhai hi a mak a, Chuchu ka hringna hin a hriet chieng hle a nih.
UNAU DITUM TAK NANGKHAWM MAK LE DANGLAM TAKA SIEM I NIH.
