SHC sawrkar lailawk laklut a nih

Aizawl, February 07, 2019, Virthli (ONP): April ni 2, 2018 a Mizoram sawrkar le Hmar People's Convention (Democratic) hai inremna dungzuia indin Sinlung Hills Council (SHC) sawrkar lailawk chu vawisun khan laklut a nih.

Laklut inkhawm (swearing-in ceremony) hi Aizawl district Deputy Commissioner (DC) office ah chawhma dar 11 khan nei a nia, council member mi 14 hai chu Aizawl DC charge la mektu Additional DC Pu VL Hruaizela Khiangte in ringumna intiem tirin a lak luta, member 3 ti lo midang po in Hmar ṭawngin sisamna (oath of affirmation) an nei a nih.

Hi huna thuhriltu Pu Hruaizela chun SHC sawrkar lailawk laklut theia um chu lawmum a ti thu hrilin, ram in hma a sawn ding chun inlungruol taka sin thaw a ṭul thu a hrila, thil iengkim a sie a tha khawm inpawtak le langthlang taka inhril tawn a pawimaw thu le council member hai chu district administration le inpawtaka thawktlang dingin a ngen a nih.

Chief Executive Member (CEM) dinga laklut Pu Lalthlamuana Hmar chun interim period sung ngeia election nei hman chu an thawding hmasawp pawimaw tak laia mi a ni thu hrilin, interim period sung ngei election nei hman dingin hma lak an tum thu a hrila, inlungruoltak le inpaw taka biel hmasawnna dinga thawk tlang dingin council member hai popo a ngen bawk a nih.

Laklut inkhawm nei zova chanchinbumihai leh an inpawlna ah Pu Lalthlamuana chun interim hmasa a khan state assembly election in a nang chil leiin sin thaw mumal an nei hman naw thu a hrila, amiruokchu thaw dinga sawpsuok thil tamtak- delimitation, election rules, development programme hai an neia, chuonghai chu a hmasataka an bawzui ding makmaw a ni a, tuta member thar hung lut hai hin programme ṭhatak tak khawm nei an ta, chuonghai po po chu council session nei hmasatakah an hriltlang ding thu a hril.

CEM a nina anga hmalak a tum dan hrilin, Pu Lalthlamuana chun development le council election chu a ngai pawimaw hmasatak a ni thu a hrila, chu ding chun vawisun a'nthawk hin hma anlak nghal ding thu a hril bakah Lok Sabha election hma ngeia thaw ding ṭul hai thaw zo hman ngei an tum thu le hun remchang hmasatakah Chief Minsiter le General Administration Department changtu ni bawk Pu Zoramthanga hrilpui an tum thu a hril.

Pu Lalthlamuana chun MNF keihruoi Mizoram sawrkar ah beiseina insangtak an nei thu hrilin, state sawrkar in interim a um zing chu rem a ti bik a ringnaw thu a hrila, council puitling a um vat theina dingin sawrkarin hma a lak ngei a ring thu a hril bawk.

"Congress keihruoi sawrkar le inrem ni inlakhawm keini chun Mizoram sawrkar leh inrem ah kan inngaia, chuleichun MNF sawrkar a hin beiseina insangtak kan neia, tu ṭuma council a hin party lungril kan put nawa, council a hlawtling theina dinga inthlang buotsai vat chu sawrkar kan nawrna ding le sawrkar khawmin chu chu ngai pawimaw hmasatak ah a nei ka ring," ti'n a hril bawk.

Council members hai hi vawisun la la khan SHC cell office, Khatla ah an ṭhungkhawm nghal a nih.

Tarlang tah angin Mizoram sawrkar chun January ni 18, 2019 khan notification insuo in SHC interim period chu thlaruk sung annawleh election nei hma po (a hma sa lem lem) a di'n a lo pawtsei nawk a nih.

Standing- (Left to Right) 1. Lalruatliana, Saipum, 2. Zahmingliana, Vanbawng, 3. D. Hmangaiha, Sakawrdai, 4. Khawlremthanga, Suangpuilawn, 5. Rodingliana, Khawlian, 6. Ngurhrangkima, Phuaibuang, 7. H. Lalengzauva, Ratu, 8. HC Lalmalsawma, Zohmun

Sitting (L to R)- 1. Lalrosiem, Khawlian, 2. Lalbiaknunga, Saiphai, 3. Lalthlamuana Hmar, Sakawrdai/Shillong 4. VL Hruaizela Khiangte (Addl DC), 5. Lalmalsawma Darngawn, Tinghmun, 6. R. Lalfakzuala, Sakawrdai, 7. Melody Lalchhuangzeli, Sakawrdai.

COUNCIL MEMBER LAKLUTA UM HAI

Chief Eexecutive Member(CEM): Pu Lalthlamuana Hmar

Chairman: Pu Lalmalsawma Darngawn

Dy Chairman: Pu Lalbiaknunga

Executive Member:

1. Pu Lalrosiem

2. Pu Ngurhrangkima

3. Pu R. Lalfakzuala

4. Pi (NK) Melody Lalchhuangzeli

Member:

1. D, Hmangaiha

2. Pu H. Lalengzauva