Responsive Ad Slot

Vangaisumtuk Lal- Pu D.R Thuoma le Lalnu Pi Rodailovi hrietzingna Lungdaw ropui taka hawng

Saturday, January 26, 2019

/ Posted by Simon L Infimate
Patpuihmun, January 26, 2019, Virthli (ONP): January 25, 2019 sun dar 11:00AM khan Vangaisumtuk Lal- Pu D.R Thuoma le a nuhmei Pi Rodailovi hrietzingna lungdaw hawngna hunser ropui takin D.R. Thuoma Memorial Hall, Patpuihmun, Pherzawl District ah nei a nih. Lungdaw hawngna hi Rev. Dr. J. Huoplien Neitham, Moderator, EFCI & Former President, NEICC in a nei a, hi ruol hin Lalnu Pi Rodailovi in a dam laia ama huon siem ngei-ah ama hrietzingna lungdaw khawm hawng sa nghal a nih. Hi huna hin Upa Er. Lalthanzam Amo in a pa Pu D.R. Thuoma chanchin hrilna a nei a, Rev. H. Chungthang Ṭhiek anthawk Pathien thucha ngaithlak a nih. Hi huna hin Pu D.R. Thuoma a nauhai laia upa tak-Pu Lalliensung Amo khawma a pa chanchin hrilna a nei a, Lalnu Pi Rodailovi a puhai khawma thu hrilna hun an hmang ve, anni baka hin mi dang dang hai khawma Vangaisumtuk Lal a chanchin hrilna hun an hmang tawl.

Vangaisumtuk Lal- Pu D.R. Thuoma le Lalnu Pi Rodailovi hi kum 1942, April 11 in NEIG Mission Biekin, Patpuihmun-ah Pastor Chawnga Pudaite in an nei tir a, naupasal 6 le naunuhmei 3 an nei a, tu 15 an nei. Vangaisumtuk Lal- Pu D.R. Thuoma hrietzingna dinga Patpuihmun khuoa bawl a um- D.R. Thuoma Memorial Hall le Lalnu Pi Rodailovi hrietzingna dinga an bawl- Waiting Shed, Lalruong Lungkap kawl a um chu January 24, 2019 dar 10:30AM khan Pu Dr. Chaltonlien Amo, MLA  Tipaimukh A/C in hawngna neiin ṭawngṭaia inhlanna Rev. Vanlalruoi, Shillong in a lo nei ta bawk.


Lungdaw hawngna hunser hmang huna hin Pu Dr. Chaltonlien Amo, Hon’ble MLA, Tipaimukh A/C in lawmthu hrilna neiin a pa Pu D.R. Thuoma le a nu Pi Rodailovi hrietzingna lungdaw ngaipawimaw a hi hunser uop dinga hmun tin le ramtin a inthawka hung khawm mipui hai po po chungah an sungkuo aiawin lawmthu a hril a, hi program sukpuitlingna dinga hma latu hai po po kuomah a lawmthu a hril bawk.

Hi hunser hmang huna hin Siel-3, Bawng-1, Vawk-6, Kel-3 le ran chi hran hran thatin ruoi ropui tak el buotsai a ni a, mipui a sangtel in an kiltlang.

Hi hunser hmang huna hin Lalramchan Amo in Pu D.R. Thuoma le Pi Rodailovi hrietzingna dinga a hla phuok sakna a nei a, Marina Varte, Zosanglien, Patpuihmun KṬP hai anthawk inpakna hla le hlapawl ngaithlak a nih. Zan hunah D.R. Thuoma Memorial Hall ah program hmang a ni a. Hi huna hin Rev. Alan L. Thiek, Lecturer, SBC, Rev. Huolthangsei Ṭhiek, Executive Director, EAC le Pu Derick L. Khawbung, SDO, Vangai Sub-Division han thuhrilna hun an nei a, thu ṭha tak tak  ngaithlak a nih. (Report & Photograph; Muona Infimate, Virthli)

D.R. Thuoma Memorial  Hall hawngna le Lungdaw hawngna thlalak hai a link a hin en thei a nih.
Don't Miss
© all rights reserved
made with by Simon L Infimate