Responsive Ad Slot

D.R Thuoma Memorial Trophy 2019 Closing Ceremony ropui taka hmang: Ralngam FC Phulpui in Champion Nopui an dawm

Saturday, January 26, 2019

/ Posted by Simon L Infimate
Patpuihmun, January 26, 2019, Virthli (ONP): Pherzawl District Sports Association (PDSA) in a huoihawt D.R Thuoma Memorial Football Tournament 2019 chu vawisun January 26, 2019 dar 12:00 Noon khan D.R. Thuoma Memorial Stadium, Patpuihmun, Vangai Range Sub-Divisional Headquarters, Pherzawl District ah Closing Ceremony nei a nih. Hi huna hin  Chief Guest in Pu Dr. Chaltonlien Amo, Hon’ble MLA, Tipaimukh A/C a ṭhang a, Guest of Honour in Dr. Phirlienthang Buhril, DMO, Pherzawl & CCpur Dist. a ṭhang a, Chief Host in Pu Derick L. Khawbung, SDO, Vangai Range Sub-Division a ṭhang. Hi huna Khuollien han thu an hrilna a chun PDSA in hieng ang district football tournament an huoihawt chu lawmum an ti thu an hril a, PDSA han sports tieng suk hmasawn na dinga hma an lak chu an thlawp pei ding thu an hril a. Pherzawl District a pieng a inthawka PDSA han sports tieng tha tho taka hma an lak na le an activities hai an lo hriet hlak thu hrilin ṭhang la nawk pei dingin an infui a, players hai khawm hawp le hmuom, zu le inruithei thil laka insukfihlim dingin an infui tawl. Hi huna hin Pu Lalvullien Joute, President, PDSA in lawmthu hrilna neiin hi tournament sukpuitling ani theina dinga hmalatu hai po po chungah PDSA hmingin lawm thu a hril.


Final Match chu Team 11 hai laia thiem tak ve ve-  Ralngam FC Phulpui le Kangreng YC han an inkhel a, an in ang tawk hle a, first half ah goal khat ve ve thunin full time chen ah 1-1 in an in draw leiin penalty petna nei ani a, Ralngam FC Phulpui chun Kangreng YC penalty ah 5-3 a hnein D.R. Thuoma Memorial Trophy an lo dawm tah a nih. Champion Ralngam FC Phulpui hai chu Trophy+Medal le Cash Prize - Rs. 50,000 inhlan an ni a, 1st Runner-Up Kangreng YC hai chu Trophy+Medal le Cash Prize- Rs. 30,000 inhlan an ni bawk. Hi tournament a Best Discipline Team- Tuisen FC hai khawm Cash Prize- Rs. 10,000 inhlan an nih.

Hi tournament a Best Goalkeeper chu Samuel of Ralngam FC Phulpui ani a, Best Player- Lalrothang of Kangreng YC, Top Scorer chu Tv. Ela of Kangreng YC a nih. Individual prize dawngtu hai hi trophy le cash prize inhlan an nih. Prize semna nei ani zoin hi huna Khuollien Pu Dr. Chaltonlien Amo, Hon’ble MLA in tournament kharna a nei. (Report & Photographs: Muona Infimate, Virthli)

Don't Miss
© all rights reserved
made with by Simon L Infimate