Muolhoi, August 05, 2018, Virthli (ONP): Tv. Major David Lalhmingthang Khojol s/o Thangchuoilo, Muolhoi chu zanikhan Major anthawk Lieutenant Colonel ah alo kaisang tah. Kum 2001 khan Combined Defence Service (CDS) inziek tlingin Gorkha Riflesa lut a nih.
Ei hriet dan chun ama hi Hmar tawng hmang ngei laia direct a Combined Defence Service (CDS) Examination inziek tling hmasatak a nih. Hmun tam tak a hai umkuol in, India ram chau nilo, foreign hieng Hawaii, USA hai chena training in alo fe kuol ta a, India a chau nilo International level chena hming lo ser phak Counter Insurgency Jungle Warfare School (CIJWS) Vairengte, Mizoram a hai khawm lo thawk tah a nih. Kum 2012 khan Limited Competitive Exam for Indian Police Service (Defence Officer, Central Police hai le State Police Service hai ta ding bik) khawm a lo inziek tling a chu Court Case a um leiin a zawm thei ta naw a nih.
Lt.Colonel David Khojol hi Kohran le khawtlang a hai khawm thei ang anga inhmang hlak mi ani a, NC. Hills EFCI District Choir a khawm member lo ni ta hlak le Missionary chawmna tieng pang a khawm inpe zo tak el a nih. Social tieng a khawm President HSA Haflong Unit lo chel tah le a College kai lai khawm Patkai Christian College ah President, All Zomi Student Association alo ni ta bakah Jt HQ HSA Shillong a Committee member le Jt. HQ Delhi a khawm Asst. Games & Sports Secy. hai lo chel ta hlak ani bawk a nih.
A kaisangna hi Virthli chun ei lawmpui takzet a nih.
