Shillong, July 10, 2018, Virthli (ONP): Hun sawt tak el damnaw khuma lo zal tah Rev. Dr. Ruolneikhum Pakhuongte chu Supercare Hospital, Shillong hmuna zantieng dar 4:50 vel khan ei lo the tah.
Rev. Dr. Ruolneikhum Pakhuongte hi Pu Rochunga Pakhuongte le Pi Dartuochawng hai karah Khawlien, Mizoram ah April 13, 1934 khan a pienga, unau 8 laia 7na a nih.
Evangelical Free Church of India (EFCI) President pahina (2nd) le full-time President hmasatak, kum 1979-2006 inkar sung President sin a chel a, EFCI President Emeritus inlan ani bawk a nih.
Inchukna tieng chu M.A. Allahabad, M.Th chu USA ah a zo a nih. 1964-68 khan Sielmat Christian High School ah Principal ani a, 1969-78 khan Bibles for the Bibles for the World ah Vice- President sin alo chel a, kum 2005 khan Senate of Serampore College (University) chun Degree of Doctor of Divinity a lo inhlan a nih. UCC Board Chairman, ASA Vice Chairman, NEICC Chairman hai khawm alo ni bakah Shillong Khawtlang thuoitu sin, hnam hminga pawl um haia Adviser nina hun sawt tak el lo chel tah hlak a nih.
Lekhabu khawm Saptawng le Hmar tawngin iemanizat a lo zieka, rambung 28 lai zet a lo sira, chun Pathien thu a rawngbawlna hai khawm Japan le Hong Kong a hai chen khawm lo nei tah a nih.
Kohran ta dinga mi pawimaw tak el ani bakah Hmar hnam ta dinga mi tangkai em em el, ro mi tak khawm a nih. HPC le Mizoram inbiek lai khawma inremna le muongna um theina dinga hmalatu mi pawimaw tak ani a, chun Dimasa le Hmar buoi hun lai khawm theitawp suoa hma lo latu le refugee hai chen lo sawmdawltu hai laia mi pawimaw a nih. Shillonga Hmarnauhai ta ding khawma Hnam Pa a tling tak meu a, HSA Shillong JHQ in Golden Jubilee kum 2007 a an hmang tumin Lifetime Appreciation Award khawm alo inhlan a nih.
A nuhmei Pi Tanpuii leh nau 4 neiin EFCI Centre, Shillong hmuna khawasa an nih. Thu ei dawng dan chun a ruong hi Sielmat, CCpur tienga phur dinga ti a nih.
Ei inpam in, lusun sungkuo hai ei tuorpuia ei sunpui tak zet.
