Responsive Ad Slot

RPCNEI Development Department-in Free Medical Check-up an buotsai

Tuesday, July 10, 2018

/ Posted by VIRTHLI HMAR
Parbung, July 10, 2018, Virthli (ONP): Reformed Presbyterian Church-NEI, Development Department, Parbung Area chun  July 9, 2018 khan Parbung Community Health Centre ah ‘Rural After School’ program le inzawmin student kum 14 hnuoitienghai ta dingin Free Medical Check-up a huoihawt. Hi hun a hin school naupang 46 le zirtirtuhai an thang a, a thang hai po hi medical check-up bakah an BMI (Body Muscle Index) hai lak vawng a ni a, an mamaw ang peiin a thlawnin damdawi pek an nih.


Free Medical Check-up huoihawt a ni huna Parbung CHC staff hai- Dr. Lalmalsawm Pulamte, MO, CHC, Parbung, Lalchunghnung Songate, Pharmacist, CHC, Parbung le Staff Nurse- Zarzokim le Loicy han thangpuina sin hai thawa kawng iengkimah an thlawp chu a huoihawt tuhaiin lawmum an ti thu an hril a, hmatieng peia Senvawn le Pherzawl a hai khawm Free Medical Check-up hi huoihawt an tum nawk thu RPCNEI, Tlangram Presbytery,Development Dept. hotuhai chun an hril.

Parbunga Free Medical Check-up neia um hi Parbung VA le JSS (Jubilee Standard School) Staff han an uop a, nu-le-pa tamtak chun an nauhai ta dinga RPCNEI Development Dept. han tlangrama cheng abikin mi harsa tak tak hai laia ‘Free Medical Check-up’ an huoihawt chu lawmum an ti thu an hril a, hmatieng peia hai khawm huoihawt ni nawk hlak sien ti an nuomthu hi hunser va uop ve tu -Virthli Palai an hril.
Don't Miss
© all rights reserved
made with by Simon L Infimate