Responsive Ad Slot

NAUPANGTE HAI HI

Sunday, July 1, 2018

/ Published by VIRTHLI
~ Jami Darngawn

Mihriem a tuelkhawm hin naupanglai hun ei nei senga, a țhen chu naupanglai inhawi ti em em khawm um ei ta, a țhen chu naupanglai hun nghawk em em khawm um bawk ei tih.

Ei Lalpa lsu'n hienghin a lo hril.
Matthai 18:
4. Chuleiin tukhawm hi naupangte anga inngaitlawm taphawt, ama chu vân rama chun ropui tak a tih.
5. Chun tukhawm ka hming leia hieng ang naupangte pakhat khawm lawm taphawt chu kei a mi lawm nîng a tih.


Awleh, nang le kei puitling tahai khawm hi naupang anga inngaitlawm tak le lungril thienghlim tak put dingin Lalpân a mi dit a nih. Chun, vân rama khawm ropui tak ning a tih tiin a hril a bawk a nih. Lalpa hming leia naupangte lawm taphawt chu Lalpân a lawm ve a nih ti ei hmu bawk, kei ka ngaidan chun Sunday sikula hotuhai khawm hi Lalpân a lawm bik ka ring chu tie! Chun, Lalpa lawm tlak ngeia naupanghai inchuktir/enkawl dingin ei ditsakin ei inngen bawk a nih.

Naupangte anga lungril thienghlim puta Lalpa Rawngbawl hi ei va pawimaw ngei de !

Tulai ei khawvel ei hang thlîr chun a bikin eini tlangmi hai hi țhalai tamtak inruithei sala intang ei tam ta em ema pawi ei ti hle a nih. Zanilai khan Facebook a thlalak pakhat ka hmu chu eini tlangmi ram ngeiah bazar hmun ngeia tlangval țhenkhat chu an injection lai thla an hung lak dawk ka en chun ka țap a ni deu tak, ka lungril nat dan chu hril ruol an nawh ie.

Kum 11 liem ta a khan ruithei sala inthanghai lai Lalpân a mi tir ve hlaka chutaka chun mi tamtak chu piengțha em em hai sienkhawm inruithei leiin mi pangai angin an um thei ta nawa pawi ka tiin en harsa ka va ti thei de aw ! An ni hai chu an nu le pa hai chu Kristien an ni ve bawk si, an naupang lai chun naupang țha le thuawi thei tak khawm an ni thei, an hung pienghlim lem chun mihai chun "nau pasal a hung pieng ie" tiin hlim em emin an lo pawm ding a na, sienkhawm hun le ni hai a hung fe peia suol lampui chu an hung hraw ngei el tah a, a țhen chu suol sala intang sawngin an thlarau chen khawm an chân pha hiel a pawi ei ti hle a nih.

Awleh, nang le kei khawm hin ei nauhai hi iengtin am ei enkawl aw ?? Kei tak tak hi ka nih fimkhur taka nau enkhawl ding chu! Anachu maw kei ka khat chun nau ka enkhawl thei le Lalpa țhangnaw chun nikhat khawm ka nauhai ka enkhawl thei naw a nih. Khawvela nu po po laia nau enkawl thiemlo pawla țhang ni ngei ka tih.

Vawikhat chu ka nauhai taksa le thlaraua ka enkhawl thiemna dingin Lalpa kuoma bungheiin titak zetin ka țawngțai ve tah a, chutaka Lalpa mi dawnna/biekna chu "i nauhai i hmangai angin mi nau hai thlarau khawm hmangai ve rawh" ti a nih. Kei hmangaina nei tlawm tak hin iengtin am mi nauhai thlarau chu hmangai thei ka ta? A thei naw a nih. Sienkhawm maw Lalpa Pathien hmangaina a'nthawk chun mi nauhai thlarau chau hai khawm ei hmangai thei ve a nih. Haleluiah Lalpa ropui raw seh.

Inngaitlawm tak leh lungril thienghlim tak puta mani nauhai ei hmangai angin, ei mihriem chanpui hai thlarau bohmang el ding hai hi ei hmangai ve chu Lalpa Pathien lawmna tak a nih.

Naupang hai hi nakie chu ei ram le kohran țhuoitu ropui tak la hung ni ding an ni leiin tuhin nang le keiin ei thei ang angin Lalpa thupek ang ngeiin inngaitlawm tak leh hmangai takin mani nauhai ei hmangai ang bawkin ei mihriem chanpui hai nauhai khawm taksa le thlaraua hmangaia enkhawl hi ei mawphurna a nih.

Naupang hai hi Lalpaa ei rochan hlutak an nih a, vân rama khawm thildang iengkhawm ei sawm thei naw ding laizingin ei rochan ei nauhai ruok hi chu ei sawm ve ding an ni leiin an hlu bek bek a nih.

HAPPY CHILDREN'S DAY
Don't Miss
© all rights reserved
made with by Simon L Infimate