Responsive Ad Slot

Citizenship Amendment Bill 2016 le inzawmin Mass Rally nei

Saturday, June 30, 2018

/ Posted by Simon Infimate
Guwahati, June 30, 2018, Virthli (ONP): Citizenship Amendment Bill 2016, dit naw inentirna in All Assam Student Union (AASU) le 28 Indigenous Organisation hai chun Guwahati hmuna June ni 29 khan Mass Rally an nei. Hi huna hin NC Hills tieng an'thawk khawma mipui 500 bawr vel fe dinga ti chu Sawrkarpa in Railway Coach reservation thawsa chu, fe tawm el in an hung cancel leiin mipui chu an fe vawng thei ta naw a nih. Amiruokchu, hnam tina thuoitu thahnem tawk tak palai intir in an thang. North Cachar Hills Indigenous Student Forum (NCHISF) keihruoinain Hmar, Kuki, Zeme, Rongmei, Karbi, Muslim, Hrangkhawl, Vaiphei, Khasi le Biate Students hai khawm an thang ve a nih. HSA Assam Hills Joint Headquarter Palai in Pu. John Mark Pena, President le Tv. Simeon L Thiek, Asst Gen.Secy hai an thang a, HSA JHQ Guwahati anthawk an thang bawk a nih.

Hi huna hin Tv. David Keivom President, NCHISF khawma mipui pungkhawm hai lai thuhrilna hun neiin, ''Assam mipui hi ei Pu Lachit Borphukan an'thawk khan mi dawizep hnam ei ni naw a, râl lien Mughal Empire khawm ei lo hnebân tah a, khâng ang bawk khan tuta Citizenship Amendment Bill 2016 hi hnam inthuruol le huoisen ral hma a zam ngai lo ei ni ang bawkin thaw ro ei Assam ram ta di'n inthuruol in kal pên tlang ei tiu, North East State dang dang hai chun Citizenship Amendment Bill hi an cabinet chun an kal thu an lo siem ta a, vawisûn chena Assam Government in cabinet decision an la siem naw zing hi Assam Indigenous people hai nêkin state BJP sawrkar in Bangladeshi hai a ngaituo lem el hi an nina indiktak Bharatiya Janata Party am Bangladeshi Janata Party an ni lem hril chieng lem law law raw hai se. N.C Hills Indigenous Students Forum hai Chun Citizenship Amendment Bill 2016 hi kan theitawp in AASU le 28 Indigenous Organization hai thlawp tlat in dodal char char kan ta, keini N.C Hills Indigenous people hai hi Assamese tawng hmang thiem naw khawm kan um nuol a, amiruokchu kan thisen ruok hi chu Assam mi thisen indiktak a nih,'' tiin a hril.


Ei hriet seng ta angin Citizenship Amendment Bill 2016 chungthu a hin vawitam Mass Fasting, Rally, Dharna hai lo nei a ni ta a, hi bill a inlang sar zuol hai chu BJP Govt. hin India rama pêmlût thar kum sari (7 years) chen lo um tling ta hai chu Hindu an ni phawt chun a ram mi nina nei an tih, ti a ni a, hi thu hi Assam Accord le a’n kal tlat a, Assam Accord chun 25th March 1971 hnunga pêmlût a bîkin Bangladeshi pêm hai hi Assam ram mi a pawm an ni thei naw ding thu a hril bawk leiin, Assam mipui chun hi Bill chungthu a hin nasa tak in an kal a nih, Assam ram el ni loin North East a state dang dang hai chun hi Bill hi an pawm naw thu an lo hril ta bawk, eini hnam tlawmte ni inla khawm Assam rama hin Assam mi nina Original Inhabitant (OI) a pawm ei ni ve a nih.
Don't Miss
© all rights reserved
made with by Simon L Infimate