Responsive Ad Slot

MIHRANG AN KIM TA NAWH

Sunday, July 15, 2018

/ Posted by VIRTHLI HMAR
~ Jami Darngawn

✍ Mihrang Hmar Kristien Pasalțha Rev. Dr. Ruolneikhum Pakhuongte. Mihriem ngaidan chun piellei thuorieta i sakruong um ta sienkhawm, i sakhming le i pasal țhatna hai hi par angin vul zing a tih.

Awleh, țawng upa chun "Nuhmei le bal chu a tlakna leilung zir a nih" a lo ti angin, kei ngei khawm iengtik khawtika ka hriet ngai le ka hmu ngai khawm ni lo Rev. Dr. Ruolneikhum Pakhungte hi ka tlakna ka sungkuo hai leh taksa leh thlarauah inlaichinna nghet tak an lo nei lei chun kei khawma ka lo ngaina ve'n ka lo ngaisang ve em em chu a nih.


A chanchin hai chu inzawt ding tam tak um sienkhawm kei ka lo hrietdan le hmu ve dan tawite hung suklang ka tih.

Mihriem a tunga lawm hai reng reng hi mithiem le mivar mihausa hai chu mi ngaisang an hlaw hlak, kei ngei khawma ka lo ngaisang ve hlak bawk, chuneka ka ngaisang lem le inhnar um ka ti hai chu Pathien Rawngbawla an thiemna le varna hai hmangzo țhak hai hi khawvela ka mi ngaisang em em hai chu an nih, chulaia chun Rev. Dr. Ruolneikhum Pakhuongte khawm a țhang ve a nih.

Pa rorum, pa var, pa rawnkai le puitling ani lai zingin nuhmei, naupang le miharsa hai hmangaina a nei hi ka ngaisangna a zuol a nih.  A ma ngeiin a hrilna a chun "ramsa hai khawm a kap ve zeu zeu hlaka, sienkhawm ka hang kapa an hang thi char hin ka lunginset nawk leiin sa khawm ka kap nuom ta naw a nih" tiin a hrila, chu khawm chu hmangaina a nei lei a nih.

Mihriem seng seng, ni khata zingtieng le zantieng bu fa seng seng inthlau tak tak hi ei tama, chulaia chun Pa Ruolneikhum khawm hi seng seng laia a bik deu laia țhang a nih, kei ve bawk hi seng seng lai a chu a țâwngtak ni mei ka tih. Sienkhawm hnațâwng/hnațawl ang chauh nilang khawm hnațâwng/hnațawl khawm hmunhnawk hai ei raw pha chu țangkaina a lo nei hlak ang bawkin, kei khawm Pathien Rawngbawltu Krista Pasalțha chanchin tawite khawm nisien ziek theia ka um hi ka phunaw lai zingin ka lawm em em a nih.

Hiengang mi Hmar Hnam le Kohranin ei chan el hi chan ropui chu ei ni ngei de ! Sienkhawm, țawng upa bawkin "Hnahlui chu hnatharin a thlak" a lo ti angin. Khei ie,  țhangthar ka lenruol hai ei hmaa lo fe ta hai Pasalțha hai sulhnung hi nang le kei hin ei thlak a țul a nih. Mani hratna chun ei thlak thei chu ring a um nawh, sienkhawm Lalpa Pathien hratna ringsanin țhang la thar sup sup ei tiu khai..?!!

Pa, nikum 2017 lai khan lmphal khawpuia damdawi in pakhata i um lai khan, kan nupan kan hung kan che a nang chun "Mi hung kan hmasatak dinga ka ngai haiin in mi hung kan intak taka" tia i lo hril kha ka nakawra a cham zinga, chuleichun thiem le thiem lovin i chanchin tawite hi ka ngainatna inentirnan i mipui hai hriet thei dingin ka suklang a. Chun, kha nia ka pa (Rev. Darkung) chanchin i hril a, mi indik tak a ni ziet thu le a sinthaw țhat zie hai i hril mawl mawla, a chunga i lawm hle ang khan, nangkhawma A Rawng i bawl pek Lalpa Pathienin i sinthaw țhat zie le ringum taka A Rawng i bawl ropui zie hai chu a bat batin lo inzawt a ta, i chan/dawng ding hai chu ava ropui awm de aw !!!

Pa! Hadam takin Lalpa Pathien angsungah mi thienghlim lo fe hmasa hai leh lo chawl ta rawh le.
Damtakin Mangțha.

Sâm 116:
15. LALPA ngaia hlutak chu,
A mi thienghlimhai thi chu a nih.
Don't Miss
© all rights reserved
made with by Simon L Infimate