Responsive Ad Slot

Jiriphai Field ah silai vawi 5 puok leiin khawsung mi an zamsie

Sunday, June 3, 2018

/ Posted by Simon Infimate
Hmarkhawlien, June 3, 2018 | Virthli (ONP): Jiriphai khawsung inkhelna field ah vawituk zingtlak khan thawk nga lai silai a puok a, khawsungmihaiin an khuo hluo ngam lovin an zamsie.

Hmar khuo mihriem chengna in 18 vel umna Jiriphai field ah silai puokri an hriet chun inlum del ngam ta lovin Jiriphaihai chu an zamsie ta a niin thulakna chun a hril a.

Thulaknain a hril pei dana chun Jiriphai le a sevela hin Naga helpawl faction pahni an um a. Khawsunga hai lutin fak le dawn ding an zawng hlak a. Hienga zingtlaka silai a hung puok hin Jiriphaihai chun Naga helpawl faction pakhat an khawsunga um hai chu faction dang haiin an hung kap ta ngei niin an ngai a. An remchang ang peiin khuo an suoksan ta a nih.


Tithawng leia zamsie hai hi thenkhat ram ah an inrelhmang a, thenkhat in Jirighat Police Station an bel a. Jirighat Thana hung bel haiin an hril dan chun Jiriphai ah hin tar umhmun sawn thei ta lo le naupang tlawmte haiin an khuo hi an la nghak a nih.

Jiriphaihai inlauthawngna thlahuol ding le sawmdawl dingin Hmarkhawlien khawsung thuoituhai chawhnung tieng khan Jirighat Thana an pan a. Police official hai inbiekpuina neiin Khuo hluo ngam lova hung tlansie hai inkulna ding an hang ngaituo a. Haokip Punjee le Chikhur Huonveng khaw hni hai ah an inthakluttir phawt a nih.

Assam Rifles, CRPF, Commando le Police hai chu silai puokna hmun Jirighat anthawka kea darkar 6 lawnna Jiriphai hi thimbut dar 7 khan an pan a. Rama inrel hmang tuchena hmel lan lang lo an um bawk a. Thana hi an hung bel dinga ngaia lo la nghak pawl khawm an um bawk a nih.
Don't Miss
© all rights reserved
made with by Simon L Infimate