Responsive Ad Slot

PENTICOST DAY

Sunday, May 20, 2018

/ Posted by Simon Infimate
~ Jami Darngawn

Awleh, Lal lsu chun ei suolhai intlanna sin ropui tak chu a hung thaw zo a, ropui taka Van tieng an lawi zo hnung ni 50 hnung a chun Thlarau Thienghlim tir pekin ei um ti ei hmu a nih, kha hun laia Thlarau Thienghlim a hung tir khan mipui hai lai chun mak takin an lar a, țhenkhat chu zurui ang damin an um ni awm a'na, a țhen chu an țawnghai an inhrietpaw tawl a a ropui hle. Amiruokchu mi țhenkhat ta ding chun mak le danglam a tlinga, mi țhenkhat chun an awi naw hiel a nih kha! Hi chungthu a hin hril ding tamtak um sienkhawm hang fe khel el ei ta, ei hung suklang nuom lem chu hi thu hi a nih.

Thilthawhai 2:
14. Nisienlakhawm Peter chu sawm le pakhathai leh ngîrin rawl inringtakin an kuomah, “Nangni Judai rama mihai, nangni Jerusalem khuoa um popohai, hienghi hre unla, ka thu khawm lo ngai ro.
15. Hienghai hi in ring angin an inrui nawh, vâirik chauh a la ni hi.
16. Hihi zawlnei Joelin a hril kha a ni lem:

17. Pathienin, ‘Ni nuhnungahai chun hienghi nîng a ta,
Mi popo chungah ka Thlarau buok ka ta;
Chuongchun in naupahai le in
naunuhaiin ka thu hril an tih,
In tlangvâlhaiin inlârnahai hmûng an ta,
In putarhaiin mangah mang an tih.

18. A nih, chuong nia chun ka suokpahai, ka suoknuhai chunga khawm,
Ka thlarau buok ka ta,
Ka thu hril an tih.

19 Chun chungtieng vânah thilmakhai,
Hnuoitieng leihnuoiah inchiknahai
inhmu tir ka tih:
Thisen dâm, mei dâm, meikhu hu dâm.

20. Nisa thimin inchang a ta,
Thla thisenin inchang a ta,
LALPA ni ropuitak le râpthlâk chu
A hung tlung hma chun.

21. Chun hienghi nîng a ta,
Tukhawm LALPA hming lam taphawt
chu sandamin um a tih,’ a ti kha.

Ani ngei el tulai ei hun tawng mek khawm hi hun hnuhnung chu an ta naw am a nih? Ti chu lungrila ngaituo hun a ni tak zet tah.

Lalpa Thlarau Thienghlim chu ei chang/dawng tawl am aw ? Thilmak chidang dang nitin el hin hmu dingin a um tah, Nisa le Thlapa khawm danglam tak takin a um zo tah, Vân a leh Hnuoia thilmak danglam tak tak hai hmu dingin a um zing ta bawk a, hiengthil hai lei hin thlaphang nawng ei ta Lalpa hnaizuol sawt ding ei ni lem a nih.

"Mi popo chungah ka Thlarau buok ka ta" Ti tu chun nang le kei khawm a mi huom sa a nih ti ei hriet a, chuong ani lei chun naupang le nuhmeite el khawm lo ni inla Lalpa Thlarau ei nia aum chun inphalam lova Lalpa thu puongsuok hlak ding chu ei lo ni hrim a nih.

Suoknu, Suokpa ti khawm nita lovin Lalpa ISU zar chun Naunu, Naupa tia inbuk hai ei ni lem tah. Haleluiah !!!

Kei khawm Lalpa Thlarau Thienghlim chun ka nun ah thu a nei ve țan lai khan kum 10 liem tah a khan (2007 laikhan) zankhat chu kan meivar (light) a hung thi thut a ka hang thova meivar sit ka tum lai chun kan zalna pindan bang chu var/ light angin a hung um ka hmu taha, ka hang en chieng chet chet chun ngaium kha ka tia khawsawt aum khawpel a va hnai deua hang them ka tum chun ka taksa ka thunun ta nawh a. Chuongchun inhawi ti em em khan ka uma Lalpa Thlarau Thienglim 'Emmanuel' chun a mi umpui zing a nih ti chu ka chieng hle tah a nih.

Tiemtu ditumtak nangkhawm Lalpa Thlarau Thienghlim chun iengtiklai khawm a umpui zing che a nih ti chu i hriet tasa nisienkhawm, Lalpa ropuina dingin ei hung suklang/ puonglang a nih.

Chuongchun a thla nawk vela chun vawikhat chu zan ah ka har nawka, thlasik dei lai ani lei chun kan puonsil kha hang siem țhat ka tum lai chun ka kutpar po po kha a hung var/light nawk tah a, ka themna tieng tieng chu anțek/current fe ang el in a hung um nawka mak ka ti taluoa a ngaina khawm ka hriet naw tien pang a nih. Hi thu hi chu ip bo ka tuma umzie um lo angin ka ngai a nih, amiruokchu iem mani chang chang ka lungrila hin a hung um nawk hlakin, vawikhat chu Lalpa kuomah mi hrilfie dingin ka ngen tah a, chutaka Lalpa Thlarau Thienghlim-in a mi hung hrilfie dan chu hieng ang hin a nih. "l kutpar kutzung hai kha tiem rawh" Ti a nih, ka kutpar kutzung ka hang tiem chun 10 a nih.

Chuongchun Lalpa Thlarau Thlenghlim chun "l kut kha mal ka sawm a nih" ti a nih. Amiruokchu ka ring tak tak ngam ngainawha Lalpa Pathien ka ringzonawna nilovin ka ringna a hratnaw lei lem a nih.

Amiruokchu tu tieng tienga (2018 May) ka hang ngaituo kir nawk chun kum 10 sunga Lalpa mi țhuoidan hai hi mak ka tiin ka phulovin a mi hmang ve niin ka hrieta Lalpa kuomah lawmthu um raw seh.

Ani ngei maw, ei iengkim kuhi Lalpa'n mal a mi sawm sa vawng a'na amiruokchu nang le kei hin ei hmang/sawr ngam ngai naw leiin Lalpa Pathien ropuina hi ei hmu ding angin ei hmu thei ngai naw a nih.

Lalpa Pathien Thlarau Thienghlim thilthawtheina Penticost nia hung um kha, vawisun hin nang le kei a khawm pekin a um zinga chu chu hriethiema hmang țhangkai ngei dingin a thutak ei hung suklang chu a thar takin.

LALPA'N MAL MI SAWM PEK RAW SEH.

Don't Miss
© all rights reserved
made with by Simon L Infimate