~ Jami Darngawn
✍ Genesis 44:
12. Chun ama chun an upa takah a țan a, an naupang tak chenin a zawng a; chuongchun no chu Benjamin ipa chun a hmu ta a.
Benjamin phursung khera lal rangkachak no lo um kha chu asan um ngei a tih.
Mihrem/Ringtuhai khawm hin harsatna namen ei tuok chang hin a san a um hlak, a țhen chu mani'n thu ei awi naw lei dam, vangduoi hrim hrim lei dam, Lalpa ropuina dinga ei chunga thil hung tlung dam a ni hlak.
Awleh, Josef ta ding chun Benjamin kha a laihrui inzawmpui ani baka, a pa Jakob ta ding chun a nau tlumtak a duot bik a ni leiin a ma phursung ngeia khan a rangkachak no kha an phur tir a nih, hmangai leia an phur tir ti kha a unauhai khan an hriet der si nawa leh, chuongchun Benjamin phursunga lal rangkachak no a lo um el kha chu Jacob nauhai an beidawngin an inrum zak el a ni kha tie maw !
Chuongang bawk chun nang le keikhawm ei chunga harsatna phurrik a hung tlung pha hin lungngaiin ei bei a dawng hlak ti ro? Kei ngei khawm ka chunga harsatna beidawngna hai a hung um pha chun ka bei a dawngin kan rum zak el hlak, ka chunga harsatna hung um hai hi ka thawsuol lei sawnin ka umdan hai abul a'nthawkin kan suikir ve hlak, ani ngei suolna chu ka hau taluo amiruokchu ka suol leia Lalpa ei Pathien-in a mi hrem ding nisien nikhat khawm ka dam zo ka ring nawh.
Josef khan a unauhân a chunga thil an lo thawsuol leia a thung ding nisien damin insuok tir ta naw nih, amiruokchu a unauhai a hmangai leiin an chunga phurik a siem pek lem a lo nih.
Nang le keikhawm ei thawsuol lei khawm ni chuong lovin ei chungah harsatna namen a hung tlung changkhawm um a tih, annawleh ei thawsuol lei khawma ei chungah harsatna hung tlung chang khawm um bawk a tih, ei bei a dawngin hril ding ei invai hlak chang um a ti ie.
Chun, ei ni neka suol lem le Lalpa thu zawm naw hai chungah tlung lovin, eini thei tawka Lalpa ta dinga ei hun le ei ngaituona po po hmanga Lal rawng ei bawl ei inti ve laiin ei chungah ringnawtieng takin harsatna a hung tlung rup chang khawm um bawk a tih. Ani ngei, ei chunga phurrik nasa tak a hung tlung pha hin lung ngai ding ei lo ni lem ie. Lal lsu thisena intlanhai/inzawmpui hai ei ni lei le, Pa Pathien ta dinga ni bik rieu. A mit naulenga a mi en dawp dawp hai ei ni lei lem a lo nih.
Nuhmeipawl hân buman bei kan siem ngun ta hle a, vawitam kan siem inhnik naw chang a um bawk hlak. A chang chun anhnik thei em em bawk a nih, beiphit chu zan khawvarin tuiah kan inchie a, chun theitawpin kan hmet hlak a nih, chuonga kan thaw chun anhnik bik hlak a nih.
Chuongang bawk chun nang le kei Ringtuhai khawm hi mihai ta dinga faktlak/inhnik ei ni theina ding chun ei Pa Vana mîn harsatna tuipuiah ami'n chie hlak a nih. Chun, Lalpa Rawng ei bawlna kawnga hin beidawngna le demsiet/hrilsietna hai hi ei inhnik nawk zuolna dingin a mîn tuortir hlak a lo ni lem a nih.
Harsatna no, Lal Rangkachak Nopui ei phur hi lawm lem ding a lo nih.
LALPA'N MALSAWM RAW SEN CHE.
