Responsive Ad Slot

Harangajao ah Railway Compensation chungthua General Meeting nei

Thursday, April 5, 2018

/ by Simon Infimate
Harangajao, April 04, 2018, Virthli (ONP): Harangajao hmuna BG Construction na hnuoia Railway Compensation chungthu le inzawmin DC Conference Hall a rêla lo um ta angin March thla sûng Compensation hi Railway Authority in a pêk ding ang a pêk naw chun 1st April an'thawk Rail blockade nei dinga hrila lo um ta le inzawmin vawisûn khan North Cachar Hills Indigenous Student Forum (NCHISF)  keihruoina hnuoia Harangajao ruomsunga khuo ṭhenkhat an'thawk Goan Bura le mipawimaw ṭhahnem tawk tak fekhawm in General meeting nei a nih.

Hi huna hin Tv. David Keivom President, NCHISF chun chair la in Deputy Commissioner an'thawk thu lawmum hung lût hai chu mipui hmaa hril langna a nei, a hril peina a chun Chief Secretary Govt. Of Assam chun State Government chun Railway tienga thuneitu hai le inbie paw in Compensation chu pêk an remti thu hai a hrila, amiruokchu official thila thlakhat bêk hun pe dinga an hung ngênna chu ni sawmpanga (15 days) pêk nisien hi chena iengkim zofel a um naw chun Rail blockade thaw dinga hrila lo um ta chu nei dingin fekhawm hai chun thuthlukna an siem.

Chun Harangajao ruomsunga khuoli hai chun kum 2012 lai daia National Highway (NH 627) Rajabari (Doyanmukh) (97.415 km.) to Boulmoul (244.235 km) under N.C Hills District in Assam Assessment thaw a lo um ta chu tuchen hin sawrkar thuneitu an'thawk hrilsap le riva hriet ani ta naw leiin NCHISF in hma la pui sien tiin committee indina um hai chun lekha an hung pêk bawk. Hi chungthu a khawm hin students ṭhuoitu hai chun an hma tieng an thei anga hma an lâk ding thu an hril bawk.

NCHISF hin mipui ta dingin nasatak in hma la in sin tam tak -Development, Disaster, Minority Scholarship, le Railway, National Highway compensation hai a lo nawr dawk in a lo lâklût ta bawk a Hmar Inpui NC Hills & Karbi Anglong Region khawma an hmalâkna kawng iengkima hin a thlawp tlat a nih. Council an'thawk a hrain Development thil le appointment thila khawm nisien hamṭhatna nei naw inla khawm mipui ta dinga ṭangkai em em a hmalatu hai hi mipui chun an inpâk takzet a nih.
Don't Miss
© all rights reserved
made with by Simon L Infimate