Responsive Ad Slot

MoS ziek dingin Mizoram sawrkar le HPC(D) inrem

Thursday, March 8, 2018

/ by VIRTHLI HMAR
AIZAWL, March 8, 2018 (Virthli, ONP): Kum 2016, August thla a inthawka inremna zawnga inbie mek Mizoram sawrkar le Hmar People's Convention (Democratic) hai chun ursuntaka March ni 7-8 sung political levelah inbiekna an nei hnungin inremana tluontling (MoS) ziek dingin inremna an lo nei tah.

Vawisun khan Mizoram sawrkar le HPC(D) palaihai chun thusuok intawm siemin political level ah inbiekna neiin lungruol taka inremna nei a ni tah thu an puong.

Chawhnung dar 1 a, state guest house, Chaltlanga inbiekna an neizo hnunga chanchinbumi thenkhatin sawrkar palaihai le HPC(D) palaihai an inpawlpuina ah sawrkar palaihai inrawitu Pu Lalrinmawia Ralte, political adviser to the chief minister le MLA ni bawk chun, "Official levela kan harsatnahai hriltlanga lo um ta hai chu hrilnawn nawk a nia, harsatna dang iengkhawm umlovin a rengin frame of agreement duzingin lungruoltakin kan in rem a nih," a tih.


Peace accord ziek hun ding le ralthuom intung hun ding chungchangah Virthli palai zawhna (indawna)dawnin Pu Ralte chun sawrkarah kan inrem thu hi intlun phawt kan ta, an hmatieng HPC(D) hai leh inrawn zing pumin a hun le ni ding chu la sukfel ning a tih, ti'n a hrila, inremna point hran hran chu accord ziek a ni hunah mipui hrieta la tlangzar lem ding a ni thu a hril bawk.

Sinlun Hills Council (SHC) in member a neizat ding le a sinthaw dan ding chungchanga virthli palai indawnna chu "iengkim inremna hi Act a la siem ding a ni leiin puongzar a pawinaw lai zingin accord sign hunah value a um thei lemna dingin la puongzar lem nisien," tiin Pu Rinmawia chun a hril bawk.

HPC(D) spokesperson Pu Lalthalien chun MoS ziek thei dinga inremlawkna um thei ta chu lawmum a ti thu hrilin, sawrkarin an demand ang ang chu hnawl nei lovin a pawmpek niin a hril.
"Lungril inpaw le inringzo intuo takin kan inbieka, a tu tieng tieng khawma inremna kan dit ve ve a, Sawrkar khawmin pa chan changa hienga inremna a mi siempui thei ta hi lawmum kan ti hle a nih," ti'n chanchinbumihai a hril.

HPC (D) palaia thang Dr. John H Pulamte chun hun sawt taka inthawka inremna zawnga kal an pennah inrem theia an um chu lawmum a ti thu a hril bawk a nih.

Tuta tuma political levela inbiekna a hin sawrkar palai tieng hi Pu Rinmawia bakah Mizoram Law Commission chairman le MLA ni bawk Pu John Siamkunga ha'n an inrawia, anni baka hin additional home secretary Pu Lalbiakzama thangsain home department official mi 7, an rengin mi 10 an thanga, HPC(D) tieng hi working chairman Pu Lalthanglien @ LT Hmar in inrawin, an rengin Manipur anthawk mi 4 le Mizoram anthawk mi 6 an nih.

Thulakna dangin a hril danin peace accord hi an rang thei anga ziek tum a nia, lo thei lova interim period hmang a tul leiin thla 6 sung interim period a um phawt ding a nih.
Don't Miss
© all rights reserved
made with by Simon L Infimate