Responsive Ad Slot

IGSSS le RWUS huoihawtna'n Intl. Women's Day Inser

Thursday, March 8, 2018

/ Posted by VIRTHLI HMAR
CCPUR, March 08, 2018, Virthli (ONP): March 8, 2018 sun khan khawvel hmun tum tum haia inser a aum ang bawkin International Women's Day 2018 chu Indo-Global Social Service Society (IGSSS) le Rural Women Upliftment Society (RWUS) ṭhangruola huoihawtnain RWUS Training Hall, Sielmat, CCPur hmun ah inser a nih. Hi hun a hin RWUS Project umna khuohai (Villages) a inthawka nuhmeihai le Hmar Women Association (HWA) Unit tum tum a inthawk nuhmeihai fekhawmin an ṭhang a nih.

Ms. Lalrimawi, Project Officer, IGSSS in hi hun hi a keiṭhuoi a, Welcome Address hun Ms. Hrilrohnem, Chairperson, RWUS le Keynote Address hun Ms. Deborah Infimate, Co-ordinator, RWUS ha'n an nei a, Speaker in Mr. Joseph Joute, Freelance Journalist a ṭhanga, "Women and Society" ti thupui hmanga a thu hrilna a chun kawng tum tum haiah nuhmei hai pawimawna le pasal hai leh an indang nawna le inangtlangna hrilin an harsatna sukkiengna dinga tulai thiemna (technology) mobile phone le internet hai khawm hmang thiem a pawimaw dan hai hrilin, nuhmeihai hriet dinga pawimaw iemani zat a hril a, nuhmei hai chu anni ngeiin mimal ah, pawl ah, vantlang/khawtlang (society) ah a dawt dawt a hma an lak thiem a pawimaw hle dan hai a hril.


Hi huna Speaker dinga ti hai laia mi Ms. Esther, Project Co-ordinator, SHALOM chu ṭhang thei naw sienkhawm ama aiaw a a hung tir Nurse Nanao, Supervisor, SHALOM (Kum 10 le thla 6 lai zet HIV +ve hai laia sin lo thaw tah) in "Women and Health" ti thupui hmangin thu a hril a, a thu hrilna a chun nuhmei-pasal inpawlna (sex) thila natna inkaisawng thei natna chungchang (STI infection/disease) fie takin hrilhrietna a nei a, ching (Infertility) um thei dan le nuhmeihai mani insukfai/insukthienghlim (Personal Hygiene) uor a pawimaw thu, STI inlangsuok dan (a sign/symptoms), hriet ding pawimaw Point 5 lai hrilin, sukdam thei a ni dan hai, kawppui nei anni chun pasal le nuhmei treatment lakkawp a ngai zie hai, SHALOM le Government Dist. Hospital a hai Clinic umin a thlawn a enkawlna treatment lak thei zing a nih thu le nuhmei thidap (pad) hmang dan thu ah a ṭhat dan tak chun darkar hni dan peia thlakthleng pei a hrisel thu le nuhmeihai chu nuhmei fak ding bik calcium fak a pawimaw thu, kum 40 chuong tah lem chun fak uor a ṭul zuol hle thu hai fak rawp a pawimaw thu a hril. Ama hi HIV invawi hai laia a sinthawna chu nurse sin a thaw ṭan tir a'nthawk a lo ni tah a nih.

"Legal Rights of Women and Schemes" ti thupui hmangin Nuhmei hai hriet dinga pawimaw zuol bik dan-le-dun um hai hrilhrietna Ms. Deborah Infimate, Co-ordinator, RWUS khawmin hi huna hin a nei bawk. Chuong hai laia chun Police ah nuhmei hai harsatna tuok leh inzawma FIR thelut dan thu ah nuom zat zat thelut thei a ni thu, zan hnunga police in nuhmei an man a thieng naw thu, an lo man khawma kal ngam dinga hrilin le nuhmeihaiin an chanvo (rights) an hriet tawk naw leia thawsuol an nei ve hai a hrillangsa bawk.

Hun karlakah hriltlangna, indawnna le dawnna (Discussion) hun hmang le Ms. Hmingmawikim, Ms. Ramhmingmawi, Mr. Hrangmanthieng haia inthawk hlasak ngaithlak niin Vote of Thanks Ms. Melody Zairemmawi, Co-ordinator, RWUS in a nei zoin hun hmang zo a nih.

Huoihawttuhai chun Speaker hai kuomah lawmthu hrilna'n thilpek an inhlan a, hun hmangzo hin hi hun a nuhmei fekhawm hai chu refreshment tuihnai tak (lunch pack) an pek bawk. Hi hun hi Printed le Electronic Media tum tum hai khawmin fiel ve an ni angin an ṭawiawm a nih.
Don't Miss
© all rights reserved
made with by Simon L Infimate