CCPur, December 12, 2017, Virthli (ONP): Rev. Lalngaisang (Kum 90), Cannan Veng, Sielmat, CCPur chu zantieng dar 4:50PM vel khan a chengna in ah a rawng a i bawl hlak a Lalpa kuomah chawl hadam dingin a mi lo maksan tah. Rev. Lalngaisang hi hun iemanichen a'nthawk ta khan a hriselna thlahnuoiin in a enkawl lo ni kha a nih. Rev. Lalngaisang hi Pathien thuhriltu, a rawngbawlna khawm hring em em hlak le ICI kohran a Revival Speaker/EAL lo ni tah hlak a nih. Ama hi Sielmat Bible College indin hlim laia hotu hmasa laia mi khawm a nih. Lusûn sungkuo hai ei sûnpui takzet.
Rev. Lalngaisang Chanchin Tawi
Pieng le Murna
Rev. Lalngaisang hi kum 1928in Patpuihmun, Vangai Sumtukah a pieng a, a pieng ni le thla hi chieng taka hriet an nawh. Tuiliensang kum (1929) khan, “Patpuihmun lal in tuol tlanga tuiliensang en dingin kan puok tah,” a nu le pahaiin an ti leiin 1928 October vela a pieng niin a nu le pain an sut. A pa hming chu (L) Pu Sumtinhrawng Amo a na, nu chu (L) Pi Khupzo (Khawzawl) a nih. Patpuihmun khuoa tiena tlanga inthawka khawnbawl an na, lal busung le lal sadar khawm pek tul lo, zalen an nih. Piengpui unau 10 a neia, chuonghai chu, a upa indawtin (1) Lalngaisang (2) Zawlrangkhum (L) (3) Darbathrawng (L) (4) Laihlizo (L) (5) Chongtuozik (L) (6) Rolallawi (7) Laltleilien (8) Lalchunglur (L) (9) Zohmuntling (L) le (10) Lalthiengzo.
Inchukna Tieng
Khawvel Indopui II, (World War II) leiin Old Churachand Mission Compound a school kharin a uma, Mission hmun chu Patpuihmunah sawnin a uma, hotu Rev. Lalthanliana inrawinain Mission school Patpuihmunah hawng a hung ni taha. Kum 1945 hin hi Mission ME School a hin a kai tana, school a kai hin kum 17 a upa, lawm zui hnunga school kai tan a nih. Zirtirubu suosaa School kai tan a ni leiin 1945 in Class 2 a passed a, 1946 in Class 3 a passed. 1947 in Mission Hmunpui Churachandpur Mission Compounda an sawn nawk tah leiin Class 4 hi Old Churachand-ah a kaia, 1948 in Class 6 Pherzawla a passed. Class 7 hi 1949 in a zoa, 1950 in Class 8 Old Churachandpura a zo. Class 9 le 10 chu Bengali High School, Imphala an chuka, 1954 in class 10 a zo. Pre University le BA chu DM Collgea an chuka, 1961 in BA a zoa, London Bible College ah kum 1964-1966 in Diploma in Theology a zo.
Sandam Inhrietchiengna le Rawngbawlna
Hun sawttak el makhatin sandamna a zawnga, fienriel tawngtaia fein Bible nasa takin a tiema, 1951 in Old Churachandpur, Mission Compounda Sandam inhrietchiengna ropui tak el a neia, “kum 1951-52 sung chu sandam hlimnain ka hmang zo a nih,” a tih. Hieng lai hin testimony khawm an la ti ngai nawha, “Lalngaisangin Pathien a hmu dan hril raw seh” an tia, “Chung le hnuoi khikin ka hril el hlak” a tih. “Chawl chang Patpuihmunah le Phulpuia Pathienthu hril dingin an mi fiela, Lalngaisangin a Pathien a hmu dan hril raw seh an tin, ka hril peiin, Pathien thu hril ka tan a lo ni zing tah” tiin a hril.
Rengkai Revival
Kum 1960 kum bul tieng khan Tuithaphai lai revival nasatakin a tlunga, hieng hun lai hin thuhriltu ropui Biswas revival khawm ti a nih. Hi revival fe zawm pei hin Reangkaia revival nasatakin a tlunga. March 1, 1960 ni hi thuhril ding inbuotsai fienriel tawngtainain Rengkai thlanmuolah a va fea, hieng ang hin a thiltawng ama vekin a ziek:
Rengkai thlanmuolah “sun lai tak ka va tawngtaia, ka tawngtai chu iengtik lai neka ka tawngtai nekin a ropui lema. Pathien Thlarauin meichawk ang elin a mi hung bawm niin ka hrieta. Pathien hmangaina nasatak ka lungrila a hung thara. Thung puma ka tawngtai kha bawkkhupin ka lo um el tah a. Inhnik ka tia ka tawngtai zing lai chun, ‘iengam ka tuok an tah, ieng chang am kan tah a, kei hi?’ ka ta ka hang menga. Ka meng chun iengkhawm ka hmu nawh. ‘Tawngtai nawk el ka tih’ ka ta ka tawngtai nawka. A hma ang bawkin Thlarau Thienghlimin nasatakin a mi chenchila, mei chawk sen zur zurin angin a mi bawmin ka hriet nawka, amiruokchu, puotieng mei kang thei chu an nawh. Hieng anga a zuol phat mak ka ta, ka hang menga anachu iengkhawm ka hmu ngai nawh... Ka tawngtai sung hin tienlai NEIG ei inzirtrina “ei tawngtai phaa, ‘Aw Isu” ti lo ding, ‘Aw Thlarau ti lo ding,’ ‘Halleluiah khawm ti lo ding’ ti hai hi a tium nawzie ka hung hriet tah a. Ka tawngtai zing pum chun vawi iemnai zat ‘Halleluiah’ ka ta... Chun thil pakhat hi ka tawngtai sung hin keima thawfawm ni lo tawng danglam a hung suoka... ka thawlui khawm a ni bawk nawh. Hienga ka tawngtai hi ka thawsawt taluo taha, tin ka tumin, ‘la hei thaw nawk ka tih’ ka tin tum thum lai hieng ang hin ka thaw zo chun kan lawi taha. Ka lungril chun lung khamna tak ka neia, “Vawizana Biekin Inkhawm hi ieng ang tak in am tlung a ti aw’ ti ka ngaituo leiin.”
Hi zan hin Pathien biek inkhawm a hin Pathien Thlaraua hartharna ropui tak el a tlunga, Pathien thucha Thilthawhai 2:17-21 ‘Mi po po chungah ka thlarau buok ka ta” ti thupui hmangin a hrila, thuhril zoa tawngtai ruol an hang nei chun, ama tawngbauin, ‘A puok phuta, thungphaa thung hrim hrim an um ta nawh. Tuonga an tla thla vawnga, ngate tuilum buokkhum an elin an inper chawr chawr el” tiin a hril. Suol inhrietna le Pathien hmangaina nasatak inhrietna a um. Pathien Thlarau sinthaw a ropui hle. Hi Rengkai Revivala inthawkin Pathien Thalrau thuoina nasa tak el, a rawngbawlnaa le a hringnuna a dawnga, hi hi a a hringnun nisa tlak chena cheltu le thuoitu a ni tah.
Sinthawna
Sielmat Christian High School Assistant Teacher 1961-1964
Chaplain Sielmat Christian College 1966-1968
Ordination
21st ICI General Assembly, Sielmat, February 22nd, 1970 in ordination a chang. Ordination rawngbawltu hai Rev. Hrawngtawnlien (Moderator), Rev. Darsanglien Ruolngul, Rev. V.L. Ringa, Rev. V. L. Bela le Rev. C. C. Rema.
Evalgelist at Large (Tirko Lien)
1970 a inthawk rawngbawla a thangsuo 1994 chen Evangelist at Large sin a thaw. Tirko Lien a ni sung hin biel a fang nasa em ema, Kohran harsat lai a ni leiin thla thum dam in inlawi lovin biel a fang hlak. ICI (Independent Kohran) umna chu a sir kim vawng el chau ni loin, a vel a velin a fangkuol a nih. Tirko Lien a ni sung hin Lausanne Congress 1973 a a thanga, khawvel pumpuia Evangelical Thuring pawmtu hai inghatna pawimaw Lausanne Covenant a suoi kei ve ‘signatory’ a ni ve. Chun 1982 le 1987 hai khan England, Scotland le Wales a hai Pathienthu hril rawngbawlin a fe. Wales rama inthawkin chanchin tha ei dawnga, ei rama inthawka Wales ram chanchintha hrila biel fang hmasaa ngai a na. Hieng ang Pathien thuoina a dawng hi Pathien zar a ni tak meu. Hi baka hin unau Zohnathlak hieng: Paite, Simte, Zo, Vaiphei, Gangte le Thado Kuki lai rawng nasa takin a bawl. A pension hnung hin nasatakin rawng a la bawla, Tirko Lien sin kum hni a sunzawm hnungin, Sielmat Bible College a dam, Bethany Christian College a dam, New Life Ministries a hai rawng a la bawl.
Sielmat Bible College (SBC)
Sielmat Bible College kum 1980, 1st April a indin a ni khan Rev. Darsanglien Ruolngul principal ana, ama zirtirtiru a na, SBC a class la hmasa tak a ni nghe nghe.
Nuhmei Nei
April 14,1971 in Lalrengpui le Kohran danin Rev. Darsanglien Ruolngulin Roberts’ Jubilee Chapel, Sielmatah an neitir. Ril a ra nau malsawmna panga (1) Paul Nathan Thiek (2) John Gordon Thiek (3) Alan L. Thiek (4) Sam Lalringsan le (5) Marc Lalrohlan a nei. A nau pasal pathum hai hin kawppui nuhmei an nei taha, tu pali (pasal 3 le nuhmei 1) a nei.
Hringnun Chawhnung Tieng
September 5, 2016 a inthawk khan taksa bawrsawmna in a tlak buoka, tuol suok thei ta loin a um tan a, mani khata lawn thei ta loin, chel bata lawnpui a ngai tah. Hieng ang hin kum khat chuong hun a hmanga, taksa chau hle sien khawm a mit a la hrat hle a, Bible, Hlabu le lekhabu dang dang tiemin a nitin hun a hmang hlak. A na a set ta leiin hohlimpui an tak taha, a ngaituona le hrietna ruok chu a buoi nawh. Ni 5 vel liemtah a inthawk khan a bu duna hai hung tla hnuoiin, boruok dei ruosur bawk leh, a hung chau deu leiin ‘drip’ hai khai a niha, vawisun khawm bur hnina khai ani mek lai, 4:30 PM vel khan, a rawng a i bawlpek Lalpa kuom tieng a mi lo inlawi san tah a nih.
