Responsive Ad Slot

Hmasawnna Thar | 17 July, 2016

Sunday, July 17, 2016

/ Posted by VIRTHLI HMAR
DM, CCPur thupek dungzuiin eviction thaw
CCPur: District Magistrate, CCPur thupek dungzuiin Sub­ Divisional Magistrate, Tuibuong le staff hai chun zani zingkar 7:00AM khan SP Office, Tuibuong le District Council, CCPur office inkara phalna nei lova sawrkar ram lampui sira Hotels le dawr dang dang siema um hai bakah District Hqrts, Tuibuong le SBI, Tuibuong lampui sir haiah dawr le hotel siema um hai an thiek (eviction an thaw) a. Eviction thawna hi Police han an thangpui bawk.
    
SP Office, Tuibuong le District Council, CCPur inkar lampui sira dawr  hai hi July 16, 2016, 7:00AM a eviction thaw dinga District Magistrate in thupek an suo a ni a, hi thupek lo hrie thenkhat chun zani hmasa khan an dawr le in hai thiekin an thuom hnaw hai an lo thak dawk ta a nih. Eviction thawa um hi In, Dawr le hotel a rengin 45 a nih.

Transformer Imphal hung phurtlung
CCPur: Tipaimukh A/C sunga Sipuikawn human 132/33KV Power Sub­Station bawl meka ding Transformer chu Imphal a hungtlung ta a, a hmun chen phurtlungna dingin Leijangphaia leilak in a zo ring a ninaw leiin hi leilak siemthat dan ding ngaituo mek a nih tiin ei thu dawngna chun a hril.
    
A hmaa Patiala hung phur ti kha ni lem lovin Malanpur, Gwalior, Madhya Pradesh –a inthawka hung phur a ni lem. Hi Power Sub­Station bawlzo a ni pha chun Khiengjang, CCPur a Power Sub­Station  anga electric power supply theitu ding a nih. NFSA a bufai Jiribam ah Card bo in an sem ti kha Card neihai chauin an chang ti lem  ding a ni bawk. LRS Puruolte

Rev. Ros Infimate in Award pahni a dawng
CCPur: Lo inhnu met ta sien khawm Rev. Ros Infimate chun April 25, 2016 khan Sikkim Governor Ch. Randhir Singh kuta inthawk  chawimawina Award pahni a dawng. Award a dawng hai hi Bharat Excellence Award le Jewel of North East Gold Award hai an ni a; Friendship Forum of India huoihawtnaa April 25, 2016 ­a New Delhi hmuna Economic Growth and National Unity Seminar neina huna inhlan a nih. Award pakhat hi ama mimal hminga a dawng a ni a, pakhat lem hi a sinthawna le inzawma inhlan a nih.
    
Hiengang chawimawina (Award) hai hi film industry, medical field, education, social welfare & development tiengpanga sinthaw tha  hai kuoma inhlan hlak a nih.
             
Rev. Ros Infimate hi naufahra le enkawltu ding nei lo naupang enkawlna Childrens Home, Saikawt indin le lo enkawltu niin hi Home a inthawk fahra tam tak enkawl puitlingin Pastors/Reverend le field dang danga mi hlawtling tam tak an lo suok ta a nih. Award a dawng hi ei Chanchinbu chun a lawmpui hle.

Low cost  foot bridge  hawng
CCPur: Mr CT Lian, MDC in Lanva le Dorcas Veng, New Lamka infepawna Lanva vadung chunga  a mimal  sum hmanga  low cost children iron foot bridge (50x2.8ft) a sei, Rs. 65,000 senga a bawl chu zani 7:30 AM khan Mr Lunminthang Haokip, DC, CCPur in a hawng a, Pastor Zamkhansuan, Delhi PCI(R) in Pathien kuoma tawngtainain an hlan.


HPC­D (C) inrawinain Consultative Meeting nei
CCPUR: July 16, 2016 sun khan darkar 5 sung hun hmangin Hmar Peoples’ Convention (D)/ HPC­D (Chairman pawl) in rawinain VTI Auditorium, Rengkai, CCPur­ah an pawl thuoitu le Consultant/ Political Adviser hai bakah Hmar hnam sunga pawl tum tum hai leh Consultative Meeting nei a nih. Hi huna hin hnam sunga pawl tum tum hai chun HPC­D (Chairman pawl) in Kum 30 sung zet hnam an lo invakvaipuina chu hrietpuiin hnam ta dinga an hma lo lakna hai chu an thlawp thu le Mizoram sunga Hmar Movement fe meka HPC­D (Chairman Pawl) hmalakna an ringzo tawk thu an puong. Hi huna hin Hmar Inpui Gen. Hqrs le a hnuoia mi pawl tum tum HCLF, HYA, HSA, HWA, HACS, HNU, HAA, DHWA, HKI, HMARTOB le a dang dang hai an thang a nih. Tuhin Mizoram sawrkar le HPC­D (Chairman pawl) hi inbiekna nei ngei dinga remruot mek a nih a. A hun ding ruokchu hrietna le hrilchiengna a la um hri nawh. Hun sawtnawte ah an inbiek vat tah beisei a nih. Hiengang Consultative Meeting hi nei nawk pei ning a tih tiin HPC­D (Chairman pawl) thuoituhai chun an hril.­ LRS Puruolte

Sugnu Road siemna: Day 4; cheng tam tak a la tul hmel
CCPur: Sugnu Road, Muolvaiphei khawsunga lampui siemthatna sin chu zanikhan Saikawt Village Authority inrawinain Saikawt khaw mipui han Truck 3 le Tractor 5 hmangin sin an thaw. Duthusama lungphit tam tawk sung zo a la ninaw leiin a pawr pangngaiin a la pawr zing a, hma a sawn hrat naw hle. Lampui siemna ding hin mi tlawmngai sum le paia thangpuina pe an la um pei a, Mount Carmel School khawmin zanikhan thangpuina dingin Rs. 2,000/­ an pek. Fur ruotui tlak hun a ni bawk leiin chirdiek um lova lungphit sungbitna ding chun tam tak a la tul ding a nih. Lampui siemna hmun ram tinah No MLA.. No Cry; Don’t come after the Bill for this Work; Corrupted metal Road; we don’t want a liquid road, we want a solid road; where are you elected members? ti le thu dang dang inziekna Placard an tar. Lampuia chirdiek po po vur hmangna ding chun cheng nuoi iemanizat a seng a la tul ring a nih.



Legal Awareness program hmang
CCPur: July 16, 2016, 11:30AM khan YPA GHQ Hall, Hiangtam Lamka, CCPur­ah SSPP GHQ le District Legal Services Authority hai thangruola huoihawtnain ‘One Day  Legal Awareness Program’  nei a nih. Hi huna hin Chief Guest in Justice N. Kotiswar, Judge, High Court of Manipur & Executive Chairman, Manipur State Legal Services Authority; Guests of Honour in RK. Memcha, Member Secy. Manipur State Legal Services Authority & Vigilance, High Court of Manipur; Kimneinieng Shoute, Dist & Session Court Judge, CCpur; Letkho Kipgen, CJM/CCPur le Advocate Ch.Noren Singh, High Court of Manipur hai an thang a, Awareness ah Justice N.Kotiswar le Advocate Ch Noren hai resource person in an thang a,  school tum tuma inthawk student  600 chuong an thang.
    
Chief Guest chun, Lawyer tha ni ding chun Good Orator/Presentable communication skills, keen listener, flexible but attentive mind, logical reasoning capability, patience le quick responsiveness nei a tul thu a hril. Doctor le academician hai ang loin lawyer hai chun advertisement an thaw ngai naw a, phal khawm a ni nawh. Sienkhawm mipuihan lawyer tha chu anhriet tho a nih tiin a hril. Law tiengpang inhnik hai ta dingin 10+2 zo han BA LLB ( 5yrs integrated) course inchuk thei a ni bakah  Graduate hnunga khawm LLB course inchuk thei a ni thu a hril bawk.


Private Hospital a thaw hai licence kansel thei
Imphal: Manipur Nursing Home and Clinic Registration Act 1992 dungzuiin sawrkar­a thawk Doctors hai chu private hospitals haia an thawk hmu a ni chun an practicing licence kansel thei, hi dan bawsie hospitals hai licences khawm suspended a lo nitah tiin Director of Health Services, O. Ibomcha chun zanita DIPR buotsai press Conference huna media hai indawnna dawnin a hril.  Hi thil dona dingin state sawrkar chun dan khau lem a draft mek a, kum 2017 kum bul vela hmang hman beisei a nih tiin O.Ibomcha chun a hril bawk.
    
Manipur­a duma siem thil fak le hawp khapna a hlawsam nasan chu bureaucrats le officials tamlem hai duma siem thil chingzawngsak mi an ni lei a ni a, tuhin duma siem thil khapna hi NHM kuta pekdawk a nita thu; Manipur State Illness Assistance Fund one­time assistance Rs. 1.5 lakh BPL sungkuo hai kuoma pek le  AIDS patient hai compulsory a siem a nih tiin a
hril.

JNIMS in white paper a phar
Imphal KCP(PML) in JNIMS a professors pahni Contract basis­a thawk hai sin suknghet  (regularized) a nina thuah thil indiklo a um tia intuma July 20, 2016 zanrila inthawk Manipur state pumpuia general strike thaw an tumna le inzawmin JNIMS zanita JNIMS a press conference hunah  white paper a phar. Professor pahni M Angouba Singh  le Dr L Deben Singh hai sin suknghet dinga thutlukna chu Feb. 19, 2015 a CM O. Ibobi Singh chairman ninaa JNIMS Governing Council in meeting vawi 21­na an nei huna an siem a ni thu JNIMS spokesperson Dr Mohen chun a hril. General Strike thaw an tum chu thul dingin Dr Mohen chun ngenna a siem bawk.

JNIMS a MBBS seat sukpung tum
Imphal: Jawaharlal Nehru Institute of Medical Sciences, (JNIMS) a MBBS seat lak zat 100 a inthawk 150 a sukpung tum a ni a, hi le inzawm hin Ministry of  Health &FW, Govt. of India kuomah rawtna peklut a nit ah tiin ei thu dawngna chun a hril. Hi chungthu hi July 19, 2016 a New Delhi hmuna Nirman Bhavan a Technical Evaluation Committee meeting huna hriltlang ring a nih tiin ei thu dawngna chun a hril bawk.

DM College B.Ed.  Spl. Admission test
Imphal: DM College of Teacher Education­a kum 2016­17 session sunga B.Ed.1st Semester  inchuk dinga Special Admission Test chu July 24, 2016, 11AM­12:15PM inkar sung College hmuna nei ni dingin Principal, DM College of Teacher Education chun inhriettirna a siem.

MU hnuoia BA (Hons) 6th Semester result  puong
Imphal: Manipur University hnuoia BA (Hons) 6th Semester Examination, 2016 result puong a ni ta a,  Subject hran hrana  position la phak eini tlangmi iemanizat an um.
            
Eini tlangmi position la phak hai chu­ Anthropology­ ah Khumngaihmawi (topper); Rachel Lamneichong (4th); Nunnemsiem (5th ); Kimsawnhoi le  Lucy Lalsangpui (8th). English­ah  Peter Lalngaihluna (4th); Neilianching (10th). Philosiphy­ah Manggoulian Suantak (3rd);Daniel Lhunkhotinsei Haokip (6th); Kh. Lallenmang Vaiphei (8th). Political Science­ah Lunmalsawm (5th ); Hoineilhing Haokip le George Lianmuan Munluah (9th). History­ah H. Wellborn Ginkhankhual (4th); Haokholal Kipgen (8th); Chin Ngaih Mawi (10th).; Education­ah Malsawmkim Gangte ( 3rd); Hoikhochin Baite (7th ).; Economics: H John Gouliankhup (7th); Sociology: Donneihching (1st).

Concerned Depts. han an peklut naw lei
Imphal: HAC, Manipur in kum 2011­2012 to 2015­2016 kum 5 sunga Administrative report a peklut nawh ti thua khan India danpui Clause (2) Article 371(C) dungzuiin HAC, Manipur chun Governor fethlengin  President kuomah Annual report a pek hlak ding ti  chu a ni ngei a, sienkhawm HAC ni lovin concern head of  departments han kum 5 sunga report an peklut naw  ni lemin ei thu dawngna chun hrilfiena a siem. Hi thua hin Chief Secretary O. Nabakishore Singh chun July 20, 2016 chenah Governor fethlenga President kuoma report peklut hman a ni theina dingin concern secretaries,  Principal secretary le Commissioners hai chu year wise report siemzo dingin an hriettir.

Nabam Tuki  an ban; CLP leader dingin Pema Khandu thlang a nih
Itanagar: Arunachal Pradesh Chief Minister Nabam Tuki chu Governor Tatagatha Roy in  Assembly­a majority a command zo le zonaw inentir dinga a ti ni zani July 16, 2016 khan Chief Minister a ninaa inthawk an banna Governor kuoma a pek bakah Congress Legislature party  leader a ninaa  inthawk an ban.
    
Hi le inzawm hin  zanita Congress Legislature party meeting hunah Mr Nabam Tuki chun ama aiawtu ding le Chief minister thar dingin Pema Khandu a proposed nghal a. Meeting­a thang MLA 43 hai chun Mr Pema Khandu hi lungruol takin CLP leader dingin an thlang. CLP meeting­a hin CM hlui Kalikho Pul thangin Congress a inthawka nuor MLA hai khawm an thang.
    
CLP leader dinga thlang a ni le inzawm hin Mr Pema Khandu chun zanikhan Governor Tathagata Roy an hmupui  nghal a, sawrkarna a siem thei thu, Independent MLA 2 thangin thlawptu MLA 47 a  nei bakah CLP leader khawm thlakthleng a nita leiin Assembly­a majority a command zo le zonaw inentir kher a tul naw thu Governor an hriettir.
    
Pema Khandu hi Helicopter  tuoksiet tuoka lo thi tah Arunachal Pradesh CM hlui Dorjee Khandu naupa niin Moktu A/C a MLA dinga thlangtling a nih. Kum 2011 khan Muktu constituency­ah a pa thi hnungin khingtu um lovin tlinga puong a ni a. Kum 2005 khan Arunachal Pradesh Congress Committee ah Secretary sin a lo chel ta bakah kum 2010 khan Tawang District Committee President a ni a, kum 2014 khan khingtu um lo bawkin MLA dinga thlangtling nawk a nih.

Centre le state an thangruol  a tul: PM
New Delhi: PM Narendra Modi in zanita New Delhi hmunah Inter­State Council meeting a vawi 11­na nei huna thu a hrilnaah, ei ramin hma a sawn theina dingin sawrkar thlungpui le state sawrkar hai an thangruol thiem a pawimaw a, inthuruol taka an thawtlang a pawimaw a nih tiin a hril. Ei ram venghimna kawnga khawm state sawrkar hai chu inthuruol taka thawtlang a, thil pawimaw hai inhril tawn dinga ngenin Education tiengpang siemthat le hmasawnna ding tiengpang ngaipawimaw dingin state sawrkar tin hai an fui bawk.
    
Inter­State Council a hin a ni a, meeting­a hin Uttar Pradesh CM Akhilesh Yadav, Karnataka CM  Siddaramaiah le J&K CM Mehbooba Mufti hai ti lo India rama states le Union Territories tina CMs le Lt. Governor hai bakah Union ministers 17 an thang.

CCPA a inthawk Smriti Irani peithlak
New Delhi: Prime Minister Narendra Modi chun Cabinet Committee on Parliamentary Affairs (CCPA) a siemtha a, hi taka hin HRD minister hlui le tuta Textile minister ni tah Ms Smriti Irani chu peithlak niin tuta HRD minister a kaisang Prakash Javadekar chu laklut a nih. Tulai hnaia Union minority affairs minister­a inthawka inban Ms Najma Heptullah chu panel member a nita nawh. Law Minister thar  Ravi Shankar Prasad chun DV Sadananda Gowada hmun hluoin panel member a laklut a ni bawk. Rajiv Pratap Rudy khawm special invitee a inthawk banin SS Ahluwalia chu special invitee a laklut a ni a, PP Chaudhary khawm special invitee a laklut a ni bawk. Home Minister  Rajnath Singh inrawi CCPA­ah special invitee 3 thanga member 11 lo ni hlak chu tuhin 14 an ni tah.  Member dang hai chu Ms Sushma Swaraj, Arun Jaitley, M. Venkaiah Naidu, Ram Vilas Paswan, le Anand Kumar hai an nih.

Kashmir buoinaa thi mi 41 an tling tah
Srinagar: Jammu & Kashmir­a buoina fe mekah zanita Police han protestors hai hnawtdarna dinga silai an kap leiin mi 3 an hliemna tuorzo lovin an thi belsa nawk leiin hi buoina leia mihriem thina tuok chu 40 an tling ta bakah civil mi 16,500 le security personnel 1,500 thangin mi 3200 chuongin hliemna an tuok tah. Security Forces han Hizbul commander Burhan Wani an kap hlum dodalna leia buoina hi hung intan a nih.

A pa hringna sanna dingin a thin(liver) a pek
Varanasi: Mirzapur district­a chun nau pahni neitah Ms Veena (25) chun a pa hringna sanhimna dingin a Thin (liver) a pek a, July 1, 2016 khan Medanta Hospital, Gurgaon hmunah hlawtling taka transplant thaw a nih. A pa Prakash Tripathi (55) hi that tieng a pan pei ta a, sienkhawm hospital­a enkawl a la ni a, Ms Veena ruok chu hospital­a inthawk a suok tah. A tarpupa Sripathi Upadhyaya  chun hienganga mani pa hai hringna sanhimna dinga a thin  a pek ngam el hi ropui a ti thu a hril.

Turkey­ah Coup thaw tumna leia buoina suokah mi 190 chuong an thi
Ankara:  Turkey rama sipai pawl chun an ram sawrkar peithlak  tuma Military Coup thaw an tum leiin an khawpui Istanbul le Ankara haia chun zani hmasa zana inthawk khan inbeituona le buoina nasa tak a tlung a. Inbeituonaa hin jet fighters le bomb hai chen hmang a ni leiin mi 190 chuongin thina an tuok niin acting chief of general staff dinga ruot thar General Umit Dundar chun a hril.  Thina tuok hai lai hin Police officers 41, sipai 2, civil mi 47 le Coup thaw tumtu tienga mi 104 lai zet an thang niin a hril. Coup thaw tumnaa hin Air Force, military police le armoured units haia officers hai khawm an thang niin Dundar chun ahril.
    
Coup thaw tumtu military personnel 1,500 chuong man an ni tah tiin  senior official chun media hai kuoma a hril a. Hi buoina suoka hliemna tuok mi 1,100 chuong an um bawk niin Anadolu news agency report chun a hril. Coup thaw tum hai hin permanent chief of staff, Hulusi Akar khawm an hrentang a, sienkhawmsansuok a ni tah.
            
Turkish President Recep Tayyip Erdogan chun, Coup thaw tumtu hai hi US­based preacher Fethullah Gullen thlawptuhai an nih tiin an tum.

VAWISUN THUPUI
I thununna thuhai le i thuinhriettirhai chu ka zawm hlak a, Ka umdan po po khawm hi i hmaa um a ni sih a.  ~  Sam 119:168

Editorial: Inthla pung a la ngai

Hnam thil thaw thei, hnam ropui, mihai inza, mihai ngaisang, mihai ti tham, mihai bel nuom le enchung ni ding chun a mihriem number hi ei tam hmasa phawt a tul. Sawrkar le mihai ngaipawimaw hlawna ding khawmin a mihriem umzat ei tam hi a tul hrim hrim a nih. Manipur­ah tribe chi tum tum sawmthum chuong ei um a, hieng tribe tum tumhai hi hnam angin ei insal seng a. A hnam tam  deuhai chun hnam tlawmte rek chau hai nek chun sawrkar ngaisak khawm an hlaw lem a, inthang khawm an inthanglien a, hma an sawn duok duok lem niin anlang. Thil iengkim ela hin mihriem tam chu a lo tul hrim hrim el a nih. Hnam anga insal ve si, a mihriem number ei la tam tham naw leiin harsatna tum tum ei tuok hlak. Thil puithu taka hang thaw ei tum hlaka chu ei mihriem number in a la tlin naw leiin hlawtling nekin ei la hlawsam pei lem a ni hi!
    
India ram politics khawm hi hang ein inla, MP hau hau, mipui tamna state hai chu sawrkar thlungpui le mihai inza le ngaipawimaw an hlaw lem a; ngaipawimaw lo thei lo ngirhmuna an um tlat el a nih. Central politics a khawm a laihlum changin a fung pawimaw cheltuhai  lai an thang thei pei a nih. Indai hmarsak biel sunga states 8 um hai lai khawm a state lien tak le mipui tamna tak Assam state chun ngaisak a hlaw bik zat zat el a nih. Union Cabinet a khawm minister an changzie hlak. State chin le mi tlawmna Manipur, Nagaland, Mizoram, Sikkim, Tripura hai chun Union minister chanvo  hi ei chang inkhat hle. A vangneia siemin tuta tum hin Arunachal Pradesh chun minister chanvo an chang ve hram.
    
Ram ropuina chu a thilthawtheinaah annghat a, chu thil thaw theina chu mihriem tam le economy ropui danah an nghat nawk a nih.United States le USSR hai chu khawvela ram lien le ropui, ramdangin an ti le an intlawnsiek anni hlak. USSR a hung kawidar hnung hin USA chu a vawk lallien hlur el a, tuhin China in a hung dawt a, China dawtah Indiale Brazil hai an hung inlang nawk a. Mihriem an tam leiin Consumer an tam a, industry khawm an inthang duong thei a nih. Tienlaia ram ropui, ni tla seng lova roreltu lo ni hlak British ram khawm an ram awp hai an hung zalen hnung hin an ram a chin si, mirhiem an tlawm bawk si a, an ram economy a ropui hlei thei ta naw a, USA thuhnuoiah an kun an kun el ta a nih.
    
Ei se vela hnam  hai hi birth control le family planning ngaisak mang lo, nuhmei pakhat neka tam neia inthlapung zing anni a, a suol ding, a tha ding, a rethei ding, a hausa ding, a mawl ding, a thiem ding, a var le an vet ding tawk an indai hle a, an thang lovin ei um thei ta nawh. Khawvela hin um nawna ram an nei nawh. Khawvel hi an dap suok a, ei ni lai ram kilkhawr taka chen khawm sumdawngna thununtu (control) tak an la ni pei a nih. A mihriem tam na nana chu an lo che thei pei el a nih. Khawvela hin vai ei tihai (Hindu, Muslim etc) um nawna hmun a um di’m chu maw? Chuong khawp chun Vai hi an la tam a nih.
    
Hang sawr chin pei inla, Zohnathlak inti, Manipur a chenghai hi nuoi tlawmte rek chau ei ni a, ei mihriem number a la tlawm taluo leiin ieng ieng ei hang thaw de hlaka chu ei ring le beisei angin sawrkar ngaisak chu ei hlaw thei naw a ni hi! Unau Naga­hai leh inthuruol le thangkawpa bandh le economic blockade ei thaw naw lem chun ei bandh thaw le ei economic blockade thawin umzie a nei tak tak zo ngai nawh. Sawrkar ngaisak khawpa ei um theina ding chun inthla pung ei la ngai hle. Zohnathlakhai ta ding chun birth control le family planning tihai hi chu la ngaisak naw inla a tha el naw ding maw?
            
Churachandpur District a chun tuhin tribe pali laiin tuolsung nitin Chanchinbu ei nei hri a. Amiruokchu, a latu ding ei la tam tawk naw a, a mihriem number in a la dai tawk naw leiin a hringin hroin an dam tawk tawk a, hmatieng hun la hung um peia Chanchinbumihai hmakhuo ding hi a eng zawnga beisei ding a um nawh. Hi thil khawm hi ei suol lei le ei that naw lei hrim hrim a ninaw a, a mihriem number (population) in a la tlinzo naw lei a nih. Chik taka ei ngaituo chet chet chun tam taka inthla pung chu ei la tul hle a nih. Ei Bible chun chi tam tak thla a, hi leilung hi hluosip dingin a mi hril a. Hi thu hi Zohnathlakhai ta ding chun ngaipawimaw hle ding a nih.



Don't Miss
© all rights reserved
made with by Simon L Infimate