Responsive Ad Slot

Damna Famkim (Holistic Healing)

Sunday, July 17, 2016

/ Posted by VIRTHLI HMAR
~ Evangelist Rimson C. Zote
(Founder and President, Global Holistic Mission)

Khawvela hin natna chi dang dangin ami run mek a. Scientist le doctor hai chun natna tri um tak tak hai an hmu thar zing bawk. Ei natna hai sukdam tumin pawisa tam tak tak sengin damdawi ei fak hlak a. Taksa damna ding chun ei nei po po khawm ei hmang ral hlak. Pathienin Doctor le damdawi hmangin ei taksa natna hai ami la sukdam pek leiin ei vangnei ngei el. Psychologist hai hril dan chun ei taksa a hrisel naw chun ei lungril khawm a sukbuoi thei an tih.

Taksa natna tamtak chu pawisa in a damna ding ei inchawk thei. Nisienlakhawm, pawisa a inchawk thei lo chu thlarau le lungril natna hai hi a nih. Mi tam tak chun taksa damna tieng hi ei ngai pawimaw hmasa hlak a. Pathien ruok chun sungril tienga natna chi dang dang hai hi a ngai pawimaw hmasa ve thung. Chun, ei taksa khawm A rawng ei bawl theina dingin a ngai pawimaw chau niloin thienghlim taka um dingin A mi dit. 1 Thessalonika bung 5 chang 23 chun hieng hin a hril: “Chun, inremna Pathien ngei chun, in pumin sukthieng raw se cheu; chun, in thlarau le, in lungril le, in taksa chu ei Lalpa Isu Krista a hung pha chun, sawiselboa a puma humhimin um raw se.” Holistic hi ‘whole’ tia inthawka laksuok a ni a, a umzie chu a pumin/rengin tina a nih.

Pathienin ieng leia ei pumin (thlarau, lungril, le taksa) sawiselboa humhim tlat dingin A mi dit am? Genesis tieng zuk kir nawk vat ei tih. Adam le Eve chun Pathien thu an awinaw tlat leiin Pathien leh inpawl thei talo in an um (spiritual death). Adam le Eve thlahai po po chu suol in ami fang suok vawng tah a. Rom bung 3 chun, “Tukhawm mi fel hrim an um nawh. Pakhat bek khawm an um nawh. Tukhawm a hre thiem hrim an um nawh, Tukhawm Pathien zawng hrim an um nawh… An mithmuah Pathien trina (fear) hrim a um nawh…” tiin a lo hril a nih. Khawvel hi tawngsephurna ram a lo ni tah. Felna le thratna dan a Pathien ram lut thei an ta nawh. Hmangaina le felna le dawtheina hai hin iemani chen chu ami thuoi thei hlak. Sienkhawm, Pathien ei suklawm zo ta nawh asan chu Pathien Thlarau le ei thlarau an zawm ta naw tlat lei a nih.

Amiruokchu, Pa Pathien hmangaina le lunginsietna le zangaina’n ami la hnawtzui ran a. Chu lunginsietna le zangaina chu Isu kristaa a hung inlang tah. Pathien ropuitak raw sen. Ieng leia Pathienin ami hmangaiin ami la hnawtzui am ana? Pathien angpuia siem ei ni tlat lei a nih! Chuongchun, Lal Isu chu kum 2000 liem tah khan mi suol hai tadingin kros a hemde in a um a, ni thum ni’n ropui takin a thonawk. Ringna’n a thinaa ei thi ve tah a, a thonawknaa ei tho ve tah. Pathien ropuitak raw sen. Kros a khan ami sandam a, thonawknaa khan thilthawtheina ami pek. Chu chu Thlarau Thienghlim thilthawtheina a nih or Thonawk krista thilthawtheina ti khawmin an dik tho. Thilthawtheina boin hringnun thar nei thei a’n nawh. Vawisunni chen hin mi tamtakin sandamna an la chang zing asan chu Lal Isu hi zani, vawisun, le chatuon chena danglam ngailo a ni tlat leiin.

Sandam tah(Saved) ti le sukdam tah(healed) ti hai hi New Testament-ah an hmang pawl hlak a. Sandamna hin sukdamna ti an entir chang a um. Krista hliemna a chun damna famkim ei chang tah (Isai 53). Kristan misuol a sandam hai kuoma chun Thlarau ra (Fruit of the Spirit) le Thlarau Thienghlim thilthlawnpek hai (Gifts of the Holy Spirit) a pek hlak. Thlarau ra chu pawisaa inchawk thei ani nawh. Hi khawvela zawng chi ani bawk nawh. Thlarau ra chu hmangaina dam, hlimna dam, inremna dam, dawtheina dam, ngilneina dam, thatna dam, ringumna dam, thuhnuoirawlna dam, insumthei na dam a nih(Gal. 5:22,23). Chun Thlarau Thienghlim thilthlawnpek hai chu varna, hrietna, ringna, sukdam theina, thilmak thawtheina, thuhril theina, thlarauhai hriet dik theina, tawng hrietlo thuhril theina, tawng hrietlo hai hrilfie theina a nih (1 Kor.12:8-10). Thlarau ra le Thlarau Thienghlim thilthlawnpek hai hi ei chak ngawi ngawi hlak ding a nih. Ei sinthaw izirin Pathienin ringtuhai fethlengin a hmang hlak. A taluoa hmang thei a nih. Amiruokchu, inchuktirtu Thlarau Thienghlimin ringtu hringnun chu in balance taka hmang dan a min chuktir hlak.

Krista kross naw chu suong ding dang ei nei nawh. Asan chu Hremhmun hi mihriem hai tadinga Pathienin a siem ani naw a, Setan le vantirko suol hai tadinga a siem a ni lem. Krista ringtu le zuituhai chun chu hremhmun chu ei pum pel tah/ding a nih. Thlarau ngei chun, eini thlarau leh, Pathien nauhai ei nih ti a min hriettir hlak (Rom 8:16).Tiemtuhai Kristan ei pumin mi sukthieng sienla. Ei thlarau, lungril, le taksa hi ama tadingin inhlan thar ei tiu. Mimal, sungkuo, kohran (Building) le ministry dang dang hai hin Lal sin hi thaw mup mup ei tiu. Ei tlandan in angnaw sienkhawm ei thiltum (goal) ruok chu an ang seng anih. Thlarau bohmanghai sansuokna sin chu thaw mup mup ei ta. Chu chu ei lawmna le ei beiseina a nih. Nang le nang in en pha chau nawk hlak I tih, Lal Krista I en sung ruok chu hrat takin um hlak I tih. Chuleiin, krista en zing ei tiu. Thlarau Thienghlim pawlna, mei, thilthawtheina, le sukdamna chu in kuoma um thar raw sen. Lal Isu hmingin. Pathien ropuitak raw sen.
Don't Miss
© all rights reserved
made with by Simon L Infimate