Responsive Ad Slot

Europe Khawmuolpuia League Cup dang danghai Result

Sunday, May 22, 2016

/ Published by VIRTHLI

Virthli Sports, 22/5/16: Liemtah Inrinni zan khan Europe khawmuolpuia ram dang danghai in League Cup final an inkhel tawl a, inkhel chanchin tawite te in hei thlir thuok thuok ei tih.

FA CUP (England)
Crystal Palace 1-2 Manchester United AET
Cry: Puncheon 78
United: Mata 81, Lingard 109

Kum 2013 a Sir Alex Ferguson a chawl anthawka a vawikhatna dingin le Red Devils a enkawl hnunga Louis Van Gaal ta dinga nopui a dawm hmasatakna dingin Manchester United chun hun pek sa ah, a chinlai anthawka Manchester United a inkhel tah, Jese Lingard goal thun mawitak hmangin Crystal Palace hai an lo hne tah anih.

Hieng hin Manchester United chun Arsenal hai record ni ruolpuiin vawi 12 ve ve FA Cup an dawm tah anih.

COPPA ITALIA (Italy)
AC Milan 0-1 Juventus AET
Juv : Morata 110

Rome khawpuia Stadio Olimpico a inkhel ah hin Milan hai hin European Competition a thang theina dingin hrat ngei ngei a tul a, goal thun theina huntha tam tak nei hai sienkhawm an bawpel pei leiin an thun theinaw ani deu tak. Hun pangngai ah an inhnetawk leiin hun pek sa an ni a, Old Lady hai hratna dingin Juan Cuadrado ball cross chu Alvaro Morata in awlsam takin alo suk lut anih.

An hratna le inzawm hin Juventus chun a zawna kum hni sunga Serie A le Coppa Italia la thei umsun an nih. Milan hai ruok chu a zawna a vawithumna dinga European Competition an inkhel theinaw na ani bawk.

COUPE DE FRANCE (France)
Marseille 2-4 Paris Saint Germain FT
Mar: Thauvin 12, Batshuayi 87
Par: Matuidi 3, Ibrahimovic 47,82, Cavani 57

Tukum nipui huna contract tawp ta ding, kum 34 mi Swedish pachal Zlatan Ibrahimovic chun a thatzie ala suklang sunzawm pei a. Goal pahni thun in a ruolhai goal thun ding vawikhat a siempek bawk. A ta ding chun kum chu nambar mei mei anih ti a sukchieng hle.

Vawizana Paris khawpui Hmar tienga Stade de France hmuna hratna an chang le inzawm hin, France rama football inelna a nopui dawmthei pathum umhai hieng; Ligue 1, Coupe de la Ligue le Coupe de France hai hi a zawnin kum hni sung PSG hai hin an lak antah.

DFB POKAL CUP (Germany)
Bayern Munich 0-0 Borussia Dortmund AET
Penalty Shootout: Bayern 4-3 Dortmund

Berlin khawpuia German football khawvela club thatak hai pahni inkhel hi an inhnetawk hle a, tulaia striker tium le tha pawl tak a an hril Lewandowski le Aubameyang ha'n an huntha nei ah goal an thun thei naw ve ve a. Hun pek sa ah an inhnetawk leiin a hratlem zawngna dingin penalty shootout pet ani a, Bender le Sokratis in an thun thel leiin Die Roten ha'n hratna an chang antah.

Season thara Manchester City zawm ding Pep Guardiola hin Bayern Munich a kum thum a cham sung hin Champions League lakpui naw sienkhawm, Bundesliga title vawithum, German Cup vawihni, FIFA Club World Cup le UEFA Super Cup hai vawikhat ve ve a lakpui anih. BVB hai ruok hi chu season li sung vawikhat khawm nopui an la dawm naw anih. An vangduoi hle.


Don't Miss
© all rights reserved
made with by Simon L Infimate