Headline
Mi tam tak ta dinga malsawmna intluntu Rev. (Dr.) Rohunga Pudaite ruong ropui taka inthlaliem a ni tah
CCPUR: Oct. 10, 2015 a USA a muol lo liemtah Pu, Rev. (Dr.) Rochunga Pudaite chu ama duthusam ang ngeiin Oct. 24, 2015 ni khan India ram, Sielmat, CCPurah a ruong sunna le vuina programme chu ropui takin Sielmat Christian Hr. Sec. School Campus le PMS Bungalow, Sielmat hmuna hai nei a nih. Hi hunser a hin kohran tum tum, hnam tum tum le sawrkar tienga thuoitu le hotu tam tak an fekhawma hieng hai lai hin DC,CCPur; SP, CCPur, Chairman, ADCC; Vice Chairman, ADCC, MDC le ExMinister le mi dang dang an thang a. State puotienga inthawk le USA a inthawk khawmin mi iemanizat an thang bawk.
Mi tam tak ta dinga malsawmna a lo nina leiin suntu le ngainatu a hau hle a, hun hmang nuom an tam leiin5:30 PM velin vuina hun Rev. Lalbiektluong President, EFCI in PMS Bunglow hmunah a nei. Chu zo chun a thlan sunga sielut a ni hnungin ama ngainatu haiin an enna hun le thlalakna hun hawng a nih a. Zan inthim hnung khawm khan mitam taka mathlan hmunuom hi an la tam hle. Pathienin a chawimawi leiin hieng anga ropui mithi sunna le vuina programme hi Manipur a tlangmi le a rama cheng hai lai hriet ding a la vang hle. Mipui sang tel an fekhawm a nih.
A ruong thlana vui hma hina thlan khur ngir huolin HYA GHQ aiawin HYA Rengkai Branch chun hlado insamin, Mihrang Pasaltha Pu Rev. (Dr.) Rochunga Pudaite inzana insang tak pein Gun Salute hun an hmanga, Silai vawi 36 lai mi 36 in an kap puok a nih. A ruong chunga ama ngainatu le suntu kohran tum tum, khawtlanga pawl tum tum, hnam tum tuma thuoituhai chun ngaisang um, inpakum le inpam um an ti hle thu le an sun takzet thuhai an hril a, thu ziek mawi le tuomna puon chi hran hranin a kuong an inkhum tawl. Hi huna hun hmangtu tam tak chu mithli leh hun an hmang a nih.
A nuhmei Pi Rimawi Pudaite chun hi hun a hin a pasal Pu Rochung a hringnun intawmpuitu a ni chu vangnei an ti hle thu a hril a, an nauhai Dr. Paul Pudaite le a nuhmei chun mipui fekhawm hai le an Pa sunpuituhai po po an lawman chibai an buk thu a puonga. Paul chu foreign inzin a rem naw leia hi hun a thang theilo ani thuhai a hrilsa bawk. Pu John Pudaite chun lawm leia mittui far zawi zawiin hun a hmang ve huna chun Ka pa chu inzin mitak tak a nih a, US a State popo a sir hman thu, an zinna rama inthawk chatuon (permanent) a aumna ding a pan ta thu, Pathien ropui raw se tia hrilin a’n lawi hmasa hai hlim deuin an um a, Chanchintha (BFW) rawngbawlna leia chatuon hringna nei hai ruoltha tam deu a Pa’n a nei ngei a ring thuhai a hril. A pa sunpuitu le ruong chunga programme buotsai dan le an hming lam senglo hai kuoma hlawmum a tithuhai an sungkuo aiawin a hril. Rev. Rohminglien Pakhuongte Vice President (Edu), PMS Conductor chun ama hi hotu nekin thuoitu a nih. PMS in a suong hle thu, khawvelin hrietpui sien a nuom thu le Khawvela khawnvar var ang a nih tiin a hril.
President, HSA GHQ le President, Hmar Inpui chun hi huna hin tuta HSA Campus, Rengkai, CCPur hmuna Tribal Hostel chu Pu Dr. Rochunga Pudaite chawimawina le hrietzingna dingin Dr. Rochunga Pudaite Hostel ti a ko a ni ta ding thu le sawrkar tienga khawm DC, CCPur in iengkim hi Hostel le inzawma sukfel tul le la bak hai khawm sukfel diem a ni ta thuhai an hril. Pu Lalthlamuana Hmar President, HSA GHQ, inrawinain HSA JHQ le Branch/Block tum tum17 hai aiawin Hmar Thangsuo Puona a ruong hi inkhumin Tawnlairang le Hmar Thangsuo Puon lukawm hai an inhlan. Pu John Pulamte President, Hmar Inpui chun Hnam Pa ti phu hlie hlie, hnam tinlai thuoitu tlin an pieng hlak a, ama Pu, Rev. (Dr.) Rochunga Pudaite hi ning a tih, a thi chena ka sawl ka kham ti lova hmalatu, a ruong inzalna USA thlang lova a piengna India a thlangna chu ngaisang um a ti thua hrillang sa bawk.
Hi hun a hin Sielmat VA chun a khuo a School, Hospital, Bungalow, Lampui (40/50 Lakhs vel man ding zet a thlawna a pek), ama leia Sielmat khuo zau, Prayer Mountain ram a pek, Thlanmuol ding ram a khawi le pek le thitha an khuo ta dinga a thaw pek hai leia an lawmthu mipui hmaah an puong bawk.
EFCI Kohran chun ama sunna le inzanain an kohran umna taphawtah EFCI Flag chu a ngul chan vein an khai a nih. A ruong vuina hunser a hin hun hmangtu an tam hle a, ama inzana le sunnain kohran le hnam tum tum a inthawka Pawl tum tum hai chun thuziekmawi le ralna le tuomna puon chi tum tum le sunpuina thuhai a thi ni a inthawkin chat lovin an inzawt tawl a nih. A ruong chunga inpakna hla mi dang dang a naunu Mary Lalsangpui, India Children’s Choir Alumni, Pu James Songrolal Songate in ama puol lieu lieua hla a phuok saktu Tv. Vincent Hekte, Nk. Lalengvari Sinate le Pu James Pakhuongte (Group Song) le Nation Wide Gospel Music Festival Choir haia inthawk “Halleluiah Chorus”ngaithlak a ni a, thlanhmun ah EFCI Choir a inthawk hla ngaithlak a ni bawk.
Pu Rochung kha a damlai khan taksa le thlarau ta dingin thiltha tam taka thaw a. Ama ang kha thangthar lai hin an hung suok nawk nuom a um takzet. “Inchukna hmanga khawtlang nun thlakdanglam (Tranforming the society through Education)” ti a thupui a ni ang ngeiin ei rama inchukna tienga a hmalakna leiin mi tam takin khawvel eng inhawi takin ei chen thei pha a nih.
All NCC cadets CCPur khawmin hi huna hin inzana salute pein par inhlanna an nei.
TKSU GHQ Admn. Office hawng
CCPur: Mr Thangjang Haokip, President, KIC chun zani 7:30AM khan KIC Complex, Tuibuongah Thadou Kuki Students’ Union GHQ Administrative office a hawng a, Rev. D. Jangkholam, Executive Director, ECA, ECCI in Pathien kuoma tawngtainain an hlan. Hi huna hin Lunminthang Haokip, IAS, DC/CCPur le Student organisation tum tum thuoitu hai an thang.
Thangjang Haokip chun, society le ram le hnam ta dingin hrat lai le student ni huna nasa taka hma lak a pawimaw thu a hril. DC/CCPur khawmin hi huna hin thu a hril ve.
Martyrs ralna Rs. 50,000/ a lut
CCPur: Zanikhan District Hospitala Tribal Martyrs hai ralna, hliemhai thangpuina le thingpui man dingin mimal le organisation 6 han JPO kutah Rs. 50,000/; Thing tel 300; Maibal 10 an inhlan. A petu hai chu EBCC Enpum in Thing tel 300 le maibal pum 5; S. Ginzalian & family, Bungmual maibal 5; GBA, Game Village, Imphal Rs.900 le JPO’ ta dingin Rs.100/ an pek a; All Tribals Employees & Workers Union, NHPCL, Loktak Power Station in Rs.35,000/; NLPCY, PCI (R) Lamka in Rs.5,000/ an nih. Chun, Oct 14, 2015 khan Hmar Women Assn.Thenmuol Branch in JPO’ kutah Rs.10,000/ le Oct 15, 2015 in BYF Lungthul (D) in Rs.5,000/ an inhlan bawk. Oct 26 (Monday) –a Dist Hospital a morgue a thingpui inlumtu ding YMA an nih.
Delhi Police Appl. Form lak thei
CCPur: Delhi Police hnuoia temporary Constable (Executive) Male/Female lakna dinga Application form SP/CCPur office a hungtlung belsa a, a dit hai chun November 10, 2015 chenin SP, CCPur Officeah a manbo(free) in lak le peklut thei ning a tih.
UNESCO Club Manipur hawng
Imphal: Zanikhan Imphal Hotel, Sangai Hallah UNESCO Club Manipur chu officiala hawng a nih. Hi hun hi Dhirendra Bhatnagar, president, World Federation of UNESCO Clubs and Association, Headquarter, Paris; Kanarjit Kangujam, Director, UNESCO Club Manipur, Dr. Moirangthem Nara, ExMinister, Art & Culture, govt of Manipur, L Ibomcha, Dornacharya awardee 2010, Prof RK Ranjan, Convenor, INTACH, Manipur Chapter (Heritage), sharatchand Thiyam, shahitya Akademi Awardee 2006, Prof Rajmuhon, Department of Chemistry, Manipur University, Dr. Dhanabir Laishram, Social Scientist, Johnson Elangbam, President, United Committee Manipur han an uop.
SMDC in Market complex bawl tum an dodal
Imphal: Tombisana High School Management Committee chun hi School complexa Market Complex sawrkarin bawl a tum chu an dodal thu zanita Manipur Press Club, Imphala press conferenceah Committee President Rajen Ayangba chun a hril a, education hi thil pawimaw a ni leiin sawrkar chu market complex bawlna ding hmun dang zawng dingin a ngen. Tombisana high School hi Manipura School upa tak pathumna, British hun laia lo um ta a ni leiin suksiet neka vawngthat lem ding a ni thu a hril.
Loktak Day hmang a ni ding
Imphal: October 27, 2015 khin Loktak Lairembi Lampak, Thanga hmuna 26th Loktak Day 2015 hmang ning a tih tiin PDA Chairman MLA T. Mangibabu chun zanikhan chanchinbumihai kuoma a hril. Loktak Dil Manipur mipui hai ta dinga pawimawna lientak a neizie, mi tam takin fakzawngnaa an hmang a ni thu a hril. Loktak Day hi kum 1990 a inthawka hmang tan a ni thu Loktak Day Celebration Committee President H. Sanayaima chun a hril.
Dept. tam takin UC an pek thei nawh
Imphal: Manipur sawrkar hnuoia department iemanizat hai chun development projects 4570 crores sengna sin thawna Utilization Certificates (Ucs) an peklut thei nawh. Utilization Certificates pending tamna tak chu Tribal and Hill Affairs niin 45% a ni a, Education (s) 16%, Rural Development & Panchayati Raj 9%; Arts and Culture 5%; MAHUD 3% an nih. Finance Department chun hieng department hai chu Oct. 31, 2015 chena Accountant General (A&E), Manipur kuoma UCs pelut dingin an hriettir. Arts and Culture le MAHUD dept. incharge minister hi CM le Finance minister ni bawk O.Ibobi Singh a nih.
Byelectionah CPI an ngir naw ding
Imphal: Communist Party of India (CPI) Manipur State Unit chun November 21, 2015a Thangmeiband le Thongju Assembly Constituency haia byelection hung um dinga hin candidate an neinaw ding thu zanita Irawat Bhavana an officea press conference huna M. Nara Singh, Secretary,
CPI Manipur chun a hril.
NCHAC CEM thar dingin Niranjan Hojai
NC Hills: Zanikhan BJP member le Dimasa helpawl hotu hlui Niranjan Hojai chu North Cachar Hills Autonomous Council (NHAC) Chief Executive Member (CEM) thar dinga thlangtling a nih. Tulai hnai ela Congress CEM Debojit Thoasen inrawinaa Congress members 9 han BJP an zawm leia Governor in Council Special Assembly ko dinga an hriettir anga special assembly neia Mr Hojai hi CEM thar dinga thlangtling a nih. NHAC a hin members 30 an um a, BJP in member 18 an nei a, vote laknaah Independent candidates 6 hai votes leh a rengin votes 24 a hmu a, Congress nominee Mahendra Kempai chun vote 3 chau a hmu a nih.
Scrub typhus leiin Miz. ah kum 4 sung mi 31 an thi
Aizawl: Mizorama chun rannung se leia natna ‘Scrub typhus’ invawi kum 20122015 sung khan 715 an um a, hienghai laia 31 an thi niin IDSPa entomologist Lalfakzuala Pautu chun a hril. Tukum sung ringawt khawm Scrub typhus invawi mi 113 an um a, hienghai laia 7 chu an thi ta niin a hril bawk. Kum 2012 khan hi natna hi mi 252 in an invawi a, mi 16 in an thipui a, hienghai laia 14 chu Aizawl district le mi 2 hai chu Champhai district mi an nih. Kum 2013 khan hi natna kai 175 an um a, hi kum hin mi 4 an thi a; kum 2014 khan mi 179 in an kai a, hi laia mi 4 an thi a nih.
Entomologist Lalfakzuala Pautu chun,scrub typhus hi infection leia khawsik insang thut “Orientia tsutsugamushi” natna hrik in an um tir a nih tiin a hril a, kum 1899 khan Japan rama chieng taka hmu le hrietsuok a nih.
ATM pawisa tlanhmangpuitu mi 5 man
Guwahati: Zani hmasa khan Guwahatia Automated Teller Machine (ATM)a pawisa thun ding Rs. 1.8 crores tlanhmangpuitu mi 5 hai chu Police han an man a, Kamrup (Guwahati) Judicial Magistrate hmaah inlangtir an ni a, Court chun ni 7 sung thu indawn dinga Police Custodya la um phawt dingin an chungthu a rel. Mana um hai lai hin ATM sum ding phurtu motor driver khawm a thang. An kuta inthawk Rs. 1.15 crore hmu a nih tiin Guwahati Police Commissioner Mukesh Agarwala chun a hril. Mana um hai chu driver Rumud Barman le an thlawppuihai Akon Barman @ Boga, Kanak Barman, Paban Barman le Madan Barman hai an nih. Brink’s Arya India Private Limited motor hmanga ATM tum tum haia pawisa thun dinga fe an ni a, security guard thanga staff 3 han Ganeshguri hmuna HDFC Bank ATM a pawisa thun an tu m laia pawisa hi an tlanhmangpui a nih.
President in SN Akademi awards an hlan
New Delhi: President Pranab Mukherjee chun zani hmasa khan dancers, musicians, traditional folk artists thangin artistes 40 hai kuomah Sangeet Natak Akademi Awards le fellowships an hlan. Folk artists/traditional artist hi award inhlana um hai lai hin K. Shanthaoiba Sharma (Thangta Manipur); Thanga Darlong (folk music Tripura) hai khawm an thang.
Carnatic musicologists SR Janakiraman, Film director MS Sathyu, musician Vijay Kumar Kichlu le Tulsidas Borkar hai chu Akademi fellowships inhlan an nih.
Musica Sangeet Natak Akademi award dawngtu hai lai hin Manipur mi N. Amusana Devi khawm a thang.
Pakistan silai kap leiin mi 1 a thi
Jammu: Zani hmasa zana inthawk Pakistan sipai han Jammu and Kashmir, international border, Sambha sector hmuna India post hai silai le bomb hmanga nasa taka an hung kap leiin civil mi 1 an kap hlum bakah midang 4 an hliem. BSF hai khawmin an kaplet ve niin ei thu dawngna chun a hril.
Chun, zanikhan Army han Jammu and Kashmira Rajouri districtah bomb kg. 2 a rik le detonators 5 dapdawkin an man.
Thamna Rs. 1500 latu Revenue official man
Bundi: Rajasthana Keshoraipatan hmuna thamna latu revenue official Shyojiram Meena chu thamna Rs. 1500/ a lak leiin man a nih tiin Anti Corruption Bureau (ACB) Circle InCharge (CI) Neeraj chun a hril. Shyojiram Meena hin mipakhat Mahaveer Meena kuoma inthawk ram chungthua hming thlengna dingin Rs. 1500 a ngen nia intum a ni a, hi le inzawma ACB han chang kama thamna sum a lak laia an man a nih.
LAHDC electionah BJP in hratna an chang
Leh: Jammu and Kashmira member 26 umna Ladakh Autonomous District Development Council (LAHDC) Leh electiona result puong a ni a, BJP chun seat 17 an lain party mala hrat tak an nih. Hi Councila seat 22 chel mektu Congress chun seat 5 an lak a, J&K National Conference (NC) in seat 2 le Independent in seat 1 an lak a nih. BJP in LAHDC electiona hratna an changna chungthuah PM Narendra Modi chun mipui hai chunga lawmthu a hril. Lok Sabha election nuhnung taka khan Ladakh Constituencya hin Congress candidate hnebanin BJP in hratna an lo chang ta bawk a nih. Kum 2010 a LAHDC electiona khan BJP chun seat 4 chau an lak a nih.
ASI Bora thina thuah mi 2 man
Diphu: October 20, 2015 nia Police SubInspector Hirany Bora that a nina le inzawmin Diphu Police chun mi pahni Konkham Shyam @ Simon Phangcho s/o Sarthe Teron le Joy Sing Teron of Bagmari village hai an man. Bora hi August 19, 2015 –a Diphu hmuna inthawka inhmang a ni a, Bora hi an that ngei a ni thu an puong. Hieng mi pahni hai chun, Bora hin Sarthee Theron nuhmei chu Police stationah a ko vet hlak baka a sawisak hlak niin an hril.
An motor inruk Rs. 16 lakh manhu leh mi 2 man
Bhopal: Pasal pahni Irfan (25) of Gandhi Nagar le Rashid Khan (30) of Hoshangabad h ai chu an motor inruk SUVs 2 le Bikes 4, Rs. 16 lakh manhu leh man an nih. Irfan le Rashid hai hi jaila lo intang khawm, an jail intangnaa ruolthaa insiem le jaila inthawk an suok huna motor inru dinga inthuruol hrim an nih. Chun, an motor inruksa inchawtu Sachin Patel (32) of Raisen le Saurabh Singh (31) of Jabalpur hai khawm Police han an man. Rashid hi tuolthatna casea jaila lo intang ta le Irfan hi motor inrukna leia jaila lo intang ta a nih.
--------------------------------------------------------------------------------
VAWISUN THUPUI
Kan damsung nihai tiem dan min chuktir la, Varna lungril kan nei pha hielna dingin. Sâm 90:12
Editorial
Mihrang fam hai hniekhnung zui dingin
Pathien thilsiem tinreng hai hin hunbi an nei a, tap hun a um ang bawkin innui hun a um a; lawm hun a um ang bawkin lungngai hun a um hlak; thinghna khawm inno le hring dupin an hung indersuok a, an hunbi a tlung huna tawlin an til tla nawk hlak. Hiengang hin mihriem hai khawm ei nih. Nuhmei le pasal inkara hmangainaa insiengin ei hung pieng a, hung inthanglienin khawvela ei hung cheng a; sienkhawm Pathien hun ruot ei hunbi a tlung huna chun pila siem ei ni ang bawkin pilah ei kir nawk hlak. Chuongang chun khawvela hin pasaltha le mi huoisen, mihrang tam tak hung piengin fammuol an lo liem ta a nih. Sienkhawm hna hlui chu hna tharin a hung thlak hlak angin pasaltha le huoisen an hung suok nawk hlak.
Thanghlui mihrang tam takin fammuol an mi liem san hnunga thangthar pasaltha, ram le hnam hmangaitu, Krista sipai tha Rev.Dr Rochunga Pudaite chun October 10, 2015 khan chatuon ram mi lo inlawisanin zanikhan ropui takin a ruong ei vuiliem nawk ta a, ei sunin ei inpam takzet a nih. Sienkhawm Pathien hun ruot a chunga hungtlung chu mihriem hai dang ruol a ni sinaw leiin inro le thlakhla tak pumin ei inthlaliem a nih. A khuolzinna khawvela kum 88 a cham sunga ram le hnam ta dinga a thilthaw le, thlarau bohmang hai sandamna dinga Bibles for The world fethlenga a rawngbawlna kha a ropui takzet. Khawvela a mihriem chanpui han pasaltha thangsuo chawimawina leh ropui taka ei inthlaliem angin Van Jerusalem thara khawm ropui takin lo tuok ngei an tih.
Aw leh, Krista pasaltha, ei mihrang fam lo chang ta hai nun ei thlirkir chun, Pathien ram ta dinga thahnem an ngai tluk zeta hnam hmangaitu le hnama chieng an an lo ni vawng, chu chu thangthar Kristien hai ta dinga inchuk le entawn ding pawimaw tak a nih. Pathien hnam thlang Israel hai sala inthawka thuoisuoktu dinga Pathienin a ruot Mosie dam kha, Lal ina seilien nisiin a nina le a hnam hmangaina bo der lova a um kha thil mak tak pakhat chu a nih. A hnam chanpui san dinga a pensuok ngam el kha huoisen tak a nih. Lal ina du du faa, nuomchen nekin Pathien mi hai le rimsik a thlang lem a, Israel mipui hai Aigupta sala inthawk thuoisuoktu a hung ni a nih. Ama ngirhmuna khan hang um inla eini rawi mi tam tak chun mani chan that le nuom chenna ding chun mani mi le sa hai inphatsan sawng el pawitina ei nei hmel nawh. Chuong lai zingin a hnam chanpui Hebrai mi a sana Aigupta mi vaw hlumin Lal ina nuom chenna thlakhla lovin a tlanhmang dai el a ni kha!
Eini laia ringtu hmasa, Krista pasaltha le ei hla kungpui fam lo chang ta hai khawm kha Pathien an hmangai thluk zeta hnam hmangaitu, hnawchepna, elrelna, hmusitna le do le ral kara khawm mani hnam invawina lien tak neia huoisen taka thu le hla lo siemtu; midanghnamdang ta intawmpui lo khawma ei hun tawng ang peia hmang le sak ding thu le hla ropui tak tak siemin literatureah foundation nghet takin an mi lo rem pek a; chu zara chun thangthar han midanghnam dang hai ruolin kalbi ei rem thei a nih. Hi taka inthawk hin Pathien mi indiktak han ram le hnam an lo invawi zie le hmangaina an lo nei lien zie chieng takin an lang a nih. Mi thenkhat Pathien mia inngai han hnam ienga ngai lova ei sirde el dam hi a lo indiknaw zie, hnama mi siemtu Pathien a ni leiin mani hnam hmangai le invawi ding ei nizie thangthar han hre nawk zuol inla nuom a um takzet.
Hnatawl an til a, hna tharin a hung thlak tanaw chun, chu thing le ruo chu a thi amani a ni ngei hlak. Hiengang hin mihrang, mi huoisen tam tak fammuol lo liem ta hai hniekhnung zuitu ding chu thangthar le thang la hung thar pei ding hai hi ei nih. Ei mihrang hai sulhnung sui le an hniekhnung zuitu ei um tanaw ani chun ei ram le hnamin boralna lampui a hraw tina hung ning a tih. Hieng a ni lei hin mihrang fam lu ei sunnaa hin Pu Ngamhaulien tawngkam hawin ‘hnam hmangaina le invawina nei puma Pathien rawngbawltu ei ni seng theina dingin mitin lungrilah ra insuo mawl raw seh.
