Responsive Ad Slot

Hmasawnna Thar | 09 October, 2015

Friday, October 9, 2015

/ Published by VIRTHLI
Tuolsung Headline
YPA in Phungzathang Tonsing le Vungzagin Valte ensan dingin an rel
CCPur:Young Paite Association (YPA) GHQ inrawinain Oct. 11, 2015, 11:00AM khan Hiangtam Lamka YPA GHQ Hall­ah Block le Unit tina thuoitu han meeting an nei. Hi huna hin Manipur Assembly in August 31, 2015 nia Bill 3 an passed le inzawma JAC Camp:CCPur;  ATSUM le pawl tum tum han tlangmi MLA hai public boycott an puong thlawpin Bill 3 han tlangram le a mipui hai chunga harsatna an tlun ding a nih ti hrietnaw tehlem thaw a, mipui palai MLA hai an dem thu an puong bakah Bill 3 hai leia nuorna a fe pei ding thu an puong.
   

Hi le inzawm hin tlangmi hai sukchimit tumna Bill 3 hai thlawp a, an mi le sa hai zawrtu YPA Member Phungzathang Tonsing, Health Minister le Vungzagin Valte, Parliamentary Secretary hai chu YPA danbu (by law) Pl 2015 Article No.8 Part II (iv) dungzuiin thuthar um nawk hma khat ensan dingin meeting chun an puong. Ensan an ni sung siet le that an tuok khawmin YPA in thlawpin a thangpui naw ding tiin an rel niin  thusuok an siema chun an zieklang.
   

Chun, Mr Thangliansiam s/o (L) Thonsong of College Veng, New Lamka ringhla um taka a thina thuah tuolthattu hai YPA chun nasa takin a dem a, thuneitu hai chu an rang thei anga tuolthattu hai man suok a, an phutawk hremna pe ngei dingin an ngen.
   
Chun, nuorna ‘people movement’ fe mek le inzawmin mimal le pawl intum thei ninaw ni a,  hun liemta haia social media hmanga mimal tum bik neia vauna siemtu hai an dem thu puongin hmatieng hiengang thil tuok an um nawk chun YPA in an chungthu ngaituo a ta, tukhawmin sawisel thei naw ni hai tiin meeting chun an rel bawk.

JPO kuta zanikhan ralna Rs. 1,09,200/­ a lut
CCPur: District Hospital­a Martyrs hai ralna dinga JPO donation centre­a chun zanikhan mimal le pawl 6 haia inthawk ralna Rs.1,09,200/­, Maibal pum 32, thing tel 28 a lut. Zanita JPO kuta ralna petuhai chu­ B.Salvaphai Village,(Presbyterian) Maibal pum 28 le Thing tel 28; Langgin Tombing of Bungmual maibal pum 4; Eimi Sepaih Officer Rs. 1 lakh; Teijang Area Women Fasting Prayer Team, Sadar Hills  Rs.5,000/; Christa Baptist Local Church, B.Phaihel, Sadar Hills Rs.1,000/­; Lenlai FB/WhatsApp Group in JPO ta dingin Rs.3,000/­ le gate donation/reception­a hmu  Rs.200/­ a rengin  Rs.1,09,200/­  a nih.
Eimi Sepaih Officer



Fogging la kap zawm pei ding
CCPur: Dengue natna laka invengna dinga NVBDCP/CCPur in khuo tum tum, a bikin khawpui sung haia Dengue natna phurtu “Aedes mosquito’ sukremna dinga fogging an kapna sunzawm pei a ni a, CMO/CCPur chun zanikhan Imphal­a inthawk Fogging thawnaa hmang ding  Petrol, Diesel le damdawi hai a va lak. Fogging kap hi ruosur lai kap thei a ninaw leiin khuo a hung that huna kap sunzawm ning a tih tiin Dr Thangchinkhup, CMO/CCPur chun a hril.
   
Hieng laizing hin NVBDCP/CCPur hnuoia Dengue monitoring Cell chun dengue invawi ringhla mi 30 hai thisen zanikhan an lakkhawm nawk a, Oct. 9, 2015 hin Imphal­ah enfel dingin thawn ning a tih.

JAC kutah khuo tum tuma inthawk Rs. Rs.1,19,000/­ a lut
CCPur: JAC Finance Sub­Committee in  In tina Rs. 100/­ le a chung tieng dawl dinga a ti angin sum a lut zing a, zanikhan Khuo 17 haia inthawk Rs. Rs.1,19,000/­ a lut nawk. Zanita ralna sum pelut hai chu Tuibuong Block hnuoia K.Kotlien Rs.2,300/­; Thanlon block­a Khoken Rs.1,100/­; Tuipiphai Rs.2,600/­; Saite Rs.1000/­; Muikot Rs.500/­ ;  Tipaimukh block­a inthawk Lungthulien Rs.27,500/­; Parvachom  Rs.15,000/­; Leisen Rs.17,400/­; Talan Rs.4,100/­; Serhmun Rs.1,900/­; Pherzawl Rs.24,100/­; Taithu Rs.14,000/­. Henglep block –a Mualdak Rs.2,400/­; Kungpinaosen  Rs.2,300/; Lamdan Kuki Rs.1,100/­; Bongmol  Rs.1,200/­; L.Phaibung Rs.500/­ hai an nih.
           
Chun, Saikawt Block hnuoia khuo 26 han Sept. 26, 2015 khan ralna sum Rs. 1,98,390/­ an lo peklut ta bawk. Saikawt block hnuoia ralna petu khuo hai chu­  Mualpi Rs 2500/­; Saipum Rs 9000/; Khawpuibung Rs. 6490/­;’ Tuikhamphai Rs 1400/­; Muolvaiphei Rs 39200/­; Tuibul Rs 1200/; Sumtukphai Rs 1300/­;Mualkot Rs 900/­ ; Saidan Rs 20200/­ ; T. Daijang Rs 4000/­ ; Thenmuol Rs 8300/­; Khuangnung Rs 1800/­; Tuikham Rs 1000/­ ; Ngurte Rs 13300/­; Dumsaumual Rs 4100/­ ; Tuaitengphai Rs 4600/­ ; N. Manaphai Rs 1600/­ ; Thingchom Rs 7200/­ ; Muolbem Rs 3900/­ ; Tuithapi Rs 3700/­ ; Valpakot Rs 4000/­ ; G. Jangnom Rs 500/­ ; Tuileluong Rs 900/­ ;  Saheiphai Rs 1200/­ ;  Hmuntha Rs 5000/­ ; Saikot Rs 51100/­ hai a nih.

Cooler machine
CCPur: District Hospital morgue­a Cooler machine inbun dinga hmalakna a fe mek a, tuta thla sung a hungtlung hman beisei a nih tiin Dr Thangchinkhup Guite, CMO/CCPUr chun a hril. Cooler umnaw leiin tuhin thingtlangpa system­a Morgue­a mithiruong hai vawngthat mek an nih.

Headline
PM in Hindus le Muslims hai  hmelma hrawn Retheina dotlang dingin a ngen
Nawada: Prime Minister Narendra Modi chun Bihar­a Assembly election hung um ding le inzawmin zanikhan Bihar­a Nawada hmuna campaign neiin mipui hmaah thuhrilna hun a hmang. Uttar Pradesh­a tulai hnai ela Bawngsa fa tia intum leia Muslim hnama mi mipuiin an sawisak hlumna chungthuah, Democracy rama chun mitinin an lungrila thil um hril theina dikna an nei, sienkhawm Hindu han Muslim am retheina an do ding; Muslim han Hindus am retheina an do ding ti an sukfel a tul tia hrilin Hindus le Muslim hai chu ei hmelma hrawn ‘retheina’ dotlang dingin a ngen.
   
PM chun zani hmasaa President Pranab Mukherjee thuhril ‘India hnam varna zierang hnam chi hrang hrang inunauna, dawtheina le inpumkhat hlutna chu lungrila tu tlatin a pil hmang el ei phal ding a ni nawh’ tia a lo hril chu thlawpin hieng neka infuina tha lem a um nawh tia hrilin President thuhril hi zawm seng dingin mipui hai a ngen.
   
PM chun Dadri hmuna thil tlung le hi thil tlung zoa tawngkam thalo tak tak saksuoka um hai thuah tawngkam a fimkhur hle a. Poltics lei le thil chite leiin mi han tawngkam mawilo an saksuok hlak tia hrilin chuong tawngkam hai chu thutaka ngai lo dinga ngenin Narendra Modi khawma chuongang tawngkam a lo hmang a ni chun ngaisak naw ro tiin a hril. 

Nov. 24 in PM Imphal­ah
Imphal: PM Narendra Modi chu thla thar November 24, 2015 khin Imphal­ah a hung inzin ding niin ei thu dwngna chun a hril. PM hin Takyelpat le Sports Authority of India (SAI) Complex, Imphal haiah Boys Hostel a hawng ding nia hril a nih.

Mission Indradhanus 2nd Phase hawng
Imphal: Zanikhan Dr K. Rajo, Director, Family Welfare Services, Govt. of Manipur in Conference Hall, Directorate of Family Welfare Services, Imphal­ah Indradhanush­2015 second phase a hawng. Hi Mission thupui chu “Be wise: Get Your Child fully immunized” ti a nih. Hi mission thiltum chu kum 2010 chenah naupang kum 2 le a hnuoitieng 20,500 le nuhmei inrai 7803 damdawi kap ding ti a nih. Damdawi kapa um hin naute hai Hepatitis­B, TB, Zeng, khulhip, tetanus, Thakpher le hnuk natna (Diptheria) hai a veng thei ding a nih. Mission Indradhanush Phase­II hin Imphal, Bishnupur le Thoubal District hai a huom ding a nih. Mission Indradhanush phase­I na chu April 2015 a tan a ni a, Churachandpur, Senapati, Ukhrul le Tamenglong district hai a huop a nih.

MHFPC pawl thar
Imphal: Sept 18, 2015 khan Ex­MLAs han Ex­MLA, Morung Makunga In, Mantripukhri ah meeting an nei a, Manipur Hills Forum Parliamentary Conference ti pawl thar an indin.  President dingin V. Hangkhanlian,Vice President in M. Thorii le Morung Makunga, Gen.Secy. in Doukhomang Khongsai le Advisers in Rishang Keishing, C. Doungel, Selkai Hrangchal le B.D. Behring hai an ruot.

Thoubal­ah ralthuom man
Imphal: Zani zingkar 6:30AM vel khan BSF le Thoubal Police Commando han Uyel Terapokpi village, Thoubal district­a culvert bula thulbuk hnuoia thup ralthuom an dapdawk a, mi man ruok chu an nei nawh. Ralthuom an dapdawk hai lai Lathode gun 1, 4 Lathode shell 4,  9mm pistols 2 , TNT cake 3, Gelatin  tluon 6, AK 47 mu 56; 9mm mu 6, CHG 1, rocket shell 1, Detonator 1, Detonator fuse 4, Fuse wire 3, Electric wire 10 metres; clips 2, thingkilna kg. 1 a thang.

AR han Sawkhe leh nupui 1 an man
Imphal: 24­ Assam Rifles chun October 7, 2015 khan Khudengthabi hmuna motor inlawn hai an dapnaah Imphal pana hung tlan Maruti Van AS 01 BK 6267 sunga inthawk Sawkkhe (flying Gecko) 2 leh nupui kum 75 mi M. Keinahan w/o (L) Bir Chandra of Thoubal District, Salungbam Mayai Leikai an man. Sawkkhe hai hi 10­15 grams vela rik an ni a, cigarette packet sunga thupruk an nih. An thil man hai hi Forest Department, Imphal kutah an inhlan niin zanita Assam Rifles thusuok chun a hril.


Primary teacher han CM an inhmupui
Imphal: High Court in kum 2011 a Primary teacher le Hindi graduate teachers laka um hai 1,423 hai banna Order insuo a, a thara DPC nei nawk dinga order an suona le inzawma court thusuok ngaituo thar dinga ngen tumin zanikhan primary teachers han Manipur CM bungalow an pan a, sienkhawm Police han Babupara­a Secretariat bul lai an lo dang a, Primary teacher 5 hai chu CM inhmupui phalna pein CM kuomah memorandum an pek. Primary teacher, Hindi primary teacher le Hindi graduate teacher lakna dinga DPC kha kum 2015 a nei le kum 2011 a result insuo a nih. OBC reservation thuah tling zo lo candidates 9 han case an file leia High Court in DPC hi a thara nei dinga thusuok a siem a nih.

Mizoram CM in Assembly­a a hrillang
Aizawl: Zanita Mizoram Assembly a Selkaltu pawl thuoitu le MNF MLA Vanlalzawma in UN Declaration on the rights of Indigenous People thua private member resolution a putlut hriltlangnaa Mizoram CM Lalthanhawla in thu a hrilnaa chun, New Delhi a AICC President Sonia Gandhi an hmupui huna tulaia Manipur buoina thuah iengleia inrawl ve tia sawiselna tam tak a hung lut thu hrilin a mi lo lawmnaw hle a. Amiruokchu, thil um dan ka hrilfie hnung chun a hrietthiem tiin a hril. Manipur a Zohnathlakhai thlavng hauna dinga lekha ziek a tul chun PM kuoma lekha ka la thawn pei ding thu khawm Sonia Gandhi kuoma a hril niin Lalthanhawla chun a hril. Private member resolution, UN Declaration hi a hung hlawtling theina dinga hmalakna hi bawzui pei dingin inpui chun an pasi bawk. Members dang dang hai khawmin Manipur chungthu hi an hrillang ve.

IAF in fighter aircraft stream­ah nuhmei
Hinddon Air base: Inian Air Force chun zanikhan Hinddon Air Base­ah IAF 83rd Anniversary an hmang. Hi huna Chief of Indian Air Force, Air Chief Marshal Arup Raha in thu a hrilnaa chun, IAF chun firghter aircraft stream­ah nuhmei laklut a tum thu a hril. IAF a chun tuhin administration, logistics, meteorology, navigation, education, aeronautial engineering­mechanical, electrical le accounts haiah nuhmei 1500 vel an um mek a, hi lai hin pilots 94 le nagivators 14 an thang.

Saradha Scam thuah Manoranjana Singh an man
New Delhi: Central Bureau of Investigation (CBI) chun multi­crore Saradha Chit Fund scam le inzawmin zanikhan Union minister hlui le Congress leader Mr Magang Singh nuhmei hlui  Manoranjana Singh le Kolkata based businessman Shantanu Ghosh hai an man. Shantanu Ghosh hi a hma khawma Enforcement Directorate in an lo tah, thla 2 sung zet an custody­a an kawl, August, 2015 a kha bail­a suok a nih. Saradha kingpin le Manoranjan Singh han e­mail an inthawn hai tam tak CBI in an dapdawk a nih. Shantanu Ghosh hin Sudipto Sen chu hlemin Rs. 25 crores vel a lakpek bakah blackmailed in a vau bawk nia hril a nih.

Kum 10 sungin Naxalites cadres 502 an inpe
Nagpur: Maharashtra sawrkarin Naxalites inpe hai ta dinga policy a siem hnungin kum 10 liemta sung khan Naxalites cadres 502 zet chun nundan pangngai hmang nawk dingin sawrkar kutah an inpe niin official thusuok chun a hril.  Hieng inpe hai laia 482 hai chu Naxals hai hratna hmun taka ngai Gadchiroli district­a inthawk an nih. Maharashtra sawrkar chun August 29, 2005 khan Naxals surrender policy hi a lo siem ta a nih. Hi policy siem hnunga inpe hmasa tak chu kum 2005 a inpe Madan Anna @ Balan Ballya a nih. Inpe ta hai lai hin state zonal Committee member 1, divisional committee member 6, commanders 16, dy. Commander 24, dalam members 218 bakah Gram rakshak 110 le Sangam members 127 an thang. Inpe hai hi Industrial Training Institute (ITI) hnuoia skill training pek an ni bakah motor khal inchuktir le nuhmei hai chu puonthui le thlaihna zawr in thawtir le inchuktir an nih.

Mizoram in NEC hnuoia sin a thaw tha tak
Aizawl: North Eastern Council (NEC) hnuoia 12th Plan sunga project thaw thaw zo ta hai dungzuiin tuchena hin India hmarsak biel state hai lai Mizoram chu a la thaw tha tak a, NEC a inthawka sum hmu rawn tak khawm a ni bawk. Mizoram chun 12th Plan sung NEC hnuoiah project 21 a dingin Rs. 28077.58 lakh a dawng tah. A dawttu Arunachal Pradesh in project 18 a dingin Rs. 9059.9 lakh. Assam in Project 11 a dingin Rs. 11640.08 lakh; Manipur in project 8 a dingin Rs. 3241.67 lakh; Meghalaya in project 15 a dingin Rs. 7975.98 l;akh; Nagaland in  project 8 a dingin Rs. 2015.42; Sikkim in project 11 a dingin Rs. 3927.71 le Tripura in project 3 a dingin Rs. 144.67lakh a dawng tah.

Junior post laknaah interview suktawp dingin
New Delhi: Minister of state for Personnel and training Dr Jitendra Singh chun, India ram state tina Chief Minister hai chu sawrkar sin inhnuoi (junior post) laknaah interview thaw hlak chu suktawp dingin ziekin an hriettir. Junior level thawktu laknaa interview thaw kher hi sawrkar thlungpui chun tul a hriet nawh tiin a hril a. Group ‘B’ (Non­Gazetted) le Group ‘C’ (NonTechnical) post, Ministry le Department tum tuma sin laknaah competitive exam buotsai a, sienkhawm interview chu thaw lo dingin an hriettir a nih.

AR Rahman kuoma Hridaynath Mangeshkar Award
Mumbai: Academy award lo dawng tah India music composer AR Rahman chu October 26, 2015 khin Hridaynath Mangeshkar Award i nhlan ning a tih. Award hi Pandit Hridaynath Mangeshkar piengchampha ni takin playback singers Lata Mangeshkar le Asha Bhosle hai tapa veteran filmmaker Subhash Ghai in inhlan a tih. Hridaynath Award lo dawng ta hai chu, Lata, Asha, Amitabh Bachhan le Sulochana Tai hai an nih.

Nobel Prize Literature dawng dingin
Stockholm: Belarus lekhaziektu Svetlana Alexievich (76) chu “a monument to suffering and courage” ti lekhabu a ziekna leiin Nobel Prize Literature­ 2015 dawng dingin zanikhan puong a nih. Alexivich lekhabu ziek hmasa tak chu “The Unwomanly Face of the War,” (1985) a nih. Lekhabu ziek el chau ni lovin documentary films 21 haia screenplays le plays a lo ziek ta bawk a nih. Nikuma Literature­a nobel prize dawngtu chu French writer Patrick Modiano a nih.   Tukuma Nobel Peace Prize dawngtu ding vawisun hin puong ning a ta, Economics a Nobel dawngtu ding chu Oct. 12, 2015 in puong ning a tih.
---------------------------------------------------------------------------------------------------------------------
VAWISUN THUPUI
Kei Lalpa chun ka hril tah a, hung tlung ngei a ta, thaw khawm thawng ka tih, kir nawk naw ning a, hla naw ning a, insir bawk naw ning; i umdanhai ang pei le i thilthawhai ang peiin ro relpek an ti che, Lalpa Pathien chun a tih.-­Ezekiel 24:14

Editorial
A tawp chena mi hmangtlak

Thalai lekhathiem tak niin, result tha tak tak nei ei ni el thei. Chu taka lungawina dittawk el ding ei ni nawh. Mi hmangtlak le a tawp chena mi hlawtling ei ni am? ti hi a pawimaw bek bek el a nih. Lekha thiem, mark insang tak hmu, record tha tak neihai kha hmangtlak lovin zui ral el ei tih ti hi inlau um tak a nih. Naupang laiin ei tum an sang ve fu hlak a, sienkhawm ei inchuk sang tiel tiel a, inchuklaiin a huopchin a hung lienin a hung tam deu deu a, chinchang ei hrietchieng chinah chun tum hi an hnuoi tiel tiel nuom khawp el. Hi lei hin a tawp chena mi hmangtlak ni dinga hma ei lak fan fan a tul a nih.
   
Lekha  ei inchuk laia ei en hnuoi ve ve em hlak, ei ni neka thiem lo lema ei ngai hai kha an tumru le a tawp chena an tumru le teirei pei leiin ei ni neka insang le ei chungah la hung um an ta, VIP car leh an mi tlan pel huna “kha pa kha maw annawleh kha nu kha  maw ka hriet taluo, kan classmate hlak a ni kha, kan school kai lai a thiem thei naw vei leh” tiin la thlir liem vawng vawng pal ei tih ti hi inlau um tak a nih. Tuta ei result that leia lungawia kut kuongkuoa thung el ding ei ni naw a, a tawp chena thang tlat ding a nih.
   
Chu el chu a la ni naw a, sin tha tak  le inzaum tak ei  thaw a ni thei ie, iengtin am chu sin chu ei thaw ti a pawimaw nawk khawp el. Lekha inchuk laia Pathien ti mi tak, sienkhawm officer sin insang tak chel hnunga, mi chan ai fakruk pawi ti nawk der lo ei ni chun a tawp chena mi tha le hmangtlak a tiem ni chuong nawng ei tih. Lekha thiem mi tium ni lova a tawp chena mi tha le mi ringum, sungkuo, khawtlang, kohran le ram le hnam ta dinga mi hmangtlak le sawr tangkai thawktu ni tum ei tiu. Sawrkar thawktu ni lei ela hlemletna ngaina mi ninaw hram tum ei tiu.
   
Vawisun hin a tha tak ei ninaw el thei, result tha tak nei ei ninaw el thei, mi fel tak ei ninaw el thei. Hlawsam chang hungtlungin, ei nunah harsatna tuokin beidawng rum rum chang ei nei el thei. Ei ruolhai, ei lekha inchukpuihai sin tha le insang tak tak chelin tluk lo le phak zo lo rieuin ei inngai a ni el thei. Chu thil chun ei nunah depression nasa tak intlunin, mani insitna, lungril sawlna le hadamnawna an tlun el thei. Sienkhawm, beidawng lovin bei fan fan inla, a tawpa hlawtlingna tha le insang lem changtu ei la hung ni thei. Tuta ei nina neka tha le insang hi ei hmaah a la um hnur a nih.
   
Abraham Lincoln America President a hung nina dinga a lampui hraw hi a namei naw a, hlawsamnain a hne thei lo, vawi tam takel hlawsam sienkhawm beidawng nuom der lova a beina chun mihang zalenna a hung intlun a, vawisun nia US President ngei khawm mihang a hung ni ta pei a nih. Khawvela misuol hmingthang Nicky Cruz khawm hmangaitu nei lova an hrietna chun a sukbeidawng a, a nunin umzie a neiin a hriet naw leiin tuolthat chaknain a sip a, thisen lumin a dang a char a nih. Amiruokchu, hmangaitu Pathien a nei ti a hung hriet suok zet chu khawvela Pathien thu hriltu ropui takhai laia mi a hung nih. A tawpah mi hmangtlak a hung nina hi a ropui hle a, mihai lungril a hne zuol bik a nih.
   
Khawvela mi ropui le hmingthanga hril le tiem phak, an hun tawp tienga hmangtlak lo, mi thahnemtawk tak an um. Chuhai lai chun Adolf Hitler le Saddam Hussein hai khawm an thang ve niin an lang. Hitler chu a nun tawp tieng beidawngin ama le ama an kap hlum a ni kha. Saddam Hussein chun Iraq ramah ropui takin lal na a hnawt a a tawpah chun muolpho takin khai hlum a ni kha. Anni ang bawk hin ei Bible a khawm an hun tawp tienga muolpho taka thi tam tak an um. Lal Saula ngei khawm ama le ama an sun hlum a nih.



Don't Miss
© all rights reserved
made with by Simon L Infimate