Responsive Ad Slot

Dr. (Rev) Rochunga Pudaite A ChanchinTawi

Saturday, October 10, 2015

/ Published by Simon L Infimate
December 4, 1927-in Senvawn, Vangai, Manipur-ah Pastor Chawnga Pudaite le Pi Daii hai inkarah a pieng a. Unau pasal 4 le nuhmei 2 lai niin Phulpuia seilien a nih. Inchukna le thiemna tieng chu Jorhat High School-ah Matric a zo a (1946), Allahabad University-ah B.A., Wheaton Graduate School-ah D.D., Northern Illinios University, USA-ah M.A., Malone College, Ohio, USA-a inthawkin D. Litt. a lak bawk a nih. Hmarbiel Manipur a chanchintha hunglutira inthawka kohran phursuoktuhai laia pawimaw tak a ni a. Hmar hnam India sorkar hnuoia ST anga ziekluta um khawm hi ama hmalakna lei lieu lieu a nih. Politics le Pathien rawngbawlna dit lem thlang dinga a um laiin khawvel ropuina nekin Pathien kona ngaiin a thlang lem a.

Tuhin khawvel pumpui hrietah rawngbawltu, Bibles for the World (Khawvel pumpuia Bible semsuok tumtu pawl)-ah Founder President a ni a, Manipur kohran lien pawl tak EFCI Kohran sulsutu a ni bawk a. Lekhabu tangkai tak tak a ziek teu ta a, ama chanchin ngei khawm English ha'n bu thum lai an siem ta bawk.


Dr. (Rev) Rochunga Pudaite a chanchin ziekna hi khawvela hmingthanghai hming chuongna iemani zatah a hming le chanchin ziek lang a nia, ama chanchin tawp ziekna khawm bu iemanizat a uma, chuonghai chu; "God's Tribesman (By James & Marti Helfey) "Ro, the Boy from Assam" (by David C. Cook), "Let My Heart Be Broken" (by Rich-ard Gehmana), Joe Musser's book Fire on the Hill (Tyndale House Publishers, 1998). Lekhabu hai bak a hin Beyond the Next Mountain ti sawptawngin ama chanchin khawm siem alo nghe nghe tah a nih. Ama lekhabu ziekhai thenkhat "The Dime That Last Forever," "Tlangchar Tuihnar" (Hmar), "Life Beyond Disappointment", "Tienami" (Hmar), "Lekhabu Hluber chu" (Lushei), My Billion Bible Dream (Thomas Nelson, 1982) and The Greatest Book Ever Written (Hannibal Books, 1989) le a dang danghai an nih.

Dr. (Rev) Rochunga Pudaite hi chawimawina insang tak tak tam tawk el a dawng a, thenkhat hai chau hang hril lang inla, 1976 khan Cambridge Man of Acievement lawmman inhlan a ni a chun Peru sawrkarin Medal of Honour an hlan bawk a. Who's Who in America le Who's Who Among the Indian in America ti hai a chen alo chuong phak ve a nih.

1970 khan kohran le education enkawltu dingin Partnership Mission Society (PMS) chu a ruolhai leh an indin a. 1971 khan Bibles for the World chu indin in tuhin khawvel hmun hrang hrang Bible nasatakin an semdawk mek baka kohran mipuihai chawmtu tak a ni tah. A vision le thiltum chu khawvel pumpui-ah Bible copy Million khat semsuok a ni a. Khawvel mihriem po poin an thi hma ngeia vawikhat bek Bible an tiem hman hi a thiltum a nih.

Rev. (Dr.) Rochunga Pudaite (88) hi Memorial Hospital, Colorado Spring, Colorado,USA hmunah October 10,2015, dar 2:42 (IST) khan chatuon ram panin a mi lo liemsan tah a, a ruong chu Churachandpur-a vuiliem a nih.
Don't Miss
© all rights reserved
made with by Simon L Infimate