CCPUR: Ephesi 2:10 a “Thilṭha thaw dinga Isu Kristaa chun siema umin, ama kutsuok ei ni sia...” ti ang hrimin Lamka RPCNEI Ṭhalai Pawl huoihawt Class - X Free Coaching thla 4 sung aw ding chu zani Aug. 3, 2015 a inthawk khan ṭan a lo ni tah. Inauguration of Coaching hi Pu Rochunghnung Vice President, HSA General Headquarters in a nei a, Pathien kuoma inhlanna ṭawngṭaina Upa L. Kiemlo Pulamte in a nei bawk. Hi Coaching huna hin Subject po po inchûktir ning a ta, naupang a ṭhanghai chu Note Book le Study Materials hai pek vawng ning an tih. Tuhin thla 3 sung thaw phawt ning a ta, chun Board Exam tawma thla khat sung revision-na hun neipui nawk ni bawk a tih. Inchûklai a ṭhang nuom hai chun August 8, 2015 Inrinni hma ngeiin hi a hnuoiah phone number a hai hin inhriettir thei ning a tih tiin huoihawttuhai chun an hril. Contact theina Mob. Number-hai chu 9862514225/8729900652/8014461619 haia ning a tih. Pathienni tilo nitin zantieng 4:00pm - 5:30pm haia hi Coaching Class hi nei ni hlak a tih. Huoihawttu Lamka RPCNEI KṬP ti hi CCPur Town Area a um RPCNEI Kohran KṬP hai an nih.
