Responsive Ad Slot

An interview with HPC (D) President Pawl/HPC (D-P)

Tuesday, August 4, 2015

/ Posted by VIRTHLI HMAR
Virthli Special:
An interview with HPC (D) President Pawl/HPC (D-P)

[Virthli: HPC (D) President Pawl hi UPF am, KNO hnuoiah in um lem?
HPC (D) President Pawl: Kan thangnaw ve ve.]


Virthli: HPC (D) hi iengleia Chairman le President Pawl ang zawnga pawl hni a um am in nih a?
HPC (D) President Pawl: Ditdanin anglo lei anih ti chu hriet sa ani zing a. Lungril (Tawngbaua hril el nilo) ngai pawimaw (priority) an an gnaw lei anih. Hnam ta dinga thil dit chu in ang sien la khawm, an ni chun Hnam thil nekin an mimal thatna le hlawkna an ngai pawimaw lem hlak a, chu leiin remchang a um phat leh Hnam le Pawl hlawkna dingin thil thaw lovin mimal hlawkna dingin thutluk (decision) siem an nuom pei hlak leiin President an nghawka, thin thlakna ding suonlam remchang zawng an sukpui tling ta a, chuleiin Pawl hni a hung um an tah.


Virthli: Iengtik kum a indin am a ni a?
HPC (D) President Pawl: Kum 1995 a indin a ni a, kan President (Pu Lalhmingthang Sanate) in an din a nih, June 16th1996 khan tlang hriet thei dinga News a insuo a nih.


Virthli: Mipuiin an thlawp tawk cheuin in hriet am?
HPC (D) President Pawl: Keini chun kan hmalak dan hi hnam ta dinga thiltha dit hai chun an mi thlawp tlakah kan ngai! Mipui thiltha le zalenna dit hai chun an mi thlawp vieu ah kan in ngai.

Virthli: Hmar hnam Sipaihai inthlungkhawm tuma hmalakna dam hi in nei am?
HPC (D) President Pawl: HPC (D) President Pawl hin theida na tu chunga khawm a nei naw ang bawkin, Hnam zalenna le Hmar Hnam Political demand-na le inzawma hmalatuhai chu mi tuelkhawm a khak naw a, an lampui a dang hran naw bawk. Amiruokchu, inthlungkhawm a hmalakna nei ding chun ei tum le ei nuom zawng lampui hai in mil lo, mani kehniek khawm inthil fai hman lek lova Zu le inruithei thil dang dang le nuhmei pasalna hmangsuol (inngaina suol le uiretna) le mani hlawkna (sum) ding zawnga thuneina hmangsuol corruption hai le chun inthlungkhawm a hmalakna nei hi thil harsa a nih.


Virthli: HPC (D) President Pawl hin iengang taka hma lak pei am in tum a?
HPC (D) President Pawl: Ei Hnam Society hi reform a tul a, political demand ei nei lai zingin chu reform chu vauna le tharum (force) ringawt a suk puitling chi a nih nawh a, mani ngei mi entawn tlaka nungchang le thil thaw a thuoi a hlawk (effective) takin kan ngai. Chulei chun Cadres hai khawm mi entawn tlak le inza tlaka um dingin inchuktir hi hmalak bultan tharna pawimaw tak a nih. Pawl thil a ni ta chun 100% fihlim hi an taka, amiruokchu, 70% vel an lo fihlim thei chun ei hnam ta dinga sinthaw tulna hieng Political, Social, Economical, Education le upliftment dang dang a hma lak khawm a awlsam lemin a hlawk lem ding a nih, chulei chun internal reform hi hmalakna pawimaw takah a ngai a, chu ding chun cadres hai in value system indik ei Pathien thu thlawp tlat an nei a ngai, entirnan- Hnam hmangaina nei leiin, thawkrim (sin inrim) indikna le ringumna le Pathien tina nun nei chun mi in a thu hril khawm an ngainepin an palzut ngai nawh. A tawi zawng takin, mani nun a sukdik pum zinga hmalak hi a ngai pawimaw a nih.

Virthli: Hmatieng peia iengti anga in Pawl hin hmalak pei am in tum a? In thil tum iem a ni deu tak a?
HPC (D) President Pawl: Hmar haiin Political demand ei neina lampui a tawp hnawk em em el a, chulei a tu chen a hlawtlingna khawm hi ei la chang nawh niin an lang a, ei thu in nghatna tak Bible chun hnuoi le a sunga thil um popo hi Lalpa Pathien ta a ni thu a mi hril a, Chun, ‘A ram le a felna zawng hmasa ro, chuong chun thil dang khawm pek belsa ning in tih’ a ti bawk a. Ring tlak le ringum tawka ei ngai si chun Pathien dit dan hi zawng hmasak phawt ding ah kan ngai. Chulei chun HPC (D) member chun a nun dan ah Pathien tina an lang ding a nih ti hi kan fe pui mek le kan la bawzui pei ding chu a nih. A bik takin Zu le inruithei thil dang dang le nuhmei pasalna hmangsuol (inngaina suol le uiretna) le mani hlawkna ding zawnga thu neina hmangsuol (corruption) laka inthawkin fihlim lo chu dan bawsie (suol) a ngai ning an ta an chungthu a rel theituhaiin ngaituo pei an tih. Chu chu Pawl hmalak tum dan pawimaw tak chu a nih. Mizoram a Autonomous District Council nei hi HPC (D) chun a tum tak a nih.

Virthli: Mizoram a Hmarhaiin Autonomous District Council an nawr mekna a hin nangni Pawl hi in thang ve a ni? Hmalakna dam in nei ve am?
HPC (D) President Pawl: Mizoram ah HPC (D) hin 1995 a inthawka. Autonomous District Council a demand ti naw hi chu Pawl dangin a hran taka an nawr khawm chu kan lo hriet naw a. Midangin an lo nawr ve chun lawmum kan tih.

Virthli: HPC (D) President Pawl hi UPF am, KNO hnuoiah in um lem?
HPC(D) President Pawl: Kan thangnaw ve ve.

Virthli: SoO Signed a um hi HPC (D) President Pawl hin tha tawkin in hriet am? Designated Camp a um in ni ve am?
HPC (D) President Pawl: SoO signed Pawl hin sawldam deuin in ngai hai sien khawm mipui (public) ta ding chun tha kan ti nawh. A san chu mipui ta dinga thiltha iengkhawm nawr dawk silovin mipui an sawl tho a an zalen bawk nawh. Designated Camp a kan um ve nawh.

Virthli: Mizoram amani India Sawrkar leh inbiekna dam in nei ta hlak am?
HPC (D) President Pawl: Kan la nei nawh.

Virthli: Khawlai State, State am hmalak in tum a? In Pawl cadres zat hi hriet a rem am?
HPC (D) President Pawl: Political demand neina hmun chu Mizoram State a chau a nih a, Hnam ta dinga sin a thawna chu state, ram ri, in a dang nawh, khawlai hmun a mi khawm a thei phawt chun HPC (D) hin HMAR hai hmasawnna le thatna dingin hma a lak zing a nih. Hmar Hnam sanhim, hmasawnna le thatna ding a hma lak khawp kan nih. A tam tieng kan nih.

Virthli: In pawl theina hun thatak in mi siem pek a, lawm a um tak zet. In chanchin hi mi tamtakhai hriet nuom a lo ni rawp hlak a, hun zalen taka in pawl theina in mi siem pekna thu ah kan lawm hle a nih. Ram le hnam tadinga pensuok group/faction dang dang hai khawm hun remchanga hai la hung interview pei ning an tih.  


HPC (D) hai ralthuom (Security leiin suklang an ni naw nih)

Don't Miss
© all rights reserved
made with by Simon L Infimate