Responsive Ad Slot

Hmasawnna Thar | 04 August, 2015

Tuesday, August 4, 2015

/ Posted by VIRTHLI HMAR
Tuolsung
ADC/CCPur Vice Chairman dingin Lalhossan
CCPur: ADC/CCPur chun zanikhan Vice Chairman ding thlangna District Council Hall, Tuibuong­ah an nei. Hi huna hin 7­Vangai DCC MDC Pu Lal Hossan chauin nomination paper a file leiin Pu Lalhossan chu khingtu um lovin Vice Chairman dinga thlangtling a ni thu Chairman le Presiding Officer Langkhanpau Guite in a puong. Pu Lal Hossan hi Vice Chairman dinga intiemkamna Presiding Officer in an neitir nghal bakah Certificate inhlanna a nei. ADC  Vice Chairman thlangnaa hin MDCs 24 hai laia term hmasaa Vice Chairman cheltu Demmang Haokip le KC Chonsei ti lo member dang hai chu an thang vawng.
   


Pu Lalhossan chun member han an thlawpna thuah lawmthu a hrila Member hai le CEOs hai le thangruola sin thaw tlang a pawimaw le a tul thu a hril.
   
ADC Chairman Langkhanpau Guite chun, tuta inthawk sawtnawte hnungah Executive Member (EM) ding hai sukfel a ni ding thu hrilin EM ruotna ding kawnga hin a lungril a buoi hle thu, member tinin EM ni nuom hai sienkhawm EM mi 5 chau um thei a ni leiin EM changlo hai chu nuor lo dingin a ngen.

Relief/Donation Centre hawng
CCPur: Churachandpur le Chandel district haia tuilien leia harsatna tuortu hai thangpuina dinga Relief/Donation Centre chu zani 10:30AM khan Thangjang Haokip, President, KIC in KSO Information Centre, Sumkong Kaimun, Tuibuong­ah a hawng a, Rev. Jangkholam, Exe. Director, ECA in tawngtainain Donation Box inhlanna a nei bakah tuilien leia harsatna tuortu hai thangpuina dingin Rs. 1000 a thawlawm.
     


Lal, Youth Club le mipui hai chu thangpuina pe tawl dingin President, KIC chun ngenna a siem. 

L. Molvom­ah Free Medical Camp nei
CCPur: August 3, 2015, 7:00AM khan Food and Nutrition Security (FNS), Devpt. Dept. RPC­NEI le CMO Office/CCPur hai thangruola huoihawtnain Molvom Village Community Hall, Tuibuong TD Block, CCPur­ah Free Medical Checkup Camp nei a nih. Hi huna hin CMO, Dr Thangchinkhup Guite khuollienin a thang a, candle sitvar le ribbon chep tanin Medical camp hi a hawng a, functional President in Michael M. Ginzasuan, District Supply Officer (DSO), CCPur a thang.
    



CMO CCPur chun hriselna ngaipawimaw a tul thu uor takin a hril a, DSO/CCPur chun National Food SEcurity chungthua hriselna le inzawm le food & nutrition chungthu hai a hril.
   
Hi huna hin Dr Robinson le Dr Jireh han damnaw mi 200 vel hai hriselna an enfel a, damdawi a thlawnin an sem bawk a, doctor pahni hai hi Nurses 2 le ASHA le Anganwadi workers han an thangpui.
    
Chun, hi huna hin Mr S. Muana Vaiphei, Coordinator FNS/DD­RPC NEI le Rev. Edwin Darsanglur, Director DD­RPC NEI in keynote address a hril bawk.

JNV entrance form sem
CCPur: JNV, Tuinom, CCPur­a Class VI inchuk ding lakna dinga Entrance test form chu Aug. 3, 2015 a inthawk khan ZEO, CCPur Office­ah sem tan a nih. Form hi Sept. 30, 2015 chenin peklut thei le Exam January 9, 2016 a nei ning a tih.

Joining report an pek
CCPur: Mr Seiminthang Lianthang, MCS chun SDO Thangting le Thangboi Gangte, MCS chun SDO/Mualnuam (Thanlon Sub­Division) dingin zanikhan DC Office­ah joining report an pek. Thuthar um hmapo Seiminthang Lianthang chun DC Office hmuna inthawk sin thawng a tih.

Inkhaihlum saa hmu
CCPur:  Ms Chinneiching @ Chingboi (22) of Sialnah, Singngat Sub­ Division, tuta a pate Thangkhongam @ Ngamboi Taithul of Zomi Colony in­a um mek chu zani zingkar khan Ekin sungah inkhaihlum saa hmu a a nih. A ruong hi an khuo Sialnah tienga vui dinga phur a nih. An khaihlum nasan hriet a ni nawh.

Tv. Hmanglienlal ruong vuiliem a nitah
CCPur: August 1, 2015 nia Tuithapui vadunga tla hlum Tv. Hmanglienlal (17) s/o Varthangkhum of Rengkai Bible Hill, CCPur ruong chu Hnam tina Tlawmngai Pawl hran hrana mi han nasa taka an zawng hnungin August 2, 2015 zingkar khan Hmarveng khuo bula Kamdou Veng zawn lai hmu a ni a, a ruong hi Aug. 2, 2015 ma khan ropui taka vuiliem a ni tah. Tv. Hmanglienlal ruong hmutu le lasuoktu hai chu Saidan khuo mi Pu Lalngaidam le Pu Lalrohlu @ Lalro hai an nih.

Free Coaching Class hawng
CCPur: Lamka RPC Thalai Pawl chun zanikhan Class X inchuklai hai ta dingin thla 4 sung aw ding Free Coaching an hawng a, Coaching hi Pu Rochunghnung, Vice President HSA GHQ in a hawng a, Upa L. Kiemlo Pulamte in Pathien kuoma tawngtainain an hlan. Coaching­a hin subject po po­a student hai coaching pek an ni ding bakah study materials le note hai pek vawng ni bawk an ta, Board exam tawmah revision thla khat sung nei nawk ni bawk a tih. A thang nuom hai chun August 8, 2015 chenin Mob. No. 9862514225/ 8729900652 le 8014461619 haiah inhriettir thei ning a tih.

-----------
Headline
India sawrkar le NSCN(IM) han inremna thuthlung an ziek
New Delhi: Zanikhan Prime Minister Narendra Modi, Union Home Minister Rajnath Singh hai hmaah Government’s Interlocutor (Naga Peace Talk), Mr R.N. Ravi le NSCN thuoitu han inremna thuthlung (Peace Accord) an ziek. NSCN(IM) tieng aiawlin an Chairman Mr Isak Chishi Swu le Th. Muivah, General Secretary, NSCN (IM) han Peace Accord a hin suoi an thaw a, India sawrkar aiawin Mr R.N. Ravi in suoi a thaw. Peace Accord­a suoi an thaw zo hin Th. Muivah le PM Narendra Modi han thu an hril. Inremna thuthlung ziekna huna hin NSCN(IM) Chairman Mr Isak Shishi Swu chu damnawna leiin a taksain a thang ve thei naw a, NSCN(IM) thuoitu iemanizatin an uop ve. PM Narendra Modi hi NSCN(IM) thuoitu han thilpekin Naga Vest (Aiman zakhuo) an inhaktir bakah Tangkhul­Naga puonbat an insiltir.
   
Peace Accord­a thu ziek, an inremna points kimchang le plan hai tarlang a la ninaw a, tuta inthawka hun sawtnawteah puonglang ni dinga hril a nih. Peace Accord ziekna huna hin sawrkar tiengpang chu National Security Adviser Mr Ajit Doval le high dignitaries hai an thang.
   
PM in thu a hrilnaa chun, vawisun hi ei harsatna tawpna ni a la ninaw a, ei hmakhuo tieng thil le thil la hung um dinghai ei thaw tanna ding chau a ni a, ei harsatna hliemna hai sukdam le chingfelna ding chau a ni naw a, midanghai ta ding khawmin thang ei lak ding a nih. Nagaland ta ding chauva hring lovin in theina le traditions hai chu India ram inthanglienna dinga theitawp suo ding a nih. India hmarsak tiengpang hmatawng le vengtu, ei ram ta dinga khawvel kawtsuo in nih tiin a hril.
           
Inremna thutlung ziek zo a ni hnunga PM chun sawrkar le NSCN(IM) Peace Accord ziek thu chu P. Acharya, Governor, Nagaland; T.R. Zeliang, CM, Nagaland; PM hlui Dr Manmohan Singh; Selkaltu Pawl thuoitu Mallikarjun Kharge (LS), JD(U) thuoitu Sharad Yadav; TAmil Nadu CM  J. Jayalalitha; Samajwadi party President Mulayam Singh Yadav; CPI(M) thuoitu Sitaram Yechury; West Bengal CM Mamata Banerjee; NCP thuoitu Sharat Yadav, DMK thuoitu le Tamil Nadu CM hui M. Karunanidhi; PM hlui le Janata Dal (Secular) President H.D. Deve Gowda le AICC President Sonia Gandhi hai a hril tawl.

Darkar 48 General Strike
Imphal: Inner Line Permit (ILP) ngenna le inzawma S. Robinhood thina thuah JCILPS a Student Wing chun August 4, 2015, 6PM a inthawk Manipur pumpui huopin darkar 48 General Strike/Bandh an thaw ding niin ei thu dawngna chun a hril.

Students 10 an hliem, mi 1 man
Imphal: Zani sun dar 12 vel khan JCILPS student’s Wing le student thahnemtawk takhai chu New Secretariat a  Education Minister M. Okendro hmaah an lekhabuhai pelut dingin an va fe a, Police han an lo dang bakah student hai control­na dinga lathi­charge an thaw leiin students 10 an hliem a, RIMS le JNIMS panpui an nih. Students hliemhai laia mi 2 an hliem inrik a hril a nih. Zani ma khan Police han JCILPS students Wing Co­Convenor Sarangthem William Milton chu Alugali, Thangal Bazar, Imphal­ah an man.

Curfew hlip a ni tah
Imphal: August 2, 2015 a State Cabinet meeting chun July 8, 2015 a inthawka Imphal East le West district haia Curfew a puong chu hlip dingin thutlukna a siem a, sienkhawm Cr.P.C. 144 ruok chu la umzing dingin an rel. Hi dungzui hin Curfew Oder hlipna chu August 2, 2015 khan Imphal East le Imphal West District Magistrates han an insuo.

Moreh la fe thei lo zing
Imphal: Mimkei leiin Imphal­Moreh lampui siet chu siem zo a la ninaw leiin Moeh chu motor hmanga infepaw theilo le la tlung thei lo zing a ni a, lamlien sietna hai siemthatna dingin hun iemanichen a la aw ding niin ei thu dawngna chun a hril.

BJP Manipur thuoitu han PM le Amit Shah
Imphal: Zanikhan Manipur BJP President Th. Chaoba inrawinain New Delhi­ah BJP Manipur thuoitu han minutes 15 sung PM Narendra Modi an inhmupui a, ILP le tuilien chungthu an hrilpui a, PM chun a hmuna thil tlung hung enfel dingin Union Minister a hung tir ding thu le Manipur harsatna chingfel dinga hma a hung lak ding thu a lo hril. Hi zo hin BJP National President Amit Shah khawm an inhmupui.

School hai hawng nawk, a kai an tlawm
Imphal: Manipur­ah ILP system hmang nawk ni raw seh tia ngenna leia mipui han nuorna nasa taka an nei le inzawma buoina suok leia July 9, 2015 a inthawka Imphal EAst le West district sunga School khara um hai chu zanikhan hawng tan nawk an ni a, sienkhawm students school kai an la tlawm hle. School tinah buoina suok vengtu dingin Police in duty tir an nih.

O.Lukhoi Session­ah thang thei ding
Imphal: Manipur High Court MLA disqualified a nina cheltang pek O. Lukhoi chu Assembly Sesion­ah thang thei a ta, vote a nei thei ding le dingnaw ruok chu la rel fel lo a nih tiin Secretary, Manipur Legislative Assembly chun zanikhan thusuok a siem.

NDRF team in sansuokna sin
Imphal: Zani hamsa zingkar khan Guwahati a intahwka NDRF team mi 21 hai chu Imphal an hungtlung a, IAF Helicopter pahnia phurin Aibol Joupi an pan a, Aibol Joupi a inthawk kein Joumuol an pan a, Joumuol tlungin sansuokna sin an thaw tan a, mithiruong 4 hmuin mi 8 an sansuok ta a, sansuokna sin an thaw zawm pei. Zani khawm khan NDRF team motor lampuia hung mi 45 in Imphal an hungtlung nawka hril a nih. Joumuola mimkei leia thi nia hril hai laia mi hai chu Sugnu ah an hmel hriet hai bula an um ti hriet a nih tiin an bieltu MLA chun a hril.

Zangnadawmna Rs. 5 lakh seng pek dingin
Imphal: Tuta tuma ruosur nasat leia tuilien le mimkei leia thina tuok sunghai chu zangnadawmna Rs. 5,00,000/­ seng pek dingin August 2, 2015 nia Manipur Cabinet meeting in a rel. Chun, DC tin hai chu haptakar hni sunga tuilien le mimkeiin thil a suksiet hai kimchang taka reaport pe dingin state cabinet  meeting chun a rel.

PM, HM le Mizoram CM han
Imphal: Manipur­a tuilien leia thina tuok sunghai an tuorpui thu le an sunpui takzet thu PM Narendra Modi, Union Home Minister Rajnath Singh le Mizoram CM Lalthanhawla han Manipur CM O.Ibobi Singh kuomah thu an hung thawn tawl. Tuilien chun kiem tieng a pan pei a, Ngakula intahwka tlan suok Nga tam takel man a ni a, tuilienna hmuna chun Nga kg 1 ah Rs. 30­40 a zawr nia hril a nih.

All Party meeting a hlawsam
New Delhi: Parliament Monsoon session tluong taka a fe theina ding lampui dapin zanikhan All Party meeting nei a ni a, sawrkar tiengpangah Union Ministers, Rajnath Singh, Arun Jaitley le Venkaiah Naidu hai an thang a; Selkaltu Pawl tieng Ghulam Nabi Azad, Mallik Arjun Kharge, Congress; Sitaram Yechury, CPI(M); Sharad Yadav, (JD­U); le Ram Gopal Yadav, Samajwadi Party hai an thang. All Party meeting a hin lungruolna an nei theinaw a, hlawsamin an tindar. Hi lei hin Parliament chu rorel hlei thei lovin an la um pei.

Nagaland Cong. MLA 8 hai chunga legal action
Kohima: Nagaland­a Congress MLAs 8 hai chun BJP le thangruol DAN sawrkar an zawm leiin an chungah legal action lak vat ni tang a tih tiin AICC General Secretary in­charge  Nagaland V. Narayanasamy chun a hril. Nagland a NPF thoinaa DAN sarkara hin Odisha  Governor S.C. Jamir sangpa SI Jamir chu Cabinet rank in Adviser to CM, a naupa Apok Jamir thangsain Congress MLAs 5 hai chu Parliamentary Secretaries, Imtio Kumzuk Longkumar chu Deputy Speaker le Tekheho Yepthomi chu Cabinet minsiter (PHED) chanvo pek an nih.

BSF le BGB han DG levela inbiekna
New Delhi: Zanikhan New Delhi hmuna BSF le Border Guard Bangladesh (BGB) han Director General (DG) level in inbiekna an nei tan. Inbiekna hi ni 4 sung nei ning a ta, ram pahni hai inkara hmalak dan dinghai hriltlang an tih. BSF tieng chu inbieknaa hin BSF Director General D.K. Pathak  in an rawi a, Bangladesh tieng chu BGG Director General Major General  Aziz Ahmed in an rawi.

Dimapur­ah pasal 1 kap hlum
Dimapur: August 2, 2015 sun dar 11 vel khan Signal  Bazar, Dimapur ah Ashish Saha (55) of Jorhat, Assam chu tu ti hrietlo han Gypsy sungah lut dingin an ti a, sienkhawm a lut nuomnaw leiin hnaiteah an kap a, silaimu a bawk takah lutin a hmuna a thi nghal. Pawisa ngenna le inzawma kap hlum nia hril a nih. Saha hi Signal bazar, Dimapur a Dawr siem a ni a, a hma chun thingat dinga sumdawng hlak a nih.

Nupui pakhatin a nauhai 2 an rawhlum pui
Hyderabad: August 2, 2015 zingkar inhma tak khan Hyderabad khawpui sunga Gachibowli hmuna cheng nupui pakhat R. Vinod (35) chun a nauhai pahni, Jyothi (11) le Sukumar (7) hai  chu Khawnvartui buokkhuma a raw hlum hnungin ama le ama an raw hlum. Lekha ziek a maksana chun, a pasalin a sukrimsi hle bakah ngaizawng dang a neisan a, a ngaisak naw lei bakah loan tam tak a lak a, thung ta lova a tlansan leia beidawnga hi thil hi a thaw niin a ziek tiin Inspector J. Ramesh Kumar of Gachibowli Police station chun a hril.

Pakistan­a tuilien leia thi 116 an tling tah
Islamabad: Pakistan a chun ruosur rawn leia tuilien leiin tuchena hin mi 116 in thina an tuok ta bakah mihriem 7.5 lakh han tuilien leiin harsatna nasa tak an tuok mek niin Pakistan National Disaster Management Authority (NDMA) chun a hril. Pakistan sawrkar chun relief camps 481 a hawng bakah medical camps 150 a hawng.

Tuilien le mimkei leiin mi 90 an thi tah
Kathmandu: Tulai hnai ela Nepal ram, a bikin Taplejung le Kaski district haia tuilien le mimkei leiin mi 90 an thi  pha ta bakah, leilak 4, suspension bridges 5 le school 1 a suksiet ta tiin Deputy Prime Minister le Home Minister ni bawk Bam Dev Gautam chun Nepal Parliament ah report a pek.
---------------------------------------------------------------------------------------------------------------------
VAWISUN THUPUI
Thil po po nekin lungril hi an khel a; a se bik rieu a, tuin am hre thei a ta? Kei Lalpa hin lungril chu ka zawng suok hlak a, mi tin chu a thilthawhai ra ang pei le, a lampuihai ang peia pek dingin an inthununna  chu ka fie bawk a. ­Jeremia 17:9­10

Editorial
Siet rup tuokna laka inveng dan

Ei ram leilung nghetnawzie hi mithiemhai mi hril a inthawk chau ni lovin, mit ngeia hmutu seng ei nih. Hi lei tak hin furpui a hung tlung zata siet rupna tuok hlak ei ni a, chu sa khawm chun siet rup tlungna laka lo invengna dinga hmalakna chu hmu ding a  chau hle, sepui ruo tuor angin ei tuor el hlak ni takin an lang. Siet  rupna a tlung chang hin phairam le vadung kam hnaia um le cheng hai ta ding chun lo invenglawk dan deu a umna chin a um a. Nisienlakhawm ei lo invenglawk chuong ngai sinaw leiin sietna rapthlak tak chau ni lovin ei thil nei tam tak ei chan pha hlak. Hi thil hi siet rupna tlung ding laka inveng a tulzie ei la hriet tawknaw lei le ei lan hril tawknaw lei niin an lang.
   
Hiengang hi ei ngirhmun a la ni leiin ei state sawrkarin siet rup tlung huna lo invenglawk dan ding hi nasa lema inhrilhrietna a ngaipawimaw le a uor zuol a tul a nih. Khawvel um dan annawleh khawvel rel dan (natural) thila siet rupna le mihriem siemfawm siet rupna khawm ei rama hin a tlung hlak. Natural thila siet rupna tlung laka inveng thei ninaw inlakhawm siemfawm siet rupna tlung ding laka hin chu inveng thei dan a um. Amiruokchu, chu thil chu ei ngaisak naw niin an lang.
   
Kum tinin furpui hun a tlung hlak. Furpui huna chun ruo nasa takin a sur a, tui a liensang hlak ti chu ei hrietchieng em em el, thlasik hung um ding ang thova inkhel ngailo a nih. Amiruokchu, lulul ei insuo lei am a ni ding, ei mawl lei am a ni ding annawleh sawrkara thangpuina ei beisei lei am a ni ding; tui a lien changa a huop ngei ngei hlakna hmun haia khawm In ei bawl a, ei cheng tho tho hlak. Hiengang thil dam hi mihriem han ei hriet sa sa a ei thaw, mani le mani siemfawm sietna ei tuokpui hlak a nih ti inla ei hril suol taluo ring a um nawh.
   
Furpui huna hin thlipui a hrang a, tek khawm a tla hlak. Natural thil lieu lieu a nih. Tuipui kam, kum tina thlisiein a nuoi  hlakna hmun hai khawm lo invenglawk thei a ni bawk. Mithiem han thlise (cyclone) hrang ding dam le Tsunami um el thei ding dam an hrillawk hlak. Hiengang huna hin mithiem han hmun himna ding chena an hril haia khawm lo insawn nuom chuong lo mihriem thenkhat ei um hlak. A chang hin chu mihriem hai hi lulul takel, thuawi lo em em el ei ni a, siet ei tuok thenkhat hi chu ei thuawi naw leia siet tuok khawm ei bo bik nawh.
   
Ei ram leilung hi a nghet tawk nawh ti hretu seng ei ni leiin tenbahram a In bawl dam hi chu ching lo le thaw ngailo ding a nih. Tenbahram a in bawla cheng dam ei lo um a ni chun insawnsan vat a, hmun himna china in bawla khawsa chu siet rup tlung theina laka himna a nih. Siet tuok hnung le ei tuor hrep hnunga sum le tha tam tak seng thlawn nek chun siet ei tuok hma ngeia hmun himnaa insawn chu thil tha, himna el khelah var hlawna a nih.
           

Ruotui tam leiin tui a lien a, mimkei rapthlak tak tak a tlung leiin Manipur mihai khawmin thina le hliemna ei tuok el chau ni lovin ei thil nei cheng a nuoia nuoitel man ding ei chan a; pawi ei ti tlang seng. Manipur a ding chun tukum hi ruotui tam leia tuilien le mimkei leia mihriem thi ei tam tum tak a la ni bakah siet rupna tlung leia National Disaster Response Force (NDRF) Manipur a an hung le an chet a vawikhatna a nih. Siet rup thil a tlung changa hmalak dan ding hi khawpuia cheng han ei lo hriet ta a ni khawma thingtlanga chenghai ta ding beka ei state sawrkarin awareness campaign a buotsai hi thaw ding makmaw laia pakhat a nih. Ngaitha chi a ni nawh.
Don't Miss
© all rights reserved
made with by Simon L Infimate