Responsive Ad Slot

Hmasawnna Thar | 30 July, 2015

Thursday, July 30, 2015

/ Posted by VIRTHLI HMAR
Health Minister in PHSC Building thar pahni a hawng
Medical collage indinna ding thuah DPR buoipui mek a nih: Health Minister
CCPUR: Director of Health Services & Family Welfare Services, Government of Manipur hmalaknain zanikhan Churachandpur District­a Pearsonmun le Mata khuo haia Primary Health Sub­Centre (PHSC) building bawl thar pahni hai hawngna nei a ni a, Health Minister Phungzathang Tonsing chun khuolliena thangin hieng PHSC building hai hi a hawng. Hieng hun haia hin Lunminthang Haokip, DC, CCPur, Dr O. Ibomcha, Director Health Services le Dr K. Rajo Singh, Director Family Welfares  Services hai chu functional President le Guest of honour in an thang. Pearsonmun­a PHSC building hi zani 11:30AM khan hawng a ni a, Mata PHSC building chu 12:00 khan hawng a nih.
    


PHSC building hai hawngna huna Health minister in thu a hrilnaa chun, Mata khuo chu ama ta dinga stronghold a nizing na thuah sinthaw inhawi a ti thu hrilin Vungzagen Govt. H/S chu Hr. Secondary a upgrade a ni bakah khaw sung mi 30 chuong IAY a pek ta thu a hril. Mata lalpa Lallunkam in PHSC­a Sub chu ladawk­a PHC a sie dinga a ngenna chu tuelin a la theinaw thu le PHC anga a function theina dinga hma a lakpui ding thu a hril. 
  
Churachandpur District­ah Medical College pakhat inthut tum a ni leiin District Hospital­ah damnaw khum 100 umna chu khum 200 um theinaa dawmsang (upgrade) a ni thu, Kum 1979­a inthawk ANM Training School nit ah chu GNM a upgrade a awm ta hle leiin GNM a upgrade tum a ni a, hi thua hin Centre Team in enfelna an hung nei zo ta a nih tiin Health Minister chun a hril.
  
Hi huna hin Minister chun National Rural Health Mission hnuoia zanita inthawk August 10, 2015 chen aw ding Intensified Diarrhoea Control Fortnight (IDCF), Churachandpur District official hawngin naupang hai sungkhaw dangna damnawi indawntir an nih.
  
Pearsonmun PHSC hawngnaa Health Minister in thu a hrilnaa chun, Manipur­a chun hriselna tiengpangah kum 3 liemtaa inthawk khan that tieng a pan pei  thu; Pearsonmun­a PHSC building hi kum 1979 a hawng, vawisuna building thar hi hawng a ni thu a hril a, Medical collage  indinna ding thuah DPR siem mek a ni thu; ei ram siemna kawnga MDCs hai, Organisation le  Tribe leaders hai le thawtlang pei a ni ding thu a hril a, Manipur­ah kum danga Doctor Specialist inchuk ding hai regular service kum 5 bek an thaw ding ti chu sawrkarin dan siem tharin doctor join hun huna Specialist inchuk nuom han an hlaw la zingin an inchuk thei ta thu; Manipur­ah tuhin doctors Specialist 168 inchuk an um mek a nih tiin a hril. Naupang kum 5 chen hai sungkhaw laka an him theina dingin sawrkar chun PHSC le PHCs haiah ORS le Znc tablet August 8, 2015 in a sem ding thu a hril bawk.
  
Director Family Welfare DR K. Rajo in thu a hrilnaa chun, Mission Indradhanush –ah CCPur in 73% a hmu phak leiin a pakhatna a ni thu a hril a, district dang hai chun 60% dam an hmu phak chau thu, Penta Valance ti, vawikhat thua damdawi chi 5 kap theina chu August 10, 2015 in Classic Hotel, Imphal­a hawng a ni ding thu hrilin PHSC hawnga um hai chu mani ta anga enkawl seng dingin mipui hai a dfngen.
  
DC, CCPur chun, vawisun hi district ta dinga hun inchiktlak a ni thu, Churachandpur District­a Model Village dinga thlangsuok nisien Pearsonmun le Sielmat a thlang ding thu a hril. Doctors le Nurses damnaw hai hmangai taka enkawl dingin an fui.        
  
PHSC building hawngna hai hi MDCs thenkhat le district level officers han an uop tawl.


Chairman Election Notification
CCPUR: ADC/CCPur a Chairman ding thlangna um ding le inzawmin Secretary/CEO, ADC, CCPur chun zanikhan Election Notification an suo. Chairman in canidate nuom han July 30, 2015, 10AM­12:00 Noon inkar sung hin Nomination paper file thei an ta, zantieng 1:00PM in Scrutiny um a tih. Candidate pakhat neka tam an um chun ballot system hmangin Chairman thlangna (election) July 31, 2015, 11:00AM in District Council Hall, Tuibuong­ah nei ning a tih.

AHRC Secretary in S.Thiek
CCPUR: Pu Sumhlirawng Thiek, S.Thiek tia hrietlar chu Secretary, Assam Human Rights Commission (AHRC) dinga ruot a nih.  A sin hi Assam state sawrkar hnuoia Secretary rank a nih. S. Thiek hi a hma chun Deputy Secretary a ni a, tuhin Secretary in a kaisang a nih.

CJWO in C.T. Lian MDC tling lawmpuina
CCPUR: Churachandpur Joint Women Organisation (CJWO) chun New Lamka West MDC dinga thlangtling thar C.T. Lian Guite chu an pawl (CJWO) Adviser a nina angin lawmpuina zanikhan an nei a. MDC a tling lawmpuinain CJWO chun Belpui an pek.


Free Medical Camp a um ding
CCPUR: August 3, 2015, 6:30AM khin  Food and Nutrition Security (FNS), Development Department, RPC­NEI le CMO Office, CCPur hai thangruola huoihawtnain L. Molvom Village  Community Hall, Tuibuong TD Block­ah Free Medical Camp buotsai ning a tih. Hi huna hin Lunminthang Haokip, IAS, DC, CCPur khuollien in thang a ta, Dr Thangchinkhup Guite, CMO/CCPur functional President le Michael M. Ginzasuan, Dist. Supply Officer/CCPur chu Guest of honour in thang a tih.

Seminar­cum­Workshop on Zou Custom
CCPUR: Zani 11:00AM khan Zogal Memorial Hall Complex, Zoveng­ah Zou Zumpi huoihawtnain “Seminar­cum­Workshop on Zou Custom (Proposed Revision­2015)” nei a nih. Seminar­cum­Workshop hi United Zou Organization (UZO) GHQ sponsored­ na hnuoia Zou Zumpi in an huoihawt a nih.

Get together
CCPUR: Thadou Kuki Students Union chun August. 1, 2015, 11AM khin B. Vengnuom Community Hall­ah Get Together­cum­Career Guidance nei an tih. 1st Session ah Dr S. Chongloi, Principal, Restoration Theological College, Imphal le James Doujapao Haokip, MCS hai resource person in thang an tih.

HIV/AIDS Awareness Campaign nei
CCPUR: July 29, 2015, 12:00 khan Rengkai Community Hall­ah Dist. AIDS Prevention and Control Unit le SHALOM huoihawtnain District Level HIV/AIDS Awareness Campaign nei a ni a, khuollienin M. Gouzamang, MDC (NL East) a thangin program hi a hawng.
  


HIV/AIDS natna hi tulaia ding chun natna tium a ni tanaw a, fimkhur taka ei um phawt chun HIV/AIDS hi ti a um ta nawh. A san chu thisen a inthawk inkaisawng thei a ni lei a nih tiin khuollienin hi huna thu a hrilna huna a hril. Student hai chu zinga ei ram le hnam, khawtlang le kohran ban pawimaw la hung ni ding an ni leiin mani ta ding chau nil ova, mipui, khawtlang le ram le hnam ta dinga lekha inchuk dingin an fui tawl. Hlawtlingna dingin tumru le mani inhnikna line­a fe a pawimaw thu; Sawrkar sin chau beisei lo dinga infuiin student hai ta dinga pawimaw tak chu lekhatiem a ni  thu le khawtlang thila khawm thang ve hlak dingin an fui bawk. Hi huna hin T.Bemjamin, Dist Superviser, DAPCU resource person in a thang a, PLHIV speaker hai khawmin thu an hril.

Essay & Drawing Competition
CCPUR:Manipur Scholarship Foundation Foundation, Manipur le Manipur Scholarship Initiative of the Foundation hai thangruolin Manipur­a inthawk student 6 thlangsuok tumna le inzawma Essay & Drawing­ah Phase I a fethleng hai ta dinga Phase­II test a thang thei dingin   CCPur a inthawk student 58 thlangsuok an ni a, Second Phase Exam/test hi August 11, 2015, 11AM in Don Bosco H/S ah exam nei ning a tih. Second phase­a thang thei ding hai list hi www.manipureducation.gov.in ah hmu thei ning a tih.
  
CCPur­a inthawk Second phase­a thang thei ding hai chu­ Dawn H/S a inthawk student 7; Saikot H/S 2; Bijang Loubuk Jr H/S 1; Grace Academy school 6;Happy Heart school 5; SSA Residential school 4; Lanva Model H/S 3; Hill Model School  8; Rengkai Hr Sec school  8; Dr S. Radhakrishnan school  6; Green Wood Academy  2; Young Leaners School 1;  Don Bosco Hr Sec School 4 le Soikholal Ideal H/S 1 hai an nih.

Merit Scholarship Application peklut thei
IMPHAL: Department of Education (S), Govt.of Manipur chun Manipur Board hnuoia HSLC Exam, 2015­a highest scorers mi 300 hai kuomah Merit Scholarship Rs. 6,000/­ le Higher Secondary Examm 2015­a highest scorers (Science), Arts 125 le Commerce stream­ah mi 50 hai kuomah kum khata dingin Rs. 12,000/­ merit Scholarship pek a tum. HSLC Exam, 2015­a marks 411 le a chungtieng hmu hai le Class XII (HSSLC) Exam, 2015 ah Science­ah marks 420 le a chungtieng, Arts ah marks 365 le a chungtieng le Commerce­ah marks 323 le a chungtieng hmu han Merit Scholarship hi hni thei an tih.
  
Chun, HSLC Exam, 2015­a marks 408 le a chungtieng (below 411) hmuhai le, Class XII Exam, 2015­ah Sciene­ah marks 417 le a chungtieng (below 420 marks); Arts­a marks 362 le a chungtieng (but below 365) hmu chin han wait list a dingin hnina (application) pe thei bawk an tih.

Hi thila dinga Entitlement CArd le Statement of Particulars chu www.manipureducation.gov.in ah download thei ning a ta, application hi July 30, 2015 chena peklut  ding a nih.

Telecobalt Machine siem that
IMPHAL: RIMS, Imphal a Telecobalt Machine thanaw chu siem that a ni ta a, vawisuna inthawk hmang nawk thei ni ta dingin Prof. Y. Indibor Singh, in­Charge, Department of  Radiotherapy, RIMS, Imphal chun a hril. Damnaw Radiation treatment peka um mek hai chun pan nawk thei a ni tah.

Tuilienin In 300 vel a suksiet
IMPHAL: Tulaia ruo a sur deu zing leiin Thoubal District a Wangjing vadung chu a luong liem a, Sangaiyumpham le Tentha biel sung haiah mihriem chengna insung haiah tui a lut a, In 300 vel a suksiet bakah Ngakul haia Nga aia um hai an suokdawk bakah bu le thlai nasa takin a suksiet. Bishnupur district a khawm tui tam leiin mihriem khawsakna a suk harsa pha hle niin ei thu dawngna chun a hril.

JCILPS in Civil disobedience Movement
IMPHAL: Joint Committee on Inner Line Permit System(JCILPS)  chun Manipur­a Inner Line Permit (ILP) system hmang nawk dinga ngenna an fepui mek le inzawmin tuta inthawk an thil ngen an hmu hmakhat Civil Disobedience Movement an tan ding thu Assistant, Media Coordinator, JCILPS chun zanikhan thsuok a siem.

Buoina lien taluo suok lovin bandh a tawp
IMPHAL: Sapam Robinhood thina le inzawma JAC in darkar 38 sung Manipur pumpui huopa bandh an thaw chu buoina lien taluo suok lovin zani zan dar 7 khan a tawp tah. Bandh hi tlangram biel haia chun thlawp a hlaw naw a, phairam biel haia ruok chun thlawp a hlaw hle thung. Lampui dangtuhai hnawtdarna dingin Police han Tear Gas an kap.

Trucks 170 vel an intang
IMPHAL:  National Highway No. 37 (Imphal ­Jiribam  Road) a Tuiruong (Barak) leilak chu motor lien hai hraw thei lo ding khawpa a tlahnuoi leiin  Leingangpokpi an ti hmuna thil chi tum tum phur Trucks 170 vel, Imphal pana hung hai chu an intang. Hi leilak siem thatna ding hin thla khat vel hun a lak ding nia hril a nih.

Curfew darkar 15 inthlazal nawk
IMPHAL: District Magistrate, Imphal East le West District hai chun vawituk zing dar 5 a inthawk zan dar 8 chen, darkar 15 sung hieng district pahni haia hi Curfew inthlzal nawk ning a tih tiin thusuok an siem.

Naga nunghak 1 le Nigeria mi 2 man
HYDERABAD: Tulai hnai el khan Hyderabad Police han Matrimonial websites hmanga nuhmei 3 hlema pawisa Rs. 48 lakh, Rs. 7 lakh le Rs. 20 lakh lapektu Nigeria mi pasal pahni  Bob @ James, Bawa le Nagaland nunghak Leniya Magh hai chu Delhi hmuna an man. Bob hin mi hausa le nina tha tak nei nia inhrilin matrimonial website­ah a nuhmei ding a zawng a, India rama mi hausa, pasal  dit nuhmei 3 a hlem let der a nih.

7th Pay Commission kum tharah
NEW DELHI: Pay Commission chun October thla khin sawrkarah an recommendation pelut an ta, kum thara inthawk 7th Pay Commission hmang tan a ni tel thei. Hi recommendation dungzui hin sawrkar thlungpui (Central Goverment) hnuoia thawktuhai hlaw chu 100­ah 40 velin sukpung a ni el thei tiin Neelkanth Mishra, India Equity Strategist of Credit  Suisse chun a hril.

Dr Kalam vuina hunserah PM a thang ding
NEW DELHI: India President hlui Dr APJ Abdul Kalam ruong chu zanikhan Delhi­a inthawk a vuina ding hmun Rameswaram, Tamil Nadu phurtlung a ni tah. Dr Kalam ruong hi zanikhan Union Defence Minister Manohar Parrikar, Union Urban Development Minister M. Venkaiah Naidu le Union Minister of  State for  Road Transport & Highways P. Radhakrishnan han an zui. Dr Kalam ruong hi vawisun 11 AM hin vuiliem ning a tih. Hi huna hin PM Narendra Modi khawm thang a tih. Tamil Nadu CM J. Jayalalitha ruok chu a hriselna a that naw leiin Dr Kalam vuina hunsera hin  a thang theinaw ding nia hril a nih.

Nu HIV hrik pai 308 an hmusuok
AIZAWL:  Kum 2011 a inthawk March, 2015 chen khan Mizoram Hmeichhe Inzawmkhawm Pawl (MHIP) General Headquarters chun Infrastructure Leasing and Financial Services Ltd. (ILFS) fethlengin project an nei a, hi project hnuoia hin Nu HIV hrik pai mi 308 an hmusuok a, naute han HIV hrik an kai nawna dingin hma an lakpui hlak niin an hril. Nu le naute hai hi thla khat le a chanve chen an buoipui zui hlak a, a tangkai hle niin an hril.

Duty laia in Police constable 9 man
AGRA: Gurdaspur, Punjab­a terrorist­hai chet leia India rama Police le sipai hai po po inralring zinga an um laiin Mathura Police Station huop sunga Kotvan Police outpost a Police constables 9 um hai chu July 27, 2015 zan khan an duty laiin an lo in (sleep) leiin man le an sina inthawk suspended an nih. Police suspended­a um hai lai hin Head Constable pakhat a thangsa.

Magsaysay Award dawnghai lai Sanjiv le Anshu
NEW DELHI: Ramon Magsaysay Award, 2015 ding hai lai Sanjiv Chaturvedi le Anshu Gupta hai an thang. Sanjiv Caturvedi hi Indian Forest Service Officer, Deputy Secretary, AIIMS, New Delhi sin chel lai mek niin Anshu Gupta hi NGO pakhat Goonj neitu le enkawltu a nih. States 21 a disaster relief work, humanitarian aids le community development sin thawtu an nih.

Police SI thamna latu man
NEW DELHI: Zani hmasa khan Delhi Police a Sub­Inspector Ravi Shankar chu thamna Rs. 25,000 a ngen leiin CBI han an man a, Prevention of Corruption Act dungzuiin case an registered khum. Thamna a ngen hi Rs. 50,000 a ni a, Rs. 25,000 chu a hnunga pek dinga ti a nih. Ravi Shankar hi zanikhan Court hmaah inlangtir a nih.

Gujarat ah tuilien leiin mi 25 an thi
AHMEDABAD: Ni 2 liemta sung khan Gujarat state a hmartieng bielah ruo nasa takin a sur a, tui a lien leiin mi 25 in thina an tuok pha ta niin official thusuok chun a hril. Tuilien leia harsatna tuorhai chu Army, CRPF, BSF, State Reserve Police le NDRF han sansuokna le sawmdawlna sin an thaw.

Degree Certificate tehlem nei zirtirtu 3000 an inban
PATNA: Bihar State sawrkar hnuoia sawrkar school a thawk Zirtirtu, Degree Certificate tehlem nei mi 3,000 hai chun an sina inthawk inbanna an pek ta niin Education Department official thusuok chun a hril. Patna High Court chun Degree Certificate tehlema zirtirtu sin thawhai chu inban dingin an hriettir a, an inban naw chun an chungah legal action lak ding in thusuok a lo siem a, hi le inzawma teacher hai hi inban an nih.

Online Army Recruitment Sept. 1 a inthawk
NEW DELHI:  Indian Army­a lut nuom hai ta dingin September 1, 2015 a inthawk khin open recruitment ni lovin online recruitment thaw a ni ta ding a nih. Director Recruiting Col Davinder Singh chun, online application process hi September 1, 2015 hin tan ning a ta,  Army­a lut nuom thalai hai chun www.joinindianarmy.nic.in <http://www.joinindianarmy.nic.in/> fethlengin in registered thei an ta, online­a in registered hai chu  recruitment/ test neina ding hmun (place) le hun (date) hai biepawin an inhriettir hlak ding niin a hril. Hi thil hin hun le tha seng a suktlawm pha ding bakah inhlemna a sukbo pha beisei a nih tiin ei thu dawngna chun a hril. Websites hi 24x7 sung hmang thei ning a ta, hi website­a in registered ta hai chu  Army­a recruitment Cell in applicant hai kuoma information an pek el ta ding a nih. Hi lei hin in registered hai chun mani e­mail a en deu zing a tul bawk ding a nih.

HMAR FC ALL INDIA SOCIETY REGISTRATION PEK
NEW DELHI: Delhi tlanga India hmarsak State hrang hrang anthawka football pet thiem hai khelzawl North East Tamchon Football Tournament (NETFT) a zawna vawihni zet nopui vawr tah Hmar Football Club (Hmar FC) chun Societies Registration Act XXI of 1860 hnuoi­ah All India Registration alo hmu tah (Registration No. S/ND/676/2015 dated 28 July 2015).
  

India ram pumpui huopa Football Club pakhata inzieklut nasan khawm NETFT inelna kheltieng Football Club dang hai anga puitling tak a hung ni pei theina ding hmathlir nei leia sorkar hrietpuia inzieklut ani thu Hmar FC Organising Board hai chun an hril. Tuhin Delhi Soccer Association (DSA)­a inzieklut tum mek ani thu an hril bawk.
  
India ram­ah football ngaisangna a zuol pei leiin Hmar nauhai lai football tienga thiemna nei tam tak hai ta dinga kailawn ani theina ding le ei hnam chawisangna pakhat ani ve theina ding ngaituo leia hienganga hma lak a ni thu Organising Board hai chun an hril bawk.
  
NETFT hi kum 2007 anthawk khan kumtin huoihawt hlak a ni a, Hmar FC hin hi tournament a hin final tum 3 (2008, 2010, 2012) kaiin runners­up a lak a, kum 2013 le 2014 khan champhionship nopui a zawnin a vawr bawk a nih. Tukuma tournament hi November 21­December 5, 2015 sung nei dinga ti a ni a, Hmar FC in hrattak nina a chang nawk chun championship nopui hi a nei sawng ta ding a nih.
(Lalremlien Neitham)
-------------------------------------------------------------------------------------------------------
VAWISUN THUPUI
Mihriem inditnahai chu sukhnuoiin um a ta, mihai chapona chu suktlawmin um bawk a tih; chu nia chun Lalpa chau chu chawisangin um a tih.  ­Isai 2:17

Editorial
Lungril piengsuol

Mihriemhai hi ei taksa chau  a piengsuol theinaw a, ei lungril khawm hi a piengsuol ve thei tlat el. Ei lungril a piengsuol pha pha chun thiltha nekin thil thanaw tieng ei thaw lem hlak. Taksa piengsuolna angin ei lungril piengsuolna ruok hi chu a langsar  naw leiin hmu le h riet el chu a harsa hlak. Tienlaia ei pi le puhai lungril that dan le a thienghlim dan kha chu thangtharhai hin ei put phak ta nawha. Ei pi le puhai huna khan chu an bupanga bu miin an ruk chun inzakum le muolpho thlaka an ngai hlak. Tulai ruok hin chu a neituhai hriet lovin ei lut a, an huon thlai le a ra ei inruk pek a, Huon thlai ra a neituin ei chang hman ta nawh; ei lungril a va piengsuol ta de aw!
  
Tienlai mihai lungril that le thienghlim dan kha dit a umin ngai a um ngei el. Ei pi le puhai khan an bupanga bu miin an inruk chun, ‘e ka thiem naw a nih. ka khuo le veng fak ding bu tlasama um hai ka lo hriet fuk naw leiin an lo inruk an ta hi’ tiin ansie an inlaw ngai naw a, anni kha a thiemnaw lem, mi bengvar lo, pansak­ panthlang hai suong ding tlasama an um an hrietfuk naw a, an lo pek naw leia an buin rawk niin an lo ngai hlak. Tulai thangtharhai le ei pi le puhai lungril that le thienghlim dan kha chu  hnuoi le van kar inhlat ang a ni tah.
  
Pansak­panthlang le thenum khawveng han neinaw bik an ti ie ti kha an lungril put dan a lo nih. Kristien ei ni hma nekin inhmangaituona le inlunginsiettuona kha an lo nei lem hman hman a nih. Mihai sietna ding hirm hrim thaw an nuom ngai naw a; pansak­panthlang hai le inrem lova  um kha an thil nuom zawng a ni der naw a, an inremnaw ding nekin a thiemnaw lem le a chân lem an lo nuomin an ngam lem hlak. Tulai ruok hin chu an tanaw a, a thiem lem le an dik lem inchuin ei insel a, Court a chen ei inhek ngam ta lem a nih.
    
Ei pi le pu hai huna an khawtlang nun inhawi dan kha inhnar a um a, ngai a um hle; khawtlang inrelbawlna a felfaiin an lungruol a, khawlang nun an hawi em em hlak. Lal le Khawnbawl upahai kha khawtlang roreltu anni a, Zawlbuk kha thu tha le hla tha an inchukna hmun  a nih. Khawtlang pawi tawk le hril, mi um tha nuom lo chu Zawlbuka riek tlangval han an sawi hlak. An neka upa hai an inza a, an thu an sel ngai ngawh. An nunah ringumna le indikna a kawp tlat a, thingherin an In kawtkharpui an dokal el hlak. Company siem Tala an hmang ngai nawh.  Tulai ruok hin chu Company siem ngei Tala lien tak takin ei kal a, sienkhawm a him chuong ta nawh.
    
Ei sakhuona le inmawi lovin ei khawsa a, ei lungril a piengsuol ta  leiin nuhmei­pasalna ei hmang suol nasa leiin HIV/AIDS chen ei invawi a, thalaihai HIV/AIDS natna hriin a suot mek a, a la suot pei ding niin an lang. Ei lungril a piengsuol ta tlat leiin ruk inrukna, corruption, thamna, indiklo taka sum hmuhai, awlsam taka hausak thut hai khawm pawitina em em ei nei ta nawh. Kristien piengthar inti siin Pathien nekin a malsawmna ei ngaihluin ei ngaisak lem ta niin an lang.
            
Ei lungril a piengsuol ta tlat leiin hriselna le nitin mamaw chi tum tum hai nekin incheina thuomhnaw, rangkachak le motor hai ei ngaipawimaw lem a, a hausa le a akhawsa thei anga inlang ei nuom a, pawr tak le uongthuong takin ei che vel a, inzak a um. Ei lungril piengsuol leiin ei khawtlang, ei ram, ei insung a rinum a, khawtlang le sunghai ringzo ta lo ei va tam ta ngei de maw! Nitin Chanchinbu le TV haia khawm a tha tieng nekin a thanaw tieng, a mak le a danglam tieng chau ei tiem nuomin ei en nuom lem. Ei lungril piengsuol dan hi rapthlak takel a nih.
Don't Miss
© all rights reserved
made with by Simon L Infimate