Responsive Ad Slot

Hmasawnna Thar | 24 July, 2015

Friday, July 24, 2015

/ by VIRTHLI HMAR
SDO/CCPur thil a suksiet hai  Preliminary report   a pek
Minister le mi dang dangin Bufai le thil dang dang an pek tawl
CCPur: July 22, 2015 nia ruosur leia Tuithapui, Chiengkon le Lanva vadung hai luongliem le tuihawk let leia CCPur khawpui sunga thil a suksiet hai le inzawma SDO/CCPur in zanita Preliminary report a pek dungzui chun mani chengna in suoksan sungkuo 189 an um, hienghai lai hin Dorcas Veng, N. Lamka­ah 15, Gangpimual ah 10; Nazereth Veng 20, Zomunnuom50, New Zouveng 26, Ngulzen Veng 18, Kamdou Veng 10, Kerith Veng 5, Zion Veng - Tuibuong 10, Bungmual 2, Rengkai 4, Compound veng 10 le Others 10 an nih. Ruosur le tuiletna Village Authorities han report kimchang tak an la peklut naw leiin ruosur le tuilien leia harsatna tuor hi tuta nek hin an la tam lem el thei niin SDO/CCPur report chun a hril.
    


District Disaster Management Authority Respond Team chun zani zingkar khan ruosur leia tuilienin a sukbuoi khuo le veng iemanizat hai kanin a hmuna an enfel. Hi team a hin  Langkhanpau Guite, Chairman(caretaker); Mannuamching, CEO/ADC; TK Simte, AC to DC le S. Khaikhopau Ngaihte, BO HQ/DC office hai an thang a, Compound Veng, Phailian; Zoumunnuam; Hiangzou le Meitei Christian Leikai, Zenhang Lamka hai an sir a, Village Authority tin hai chu SDO/CCPur fethlenga report pe dingin an inhriettir.
   


District­in­Charge le Health Minister Phungzathang Tonsing in zanikhan thangpuina le sawmdawlna thil a pek tawl. Health Minister hin tuilien leia harsatna tuok nasa zuol Lanva le Zomunnuam area hai a hmuna sirin a enfel a, Zomunnuom khuoa In 59 vel hai  fak le dawn dingin an lalpa T. Pauchinkhup kuomah Bufai bag 20 a pek a, Lanva area­a In 30 chuong hai thangpina dingin Dorcas Veng Hall­ah Bufai bags 31 a semdawk bawk.
   
Minister chun, ruosur le tuilien leia harsatna tuortu hai ta dinga a beidawng um ding zie a hriethiempui thu hrilin District mipui hai chu tithawng lo dingin a thlamuon a, hma lak pei a ni ding thu a hril. Chun, 7­ Assam Rifles hai khawmin Lanva Area­a tuilien leia harsatna tuortu relief camp­a um hai Dal le Chini an pek bawk.
   
Pu Vungzagin Valte, Parliamentary Secy. & MLA/Thanlon chun, Lanva vadung tuilien leia harsatna tuortu  hai thangpuina dingin YPA Dorcas Veng le VA Dorcas Veng hai kutah Bufai bag 5 le Chini kg. 100 a pek. Chun, Lanva MDC T. Khaikhomang khawmin zanikhan Lanva Model H/S a tuilien leia harsatna tuor sungkuo 14 hai kanin bufai bag 1 seng a pek bawk.

Mobile Network thuah joint meeting an nei
CCPur: Churachandpur District sunga Mobile Network thalem hmu theina ding lampui ngaituoin zanikhan Mobile companies Aircel, Reliance le Idea haia inthawk Offiials hai le   Team CT Lian han zanikhan Sauliim Restaurant, New Lamka, CCPur­ah meeting an nei. Hi huna hin Mobile network thalem nei thei dan ding an hriltlang tiin ei thu dawngna chun a hril.

Rev. Nengzakhai Ngakul sungah a tla hlum
CCPur: Rev. Nengzakhai, f/o (L) Khamlunmang of New Lamka, Hebron Veng chu zani hmasa khan Ngakul sungah a tla hlum. A ruong hi zani ­hmasa zan dar 7:45 vel khan hmu le laksuok chau a ni a, zanikhan New Lamka­a YPA thlanmuolah a ruong hi vuiliem a nih. Rev. Nengzakhai hi kum 70 mi a ni ta a, kum sawt takel Grace Bible College­a Principal sin lo chel hlak, pension ta a nih.

Leadership Summit thang dingin Nagaland an pan
CCPur: July 24­26, 2015 inkar sung khin Assemblies of God of East India Leadership Summit, Dimapur, Nagaland hmuna a um ding a ni a. Hi huna thang ding hin AG Manipur District thuoituhai khawmin zanikhan CCPur suoksanin Dimapur an pan. Hi leadership Summit thupui chu ‘Essence of Emerging Christian Leaders’ ti a nih. Seminar hunah ‘Effective Leadership & Integrity, Effective Evangelism & Church Planting,Church Administration & Financial Management le Leadership Challenges  hai hmangin Rev. Dr. Samuel Raj, National Director, ICOM, Rev. Dilip Chhetri, Sr. Pastor, AG Church, Guwahati, Rev. T. Phesao, executive member AGI le Rev. Moses Murry, General Superintendent, AGEI  han paper present an tih.
   
Hi summit a hin North East India state 8 a inthawka AG hotuhai thang an tih. Manipur  a inthawkin Rev. (Dr) LH Jacky Simte, Superintendent, Rev. Rokhum Joute, Secretary, Rev. DL Thangboi, Asst. Supdt., Rev. K. Siama Haulai, Treasurer, Manipur District of AGEI hai bakah Vanlalhlun Traite khawm special invitee in thang v>ng a tih.

Headline
A zawnin ni 3 sung Parliament rorel thei lova sukchawl a ni tah
New Delhi: Zani khawm khan Lok Sabha le Rajya Sabha haia Selkaltu pawla members han Lalit Modi le Vyapam Scam chungthu haia inring tak taka kheka an sukbuoi leiin  Parliament Monsoon Session chu rorel thei lova sukchawl nawk an nih. A zawna ni 3 lai zet Parliament rorel thei lova an umna a ni tah. Lok Sabha Session chu sun dar 12 vela inthawka sukchawl a ni a, Rajya Sabha chu 2:10 PM vela sukchawl a nih. Parliament Session haia hin rorel thei a ninaw leia zanita dinga sukchawl an ni a, vawisun 11AM a inthawk hin session inthung sunzawm nawk ning a tih.
   
Selkaltu Pawl member­hai chun Lalit Modi chungchangah External Affairs Minister Sushma Swaraj le Vasundhara Raje hai inban ding le Vyapam Chungchangah Madhya Pradesh CM Shivraj Singh Chouhan inban raw seh tiin khau takin an ngiet a nih. Bahujan Samaj Party (BSP) member­hai khawma zanikhan a chunga mi 3 hai hi inban dingin an ngen ve.
   
AICC Vice President Rahul Gandhi chun, PM Narendra Modi chu Lok Sabha election, 2014 a Vote a campaign laia mipui hmaa “Corruption Free Government” indin dinga an  tiemna chu sukpuitling dingin a phut a; PM chu Lalit Modi le Vyapam chungthu haiah a bau an chip tlat a nih tiin an tum. Lalit Modi chungthuah External Affairs Minister Sushma Swaraj le Rajasthan CM Vasundhara Raje le Vyapam Scam chungthuah Madhya Pradesh CM Shivraj Singh Chohan hai an inban hmakhat Lalit Modi le Vyapam chungthu hai hi Inpui pahni haiah hriltlang thei ninaw nih tiin a hril. Rahul Gandhi hril ang bawk hin Left Parties le Selkaltu pawla thang party dang hai khawm an ti ve a nih.
           
Parliamentary Affairs Minister Venkaiah Naidu chun Sushma Swaraj, Vasundhara Raje le Shivraj Singh Chouhan han thawsuol an nei naw a, inban naw nihai tiin a hril. Parliament Session tluong taka a fe theina ding le hieng issues pahni chungchang hai hi tha taka hriltlang a ni theina dingin Selkaltu Pawl chu an thil thawdan tawpsan dingin a ngen a. Selkaltu Pawl tieng hlak chun an thil ngen sukpuitling a ni hmakhat an thil thaw dan an tawpsan naw ding thu an hril ve thung.

JCILPS hmalaknain Public meeting
Imphal: JCILPS hmalaknain ILP le inzawma Bill thar siemna ding thuah zanikhan Iboyaima Shumang Leela  Shanglen, Imphal­ah Public meeting nei a nih. Sawrkarin inbiek dinga a fielna thua chun ngaidan an kal nuoi a, resolutions 3 an siem a, chuonghai chu­ ILP thua bill thar tuta inthawka ni 15 sungin Assembly in an pass ding; Sapam Robinhood thinaa mawphurtu Police hai suspended ni rawhai seh; Bill thar siem dingah JCILPS Recommendation point 5 inthangtir ni raw se ti le Judicial Inquiry thla 3 sung ngeia zo ni raw seh ti hai an nih. Public meeting huna thang  ve  Union Ministry of Home Affairs­a Internal Security Advisor (North East Division),DrManoranjan Khuman chun Manipur state pumpui  ‘Hill state’ a puong tha a ti thu le Meitei hai chu Tribals a puong tha a ti thu a hril.

MDC Oath taking la nei lo han vawisun
Imphal: Manipur­a ADCs 6 haia inthlangnaa tling MDC dinga intiemkamna (Oath  Taking) la nei lo han vawisun hin Directorate of TA/Hills/ SC huoihawtnain TRI Hall­ah Manipur CM O.Ibobi Singh le Dy. CM Gaikhangam hai inrawinain Oath Taking Ceremony nei ni dingin ei thu dawngna chun a hril. Hi huna hin concerned DCs hai khawm thang seng dinga inhriettir an nih tiin Director, TA/Hills & SC, S. Minlianthang Vaiphei, IAS chun a hril. 

Curfew darkar 14 inthlazal nawk
Imphal: Hun tiemchin um lova Curfew puongna Imphal East le Imphal West District haia chun vawisun hin darkar 14 sung, zing dar 5 a inthawk zan dar 7 chen Curfew inthlazal a ni nawk ding thu zanikhan hieng District pahni haia District Magistrates han an puong nawk.

Motor an service naw ding
Imphal: ILP thua bill thar siem dinga JCILPS ngenna an thlawpnain Manipur­a Transporters Organisation 12 hai chu vawituk zing dar 4 a inthawk zantieng dar 6 chen an motor­hai an service naw ding a nih. Hi taka hin passenger Bus service­hai khawm a thangsa.

Delhi Law Minister hlui bail phal
New Delhi: Law degree tehlem leia Tihar Jail a intang Delhi Law Minister hlui Jitender Singh Tomar chu zanikhan Additional Session Jdge Vimal Kumar Yadav in personal bond Rs. 50,000 siea bail­a suok a phal pek.

National Broadcasting Day hmang
New Delhi: Zanikha National Broadcasting Day a ni leiin India ram pumpuiah hmang a ni a, All India Radio (AIR) chun New Delhi­ah “Creation of New India and Broadcasting Medium” ti thupuia hmangin Symposium a huoihawt. July 23, 1927 khan Indian Broadcasting Company indin tan a nih. Union Minister of State Colonel Rajayavardhan Singh Rathore chun Prasar Bharati chu autonomy pek a ni ding thu hi Day hmangnaa thu a hril huna a hrillang.

Phensedyl bur 9,300 man a nih
Agartala: July 22, 2015 khan Bangladesh a thawn lut tum Phensedyl (hritlang damdawi) bur 9,300, Rs. 27 lakh manhu zet chu Usha Bazar village­ah BSF, Customs le Police thangruol han an man a. Truck Driver le Handyman hai ruok chu an tlan hmang hman leiin man an ni nawh.

Pasal 1 sat hlum a nih
Aizawl:  July 21, 2015 sun dar 12 vel khan Thangrimawia (22) s/o Tualdala, Buang khuo, Salem venga khawsa mek chun AH & Vety Department Slaughter House bulah Malsawmtluanga (36) s/o Thanhlira, Salem Veng, Aizawl chu a sat a, Hospital panpui a ni a, sienkhawm a hliemna tuorzo lovin zanah a thi. Mi sat hlumtu hi Police han an man a, Central Jail, Aizawl­ah sielut a nih.

Tekin mi 4 a deng hlum
Kota: Zani hmasa zantienga ruo nasa taka a sur huna khan Rajasthan state a Jhalawar district a Kota Division sungah Tek a tla rawn hle a, mi 4 zet a deng hlum bakah midang 8  hai chu tek tla leia mei suokin a kang hliem. Thi le hliem tuokhai hi Lo a sin thaw laia Tekin a deng an nih.

Minister 3 lakluta Haryana Ministry suklien
Chandigarh: Zanikhan Haryana Chief Minister Manohar Lal Khattar chun thla 9 a upa a ministry chu Minister 3, Israma Krishan Lal Pawar, Ghan Shyam Saraf le Nayab Singh Saini hai lalutin a suklien. A ministry a suklien vawikhatna a nih. CM thangsain Haryana sawrkarah ministers 13 an um ta a, hi baka hin Chief Parliamentary Secretaries le Parliamentary Secretaries hai zani zantieng khan laklut dinga ti a ni bawk. Ministers a laklut hai laia pakhat Cabinet le pahni hai chu Minister of State an nih.

Uttarakhand CM’s Pvt. Secy. suspended
Dehradun: Uttarakhand Chief Minister Harish Rawat Private Secretary Mohammad Shahid chu Liquor Scam a inrawlna a nei tia intum a ni leiin a sina inthawk July 22, 2015 khan suspended a nih. BJP chun Mohammad Shahid hi liqour scam ah an rawl tiin Video ah an insuo. BJP thuoitu le Union Minister Nirmala Sitharaman chun Harish Rawat le a Private  Secretary, Mohammad Shahid hai chu an inrawl ve niin an tum.

Thawktu 1738 hrem an ni tah
New Delhi: January 2015­June 30, 2015 inkar sung khan sawrkar, banks, Central Public  Sector Enterprises (CPSEs), Financial Institutions le Autonomous bodies hnuoia thawktu 1738 hai chu Corruption le inzawmin Central Vigilance Commission in hremna a pek ta tiin Union Minister of state for Personnel, Jitendra Singh chun zani hmasa khan Lok Sabha an hriettir. Sawrkar thlungpui hnuoia thawktuhai chu an sinthaw dan izirin bonus pek anni el thei tiin a hril bawk.

PM in zanikhan SRI a hawng
New Delhi: PM Narendra Modi chun zanikhan Parliament House Annexe ah Speaker’s Research Initiative (SRI) a hawng. SRI hi Parliament members han mithiem bik haia inthawk thurawn tha lem an lakna dinga hawng a nih.

Kum 7 sungin CRPF mani inthat 228
New Delhi: Kum 2008­2014 inkar, kum 7 liemta sung khan mani le mani inthat CRPF Jawan 228 an um tiin zani hmasa khan Union Minister of state for Home, Kiren Rijiju chun Rajya Sabha an hriettir. Mani le mani an inthat elna san tlangpiu hai chu, thluok buoi, nun beidawng, mimal intheidana, insung harsatna thil, nuhmei nei infuknaw lei, mimal thil le a dang dang hai niin Kiren Rijiju chun a hril. July 22, 2015 khawm khan CRPF Head Constable L.R. Thakrey chu a posting­na hmun Chinkipora, Sopore area, Baramulla district, J&K­ah a service Rifle hmangin ama le ama an kap hlum. Sentry duty­a a um laia inkap hlum a nih.

Customary dress hak thei
New Delhi:  Central Board of Secondary Education (CBSE) chun July 25, 2015 khin All India Pre ­Medical Test (AIPMT) re­test huoihawt a tih. Hi test a thang ding han Customary dress hak thei an ta, Kutsebi, thi, Nabe, hnara inbuk chi, sana le thi aia be chi hai an inbel le mobile phone, bluetooth, earphone, hairband, kawnghren, lukhum le scarf hai exam hall­ah an chawilut phal ninaw ni a, puonbat le zakuo phawk hai hak phal lo a ni a, slipper bun ding a nih tiin CBSE chun dress code a siem.

Khawvela companies lien 500 hai lai
New Delhi:  Fortune Magazine in khawvela companies lien 500 a thlang khawm hai lai India rama Firms 7 an thang a, chuonghai chu Reliance Industries, Tata Motors, State Bank of India, Bharat Petroleum, Hindustan Petroleum le Oil and Natural Gas Commission (ONGC) hai an nih. Indian Oil chu ranks 119­nain a thang.

Khobragade ngenna Home Ministry in a hnawl
New Delhi: IFS Officer Devyani Khobragade in a nau nuhmei hai pahni (American nationals) hai dual citizenship (America le India ram mi nina) pe dinga a ngenna chu India ram danin a phal nawh tiin Home Ministry chun a hnawl pek. Hobragade hi kum 2013­a kha New York hmuna India Deputy Consul General sin a thaw laia US­a indiklo taka Visa thawa intum leia man a nih. India dan dungzui chun India mi nina nei dingin foreign passport le citizenship a surrender a tul thu official hai chun Khobragade hi an inhriettir niin senior official pakhat chun a hril. Khobragade a nau nuhmei hai hi India rama pieng an ni a, sienkhawm a pasal hi America mi a ni leia US Citizenship la an nih.
----------------------------------------------------------------------------------------------------------------
VAWISUN THUPUI
Tukhawm a lei le a bau veng tha chun, Buoinahaia inthawkin a lungril chu a veng tha a nih. Mi chapo le mi uong chu a hming chu Hmusittu a na, Inphuloin chaponaah sin a thawh a. ­
 -Thuvarhai 21:23­24

Editorial
Bawse tlanghai ei nih
Ei rama hin indikna le ringumna hi vadungpui angin luong huou huou dingin ei dit a, inlangtlang sawrkar dam,fakrukna le thamna umlo sawrkar dam, sawrkar tha (good governance) dam, rorelna indik sawrkar dam, dan palzutna um lo dam le sawrkar dam, Order le Notification zui hlak sawrkar cam le a dang dang hai hi ditin ei hril ri hlak a, a tak tak ruok chu ei hla hle niin an lang. Tuta inlangtlang sawrkar ei ti hi ‘dan anga thilthaw, hmu le hriet thei vawng” ni lovin, “dan lo anga thilthaw hriet le hmu thei vawng inlangtlang” a ni  ta tak awm ie. Ei thil dit hai hi a tha, sienkhawm a tak taka thaw ding chun ei dit tak tak naw bakah ei nuom naw tlang niin an lang.
   
Sawrkar sinthawhai hi an ringum a, an indik phawt chun minister amani, MLA amani, MP amani le Department hotu lu lawk zuolhai in amani an dit le nuom ang angin thil an thaw thei ringawt nawh.Nina hmasuona dan palzuta thil thaw nuom an lo um a ni khawmin mawphurna latu chun dan umsa an zain a zui ding le a ti lem ding a ni a; Dan hi ei hotu lawk tak ding a nih. Chuongang ni lova, hotu a ni leia dan khawm inza lova dan ang lova danlo anga inthawtir tumtuhai an za a, a thu zawma, a ti tlat chun dan palzuttuhai leh angkhat zing anni ding tina a nih.
   
Corruption dang tam tak a um theina san khawm hi sawrkar thawktu thenkhatin dan umsa pawisa lova dan ang lova thilthaw an pawm lei a ni rawp hlak. Minister amani, MLA amani, MP amani le Department hotu lawkhai an hlemlet a, an fakruk ti ri hung um hlak khawm hi, inthuruolpui an nei thei lei a nih. Sawrkar thawktuhai hin mihriem nekin dan hi tiin inza lem hai sienla chu, hlemletna hi a hung kiem thei ngei beisei a um. Hiengang dan kala thuawina hi thuawina thalo le indiklo, ei ram, ei hnam, ei khawtlang, kohran le Pawl tum tum han ei sietpui a nih.
   
Ei state annawleh India sawrkarin Order, Notification, Memorandum le a dang dang an suo rawp hlak.Amiruokchu,sarwkar ngei khawma hiengang Order,Notification, Memorandum an suo hai hi zui lo, zawm lo le sukpuitling lo tam takel a nei. Sawrkar Order le Notification inzaum lo hi ei rama a tam taluo a, a hrila hril seng ding a ni nawh. Ei state Manipur a lek lem hin chu Order, Notification le Memorandum inzaum lo, hmang lo le zui lo hi a tam zuol bik niin an lang. Law, rule le Act zui lo le h mang lo khawm tam takel a um. Hi lei hin Manipur in bandh, economic blockade, strike etc ei tuok rawp hlak a, tu khawm hin ei tuok mek a, ei la tuok pei ding niin an lang.
    
June 1, 2015 khan State sawrkar Order le Notification dungzuiin MDC election ei nei a. State sawrkarin Notification an suo dungzui chun ADC election process hi June 17, 2015 chena zo fel ding ti a nih. Nisienlakhawm MDC a thlangtling thar hai chun July 13, 2015 khan sesamna an nei thei chau a, sesamna la nei lo MDC thahnemtawk tak an la u m a, hienghai hin July 24, 2015 in sesamna an nei el thei ti a nih. ADCs 6 u m hai iengtik am sawrkarna ei state sawrkar hin an siemtir ding chu maw! Naga People’s Front (NPF) chu hi thua hin an lung a awi tanaw a, July 25, 2015 chena sawrkar insiemtir an ninaw chun July 27, 2015 ah a dodalnain Hill Districts sungah total bandh thaw an tum. State sawrkarin a Notification a bawsiet leia hi thil hi a hung um ding a nih. Iengang agitation am an la thaw pei ding chu!
           

Sawrkar chauin Order, Notification, Dan le dun hai hi a bawsiet nawh. Mipui le sawrkar thawktuhai khawmin an bawsiet. Kohran Pawl tum tum le Civil Organisaton hran hran hai khawma thu rel dam, in­thuoidan chi tum tum siemin ei nei tawl. Amiruokchu, hiengang dan ei siem hai hi zui lo le bawsiet  a ni hlak. Hieng a ni lei hin ei reng ku hin bawse tlanghai ei nih. An dem le an sawisel thei bik ding hi ei um der nawh, bawse tlang hai hi!
Don't Miss
© all rights reserved
made with by Simon L Infimate