Responsive Ad Slot

MILANO LE ZURICH KHAWPUI PANIN

Friday, July 24, 2015

/ by VIRTHLI HMAR
~ Prof. Lal Dena, Virthli Columnist

Milano hi Italy ram hmar tienga khawpui hlun le ropui tak a nih. Italy ram pumpui huop khawmin mipui tamna tak dawttu a kai phak. Middle Ages-a inthawk ta khan sum dawngna pawimaw le banking center a lo ni daih tah. Hun thar a hung intan khan France, Spain le Austria ramhaiin an hluo insawk a. Indopui II-na zo tieng khan Nazi sipaihaiin Milano khawpui hi an hluo a, chu laka zalenna nawrnaa Italian Resistance movement hmunpui pawimaw tak a nih nghe nghe.

Milano-ah hin khawvel hmun hrang hranga inthawka inpemlut an tam a. Kum 2011-a intiemna dungzui lem chun hi khawpuia mi paruk laia pakhat pei chu ram danga pieng an nih. A tawi zawngin, hi khawpui hi ramdang mi tamna tak a nih a. Tuhin London, Tokyo le New York hai ang bawkin hi khawpui hi leading global city ti hiela hriet a nih.


Hi khawpuiah hin tu kum 1st May-a inthawk 31st October, 2015 chena huopin EXPO MILANO hawng a nih. Hieng ang Expo khawvel pumpui huop hi kum nga dan peia khawvel hmun hran hrana thaw hlak a nih. Tuta tuma mi hi Milano Railway Station bul hmun lien taka Municipality of Milano le Milano Chamber of Commerce-hai huoihawt a nih. Khawvel rambung zasawmkuopangahaiin pavilion an nei seng a. Europe nipui hun inhawih lai tak a ni leiin hi Expo en dinga khuolzinmi an tam hle. Expo hma khawmin Milano-a inzin mi kum tin makteduoi riet neka tam an fe zie. Expo sung hin ieng zat khieu am an fe ding!

Hi Expo baka hin Milano khawpuia fe chakna rieu pakhat dang ka nei a. Ka Pu L.Keivom, India ram palai sin thawa a tuol lengna khawpui a lo ni leiin, ka phur pha a. Ama anga hla phuok thiem ka ni ve naw leiin, mi phuoksa 'Luahlo Lungdi' ti hla chang khatna kha keiletin hieng hin ka zuk inzawt ve khanglanga:

Ka rawn fan leh hmana in tuanna tlang,
Lauriere leh hortensia an vul leh ta;
In sul ihnu khuahrei an chang zo ta,
Hring leh thar hna nemten lo bawm.

Franca-a inthawka Italy pan ding hin rambung pahni fe tlang a ngai a. German ram phaizawl darkar khat kan hraw hnungin Switzerland kan tlan lut a. A hmaa ei hril ta ang khan, Switzerland chu tlang insang tak tak deuh ruoka sip a nih. Tipaimukh lampuia Kailam rawl anga insang dam kha hmun hni hmun thuma hmu ding a um. Hmun tam taka tlang le tlang karah dil lien tak tak a um bawk a. Tlang ram ni sienkhawm lampui chu a tlun thei  patawpin an siem a. Tlang sang hai chu hel loin, an ver peih. Basel, Switzerland-a inthawkin ka tiem pei a, Italy ramri kan tlung chenin tlangver sawmthum pasari a um. Chu laia a sei tak chu Gottard tlang ver a nih, kms sawmpasaria sei a nih. Hi tlangver hi Europe ram pumpuiah khawm a sei taka hriet a nih.

Italy hmar sak khuo chite Luino (a ram mihai chun Lu-i-no ti'n an lam) ah kan innghat a. Hi khuo hi ram dang mi Belgium, Germany, France, Holland, a dang dang (add)a inthawka nipui changa holiday hmangna hmuna an nei a ni tak. Inhal chu tlakden ten panga bawl an ni tawl a, Seoul khawpui a mi'n hrietsuoktir hiel. Chun hi khuo hi Lugo Marriogo dil kama um a nih. Hi dil hi Italy rampumpuia a sei tak dawttu a nih a, kms zarieta sei a nih. Tui inhlieuna hmun bik a um a, tui inhlieu thiem naw lang khaw, tum hni chu ka zun phum ve kha tie!

Luino-a inthawkin Milano panin railah kan chuong a, darkar khat kan tlan hnungin Milano kan hei tlung a. Darkar riet chauh hun kan nei a, Milano khawpui fang chu ti tak loa, pavilion khawm kan sir zo hman nawh. Costa Rica, Nepal, China, Bahrain, India, Bangladrsh, Venezuala, Vietnam, Laos, Russia, France, Iraq, Israel, Germany, Malaysia, Indonesia, Japan, ka hriet seng ta nawh, pavilion dang dang kan sir. Pavilion po po hin fak le dawn tienga hma lak dan an inentir tak. Korea-haiin hme suong dan chi tum tum video-in an inentir a. Seoul khawpuia ka lo um ve met ta leiin, "anyong haseyo" tiin ha heih chibai tawl kha tie. Babylonia "hanging garden" replica dam an bawla, a ropui fu chu tie. French-hai nawk thung chun a tak ngeiin wheat vui mek lai, vaimin sawn thlak mek lai, mantathur le thlai dang dang an inentir a, lo fang ang el ei nih. Pavilion lai po poa ka ngaisang tak chu Israel Pavilion a nih. Lut hma'n minit sawm Israel chanchin TV-a kan en hmasa a. Hall kan lut charin an thlaiching dan, thlaler ram tawl bu le thlai chitin reng an tharsuok dan video-ah  kan en nawk a, "Kan lo hmasuokin khawvel chawmsoa kan tum a nih" an ti chu! Ngaisang an um kher el.


Fe tawm ruoiin a ramchawngpuhai "Tomorrow's Super Market" kan la fang a. Chutaka vegetable table-ah chun thil inphun a um a; computer hmangin thlai chi dang dang, a man zat, vitamin le protein an kawl zat le calory an kawl zat iengkim thilphunah khan an ziek a. Sap rama zinga an bazar dan ding an lo thlir lawk dan a nih. Eini'n fak ding buoipuiin ei buoia, anni ruok chu hringnun siemthatna (quality of life) ah an buoi lem a nih! Ei inthlak khawp el. An hmasawnna hi ieng tik am ei hnawtphak ding!

Zan tieng dar ruk a hung inri tep a, Lu-i-no direct traina chuongin dit khawp lo takin  "VIVE LA MALINO" tiin Malino khawpui chu kan lo maksan nawk tah.

Zurich khawpui panin: Ka vuongna ticket kha Delhi-Zurich-Delhi a ni leiin Luinoa inhawk hin Zurich-a breakfast nang hman dingin zing dar rukin ka suok a. Hahat Melchior Haokip le a pasal Thomas-in in inhawih taking zing dar 9:30 velin kan heih tlunga. Ni ram le tuah khawm mani nauhai in ngeia tlung chu "Home Away From Home" a ni ringawt el. A zinga Thomas le ka nauhai pahni'n airportah an mi va'n thlaa, bieng inchuktuo zoin, ngai takin ka inthe "to meet again hopefully".

Delhi, Imphal le Churachandpura hai khawm selected people-hai chu bieng ka la'n chuktuopui tho, European hung-over la um tlat chu!
Don't Miss
© all rights reserved
made with by Simon L Infimate