Hmasawnna Thar | 18 July, 2015

Tuolsung

Ni 18 liem hnungah dama hmu : A nge a lo um tah

CCPUR/PHERZAWL: Ram suoka fe Mr Ruolthangsei (25) s/o Daniel of Pherzawl, a umna chin hriet lova ni 18 zet inhmang ta chu zani (July 17, 2015) khan Tinsuong ramah dama hmu a ni a, zani zan khan Pherzawl phurtlung a nih. Mr Ruolthangsei hi a la tawng thei bakah a lan nui pei a, sienkhawm a taksa pumpui hmun tam takah a nge a um ta tlat leiin zani zan khan a nge hai kheldawk niin Lalropui Songate of Parbung a inthawk ei thu dawngna chun a hril.

            

Ama hi June 29, 2015­a kha silai  chawia ramsuoka fe a ni a, Ni 7 sung zet chu nitin khawtlang mipuiin an zawng a, sienkhawm an hmu zolo a nih.

Suicide Prevention Awareness Campaign nei

CCPUR: 16 ­New Lamka West MDC CT Lian; Church leaders; Lainat Counselling Centre le  ZEO/CCPur hai thang­ruola huoihawtnain July 17, 2015, 11:00AM  khan EBC Centenary Hall, New Lamka­ah ‘Hon hilh in Hon Huh ding ka hi’ ti thupui hmangin “Suicide Prevention Awareness Campaign in tune with RTE Act 2009” nei a nih.  Program hi Pastor M. Ginzatun in tawngtainain a hawng a, T.Goukhomang, ZEO chun RTC Act ti thupui hmangin thu a hril a, Rev Kamchinkhup, Director of Ministries, EBC chun Social Life & Christianity ti thupui hmangin le Miss Muani Tombing in Depression & Psychology ti thupui hmangin thu an hril tawl bakah CT Lian, MDC  khawmin thuhrilna hun a hmang.

    

C.T. Lian, MDC in thu a hrilnaa chun, inngaisietna leiin mi tam takin thangpuina an mamaw  a, thangpuitu an manaw laia thangpuitu ding umnaw leiin mi an inkhaihlum hlak a nih tiin a hril a. Team CT Lian in study thawa an suinaa inthawk tukum sung ringawt hin student 26 hai chun an thil suksuol hai sukdik le siemthat nawk thei talo dinga an in ngaina le inngaisietna leiin an inkhai hlum ta ti an hmusuok a. Khawvel­a mihriem hai hi tukhawm thil suksuol lo ei um naw a, thawsuol chu suk­that nawk thei a ni thu hrilin mani thawsuol tuornat leiin mi tam tak inthatin an inkhaihlum rawp hlak thu a hril.

    

Hi programme hmangnaa hin School tum tum­ Phungkhothang govt H/S; Rengkai Govt. Hr. Sec. school; Rayburn H/S; Donbosco Hr. Sec. school, Sielmat Chr. Hr. Sec. School le Vimala Raina H/S haia inthawk student tam tak an thang.

    

Team C.T. Lian chun issue dang dang haia beidawnga inngaisietna nei hai ta dingin iengtik huna khawm rawn thei an ni thu lekhaziek an thedar­a chun an ziek lang a. Social issue­ah C.T. Lian MDC @ 8974225922/ Faith base issue­ah K. Kamchinphup, Director of Ministry, EBC @ 9436622882 le Psychological & Biblical issue­ah Muani Tombing, Director, Lainat Ministry @ 8119041094 haia biek thei ning an tih.

Suma thangpuina hni thei

CCPUR: Government Training Centre/Institute a thla 5 neka tlawm lo training nei tasahai ta dingin Assistance to Individual Artisans,2015-­16 le Modernisation of Handicrafts, 2015­16 Scheme hnuoiah hmangruo inchawkna ding sum ngen thei a nih. Thu chieng lem DIC, CCPur a hriet thei le Application form www.dcimanipur.gov.in ah download thei a nih. Application Form peklut theina hun nuhnung tak 25/07/2015 a nih.

T. Manga Vaiphei in Leilak a hawng

CCPUR: Pu T. Manga Vaiphei MLA/Henglep le Chairman, MTDC chun July 17, 2015, 1:00PM khan Leimatak Power House bul laia Leimatak leilak daw zo thar hawngna a nei a, Pastor D. Thangsei, Area Pastor chun Pathien kuoma tawng¬tainain an hlan. Leilak hawng thara um hi ft. 150 a sei niin 2009­10 SPA Fund Rs. 310.53 lakh senga bawl a nih. Hi leilak hi Composite Super Structure RCC Bridge dinga proposal anga sin tan a ni a, sienkhawm remchang lem dinga hriet a ni leia May 17, 2015 a kha Baily Bridge a siem nawk ta lem a nih.

ITI Interview thul

CCPUR: Industrial Training Institute (ITI) Saikawt hnuoia Trade tum tum training ding lakna dinga Interview July 20, 2015 nia nei dinga ti chu ILP leia Imphal tienga buoina fe mek leiin la thul hri phawt a nih tiin ITI, Saikawt official thusuok chun a hril.

Torch Rally nei tum thul a nih

CCPUR: Meitei Society/CCPur hmalakna hnuoia zani (July 17, 2015) zana Inner Line Permit (ILP) ngenna fe mek le inzawma CCPur khawpui sunga Peace Torch Rally nei an tum chungthuah zani zantieng 3:00PM khan Mr Lunminthang Haokip, DC, CCPur inrawinain a Office chamber­ah joint meeting nei a ni a, hi huna SP/CCPur bakah pawl tum tum han thul dinga an ngenna leiin Torch rally nei tum chu an thul tah.

    

Meitei Society chun an thil rawt le iengkim sukfel tasa sukpuitling lova um chu an ta dinga thil inzakum a ni ding thu an hril a, sienkhawm Organisation tum tum thuoitu hai chun Manipur­a ILP a um an dit seng le an thlawp thu hrilin, zan ni lovin sun huna rally nei tha an ti thu an hril tawl a. Tulai law & Order ngirhmun khawm hril tlang a ni a, zan huna chun buoina tlung thei a ni leiin sun huna nei lem ding le Imphal tiengpang le inkawpa rally khawm sun huna nei lem dingin an ngen a, chu le inzawma zan huna rally nei tum hi an thul a nih.

Headline

July 20 a inthawk Private School­hai hawng tan ding; DESAM in Manipur High Court­ah PIL an file

IMPHAL: All Manipur Private Recognised Schools Welfare Association (AMPRSWA) in  Uripok Khaidem Leikai, Imphal­ah meeting an nei a, July 8, 2015 a inthawka Imphal East le Imphal West Districts sunga Private Recognised Schools khar tana um ta hai chu July 20, 2015 a inthawk hawng tan nawk ta dingin an rel. School­hai hun sawt tak khar a ni chun students han an lekha inchukna kawngah an bahla pha ding a ni a, a bikin HSLC Examination, 2016 a thang ding students han harsatna nasa tak tuokin an syllabus an zo hman naw ding a ni leiin School hawng tan nawk vat chu thil tul makmaw a nih tiin AMPRSWA chun an hril. Private School­a Zirtirtuhai le student­hai chu July 20, 2015 a inthawk school kai tan nawk seng ta dingin AMPRSWA chun ngenna le inhriettirna a siem.

    

Hieng laizing hin Manipur sawrkarin July 8, 2015 a inthawka Imphal East le West District haia hun tiemchin um lova School­hai kharna thuah zanikhan Democratic Students Association Manipur (DESAM) chun Manipur state sawrkar chu High Court of Manipur­ah Public Interest Litigation (PIL) an file khum. Zanikhan an Office­ah DESAM Executive le Central Committee meeting an nei a, School­hai hun tiemchin um lova khar hin inchuklai sang tam tak hai lekha inchukna a sukbahla ding a nih tiin PIL hi file dinga an rel niin DESAM thusuok chun a hril. Imphal East le West District sunga Govt. le Private School­hai chu JCILPS pawl chetna leia buoina suok leia curfew puong a ni leia state sawrkarin tiemchin um lova a khar tan a nih.

Curfew darkar 13 inthlazal nawk

IMPHAL: Zanikhan Imphal East le West district haia District Magistrate­hai chun hieng district pahni huop sunga hin vawisun khawm hin Curfew darkar 13 sung, zing dar 5 a inthawk zantieng dar 6 chen inthlazal nawk a ni ding thu an puonglang. Zani khawm khan darkar 6 sung Curfew hi inthlazal a ni a, Curfew umnaw sung buoina suok hriet ding a um nawh.

July 20 a inthawk MSSA in ceasework strike

IMPHAL: JAC of AMTUC le AMGEO a Unit pakhat Manipur Secretariat Services Association (MSSA) chun July 20, 2015 a inthawk khin an sinthaw chawlsana nuorna nei tan dingin zanita Conference Hall, Manipur Secretariat, South Block, Imphal a MSSA General Meeting chun an rel. JAC of AMTUC le AMGEO thil ngen pek chu sawrkar thawktuhai kuoma in surrender­na ang a nih tia Assembly Session­a a hril chu an ngaimaw hle thu hi meeting hin an hriltlang.

Id­ul­Fitr le Ratha Yatra

IMPHAL: Vawisun hin Manipur a Muslim sakhuo zui han Id­ul­Fitr hmang an tih. Thla khat zet bu an nghei hnunga hi Kut hi an hmang ding a nih. Chun, Manipur a Hindu sakhuo zuitu han vawisun hin Ratha Yatra Kut hmang an tih. Hieng Kut pahni hmangtu dinghai po po Manipur Governor, Dr Syed Ahmed, CM O.Ibobi Singh, Dy. CM Gaikhangam le Assembly Speaker Th. Lokeshore Singh han ditsakna chibai an buk tawl.

Motor eksiden­a hliem hai AR han an sansuok

IMPHAL: July 17, 2015, 6:20AM vel khan 45 Assam Rifles patrolling­a fe hai chun NH­02­a  Khongampat village bul lai Tata Winger eksiden­a rawla tlanliem an va tuok fuk a. Motor eksiden tuok sunga suok thei lova intang hliem hai chu an sansuok a, first aid pein Imphal an hung phurtlung. Tata Winger hi Sekmai­a inthawka hung tlan a ni a, a sunga hin passenger mi 19 an chuong a nih. Passenger hliem hai chun 45 Assam Rifles chunga lawmthu an hril. Eksiden­n hi Commandant khawmin a hmuna a va enfel tiin zanita Assam Rifles thusuok chun a hril.

    

Chun, Major General VS Sreenivas, VSM**, Inspector General Assam Rifles (South) Id­ul­Fitr  hmangtu hai popo chibai a buk.

Mizorama Congress spokesperson 2 an inban

AIZAWL: Mizoram Congress Party spokesperson pahni,David M. Thangliana, Secretary, Media Department, MPCC sin chel lai le James Thanghmingmawia hai chun an sin haia inthawka an inbanna lekha Mizoram CM le MPCC President ni bawk Lalthanhawla kuomah an pek. Mizoram Congress chanchinbu ‘Congress Thlifim’ ah Mizorama Zu khapna hlipa a um sawiseltu Pastor­hai hming an chanchianbua hin pelut dingin an insuo a. Hi thua hin sawisel an hlaw hle a. An pahni hin Thlifim Publishers anni a, inhawi an tinaw leia Publishers an nina haia inthawka inban niin ei thu dawngna chun a hril.

Lungmeihawl, ruo le thing man

SHILLONG: Smugglers han Bangladesh rama tawllut an tum Lungmeihawl bags 3000 (kgs. 150,000), thing at ding (beams) 152 le ruopum 1,100, Rs. 25 lakh manhu zet chu 132 BSF han Baghmara Border Outpost bula July 15, 2015 zan khan an man a, Smuggler­hai ruok chu an tlan hmang hman. Hieng thilhai hi Simsang vadunga an tawl laia man a nih tiin BSF thusuok chun a hril. Simsang vadung hi South Garo Hills sunga mi a nih.

Myanmar mi heroin gram 82 le man

AIZAWL: Zanikhan Mizoram Excise and Narcotics Department thawktu han Lalmawia of Rihkhawdar, Myanmar chu Aizawlah Heroin grams 82, Rs. 3.69 lakh manhu leh an man niin Department Spokesman Peter Zohmingthanga in a hril.

CRPF jawan in an hotupa a kap  hlum

GUWAHATI: Zanikhan Assam­a Nalbari district­a Badrakusi­Tihu area­ah 136 Bn. CRPF a mi hai patrolling­a an fe laiin CRPF Head Constable Amal K Das chun an hotupa (CRPF Officer) pakhat a kap hlum bakah a ruolhai (CRPF jawan) 4 a kap hliem. A kap hlum CRPF officer chu  Assistant Sub­Inspector (ASI) DC Bandolai a ni a, hliem hai chu constables Mohale Janardan of Maharashtra le Diganto K Banya of Assam, Head Constable Dayaram Bandaloi le ASI Nirmal Das hai an nih. Amal K. Das hi ama le ama inkap hlum a tum a, sienkhawm a ruol dang han an dang hman leiin an kap hlum hman naw niin senior CRPF officer chun a hril. Hi thil tlung hi Court of Inquiry thaw dingin CRPF chun Order an suo.

KPLT C­in­C le Dy.  C­in­C an inpe

DIPHU: July 16, 2015 khan mak le danglam takin Karbi Anglong Peoples Liberation Tiger (KPLT) Commander­ in­ Chief Swaran Killing le Deputy Commander­ in­ Chief Pangri Timung hai pahni chu Outgoing SP, Karbi Anglong, Anglong MJD Mahanta kutah AK­56 Rifle pakhat leh an inpe. Muongna tluongtling a hung um theina dingin an cadres, ama command­na hnuoia mihai chu an la hung inpe vawng ding thu le an pawl chu sukbo a ni ding thu Swaran Killing hin media hai hmaah a hril.

Army Chief Nagaland­ah a hung inzin

DIMAPUR: Indian Army Chief General Dalbir Singh Suhag chu zanikhan Dimapur, Nagaland­ah a hung inzin a, Army Officer le Army Jawans hai an hmupui a, Nagaland a Security ngirhmun a ennawn.

Enfel dinga inlang an um nawh

AIZAWL: North Tripura huop sunga Asapara Relief camp­a Bru um hai lai Mizoram mi indik tak Bru an um le um naw enfel dingin Identification Camp ni 5 lai hawng a ni ta a, sienkhawm zani hmasa chen khan inenfel dinga inalng pakhat khawm an la um nawh tiin Lalbiakzama, Additional Secretary (Home), Govt.of Mizoram chuna hril. Kaskau,Khakchangpara le Hamsapara Relief Camp haia khawm enfelna camp hi hawng a lo ni ta a, pakhat khawm an lang an um nawh. Mizoram Bru thuoikir ding zata riruong hi mi 3,455 lai an nih.

Zangnadawmna Rs. 14,95,000 pe dingin

NEW DELHI: Uttar Pradesh state a SBD Govt. Hospital a nau 4 nei ta Neelam Gupta chu a blood group B. negative a ni laiin B. positive thisen an pek leiin a hriselna a suksiet pha leiin National Consumer Dispute Redressal Commission (NCDRC) chun Neelam Gupta hi zangnadawmna Rs. 14,95,000 pe dingin SBD Hospital, Saharanpur chu thu a pek.

Nagaland­ah Duma siem thil khap

KOHIMA: Nagaland state sawrkar chun duma siem thil hrim hrim zawr, laklut, semdar le siekhawl a khap vawng. Hi khapna thupek bawsetuhai chu Section 59 of Food Safety and Standards Act, 2016 dungzuia hrem ning an tih tiin M.Patton, Food Safety Commissioner, Government of Nagaland chun Food Safety and Standards (Prohibition and Registration on  Sale) Regulations, 2011 dungzuiin inhriettirna a siem.

NE sukhmasawnna dingin Rs. 92,000 crore

NEW DELHI: July 15, 2015 a New Delhi­a PM Narendra Modi in NE  CM­hai an hmupui tum  khan NE biel sukhmasawnnaa hmang dingin sawrkar thlungpuiin Rs. 92,000 crore a riruong tiin a hril. Hi laia Rs. 35,00 crore chu Special Accelarated Road Development Programme (NE) a ding a ni a, Trans­Arunachal Highway (6,400 km vel) siemnaa hmang ning a ta, Rs. 57,000 crore chu NE biela railway network thar siemnaa hmang ning a tih tiin Modi chun a hril.

Naga chungthu chingfel dinga hmalak a nih:Modi

NEW DELHI: Nagaland CM T.R. Zeliang le Nagaland MLAs 18 han July 16, 2015 khan New Delhi­ah PM Narendra Modi an inhmupui. Naga politial chungchang hi sawrkar thlungpui chun chingfel tumin dilsut tak le ngaipawimawa neiin hma a lak mek a nih tiin PM Narendra Modi chun Nagaland CM le MLAs 18 hai a lo hril tawl. Chun, sawrkar thlungpuiin NE biel sukhmasawn chu a sawrkar thiltumhai laia thangsa niin a lo hril tawl bawk.

PM kuomah lekhathawn nuoi 2

KOKRAJHAR: All Bodo Students Union (ABSU) hmalaknain Bodo students 2,00,000 velin Bodoland state hran ngennain PM Narendra Modi kuoma Hindi le English tawnga ziek lekhathawn nuoi 2 vel zet an thawn a, hienghai laia lekhathawn 50,000 hai chu Kokrajhar town a inthawka thawn an nih. NDA Govt. in an thil ngen hi a sukpuitling pek ngei an beisei thu ABSU General Secretary Lawrance Islary chun a hril.

Nuhmei naupang kum 10 mi suollui

AGRA/MATHURA: July 15 & 16, 2015 zan inkar khan nuhmei naupang kum 10 mi nunrawng taka suollui a nih. Hi thil tlung le inzawm hin pasal pakhat Police han an man. Doctors han nuhmei naupang hi suolhrawn a ni an ring. Nuhmei naupang hi nau fahra, rela inthawka tla thla, a ke changtieng ru relin A hrut tliek leia Govt. Railway Police (GRP) han May 21, 2015 nia Mathura Hospital­a an va admit, a ke tanbawng leia Mathura Hospital­a enkawl mek, dam fel tep ta le lungril kimlo niin Hospital authorities han an hril.

Chief Security Advisor dingin Neeraj

NEW DELHI: Kum thar khin India chun T­20 World Cup (Cricket) Tournament a mikhuol ding a ni a, hi le inzawma T­20 World Cup 2016 Chief Security Advisor dingin Delhi Police Commissioner hlui Neeraj Kumar ruot a nih. Chun, Board of Control for Cricket in India chun General Manager (Cricket Operations) dingin Dr M.V. Sridhar; Principal Coordinator dingin Amrit Mathur le R.P. Shah chu Tournament Manager (Financial) dingin a ruot tawl.

Nigeria rama bomb puokah mi 49 an thi

GAMBE: Zani hmasa khan Nigeria rama Gambe town ah a zawnin bomb vawihni a puok a, mi 49 an thi bakah mi tam takin hliemna an tuok. Bomb pahnihai hi Bazar mi tamna hmuna puok an nih. Bomb hi Boko Haram pawl sukpuok ni dinga ring a nih.

Vawk hawnin naute 1 an fak

MAHBUNAGAR: (L) S. Narasimlu of Devarakadra Mandal, Andhra Pradesh state huop sunga Balusupally village chun a naute thla 5 mi, nuhmeite le a unu kum 11 mi hai chu an insungah maksanin sinthawin a fe san a, hi kar hin In sungah Vawk hawn an lo va lut a, Vawk ruol chun naute thla 5 mi le a dawntu a unu hai chu an bei a, khawlai Vawk (stray pigs) hai chun naute hi an se hlum a, a hring pumin an lo fak zo hman tep niin Police Sub­Inspector Vinay Kumar chun a hril. Hi thil hi July 16, 2015 nia kha tlung a nih.

-----------------------------------------------------------------------------------------------------------------

VAWISUN THUPUI

Ei Lalpa Isu Krista hmingin, Pathien, Pa ngei kuoma chun, iengkim chungah lawmthu hril ro. Krista ti dekin intuklut tuo seng ro. ~ Ephesi 5:20­21

Editorial

Ruoithe

Zohnathlakhai hi hnam hnufuolhai laia kawng tinrenga hmasawn hrat pawl tak ei ni awm ie. Incheina thila dam, in le lo bengbelna kawnga dam, fak le dawn chungchanga dam, lekha inchukna kawnga dam, thu le hla haia dam, loneina kawnga dam, politics thila dam, sin zawngna  thua dam, khawsak relbawlna kawnga dam, thienghlimna thua dam, sumdawngna thila dam, sakhuona thila dam, mobile phone hmang kawnga dam, computer, internet le thil dang dang haiah namen lovin eini phutawkah hma ei sawn ta a, ram hmasawn khawsak le khawthlang ram hai leh danglamna bek bek ei nei bik ta naw leiin lawm a um ngawt el. Amiruokchu, pi le puhai chena ei lo ching thang ta “Ruoithena” kawnga hin hma ei la sawn nep hle.

    

Ruoithe hi hlim a um a, a tlai thlak a, inhawi khawm an hawi bawk a, a thatna kawnga chun a tha khawp el. Hlimtlang taka a khaw pumpui bakah ruoltha, milien le milal, a pasie le a hausa huopzo taka ei hang buoi map map el hi hlim thlak takel  chu a ni hi tie! Amiruokchu, ei ruoithe dan hi ei ngaituo chik ngai am aw! Krismas le Kum thar ruoithe dam, hlawtling lei le lawm leia ruoithe inzawm tlat anga ei ngai hlak hi ngaidan indik tak le thaw dan tha tak ning a tim aw!

    

A hmasain ei ruoithe dan hi lo ngaituotlang inla. A thatna tam tak um sienkhawm a thapa tak a ninawna lai khawm a um. Ei khawp tawk neka tam, ei fak seng naw hle ding khawp ei siem naw chun khawp lo le indai lova ei inngai tlat el. Bu le sa ei pei hi ei fak zat ve vel ding lai a ni hlak, hi lei hin ei ruoithe dan hi a hau an tak a, seng thlawn ei hau taluo. An hnik an phak ding ang hlakin ruoithena a hin ei fak hlei thei si nawh.

    

Ruoithe hi hmasawnna, changkangna, hlimna le lawmna sukfamkimtu a ni si nawh. Chu nek chun a nuor le a pheng suktamtu a nih. Hi baka hin a lawm naw pawl, a tling naw pawl le a hlawtling ve lo hai lungril natna an tlun lem nawk nghal hlak si a. Lawm rawp ding ei ni thu le lawmna chang hriet rawp ding a ni thu chu ei Bible khawmin a mi hril. Hlima lawmna chang hrie ding chu ei nih. Amiruokchu, ruoithea lawm hlak ding ruok chun a min fui tawl nawh. Ami siemtu, a mi petu le a min hlawtlingtirtu Pathien kuoma  lungril taka lawmthu hril hi a huntawk hle el an naw maw?

    

Mipui a zatel le a sangtel fak dinga ruoithena a hin sum seng hi a tam nuom hle. Tulai lem hin chu ran man a to ta hle a, bawng, vawk le Siel hai chu a singtel man a ni ta a. Mi zatel le a sangtel fak khawp ding chun sum cheng nuoitel a tul ngei ngei hlak. Hi baka hin tha le zung ei seng nasa hle hlak. A sawl zuol bik le a seng tam zuol bik an um ngei ngei hlak bawk. Chu thil chun mihriem hlimna le lawmna tak tak an tlun ngai nawh. Ruoithena dinga thawlawm thaw le ran tuokhai ku hi beisei neia thil thaw an ni hlak chu tie! An beisei ang an hmu naw pha a mi demtu, a mi khingtu le hmelmain an inchang nuom hlak.

    

Ruoithe hi a tha pumhlum, hmasawnna le changkangna bulpui, thiltha tak le thaw ngei ngei dinga tha nisienla chu ram changkang, hnam var, ram hmasawn ta le hausa hai hin an lawm chang, an hlawtling chang, thlangtling le an sang lema hlangkai anni huna ruoithein an lawm mup mup ve hlak ngei ring a um. Ruoithe hi a thanaw hulhuol ei ti der nawh. Thil iengkim hin thatna le that nawna lai an nei vawng. Nisienlakhawm ngun taka ngaituo chun a thatna nekin a thatnawna a tam lei ruok hin chu ching zui pei dingin a tlak naw niin an lang.