Tuolsung
Digital
India Week kharna le lawmman semna
CCPUR: July 1, 2015
nia PM Narendra Modi in a lo tlangzar Digital India le inzawma July 2, 2015 a
inthawka District Level Digital India Week hmang tana um kharna le competition
neia um haia lawmman semna July 7, 2015 khan District Training Centre (DTC),
Tuibuong, CCPur hmuna nei a nih.
Painting Competitiona lawmman latu hai chu 1st. Lunminlen, Class VIII, 2nd Brigite Lalringdik Class VII of Young Learners School le 3rd. Selena Kholneingah Class VIII of Gandhi Memorial H/S hai an nih.
Quiz
Competitiona lawmman latu hai chu 1st Vision Academy a inthawk Lalparvul le
Lamthienbel; 2ndah NIELIT a inthawk Henminlen le Thangchungnung le CCPur
Collegea inthawk Khaikhopao Haokip le Lamchonghoi hai an ni a; 3rd chu
Donbosco Hr. Sec. Schoola inthawk William H. Paumuansang le P. Kapbieklien
Gangte hai an nih. Lawmmanin
lekhabu an dawng tawl.
Govt.
School hai inspection a thaw ding
CCPUR: L. Thahgen,
Director, Ministry of Health and Family Welfare, Govt. of India, New Delhi chun
July 9, 2015 a inthawk khin CCPur district sunga Govt. Primary, Upper Primary,
Secondary le Senior Secondary schools tum tum hai inspection a thaw ding niin
ei thu dawngna chun a hril. L. Thahgen hi MHRD and MOHFW in Swachh Vidhyalaya
Abhiyan thu le inzawma sawrkar hmalakna hai enfel dinga hung tir (deputation to
states) a ni a. Concerned ZEO chu school inspection a thaw ding haia
Headmaster/Principal staff hai inhriettir hmasa dingin an hriettir.
July
8, 2015, 2:40PM in Tulihal airport hung tlung a ta, hi mi ma hin CCPur district
hung pan a ta, School tum tum a sir zo July 13, 2015 in CCPur a inthawk Imphal
pan nawk a ta, hi ni 7:45PM in New Delhi pan nawk a tih.
P.
Tongthang in lampui sietna hai a siem
CCPUR: Mr
P. Tongthang, Special Contractor chun mipui hmakhuo ngaina leiin ChuraSugnu
Road, CCPur Police station a inthawk Rengkai khuo inkar lampui siet zuolna le
an khurna hmun hai Shaktiman Truck 5 le Tripper 3 hmangin lungnawi sungin
lampui siemruolna sin a thaw. Zanita a la thaw hman nawna hai zo a ni hmakhat
sunzawm a ni ding thu P. Tongthang chun a hril a, Lampui siet zuolna hai
siemthatna hin Truck 100 chuong a lut a ring thu a hril.
Pasal
pakhat ama le ama an kap pal
CCPUR: Lallungkham
(35) h/o Zaithangpui of Tinsuong chu a ruolhai le an ramsuokna hmunah a
silai chawiin ama le ama a kawngah an kap hliem pal a, July 6, 2015 chawhnung
dar 1 vel khan District Hospital, CCPur phurtlung le hi Hospitala hin enkawl
mek a nih.
Lottery
sum Rs. 4,62,090 a tlan hmangpui
CCPUR: Mr
Kamkholen @ Lelen of Salbung village chun August 22, 2014 khan Khoupum Village,
Tamenglong Districta Public Lottery sum Rs. 4,62,090/ a tlanhmangpui tiin Mr
Gaipumcham Phaomei s/o Amurei of Namkakong Pt.I Khoupum, Tamenglong District
chun July 6, 2015, 3:30PM khan CCPur Police stationah report a pek. Hi le
inzawm hn CCPur Police chun FIR No. 58 (7) 2015 CCPPS U/S 420 IPC an
registered a. Thil tlungna hmun CCPur Police Jurisdiction a ninaw leiin a case
hi OC Khoupum kuomah an peklut.
ZEO
in DI hai an hmupui
CCPUR: Mr T.
Goukhomang, ZEO, CCPur chun zani zantieng khan DI of Schools hai meeting a
neipui. Hi huna hin State Award for Teachers le Mid Day Meal chungthu hai
hriltlang a nih. State Award for Teachers a dingin DI hai chu an
hnuoia mi Award hmu tlaka an ngai hai thlangsuok dingin an hriettir a, Mid Day
Meal chungthua chun State sawrkar in Inspection a hung thaw huna mani school
hmun chita um dingin DI hai an hriettir.
MTRFD
in 6th Schedule thua thangruol dingin a ngen
CCPUR: Manipur
Tribal Rights Forum Delhi (MTRFD) Manipur Chaptera Coordinator Mr K.
Paukhansuan chun July 7, 2015, 10:00AM khan Manipura ADC hai 6th Schedule
thuah Nehru Marg hmunah press conference a ko a. K. Vungzalian le N.
Songchinkhup hai hun laia inthawk Manipur tlangram haia 6th Schedule sie dinga
ngenna tan ta le, a la fe pei thu hrilin, tulai hnai khan MDC han Union
Minister tum tum inhmupuiin Memorandum an pek thu a hril. MTRFD khawmin July 6,
2015 khan Manipur Governor le Chairman, Hill Areas Committee hai kuoma
memorandum an pek thu, Manipur ADCs hai 6th Schedule hnuoia sie dinga Ministry
of Home Affairs, Govt. of India in May 7, 2015 nia Manipur Chief
Secretary kuoma inhriettirna hung pein Rajya Sabha secretariat a
Assuarance Committee ah khuo iengzam a huop ti kim taka sawrkar thlungpui pe
dingin Manipur sawrkar an hriettir thu a hril a, sienkhawm Manipur sawrkara
inthawk dawnna a hmunaw leiin May 28, 2015 khan reminder a hung
thawn nawk a. Rajya Sabha Assurance Committee in June 17, 2015
chena dawnna a um nawknaw leiin September 17, 2015 chen thla 3 sung hun a pek
nawk a nih tiin a hril.
Manipur
tlangram hai 6th schedule hnuoia sie a ni theina dingin hnam tum tum a
Organisations tum tum,leaders le student organisation hai bakah MLA, Minister
hai le thangruolin sawrkar kuoma ngen inla nuomum a ti thu a hrila, 6th
Schedule ei hmu theina dinga thangruol dingin MTRFD chun a ngen. MTRFD hi
Meitei han ST list a inzieklut tuma hma an lakna kawnga khinglettu ding le
tribal issue tum tum haia hmalatu dinga indin a ni thu K. Paukhansuan chun a
hril.
Headline
Property Tax lak a ni ta ding;
Pawisa
ngen le la hai hrem ning an tih
IMPHAL: State
sawrkarin Property Tax code a siem ta a, tuhin Property Tax Board indin dinga
hma lak mek a ni a, Board Chairman le Members dinghai ruot fel anni pha leh
Imphal Municipal Council (IMC) area sungah Property Tax lak tan ning a tih tiin
zanikhan Manipur CM O.Ibobi Singh chun Manipur Assembly an hriettir. Chun,
Imphal khawpui laili lai tak Khwairamban Bazar sunga Market pathum um haia 1st
Floor a ruoka la um haia hin State Bank of India (SBI) Branch pakhat, First
Aid Centre le Cafeteria hai sie ning a tih tiin CM O.Ibobi Singh
chun a hril.
Nagaland
le ramri thua buoina leiin Mao a chenghai chun an lo hmasuok hai Kohima hmuna
an va zawr thei tanaw leiin tulai hin Imphal khawpui sunga Naga Mapal hmuna
hung phurin an zawr hlak. An thil zawrnaa hin harsatna nasa tak an tuok leiin
an thil zawrna hmun ding siem pek ni raw seh tiin L. Ibomcha, MLA chun Inpuiah
zanikhan ngenna a siem a. Hi thua hin Dy. CM le Home Minister cheltu Pu
Gaikhangam chun, Mao mihai harsatna hi State sawrkarin a hriet a, Nagamapal le
Dingku Road, Khuman Lampak Main Stadium bul haiah an lo hmasuok zawr theina
ding phalna pek an nih tiin Inpui an hriettir. Mao a inthawka thil zawra hung
hai hi Police thenkhatin pawisa hniin an lo lakpek tia intumna a u m a. Hi thu
hi sawrkarin a ngaimaw hle a, chuonganga pawisa lo hni le lapek Police an u m
chun dan anga hrem ngei ning an tih. Mao a ianthawka Imphal a thil zawra hung
hai pawisa lo lapek an um a ni phawt chun iengang mi khawm nihai sienla mi hung
hril ro, Ka phone ah darkar 24 sung biek thei ka nih. Pawisa hni le latu hai
chu man le hrem ni ngei an tih tiin Gaikhangam chun Inpuiah a hril.
Demand
for Grants 7 passed
IMPHAL: Zanikhan
Manipur Assembly Session chun demand for Grants 7, Medical Health & Family
Welfare Services Rs. 494,39,36,00; Municipal Administration, Housing and Urban
Development Rs. 93,92,66,000; Cooperation Rs. 21,48,70,000; Administration of
Justice Rs. 54,12,01,000; Stationary and printing Rs. 5,36,78,000; Science and Technology Rs. 3,99,01,000; Information and Technology Rs.
28,10,19,000 an passed.
Post
Graduate inchuklai mi 147
IMPHAL: Manipur
sawrkar hnuoiah Doctors, Post Graduate inchuklai 146 an um mek a, hieng mi 146
hai hin an thil inchuk zo pha leh Specialist Doctor indai naw hi a zie hung um
deu tang a tih tiin Health Minister Phungzathang Tonsing chun zanikhan Inpui an
hriettir. Chun, District Hospitals 3, Senapati, Tamenglong le Ukhrul District
Hospital h aia damnaw khum 50 pei um chu 100 a sie vawng a ni tah tiin a hril
bawk.
Police
kutah an pe tah; July 10 chen custodyah
IMPHAL: Ni 7
vel an bikhmang hnungin Khulem Jiten (38) of Naoremthong Khulem Leikai chu July
6, 2015 zantieng khan S. Ibomcha, Additional SP (Ops), Imphal West District
kutah Pistol pakhat le a mu 4 leh an pe tah. June 30, 2015 khan Khulem Jiten
hin a pa Khulem Kendrajit a vuok a, a pate han an va thel leh a lo kap a, hi
taka hliemna tuok a pate pahni hai laia pakhat Khulem Krishnamohan
chu a hliemna tuorzo lovin July 1, 2015 khan Shija Hospitalah a thi a nih. Hi
thil tlung leia tuolsung mi lungsen hai chun Jiten In le a sunga thil um hai an
suksiet bakah a motor 2 le a Generators hai an raw siet pek a nih.
Khulem
Jiten hi zanikhan Chief Judicial Magistrate, Imphal West hmaah inlangtir a ni
a, July 10, 2015 chen Police custodya la u m phawt dingin Court chun a
chungthu a rel.
Nupui
1 le a nau sun hliem
IMPHAL: July 5, 2015
zan dar 8 vel khan Sanabam Bishorjit (31) s/o Nabachandra of Langmeidong chun
Khwairakpam (O) Kunjalata (44) w/o Brajakumar, Awang Sekmai Khunou Leikai le a
naupa kum 14 mihai chu an insungah a sun hliem. Bishorjit hin Kunjalata sum a
puk a, chu pe dinga va ve, sienkhawm Kunjalata hin i bat hi hieng zat chau a ni
nawh tiin a sawisel a. Chu phing leh Bishorjit in a hnungtienga chemte pahni a
pai chu keidawkin an nufain aa sun a, Kunjalata hi thangpuitu ding kovin a khek
a, a veng mi han an hung san bakah Bishorjit hi manin an vuok hrep
hnungin Police kutah an pek a, a hliem leiin RIMS panpui a ni a, Kunjalata le a
naupa hai chu Raj Medicity panpui an nih.
Pasal
2 Kani kg. 5 leh man
IMPHAL: Zani hamsa
khan Police han Namdilong ah Kani kg. 5 leh pasal pahni an man. Mana um hai hi
case siem khum an nih. Kani mana um hi Rs. 4,00,000 manhu vel niiin
Police chun an hril.
Nupui
1 inkhaihlum saa hmu
IMPHAL: Zani zingkar
dar 3:40 vel khan Mayengbam Ongbi Umabati Devi (31) w/o Mayengbam Rohit of
Moirang College Gate chu a riekna pindan sungah inkhaihlum saa hmu a nih. A
pasal chun zingkar a tho hnunga a nuhmei hi inkhaihlum saa a hmu niin a hril.
World
Police Gamesah Gold Medal 2 a lak
IMPHAL: June
26July 5, 2015 inkar sunga Virginia, USA hmuna Fair Fax World Police &
Fire Games neia uma chun Manipura inthawk Assam Rifles personnel Suander Singh
chun Gold Medal pahni a lak, Sunder hi World Police Games a Assam Rifles
personnel India a inthawk thang hmasa tak a nih. Sunder hin Long Bow Field
Archery le Target Archery haia Gold medal pahni hai hi a lak a nih tiin PRO,
Assam Rifles (South) chun a hril. Rifleman Sunder Singh hi kum 2007 a inthawka
Assam Rifles Archery team a thang niin national levelah Gold 8,
Silver 2 le Bronze medal 3 a lak tah.
Others
Mizoram
Assembly Session tan
AIZAWL: Ni 3 sung aw
ding Mizoram Legislative Assembly Monsoon Session chu zanikhan Aizawlah tan a
nih. Mizoram Finance Minister Lalsawta chun a vawihnina dingin Vote on Account
Rs. 1,823 crores zanikhan Inpuiah a phar nawk. Hi su m hi August, 2015
October, 2015 inkar sunga Mizoram sum hmang ding a nih.
Sumdawngtu
Rs. 10 lakh lakpek
SHILLONG: Zani hmasa
11:30AM vel khan sumdawngtu, Rahul Ali of Umjarain Mawkywat chun SBI Main
Branch, Shillong a inthawk Rs. 10 lakh a lak suok zovin Khyndailad tieng a pan
a, tu ti hrietlo pakhatin thil bal a lo deng khum a, a hnungzuituin an
sawpfaina ding tui a pek laiin a pawisa bawm sie thaa an sawpfai sungin tu ti
hrietlo pakhatin lain a fe hmangpui. Hi thil thawnaa hin mi 5 vel an inrawl an
ring thu Police chun an hril.
Pasal
3 kum 20 sung intang dingin
SMUKTSAR: Zanikhan
Punjab State a Muktsar hmuna Additional Session Judge Varinder Kumar chun
nuhmei naupang kum tling lo suolluitu pasal 3, Baljeet Singh, Gurlal Singh le
Manpreet Singh hai chu kum 20 sung lungin intang dingin thiemnaw an changtir
bakah Rs. 80,000 seng chawi dingin an chungthu a rel. Rs. 80,000 hi an pek
theinaw chun an lungin intang hun hi kum 4 suksei ding ti a nih. Nuhmei naupang
an suollui hi Class VIII inchuklai, Jan. 25, 2014 nia an suollui a nih.
Assam
stateah JE invawi thar mi 10
GUWAHATI: July 4, 2015
khan Kamrup Rural Districtah naupang kum 5 mi Japanese Encephalitis (JE) natna
leiin a thi nawk bakah JE natna hri invawi thar mi 10 hmu belsa nawk anni bakah
tuta kum fe mek sunga Assam statea JE natna leia mihriem thina tuok chu 12 an
tling ta tiin Health Deaprtment thusuok chun a hril. JE natna hri invawi mek hi
Assam state sungah mi 142 an um mek niin ei thu dawngna chun a hril.
Kutdaw
nauin Class X examah 50%
GUWAHATI: Tu kuma
Assam Board hnuoia Class X (HSLC) Examination a khan Kamrup, Assam a kutdaw
Chandmiya Ali naupa Sujah Ali chun marks 50% hmuin a pass. Kutdaw nauhai laia
HSLC pasi hmasa tak nia hril a nih. Science subject lak a nuom a, sienkhawm an
neina in a tlin hlawl naw leiin Arts subject lain Kamrup Academyah admission a
thaw niin Sujab Ali chun a hril.
Noodles
fak leiin mi 5 an damnaw
SHILLONG: Zani hmasa
khan Shillong khawpui huop sunga Lawsohtun an ti hmuna noodles (readyto eat
noodles) fak leiin sungkuo pakhata mi 5 an damnaw pha a, Hospital panpui an
nih. Damnaw mi 5 hai laia pakhat puitling le pali danghai chu naupang vawng an
nih.
Ekinah
naupang 2 an tla hlum
GONDA(UP): Zanikhan
Uttar Pradesh state a Gonda district sunga Mathura Shah Jot Village a Ekin
(septic tank) sungah naupang pahni an thla hlum. Naupang pahni hai hi ball an
inhnelpui a, an bawl hi septic tank sungah a tla lut a, an zuk binaa changsuola
tla hlum an nih tiin Police chun an hril. Ekina tla hlum hai chu Shubham (2) le
Anuj (4) hai an nih.
Suspended
Police SI an khai hlum
SHILLONG: Nuhmei
pakhat a sai buoi (molested) tia intum leia a sina inthawka suspended lai mek
Police SubInspector Madan Basumatary chu July 6, 2015 zing dar 9:30 vel khan
State Police Reserve Linea a official quarter Verandah ah inkhaihlum saa hmu a
nih tiin Vivek Syiem, SP (City), Shillong chun a hril.
Tomar
lungin intang hun suksei
NEW DELHI: Zani
hmasa khan Delhi Additional Chief Metropolitan Magistrate, Tarun Yogesh chun
Delhi law Minister hlui, Jitender Singh Tomar lungin intang hun ding chu ni 14
in a suksei nawk. Hi lei hin July 20, 2015 chen chu lunginah a lan tang ding
tina a nih. A Law degree certificate a tehlem a ni leia lungin intang pha a
nih.
Thilpuokthei
tamtak leh pasal 2 man
JAIPUR: Zani hamsa
khan Police han Lakher village le Balalji store Crusher, Jamwaramgarh hmuna
Amonium Nitrate kg. 550, Gelatin tluon 800, safety fuse wire metres 2,891 le
Detonators 900 leh pasal pahni, Madan Lal le Kailash Chand hai man an nih tiin
Nitin Deep, SP, Jaipur (Rural) chun a hril.
Akash
Uddin thuoihmangtuhai laia mi 3 man
AIZAWL: July
4, 2015 zan dar 7:30 vela Babutlang, Aizawla inthawka Pan hna le Kuva zawr,
Akash Uddin thuoihmangtuhai laia mi 3,Thomson Lalrambuatsaiha (29) s/o C.
Lalngaihawma; C. Zohmingliana (29) s/o C. Lianzuala le Lallianmawia (32)
s/o P.T. Kaia, Venghnuai hai chu Police han an man ta a, pakhat dang man tumin
an zawng mek.Thuoihmanga um Akash Uddin khawm sansuok a ni tah.
Minister
thangsain mi 15 an hliem
GUWAHATI: Zani
hmasa khan Assam State a Dibrugarh hmuna BJYM workers meeting neina Dawsang/stage
(dais) a chim leiin Union Youth Affairs and Sports Minister Sarbananda Sonowal,
MP pahni, Kamakhya Prasad Tasa le Rameswar Teli hai thangsain mi 15 zet an
hliem pha. Amiruokchu Hospitala enkawl ngai hiel khawpa hliem an um nawh.
Stage hi mi 25 vel dawl dinga siem a ni a, party workers 150 vel han minister
hi inbiekpui tuma an va pan leia chim nia hril a nih.
BSNL
in NE a MNP hmang phalna ngen a tum
SHILLONG: Bharat
Sanchar Nigam Limited (BSNL) chun India hmarsak biel (North Eastern region) ah
Mobile Number Portability (MNP) hmang phal dingin Telecom Ministry kuoma ngen a
tum tiin BSNL NE1 Chief General Manager DP Singh chun zanikhan reporters hai
kuoma a hril. MNP hi July 3, 2015 a inthawk khan India ram pumpuia hmang thei
dinga thlangzar nisienkhawm security thil leia NE a chu MNP hi inhuomtir lova
um a nih tiin DP Singh chun a hril.
Cricket
ball in a deng hlum
LONDON: British
Tamil League a batsman Bavalan Pathmanathan (24) chu Cricket ball in a awm ah
na takin a deng fuk a a hliemna tuor zo lovin a thi. Bavalan Pathmanathan hi
July 5, 2015 nia southwest Londona Long Ditton hmuna British Tamil League
inkhel huna Manipay Parish Sports Club (UK) division three hnuoia inkhela thang
a ni a. Inrang takin doctor panpui a ni a, sienkhawm doctor han san hman ta
lovin a thi a nih. Australian batsman Phillip Hughes khawm nikum November thla
khan a cricket ball in a deng leia damzo lovin a lo thi ta a nih.
Khawvela
pasal upa tak kum 112 mi niin a thi
TOKYO: Khawvel
pumpui huopa pasal hring le dama la u m hai laia a upa taka Guiness World
Records in a sinsie, Sakari Momoi chu zanikhan kum 112 mi niin a thi. Sakari
Momoi hi Fukushima, Japan a February, 1903 a pieng, Zirtirtu sin lo thaw hlak,
hrisel tha em em el, bu dunaw lai nei lo le in harsatna nei ngailo, August,
2014 a khawvela pasal dama la um hai laia a upa taka record a nih. Khawvela
pasal dama la um hai laia a upa tak chu Japan mi tho, Yasutaro Koide a hung ni
ta a, kum 1903 a pieng niin Momoi neka thla khata naupang lem a nih. Khawvela
mihriem dama la um hai laia a upa tak chu US mi, Susannah Mushatt Jones a ni a,
kum 116 a upa a ni tah.
Flyod
Mayweathar a WBO title hlip pek a nih
LOS
ANGELES: World Boxing Organisation (WBO) chun Floyd
Mayweather (38) chu thla hni vel liemtaa Manny Pacquiao le an inhnek huna a lak
Welterweight World Title a hlip pek. Mayweather hin May 2, 2015 khan Las Vegas ah
Pacquiao hnein dollar 220 million a hlaw a, a sum hmua inthawk 3% annawleh a
tam takah sanctioning fee dollar 200,000 (WBO World Championship Contest fee) a
pek dinga ti deadline July 3 chena a peknaw bakah a junior middleweight title a
hau mek sie thla dinga ti a sukpuitling naw leia WBO title hi hlip pek a nih.
Mayweather hin WBC le WBA titles hai khawm a hau mek a, WBO rules dungzuiin
Boxer in WBO title kawl pumin weght division danga title kawl khap a ni a, hi
lei hin Mayweather chu a ieng lem am a lak/chel ding thutlukna siem dinga hun
pek a nih. Mayweather hi WBO title hlip pek a nita leiin WBO champion a nita
nawh.
Mayweather
Jr. hi WBO World Championship Committee chun 154pound world titles pahni a
chel mek hai siethla dingin hun an pek a, sienkhawm ama le a legal
representatives haia inthawk deadline chena dawnna an hmunaw leia
lampui dang a um naw leia WBO Champion a nina hi an hlip pek a nih.
-------------------------------------------------------------------------------------------------------------------
VAWISUN
THUPUI
Lalpa
nghaktuhai ruok chun an hratna chu siem tha nawk an ta, mupuihai angin
thlain hang vuong an ta, sawl loin tlan an ta; chau loin kein feng
an tih. Isai 40:31
Editorial: Khawpui
fai le thienghlim
Ram
changkang le hmasawn haia inzin ta hai chun mi ram le khawpui faizie an hmu a,
ram danga lan zin phak ve lo hai khawmin Television haia inthawk mi ram hai fai
le thienghlim zie ei hmuin a hmuna um le chengve ei chak hle hlak. Taksa le sil
le bil thienghlim le faia inbel chu thuomhnaw bala inbel nek chun an hawi rawp
hlak.Chuongang bawkin hmun fai le thienghlimna hmuna um chu hmun tawp le balna
hmuna um nek chun inhawi ei ti lem.Sil le bil bakah khawsakna hmun a thienghlima
a fai chun lungril khawm a thienghlim deu nghe nghe ring a um.
Churachandpur
District hi Manipur state sunga dingin khawpui pahnina a ni a. Kawng iengkima
an thang hrat a, ei sil le bil inbel nuom zawng le fashion khawm an sang hle.
Amiruokchu, fai le thienghlimna kawnga ei la hnufuol tlat hi ei baksamna a nih.
Thuom mawi le changkang tak tak inbelin khawlai lengpar hlak inlakhawm ei
chengna khawpui a tawp tlat chun ei la changkang tawk nawh ti an lang. Ei
khawpui fai le thienghlimna ding ngaituoin district thuneituhai khawmin tuta
hmaa inthawk khan hma lain New Bazar area le khawpui sung haia hmunhnawk peina
hai an lo thiekdar ta a, sienkhawm hmunhnawk dehawn pawl ei la um zing bakah ei
tuiluongkawr le khawpui sunga vadung hai chu hmunhnawk dehawnnaa ei hmang leiin
ei khawpui chun fai le thienghlimna kawngah hma a sawn naw hle.
July
6, 2015 khan DC inrawinain BRGF Resource Centreah Town Beautification thuah
meeting nei a ni a, hi huna hin Tiddim Road in a hraw khaw lal le VA hai chun
an biel sung chita Nulla inhnawk hai an sukfai ding ti le khawpui sunga dawr
neitu han mani dawr chit rawng an nal thar ding ti a nih. Chun, Fur ruotui tlak
hun ei tawng mek le inzawmin khawpui sung lampui haia tuihawk an luong zel zul
hlak leia lampui nasa taka a tawp hlak dangna dingin DC CCPur chun ei khawpui a
fai le thienghlim lemna dingin EE/PWD CCPur chun intertown road a nulla
hmunhnawk in a hnawkhat hai sukfai ding; OC/80 RCC chu Police stationa inthawk
Tipaimukh road tunga Nulla le culvert hai sukfai ding; BDO/Tuibuong chu Sielmat
leilaka inthawk Peace ground inkar nulla le footpath hai sukfai ding;
BDO/Lamka chu Sielmat leilaka inthawk Lanva inkar le CEO/ADC chu town sung a bikin
Police station traffic point a inthawk tiddim road tung sukfaina sin thaw
dingin mawphurna a lo pek ta bawk.
CCPur
khawpui sung fai le thienghlim lemna dinga DC CCPur hmalakna hi lawm a um ruol
ruolin khawpui sunga vadung ruom hai vawng fai dan ding a thang naw tlat.
Khawpui sung hraw tlanga luong vadung iemanizat a um a, hieng vadung ruom hai
hi vawng fai an ninaw chun ei khawpui sung tawpna hi a nep chuongnaw ding a
nih. Hi lei hin District Administration hin khawpui sunga vadung (ruom) hai fai
le vawng thienghlimna ding kawnga khawm hin hma hung la sienla nuom a um hle. A
thei chun vadunga hmunhnawk dehawn khapna thupek insuo sienla, khapna thupek
bawsetu hai chunga dan angin action la ngam bawk sien nuom a um.
Ei
chengna khawpui fai le thienghlimna ding hi sawrkar thaw ding chauva ei ngai le
sie sung chun khawpui fai le thienghlim nei ngai naw manih ti hi mipui han a
thar taka ei hriet nuom a um. Khawpui fai le thienghlim nei ei nuom tak tak a
ni chun mipui tieng khawmin kut ei rawl ve a ngai. Chu ding chun khawpui sunga
hmunhnawk lakkhawm le dehawnna kawnga sinthawtu ding mi ruoi a, thlabia hlaw ei
pek theina dingin a thla bia sum ei pek ve a tul ding a nih. Ei state hi mania
thawsuok mumal neilo, central –a inthawk sum tlawmte te a hmu haia inthawk
khawsa ve tawk tawk, state pasie ei ni leiin ei khawpui vawng fai le
thienghlimna dinga sum tlawmte ei thawkhawm hai khan thil ropui tak a thaw thei
a nih ti ei hriet nuom a um.
Chun,
khawpui mawi le inhawi ei nei theina ding chun lampui sir tuok haia thing phun
inla, thing ei phun enkawl le venghimna sin chu a bula dawr neitu hai chit
kuoma mawphurna pek ni hai sien, ei khawpui sung lampui sir haia thing a vul
chuk chun nasa takin khawpui a suk inhawiin boruok a suk thienghlim pha ngei
ding a nih. Hi lei hin khawpui fai, le inhawi ei nei theina ding hin nulla fai
chau ni lovin thingphun ei insukhmu thil tul makmaw a nih.
Eini
Zohnathlak hai hi ram hausa le changkang hai thaw dan entawn hrat vieu si, an
thienghlimna tiengpang ei entawn thei der naw hi thienghlimna kawnga ei
baksamna a nih. Television haia ram fai le thienghlim tam tak a hung inlang ei
hmu changin chengve chakin ei inhnar hlak, sienkhawm ei khawpui faina ding kawnga
hmala le entawn tum ruok chu ei la um meu naw a ni hi!
Chun,
ei hmunhnawk hai hi a hmawn thei le hmawn thei lo chi hai thlier hranin, a
hmawn thil thil hai hi hnuoithatnaa inchangtir dan ngaituo inla chu thil tha le
hlawk tak a ni ding a nih. Hi kawnga hin sawrkar khawmin hma hung la sien nuo a
um hle. Ei hmunhnawk hmawn thei hai hnuoithatnaa ei inchangtir thei a ni chun
sum tam tak tak senga Vaipa siem hnuoithatna phurlut tul naw nih. Khawpui haia
chun hmunhnawk hmawn thei le hmawn thei lo hai hi the hrangin, a hmawn thei
thil hai chu hnuoithatnain an inchangtir hlak.