Tuithaphai, July 17, 2025, (Hmasawnna Thar): Tuibong Sub-Division sunga um M. Ramthar -a Observation Home Road-ah Thingzung le Hlohna hmangin natna dang dang a damnaw hai ta dingin damdâwi siem a ni a. Damdâwi hai hi a dithai ta dingin a thlawnin an pek niin ei thu lakna chun a hril.
Damdâwi chungchanga Mrs. Ngamdingpui (45) Natna khir taka a Pate damnaw leiin a damna dingin ni 60 chuong Pathien buona ṭawngṭaina a nei a. Ni 7 liemta khan ṭawngṭaina a nei lai thawklekhatin khawmuol hre loin a um a, chu sung chun khawvel puotieng hmun pakhat ah umin an hriet a. Angel ni dinga a ring nuhmei hmeltha takel pahni in a dâr khing khinga chelin hmun hran hran an fangpui a. "In ramah Pathien in a siem Thing-le-Hlo hai chu damdâwi tha tak a ni zie in hriet naw a nih,” tiin Angel pahni hai chun damdâwi a tha Thing le Hlo hai an kawkhmu a. A hung harsuok hnungin an thil kawkhmu a inthawk damdâwi hi siemdawk niin a hril.
Pathien in damdâwi siem dan dinga a kawkhmu anga damdâwi an hung siem a ni a. Damdâwi an siem-a inthawk ni 4 chau la ni sienkhawm mi tam takin an dampui thu feedback an hmu niin a hril.
Damdâwi an siem hai hih a tui vawng niin, chi 3 in an the a, Damdâwi COD-1 chu Diabetes, Kidney le BP insang nei hai ta ding a ni a. COD-2 chu Sûngtieng Ulcer, sungtieng le puotieng natna benvawn nei hai le Pile nei hai fak/dawn ding a ni a. COD-4 chu Cancer a damnaw hai ta dinga an siem niin a hril bawk a. Damdâwi hai hi hmun dei (cold storage/fridge sunga mani sie ding, an khal loin) a sie ṭhat ding a ni thu a hril bawk.
A hril pei danin, Pile nei hai ta dingin damdâwi hi a faka fak ding ni lo, a nal-a nal ding a ni thu a hril a. Pathien-a inthawk thiltlawnpek le inhriettirnaa damdâwi siemdawk a ni leiin a dit hai chu a thlawna pek vawng an ni ding thu hrilin, thuchienglem hre nuom han contact number 6909204623-ah biek thei a ni thu a hril.
Damdâwi hai hi chemical thang lo an ni a, thla khat sung fak ding an ni tlangpui a, an chengna M. Ramthar-ah iengtiklai khawm lak thei a ni thu a hril.
