Hmasawnna Thar | 26 June, 2015

Tuolsung

DC CCPur in TSA thu insuo a hrilfie

CCPUR: Churachandpur District Website chungthua Thadou Student Association (TSA) in thu an insuo chu zanikhan Mr Lunminthang Haokip, IAS, DC, CCPur chun a office chamber­ah tuolsung chanchinbu reporter hai inhmupuin a hrilfie.

    

DC chun, Churachandpurdistrict.com ti district website TSA in an dodal hi thil inzakum a ni thu; January 26, 2000 a Jacintha Lazarus, IAS in CCPur Dist. a DC a chel huna District website Churachandpur.gov.in hawng a ni thu; website­ah information a tam tawknaw thu le district website thar CCpur.gov.in hawng thar a ni thu a hril. Digital India week hmang hma ngei June 27, 2015 in District website hi hmang theia zo ning a tih tiin DC chun a hril bawk.

    

Hieng laizing hin TSA/CCPur chun District website umsa sukdanglam chu thil theilo a ni thu le TSA/CCPur chun website thar hi an pawm theinaw ding thu an hril.

Behiang­a BLO um tha an ti thu

CCPUR: June 24, 2015, 9:00AM khan Myanmar palai hai le Churachandpur district­a inthawka fe palai han Myanmar­a Tamu hmunah Border Liaison Officer meeting an nei. Hi huna hin thu pawimaw tum tum hriltlang a nih. CCPura inthawka palai fe hai chun Dec. 9, 2015 a Myanmar Police han Haichin le Vaivet khuo inkara Shaktiman le motor zuitu mi 4 an man thu DC.Tamu kuoma an intlun a, hi thu hi ama thuneina hnuoi a ninaw leiin BLO Chin State le Mizoram a BLO han an rel ding a ni thu DC Tamu chun a hril.  Chun, India ram tieng Ukhrul le Myanmar ram tieng Somra hmun haia BLO an lo indin a, sienkhawm tuchena a la function mumal theinaw thu bakah Behiang­a khawm BLO indin nisien an nuom thu intlunin hi huna hin an hriltlang. Behiang­ah India le Myanmar side haiah BLO tha tak um sien India le Myanmar ram hai ve veah km.16 biel sungah free movement a um thei ding a hril a nih. Hi meeting­a va thang Churachandpur a inthawka fe hai chu an hung kir nawk tah.

Digital India meeting

CCPUR: June 27, 2015, 11:30AM khin DC CCPur inrawinain DC Office­a BRGF Resource Centre­ah MGNREGS & IWMP sinthawna le inzawmin Digital India meeting um a tih. Hi huna hin SDOs/BDOs hai bakah SO/Technical Asst. Hai; Govt. a inthawk MGNREGA Monitoring Cell; Planning Dept., DRDA official le NELLIT/CCPur a inthawk DIO/NIC hai thang an tih.

SYO Road hawngna

CCPUR:  June 27, 2015, 7AM khin Simte Youth Organisation Gen. HQ hmalaknain Simte Inn a  SYO Road hawngna le Mr M. Gouzamang, MDC 17­New Lamka East in SYO kuoma Oxygen set 2 a pek hawngna hun hmang ning a tih. Hi huna hin Dr Rev. Jacky Lulun Simte chun SYO Road le Oxygen hai tawngtainain inhlan a tih.

M.Songgel­ah Free Dental camp

CCPUR: JC Dental Care chun Ha enkawl that a pawimawna mipui kuoma hrilhrietna dinga Free Dental Camp hmun tum tuma an huoihawt chu an la sunzawm pei a. Zanikhan M. Songngel khuoah Free Dental Camp an buotsai nawk a, hi huna hin mi 171 hai chu Dr Sangi, Dr Lalrotling le Dr Helhing Haokip han Damdawi, tootpaste, toothbrush le Mouth wash hai a thlawnin an sem bawk.

 Hi huna hin Dental Assistant Nk. Hrieti chun Ha enkawl dan le Ha enkawl that a pawimawna hai mipui hai hrilhrietna a nei bawk.

Headline

Khawpui sukhmasawnna dingin PM in Flagship schemes 3 a hawng

NEW DELHI: India ram sunga khawpui tum tumhai sukhmasawnna dingin Prime Minister Narendra Modi chun zanikhan New Delhi­ah Flagship Schemes pathum, Smart Cities Mission, Atal Mission for Rejuvenation and Urban Transformation (AMRUT) le Housing for All hai a hawng. Smart Cities thawna dinga sum hmang dinga riruong chu Rs. 48,000 crore; AMRUT Mission a dingin Rs. 50,000 crore hmang dinga riruong a nih. Housing for All Scheme hnuoiah miretheihai chengna dingin In vaibelsie 2 chuong kum 7 sungin bawl ning a tih. In pakhat bawlna dingin Rs. 1 lakha­Rs. 2.3 lakh Central Assistance pek ning an tih tiin Modi chun a hril.

    

Mitinin mani a In nei an nuomin an beisei seng a, an beiseina hi sawrkar chun sukpuitling a tum a nih. Smart Cities hi sawrkar siem ding a ninaw a, mipui le local administration siem le thaw ding a nih. Urban Infrastructure Sector a dingin sawrkar chun Foreign Direct Investment tuta neka nasa lemin lalut a tih tiin Modi chun a hril.

            

Kum 40 liemta hnunga June 25 le 26 kha tukhawma theinghil ngai naw nihai. Emergency puong a ni a, mi nuoitel lunginah khum anni a, Press censored a ni a, Radio khawm sawrkar dit le remtihai chau puong a nih. India ram le a mipuihai ta dinga harsatna vawrtawp a tlung hun a ni a, Democracy hnawchepin a um a nih. Khang thil po po kha duamna le inlal nuomna leia tlung a ni a, khangang kha India rama tlung ta ngai naw raw seh tiin PM Narendra Modi in hi Flagship Schemes 3 hai a hawng huna thu a hril huna a hrillang.

Imphal

Manipur Assembly Session tan ding

IMPHAL: 10th Manipur Legislative Assembly 11th Session chu vawisun hin tan ning a tih. Hi Session hi July 10, 2015 chen inthung an ta, sitting vawi 11 um a tih. Vawisun hin Manipur CM le Finance Minister cheltu O.Ibobi Singh in kum 2015­16 Manipur Budget phar a ta, Session um naw sunga MLA lo thihai sunna hunser, Governor thuhril hriltlangna nei an tih. Budget Estimate thuah June 29, 2015 in general discussion tan ning a tih. June 30, 2015 in vote lakna um a ta, chu zova demands 6 hriltlang ning a tih tiin Meghajit Singh, Secretary in­charge Manipur Legislative Assembly chun a hril.

Dy. CM in Tractors a sem

IMPHAL: Zanikhan Directorate of Horticulture, Sanjenthong, Imphal hmuna Dy. CM, Home  & Horticulture minister Gaikhangam chun huon siemtuhai kuomah Tractors a sem. Hi huna hin  Victor Keishing, Parliamentary Secretary (Tribal  Affairs); Vungzagin Valte, Parliamentary  Secretary (Horticulture); T. Panmei, Commissioner (Horticulture)le Kipgen, Director (Horticulture) hai an thang.

MSPCL hnuoia sin ruok a um

IMPHAL: Manipur State Power Company Limited (MSPCL), Manipur hnuoia Junior   Establishment Assistant Post 10,  Switch Board Assistant Post 50 (ST­15), Swich Board Jr. Assistant Post 50 (ST­15), Jr Technical Assistant Post 100 (ST­31), Watchman­cum­Cleaning Assistant post 23 (ST­7) a ruok. Application Form le thu chieng lem www.manipur.gov.in ah   hriet thei ning a tih. Jr. Establishment Assistant a dingin thiemna Class XII passed le a danghaia dingin Matriculate etc. ni a tul.

Tamenglong district­ah harsatna an tlun

IMPHAL: Zeliangrong State hran ngenna le inzawma Zeliangrong United Front (ZUF) in Manipur a Zeliangrong mihai chengna biela darkar 72 bandh an thaw tan chun Tamenglong District mipui ta dingin harsatna nasa tak an tluan pha. Imphal­Jiribam Road le Imphal­Tamenglong Road haiah motor tlan an u m naw a, Bazar le dawr hai khar an nih.

Ruolbanlohai kuomah hmangruo sem

IMPHAL: Directorate of Tribal Affairs & Hills, Govt. of Manipur hmalaknain zanikhan Kuki Inn, Imphal­ah rauolbanlohai kuomah hmangruo chi tu m tum sem le Mobile Ambulance sem a nih. Hi huna hin Dy. CM Gaikhangam; Victor Keishing, Parliamentary Secretary (Tribal Affairs & Hills) le official hai an thang.

CM kuoma memorandum an pek

IMPHAL: Scheduled Tribe Demand Committee of Manipur (STDCM) chun Manipur Assembly session nei dinga hin Meetei/Meitei chu India rama Scheduled Tribe (ST) list a inthangtirna dinga resolution pass dingin state sawrkar an gen a, hi thua hin Maanipru CM kuoma zanikhan memorandum an pek.

Others

Zu tha lo dawn leiin an mit an del

MUMBAI: Tuta hma deuva Mumbai khawpui huop sunga Malwa an ti hmuna Zu thalo dawn leia damnawhai laia mi 3 hai chu an mit an del pha. An mit hi siem that thei ta lo ding, an damsunga mitdel ding an ni tah tiin Dr Nitin  Pawar chun a hril. Mit indel pha 3 hai laia pahni hai chu Dilip Hire (50) le Vasappa Dhotre (49) hai an nih. Zu thalo dawn leia thi kha mi 102 anni a, tuhin Zu tha lo dawn leia damnaw mi 13 hai chu Hospital­ah enkawl zing an la nih.

Sukphurna dingin Rs. 1 lakh le Laptop

LUCKNOW:  Uttar Pradesh state a IIT Preparatory exam a marks 97% hmu students 7­ Kapoor Saroj le Shubham Yadav of Pratapgarh; Muzzammil Khan le Alok Maurya of Sonabhadra; Nilesh Yadav of Amethi; Vishnu Gupta of Sultanpur; Shashank Awasti of Rae Bareli hai chu sukphur zuolna dingin Uttar Pradesh Chief Minister Akhilesh Yadav chun June 24, 2015 khan Rs. 1,00,000 seng le Laptop 1 seng a pek tawl. Student danghai ta dinga entawntlak an nih tiin Akhilesh Yadav chun a hril.

Sawrkarin IIMs thar 6 indin a tum

NEW DELHI: Sawrkar thalungpui chun Academic Session nawka Class tan hman dingin Indian Institute of Management (IIMs) 6 indin le hawng thar nawk a tum. IIMs thar 6 indinna dinghai chu Visakhapatnam, Andhra Pradesh; Bodh Gaya, Bihar; Sirmaur, Himachal Pradesh; Nagpur, Maharashtra; Sambalpur, Odisha le Amritsar, Punjab hai an nih. Institute pakhata seats umzat ding chu 140 pei le admission chu CAT fe thlenga thaw ning a tih. IIMs thar 6 indin ding hi Union Cabinet meeting khawmin a pawmpui tah.

Kohima ah dawr 3 suksiet a nih

KOHIMA: June 24, 2015 zing dar 1 vel khan Southern Angami Youth Organisation (SAYO) volunteers han Kohima khawpui sunga Old BOC an ti hmuna Dawr 2 le New Reserved Area a dawr 1, a rengin dawr 3 an suksiet. Dawr 3 hai hi Mao Naga hnamhai ta a nih. June 5, 2015 khan SAYO chun Mao hnamhai chu Kohima suoksan dingin Quit Notice an lo pek ta a nih. Hi thil hi Dzuko Valley a Manipur le Nagaland state ramri buoi hung kakhawk nia hril a nih.

JD (U) MLA Lunginah sielut a nih

PATNA: Zani hmasa zanril lai khan Bihar Police han mi thuoihmangna case le inzawmin Bihar­a JD(U) MLA, Anant Singh chu an man a, zani zingkar inhma tak khan ni 14 intang dingin Beur Jail­ah an sielut. Anant Singh hi kum 2014 a Bihta, rural Patna a builder pakhat thuoihmangnaa thangve a intum le a insunga licence umlo silai man a nih.

Pa hme leiin mi 6 an damnaw pha

AIZAWL: Zani hmasa khan Keifang khuo, Mizorama cheng mi 6 hai chu Pa (Mushroom) an hme leiin an damnaw pha a, Saitual Primary Health Centre (PHC) ah admit le enkawl an nih. Pa hi ramhnuoia mawng an lak hmea an suong a nih. Pa hi a hming khawm an hrietlo nia hril a nih. Damnawhai hi an inluok a, an phing a hung na leia PHC panpui an nih. Pa hi June 22, 2015 nia ramhnuoia mi an va lak a nih. Pa hme leia damnaw hai laia Zari, a naunu Lalthapuiii (36), Lalthapuii pasal Lalzawmliana (37) hai chu an damnaw inrik niin ei thu dawngna chun a hril.

Smriti Irani in educational qualification inanglo

NEW DELHI: Freelance Writer Ahner Khan chun Union Human Resource Development Minister Smriti Irani in Lok Sabha le Rajya Sabha election haia ngir dinga nomination paper a file huna Election Commission of India kuoma Affidavit a pek huna educational qualification an ang naw a, information indiklo a pek tia intumin zani hmasa khan Delhi Metropolitan Court ah hekna a siem a, a hekna hi Court in a pawm pek. Hi thua hearing chu August 28, 2015 ah nei ning a tih.

            

April, 2014 a Irani in Lok Sabha election a ngir ding huna Affidavit a pekluta chun kum 1996 in Delhi University (School of Correspondence) hnuoia BA a zo niin a ziek a; July 11, 2011 a Gujarat­a inthawka Rajya Sabha election­a ngir dinga educational qualification (her highest educational qualifiation) afidavit­a a zieklangnaah B.Com Part­I, School of Open Learning, Delhi University hnuoia Correspondence in a zo niin a zieklang tiin Ahmer Khan Ukil, K.K. Manan chun court hmaah a hril.

Smriti Irani ban dingin an phut

NEW DELHI: Zanikhan AAP le Congress chun Union Human Resources Development Minister, Smriti Irani chu minister a ninaa inthawka ban dingin an phut. A pawl nizat (educational qualification) chungthuah information indiklo Election Commission of India kuomah a pek tiin an intum. Degree tehlem leia Delhi Law Minister, Jitendra Tomar an ban chun, Ms Smriti Irani khawm Union Cabinet minister a inthawk ban vat a, a chungthu tha taka suizui ni raw seh tiin an phut a nih.

Nuhmei tleirawl phing sungah sam kg.2.5

THANE:  June 24, 2015 khan Maharashtra state a Thane rural a cheng nuhmei tleirawl, kum 15 mi Sarika Barde chu a phing na a ti hle leiin Chattrapati Shivaji Memorial Hospital, Kalwa ah operation thaw a ni a, a phingpui sunga inthawk sam hlawm 2.5 kg zeta rik ding at dawk a nih tiin Dr Sukesh Thakur (operation thawtu) chun a hril. Sarika Barde hi lungril kim lo, ama sam ngei le thil ngar fa rawp hlak niin a sung hai chun an hril.

Rangkachak Rs. 80 lakh manhu leh man

CHENNAI: Dubai­a inthawk Vuongnaa Chennai airport hung vuong lut passenger pakhat Afsar Valluparambath of Kerala chu zani zingkar khan a handbag sunga rangkachak kg. 3, Rs. 80 lakh manhu ding dapdawk a a ni leiin man a nih. Afsar hi Customs a Air Intelligence Unit official han an man niin airport official thusuok chun a hril.

Rocket Launchers 3 le Detonator dapdawk

RAJNANDGAON: Zani hamsaa Indo­Tibetan Border Police (ITBP) le Police hai thangruola Chhattisgarh state a Rajnandgaon district sunga Dorede le Birjupara village inkara ramhnuoia dappui thaw huna Rocket Launchers 3 le Detonators 2 an dapdawk tiin P. Sundarraj, SP, Rajnandgaon District chun a hril.

KNLA Chairperson man

DIPHU: June 24, 2015 khan Army le Police thangruol han Chokihola police station huop sunga dappui an thawnaah Karbi National Liberation Army (KNLA) Chairperson Hampang Timung chu 7.65mm pistol 1, hand grenade 1, Mobile set 1, demand letter 56  le receipt book iemanizat leh an man.

Mizoramah CSF le PRRS natna hri

AIZAWL:  Mizorama Vawk thi hai thisen an test­naah Classical Swine Fever (CSF) le Porcine  Reproductive and Respiratory Syndrome (PRRS) natna hri an invawi leia thi an nih ti hriet suok a nih tiin Dr L.B. Sailo, Director, Animal Husbandary & Veterinary Department, Govt. of Mizoram chun a hril. Hieng natna hri hai hi sik le sa hung inthlakthleng huna a hung um hlak a, inlauna ding le titthawngna ding a um nawh; hung re nawk vat a tih tiin Dr L.B. Sailo chun a hril.

OROP ngennain rally an nei

AIZAWL: Mizoram Ex­Service League chun One Rank One Pension (OROP) sukpuitling dinga ngennain zanikhan rally an nei. Rally security khau tak hnuoia nei a ni a, President Pranab Mukherjee kuomah Mizoram Governor Lt. Gen. (Retd) Nirbhay Sharma fethlengin Mizoram Ex­Service League chun Memorandum an pek. Mizoram Ex­Service League a hin members (sipai bang) 6,000 vel bakah ex­servicements hai nuhmei le sunghai 25,000 vel an um a nih.

Vuongna tla thlaah inhmang nu le nau hring le dama hmu

BOGOTA: June 20, 2015 nia Colombia rama ramhnuoi pik tak laia vuongna tla thlaa chuong le an umna chin hriet lova inhmang Nelly Murillo (18) le a naupa Yudier Moreno (kum 1 khawm la tling lo) hai chu zani hmasa khan dam le hima sansuok an nih. Nelly Murillo le a naupa Yudier hai hi helicopter hmangin hospital panpui nghal an nih. Nelly hi taksa hai meiin a kang hliemna le thil in a hrut hliemna hmu dingin a um a, a naupa ruok hi chu a him piel niin Colombian Air Force thusuok chun a hril.

    

Hi vuongna tla thlaa hin a khaltu (pilot) Captain Carlos Mario Cebalos chu a thi a, a ruong khawm hmu a ni ta a. Hi vuongnaa chuong dama la um an um ngei ring a ni leiin member 14 umna search­and rescue team in ramhnuoi pik tak hnuoia sansuokna sin an thaw huna hieng nufa hai hi dama an hmu a nih. Vuongna hi Nuqui le Quibdo inkara vuong a ni a, vuongna tlak nasan sui mek a nih.

Bobby Jindal in US Presidential candidate

LOUISIANA: Kum 2016 a US Presidential election hung um dinga khin Indian­American Bobby Jindal chun US Presidential candidate ni a tum ve thu a puonglang. Bobby Jindal (44) hi Louisiana Governor ni lai mek a nih. Jindal hi Indian­American hai laia US Presidential candidate ni tum hmasa tak a la nih. Chun, Indian­American hai laia United States Governor dinga thlangtling hmasa tak a ni bawk. Governor sin hi term 2 a chelna ding a ni tah.

Best bollywood playback singer in Asha Bhosle

LONDON: Veteran singer Asha Bhosle (81) chu UK based Eastern Eye newspaper chun greatest Bollywood playback artist of all times in a puong. Asha Bhosle hin a unu Lata Mangeshkar chu kawng tum tumah a khum khel a, a unu Lata Mangeshkar chu list a hin pahnina in a thang a, Mohd Rafi chu pathumna le Kishore Kumar chu pathumna in a thang. Top 20 list a chun Mukesh (5), Bollywood music queen ni mek Shreya Ghoshal (7), Geeta Dutt (10), Sonu Nigam (14), Kumar Sanu (17)  le Kavita Krishnamurthy (19) hai an thang.

India in Nepal kuomah thangpuina USD 1 billion

KATHMANDU: Zanikhan Kathmandu­ah International Donors Conferene nei a ni a, hi huna India sawrkar aiawa thang Union External Affairs Minister Sushma  Swaraj chun, Nepal rama simkhawlei inhningin thil a suksiet hai siem that nawkna dingin India sawrkarin Nepal kuomah thangpuina USD billion 1 peng a tih tiin thu a hril huna a puong. April 25, 2015 a 7.9 richter scale a hrat simkhawlei an hning tum khan mi 9,000 vel an thi a, mi 23,000 vel an hliem a nih.

---------------------------------------------------------------------------------------------------------------------

VAWISUN THUPUI

Midangin inpak lem raw se cheu, nangma hmur ngeia inpak ni loin, Hm>lmak miin ni raw se, nangma hmurhai ngeiin ni loin. ~ ­Thuvarhai 27:2

Editorial:Aw Churachandpur  town i tlawm le tlakbal ding kan phal nawh

Churachandpur town sunga hin mihriem  ei pung hrat hle a. Khawvel hmasawnnain a hung i ntlun in tha le lien, inlirthei chi hran hran a hung pung pei mila riruongna tha nei sawrkar sulhnung le hmalakna hmu ding a chau hle bakah a um mumal nawh. Town planning fel tak a um naw a, ei nuom dan danin in ei bawl a, ei town sung chu an chep ta hle a nih. Ei in bawl dan hai enfel a, a relfeltu ding ei neinaw a. Ei in hai chu bang intawm titin ei bawl a, a nekchep thei ang patawpin ei innekchep a. “In inhnai taphawt an lungril an hlat” an ti fiemthu hlak chu, tuhin chu a tak ramah a hung inchang ta a nih.

    

Motor insut tihai chu a ni ding hrim an maw mani ti thei ding hiel khawpin ei kawtthler le lamlienpui hai an tepin a chin ta a, hi lei hin hril buoi chi rak khawm ni tain an lang nawh. Ke a fe hai ta ding lem chun a rinum a, a beidangthlak ta takzet a nih. Hieng a ni lei hin state sawrkarin lamlienpui zaulien dinga rawtna a siem hi a taka a hung sukpuitling ding hun ngakhla a um khawp el. Chuong naw chun mihriem le inlirthei hai ei inleng tanaw a, ei nuom lei hrim ni lovin inlirthei le inlirthei an insut pal a, chu chau chu ni lovin mihriem le mihriem khawm ei inbawtuo nawk nawk chang le ei innek pal sawk chang khawm a um rawp el ta a nih.

    

Lamlienpui keklien el chau hi a huntawk naw ding a ni leiin sawrkar tienga thuneitu han Churachandpur town a dinga ring road an lo riruong ta sa hi an hmatienga hmang thei dingin hung zo fel hai sienla chu Churachandpur town sunga chenghai ta dingin inhawi a ta, inlirthei inbaw annawleh insut khawm hung a hung re beisei a um. Churachandpur district thil mamaw chi tum tum hai lai ring Road hi a thang ve a nih. Churachandpur town hi city a la hung ni ding an leiin ring road ei ti tak hi ei ta dinga tul le mamaw em em el a ni khelah ei town or city ding suklienna tha tak a la hung ni ding a nih. Tuta ei main road tak hi chu suklien iengang inlakhawm city a hung ni huna chun ei la dittawk naw tho tho ding a nih. Hmathlir hla tak ei nei a tul.

    

Ei Prime Minister Narendra Modi khawma India rama khawpui le town ei tihai suklien a tulzie a hmu le a hrietchieng leiin zanikhan Flagship schemes 3, Smart Cities Mission, Atal Mission for Rejuvenation and Urban Transformation (AMRUT) le Housing for All hai a hawng tan a nih. AMRUT scheme hi Manipur state le a sunga cheng mipuihai ta dinga tha le dit um em em el a nih. Ei rama khawm a tak ngeiin AMRUT scheme hi thaw le sukpuitling ve nisienla nuom a um ngei el. Ei ram sawrkar le roreltu hai khawmin hi Scheme hi hung ngaipawimaw ve hai sienla nuom a um hle.

    

Ei lamlienpui (main road) tak ngiel khawm khuo a sietin an diek zel zul a, an khur thlie  thluo leiin tui an tling lenglung a, tuihawk in luongna ding an vai a, lamlienpuiah an luong a, hun iemanichen zet chu tuikul/dil (pond) ang hiel khawpin an dil leuluou a, mihriem le inlirthei hai ta ding khawma hraw harsa tak a hung ni hlak. Lamlienpui ni lo, veng le khuo hran hran panna lampui thenkhat lem chu vadungte ang elin a um hlak. Khuo a hung that pha hlak chu pilvut khuin inlirthei khalhai, inlirtheia chuonghai le kea fehai a mi baw paw ther thur  hlak bawk si, a mangangthlakin lamlien tha neihai inhnar an um hle hlak.

             

State dang haia chun City le town enkawltu ding Municipal le Corporation dam an nei a. Manipur Hill Distrits haia ruoak chun hiengang hi ei ditnaw a, ei hnawl a ni kha! Churachandpur town sunga cheng hai khawma Municipal Council ei ditnaw a, ei hnawl leiin lak kirin a um. Hun tawite sung chau Ward Commissioner ei nei hman a nih. Hieng hi a ni leiin ei town­hai enkawltu tak ding chu Autonomous District Councils (ADCs) hai anni leiin sawrkar siem vat vatin ei town sung hi hung enkawl tha hai sienla nuom a um. Aw Churachandpur town i tlawm ding; i hmelsiet ding le i hung tlabal el ding kan phal naw che ti lungril puta ei Churachandpur town hi cheimawi le siem tha dingin hma latlang ei tiu.