Responsive Ad Slot

Hmasawnna Thar | 23 June, 2015

Tuesday, June 23, 2015

/ Posted by VIRTHLI HMAR
Tolsung:Headline
HCLF in MDC hai lawmpuina le inpawlpuina an nei
CCPUR: Hmar ChristianLeader’s Forum (HCLF) chun June 22, 2015, 1:00PM khan VTI, Muolhlum, Rengkai Auditorium, CCPur­ah ADC, CCPur hnuoia Hmar mi MDC tling thar mi 4­ Pu Hrila (Saikawt MDC); Pu Lal Hossan (Vangai MDC) Pu Lalhmangpui (Parbung/Pherzawl MDC) le Pu Lalditsang (Senvawn MDC) hai lawmpuina le inpawlpuina a nei.
    


Rev. Ros Infimate, Chairman,HCL in introductory speech a nei zovin Rev. Tlangmingthang chun hun hawng tawngtaina a nei a. Rev. Dr Lalhmuoklien, Secretary, HCLF chun Elected MDC hai inhmelhriettirna a nei a, hi huna hin MDC hai ta dinga tawngtai pekna hun hmang a ni bawk.
          
Rev. Dr Lalthankhum Sinate chun MDC tling thar hai infuina thucha a hril bakah Rev. Dr Rochunga Pudaite khawma hi hun hi uopin thuhrilna hun a hmang ve bakah MDC hai khawmin thuhrilna an nei tawl. Rev. Saithanglur Joute in hun tawp tawngtaina le buthleng inhlanna a nei zovin zantieng hlim takin ruoi an kiltlang.

Tamu­ah June 24 in Indo­Myanmar Border meet
CCPUR: June 24, 2015 nia Indo­Myanmar border meet um ding le inzawmin June 23, 2015, 10:30AM khin DC/CCPur Office Chamber­ah Pre­consultation meeting um a tih. Hi meeting a hin SP/CCPur; SDO/Singngat hai bakah SP, CCPur le SDO/CCPur hai chu thang dingin DC, CCPur in an hriettir. Pre­consultation meeting a hin proposal/suggestions ding hieng­ Porous border, Free movement; No.of border villages; No. of Border pillars in CCPur distict Pillar Nos. VU/availability of status of border village of CCPur district; proposal to conduct spoken  English Course (one month) at Behiang for Burmese Officials ti hai hriltlang ning a tih. Indo­Myanmar border meet hi June 24, 2015, 10:30AM in Tamu hmuna nei ning a tih.

DFO in Thingkak sem ding
CCPUR: Divisional Forest Officer, Southern Forest Division,CCPur/Manipur chun 66th  Vanamahotsava, 2015 celebration le inzawmin July, 2015 chawlkarkhatnaa inthawk thingkak sem an tih. July 1, 2015 in CCPur khawpui sunga Schools le Colleges thingkak dit hai ta dingin Office hour sungin lak thei ning a ta, July 2, 2015 in Town sunga Government Institutions le Offices hai ta dingin lak thei ning a ta, July 3 & 4, 2015 haiah Local Youth Clubs/ Churches le Philanthropic Organisations dang hai ta dingin Thingkak hi Office hour sungin lak thei ning a tih tiin DFO: Southern Division, CCPur chun inhriettirna a siem. Thingkak hi a tam tawknaw leiin Government funded NGOs le mimal kuoma chun semdawk ninaw nih tiin DFO thusuok chun a hril.

3rd Vocation Children Devp. Prog.
CCPUR: Gospel For India chun zani 10:30AM a inthawk khan Hill Town EOC Central Church­ah Hindu naupang hai ta dingin 3rd Vocation Children Development Programme an hmangpui.  Hi huna hin Thangboi Gangte, MCS khuollienin a thang. Hi huna hin Hindu naupang mi 82 an thang a, inchuktirtu in mi 6 an thang. Hi programme hi June 25, 2015 chen aw ding a nih.

Rev. Dr HM Songate in UK a pan ding
CCPUR: Pray for the World Ministry (PFWM) ­a Director (International Ministries) Rev. Dr H.M. Songate le a nuhmei Pi Lalbeisei hai chun June 29, 2015 khin Wales le England haia Kohran 10 vel haia rawngbawlna nei dingin UK pan an tih. Dr Songate le a nuhmei hai hi   August thla khin Mizoram a inthawk zaipawl (Choir) han an rawngbawlna hi zu thlawp an ta,  September 2015 thla tawp tieng khin India ram hung kir nawk an tih. An rawngbawlna kawnga hin Kohran mipui hai tawngtaina an mamaw nasa hle thu Rev. Dr H.M. Songate chun a hril.

DC ­a Certificate lakna dinga tul hai
CCPUR: DC Office, CCPur­a Certificate tum tum la ding hai chun Aadhar Card/Voter I Card/ Indentity Card/ Service or Student card/ Ration Card/School leaving Certificate/VA’ Recommendation letter/ Landline telephone bill/ electricity bill hai chawi a tul. Hieng documents hai chawi lo chun DC Office in Certificate tum tum a pek dawk naw ding a nih.

Online in Scholarship: Institutions hai NSP­a in register a tul
CCPUR/IMPHAL: National Scholarship Portal (NSP) www.scholarships.gov.in tlangzar a ni le inzawmin Academic Session 2015­16 a inthawk Scholarship po po Online­a apply thei a ni tah.  Amiruokchu, Scholarship Online­a apply theina ding hin Institutions hai chu NSP a in registered hmasak a tul a, NSP a in registered Institutions hai chu www.scholarships.gov.in/institutedetail.do annawleh MOBC official website: www.mobcmanipur.gov.in ah hmu thei ning a tih. NSP­a Registration thaw thar nuom hai chun Institute Registration Form le Recognized Certificate chu Directorate­a peklut thei ning a tih.  Registration Form hi MOBC official website­a inthawk khawmin download thei ning a tih tin  Director, Minorities, Other Backward Classes, Manipur chun inhriettirna a siem.

BJP in General body meet an nei
CCPUR: BJP, CCPur chun zani 11:00AM khan M. Songgel Community Hall­ah General Body meeting­cum­ Felicitation prog. Of Seilenmang Khongsai, MDC (Khousabung) an nei. Hi huna hin J. Haokip, President, BJP CCPur; Seilenmang Khongsai; Lhunkhojang Haokip, Ex­President  BJP CCPur bakah Ex­MDC candidate han thu hrilna an nei a, Ts. Jamlet Haokip, President, Singngat Mandal in tawng­tainain hun a khar.

KSO in 9th Felicitation program an hmang
CCPur:  KSO Henglep Sub­Division, CCPur chun zanikhan Kangvai Community Hall­ah 9th Felicitation programme an hmang. Hi huna hin T. Manga Vaiphei, MLA Henglep le Chairman MTDC khuollienin a thang a, T.L. Haokip, President, KSO/CCPur le Lamboi Haokip, President, KSO/Henglep hai chu functional president le guest of honour in an thang.
    
Hi felicitation programme hi T. Manga Vaiphei sponsored­na hnuoia KSO/Henglep in an buotsai a ni a, KSO Merit Certificate hmu Class X pass mi 19 (pasal 9, nuhmei 10) le Class XII pass mi 29 (pasal 15 le nuhmei 14) hai kuomah T. Manga Vaiphei chun cash award Rs. 2000/­ seng an hlan.
    
Hi baka hin T. Manga Vaiphei chun Henglep Sub­Division sunga  HSLC a percentage insang tak P. Lamneithem Gangte le Class XII a percent insang tak Lamjasong hai kuoma cash award Rs. 5,000/­ ve ve an hlan bawk.

Headline
Supreme Court in CBI insuitir dingin Central le UP sawrkar an hriettir
NEW DELHI: Journalist Jagendra Singh thina thuah Supreme Court chun zanikhan Central le  Uttar Pradesh sawrkar hai chu CBI insuitir dingin an hriettir. Chun, hi thua an hmalak dan ding chu tuta inthawk haptakar hni sunga sukfel dingin an hrietir. Jagendra Singh hi Shahjahanpur, Uttar Pradesh a cheng, June 1, 2015 a raw hlum a nih. Hi thil tlunga hin Police le Minister an inrawl a, Minister chungah action lak a la ninaw a, Police inrawlna neihai chu an sina inthawk suspended an ni tah.
    
Jagendra Singh piengna pa le Jagendra Singh naupa han zanikhan Uttar Pradesh Chief Minister Akhilesh Yadav an van hmupui a, pawisaa thangpina Rs. 30 lakh pek ding, thina tuok  Journalist sunghai mi 2 sawrkar sin pek ding le an sunga venghimtu pek dingin CM Akhilesh Yadav chun a lo tiem.
    
India rama chun Journalist hai beina hi inzing utin a tlaung el ta a nih. June 19, 2015 zana thuoihmanga um Journalist Sandeep Kothari (40) khawm June 20, 2015 zan khan Butibori, Nagpur, Madhya Pradesh ah raw hlum saa hmu a nih. Sandeep Kothari hi Katangi, Balaghat District, Madhya Pradesh a inthawka indik lo taka ram peksuok tumna thu a suizui leia pasal 3 han an that ni dinga ringhla a nih. Journalist raw hlumtu ni dinga ringhlahai chu, Vishal Dandi, Rakesh Nasvani le Brijesh Duharwal hai anni a, Katangi hmuna cheng vawng an nih. Hi thina le inzawma intum mi 2 man an ni ta a, pakhat dang chu an bi hmang leiin man a la ni nawh.

Thoubal District bandh
IMPHAL: June 16, 2015 a Khangabok, Thoubal District a motor pakhatin Sanaton a baw hlumna le inzawma JAC indina um chun zanita inthawk khan hun tiem chin um lovin Thoubal District bandh an thaw tan. JAC chun mi baw hlumtu chu man le dan anga hremna pe dingin State sawrkar an ngen a, sienkhawm tuhena an thil ngen hin ngaisak a hlawnaw nia an hriet leia bandh hi an thaw tan a nih.

VDF rifle lakpek le SP kuta pek
IMPHAL:  Zani zingkar khan Porompat Police station huop sunga DC Complex tuol zawn, Porompat hmuan VDF thenkhatin mi inlawn velhai dapin mi 2 hai chu Mobile phone lakpek an tu m leiin tleirawl pahniin VDF personnel Rifle an lakpek a, a hnungin SP, Imphal East District kutah an peklut niin ei thu dawngna chun a hril. A Rifle lakpeka um VDF hming hi hrillang a ni nawh.

Battle of Imphal World War ­II
IMPHAL: MFDC Hall, Imphal­ah Manipur Tourism le 2nd World War Imphal Campaign Foundation hai thangruola an huoihawtnain 71st Anniversary of Battle of Imphal World War­II hmanga nih. Hi huna hin CM O.Ibobi Singh; Prithviraj Singh, Parliamentary Secy. (YAS&Tourism); Nidhi Mani Tripathi, IAS, Secretary (Tourism/Science & Technology); Shyam Lal Poonia, IAS, Director (Tourism) le Dr Dhabali Singh, Manipur Tourism Forum thuoituhai an thang tawl. Hi huna hin World War­II veterans mi 6 dama la um hai chawimawina inhlan an nih.

UNC in ZUF kuomah ennawn dingin
IMPHAL: Zeliangrong United Front (ZUF) in June 24, 2015 zanrila intahwka Zeliangrong hai chengna biel sunga darkar 72 sung bandh thaw an tum chu ennawn a, mipui hmakhuo ngainaa thaw lo dingin ngenna an siem.

ATSUM in tiemchin um lo blockade
IMPHAL:  June 22, 2015 zanrila inthawk National Highways haiah All Tribal Students Union Manipur (ATSUM) chun tiemchin um loin Economic Blockade an thaw tan ding niin ATSUM President Muan Tombing chun a hril. Hi baka hin Jiribam­Tupul Railway project le NEC hnuoia National projects dang dang sinthawhai khawm dang le sukchawl (ban) ning a tih tiin a hril. June 15, 2015 a inthawka Higher Secondary School hai po po khar a ni hnung khawma State sawrkarin ATSUM thil ngen a la ngaisak naw rawp leia economic blockade hi lo thei lova thaw a hung tul ta a nih tiin June 21, 2015 nia ATSUM Office, Nagaram a chanchinbumihai an hmupui naah Muan Tombing chun a hril. Dy. CM GAikhangam chun ATSUM chu National Highways haia economic blockade thaw an tum chu tul dingin a ngen.

Petrol la tum mi an tam
IMPHAL:ATSUM in June 22, 2015 zanril­a inthawk National Highways haia tiemchin umlo Economic Blockade thaw an tum thu an puong leiin Imphal khawpuia chun zanikhan mi tam takin petrol bo ding inlauin pumps haia petrol la tu m mi an tam hle.

Rangkachak le Heroin man
IMPHAL: June 19, 2015, 4PM vel khan Customs han Kondong Lairembi, Impha l­Moreh Road ah nupui pahnihai chu rangkachak kg. 1.5 (Gold Biscuits pieces 9), Rs. 41 lakh manhu leh an man niin Customs thusuok chun a hril. Nupui pahnihai hi Moreh a inthawka Imphal pana fe a an ni a, an motor sukchawla customs han an dap huna an man a nih. June 19, 2015 ma khan 24 Assam Rifles han Khudengthabi hmuna Moreh a inthawka Imphal pana fe Maruti Van MN01S/7764 sukchawla an dapnaah Vuangkholching (33), w/o Khuplamkap of Phaicham  Veng, Moreh chu heroin grams 36 leh an man a, Moreh police station­ah an peklut niin PRO Hqrs. IGAR(S) thusuok chun a hril.

Others
Lambunna inrawitu Nagaland a kir nawk tah:
KOHIMA: June 4, 2015 nia Manipur­a Chandel District sunga 6­Dogra Regiment hai lambunna inrawitu tak Commander Niki Sumi chu Nagaland a kir nawk ta niin media report chun a hril.  Niki Sumi hi kar hmasa lai khan Myanmar le Nagaland ramri lai hmu niin intelligence service report chun a hril. Hi inlambunna­a Commander Sumi le a rawi hai manna dinga thangpui dingin sawrkar chun Ceasefire hnuoia um Naga helpawl hai a ngen tiin ei thu dawngna chun a hril bawk. June 4, 2015 nia Chandel district­a NSCN(K) han army an lambun huna khan Armay personnel 18 zet an thi bakah midang 11 in hliemna an tuok a nih.

Rajpath Intl.  Yoga Day­ah world Record 2
NEW DELHI: June 21, 2015 nia  International Yoga Day hmang a ni le inzawma New Delhi­a  Rajpat hmuna International Yoga Day hmangnaa chun a ruola  hmun pakhata Yoga thaw tam tak le rambung tum tuma mi thang rawn na tak haia World Record an siem. Rajpat hmuna International Yoga Day hmangnaa hin mi 36,000 vel an thang a, chu hai lai chun khawvel rambung  tum tum 84 a mi hai an thang niin ei thu dawngna chun a hril. Hi hun huoihawttu tak Minister of AYUSH, Shripad Naik chun, India ramin hienganga record pahni zet a siem chu lungawithlak a ti thu a hril. Prime Minister Narendra Modi chun record siemna dinga Yoga event­a thang hai po po chunga lawmthu a hril. Hi huna ramdang mi thang hai lai US Ambassador to India Richard Verma thangin khawvel rambung tum tuma palai (diplomats) hai an thangsa.

Delhi Law Minister hlui Tomar Tihar Jail­ah
NEW DELHI: Delhi law Minister hlui Jitendra Singh Tomar chu fake Degree Certificate case­ah June 21, 2015 khan Tihar Jail­a intang dingin Court chun a chungthu a rel. Tomar hi June 9, 2015 a inthawka kha fake certificate case leia  Police han thu indawnna nei dinga an kawl  tan ta a ni a, Police chun kawl tulna an neitanaw leia Court in Tihar Jail­a sielut dinga a rel a nih.

Yoga Day event­ah Vice President fiel ve lo
NEW DELHI:  June 21, 2015 nia Rajpath, New Delhi hmuna International Yoga Day hmang huna Vice President Hamid Ansari a thangnawna thua senior BJP le RSS leader Ram Madhav in indawnna a siem dawnletin Vice President Hamid Ansari chu Yoga Day event­a thang ding khan Vice President hi fiel a ninaw thu Hamid Ansari Office chun a hril.

Aizawl Venglai­ah In a chim
AIZAWL: Tulai hnaia ruosur lei khan Aizawl Venglai­a H. Ramtiama In, Assam type chu June 20, 2015 khan a ban innghatna lung an tawl leiin a tlu bakah a thlang tienga um Saithangpuii le Saliani hai chengna in chu a del siet bawk. Mihriem thi le hliemna tuok ruok chu an um nawh. H. Ramtiama hai sungkuo hin an in chu chim thei ding ngirhmuna um nia an hriet leiin June 19, 2015 zana inthawka kha in danga riek hmang an nih.

Thla 6 sung helpawl 12 that, 300 chuong man
TEZPUR: Assam state sunga chun thla 6 liemta sung khan Security Forces han National Democratic Front of Bodoland (Songbijit) cadres 12 an that bakah Bodo helpawl le KPLT helpawl hai thangin helpawl 300 chuong an man niin Army thusuok chun a hril. Helpawl an man hai laia a tam lem chu NDFB(S) le KPLT an nih tiin General Officer Commanding (GOC) 4 Corps of Army Lt. Gen. Sarath Chand chun reporterhai kuoma a hril.

Kashmir­ah helpawl 2 kap hlum an nih
SRINAGAR: Zani hmasa zan khan Kashmir­a Kulgam district a chun helpawlhai le Army hai an inkaptuo a, helpawl pahni kap hlum anni bakah Army jawan 2 in hliemna an tuok. Kap hluma um hai hi ieng helpawla mi am an nia ti hriet a la ninaw a, sienkhawm kap hluma um hai chu Javed Ahmad Kachroo le Idrees Nengroo hai an ni a, Hizbul Mujahideen le inzawmna nei niin Police chun an hril.

Zu thalo dawn leia thi mi 100
MUMBAI: Malad area, Mumbai a Zu tha lo dawn leia mihriem thina tuoak chu 100 an tling ta a, mi 38 zet Hospital tum tum haiah enkawl mek an la nih. Hi thil tlung le inzawm hin Zu zawrtu mi 7 man an ni tah. Kum 2005 hnunga Zu thalo dawn leia Mumbai khawpuia mi an thi tam tak tum a la nih. December 2005 khan Vikhroli a khawm Zu thalo dawn leiin mi 87 zet an lo thi ta a nih.

Sum khawntu mi 2 mipuiin an that nawk
TURA: Meghalaya­a Williamnagar hmuna chun thawluina hmanga sum khawntu ASAK helpawl 2 hai chu mipui lungsenin an vuok hlum nawk. Hi thil hi June 20, 2015, 7:30PM a kha thlung a nih. Vuok hluma um hai chu Mithush Sangma of Hakashak le Balsrang G Momin of Khalu, West Khasi Hills hai an nih. Mithush Sangma mansaa inthawk Police han ANVC­B Commander­in­Chief in pek promotion Certificate an dapdawk. Hiengang bawk hin tuta hma met khan Rongjeng town­ah mipuiin sum khawntu mi 2 an lo vuok hlum ta bawk a nih.

North Garo Hill­ah Tekin mi 2 a deng hlum
RUSUBELPARA: Meghalaya­a North Garo Hills district sunga Hatibhasa village a chun June 20, 2015 khan Tek tlain In pakhat a deng a, insunga um mi 2 hai chu tekin a deng hlum niin ei thu dawngna chun a hril.

Nuhmei suolluitu kum 7 intang dingin
AIZAWL: November 11, 2013 zana nuhmei pakhat suolluitua intum Vanlalnghaka (40) s/o Lalengmawia, Champhai Venglai chu Court in kum 7 jail intang ding le fine Rs. 1,000 chawi dingin thiemnaw an changtir.

IED pakhat dapdawk a nih
TEZPUR: Zanikhan Assam­a Sonitpur district sunga Dhekiajuli hmuna Improvised Explosive Device (IED) kg. 5 zeta rik ding Culvert hnuoia kam chu security forces han an dapdawk a, Army a bomb squad han pawitawklo dingin an suksiet.

Yoga prog. a dingin Rs. 25 crore
VIJAYADA: Regular taka Yoga programme le Yoga class Andhra Pradesh state sunga a fe pei theina dingin state sawrkarin AYUSH Department kuomah Rs. 25 crore peng a tih tiin N. Chandrababu Naidu, CM Andhra Pradesh chun a hril.

Sushma in UN Secy. General an hmupui
NEW YORK: New York hmuna International Yoga Day hmangpui dinga inzin India External Affairs Minister Sushma Swaraj chun zani hmasa khan UN Secretary General Ban Ki Moon an hmupui a, India le a thenum rambung hieng Pakistan, Bangladesh le Maldives hai chungthu an hriltlang bakah Pu Ban Ki Moon chun Pi Sushma Swaraj hi New York­a a tlungna Hotel­ah panin  khawvel boruok inthlakthleng mek chungthu, hmasawnna ding le chu kawnga chun India ramin hrat taka hma a thuoi thei dan chungthu hai a hrilpui.

Kum 3 hnungin Egyp in Israel­ah Ambassador ding
CAIRO: Egypt sawrkar chun kum 3 deuthaw Israel­a ambassador a sienaw hnungin President Abdel­Fattahel­Sissi chun Israel­a a ambassador dingin Hazem Khairat a ruot. Kum 2012­a Israel in Gaza strip a beia inthawka Egypt hin Israel­a ambassador a lakdawk a nih.

Pakistan­ah khawlum leiin mi 136 an thi tah
ISLAMABAD: Pakistan­a Karachi le Sindh Province sunga district pahni haia chun June 20, 2015 a inthawk tuchena hin khawlum tuorzo lova mihriem thi 136 an tling ta niin media report chun a hril. June 21, 2015 kha tukum sunga dingin Karachi a chun a lum ni tak a ni a, a lum dan chu 45 degree Celsius a nih tiin Dawn online report chun a hril. Lum leia mi thi tamna district dang pahni haia lum dan chu 48 degree Celsius nia sinsie a nih. Tuta hmaa Karachi khawpui lum ni taka record lo um ta chu May 9, 1938 kha a ni a, kha huna Karachi khawpui lumna chu 48 degree Celsius a nih tiin ei thu dawngna chun a hril.

Afghanistan Parliament beitu Taliban 6 kap hlum
KABUL:  Zanita Afghanistan Parliament va run tu mtu Taliban helpawl 6 hai chu kap hlum vawng an ni. Hi thil tlunga venghimtu le helpawlhai inkaptuonaah civil mi 19 an hliem niin Sayed Kabir Amiri, Kabul Hospital a health official thusuok chun a hril.
----------------------------------------------------------------------------------------------------------
VAWISUN THUPUI
“Ka nu phing sunga inthawkin saruokin ka hung suok a, saruok bawkin kir nawk ka tih; Lalpa chun a pek a, Lalpa chun a lak hmang nawk tah a ni chu; Lalpa hming chu inpakin um raw se,” a ta.  ­Job 1:21

Editorial
Mani inthat (Suicide)

Ringnawtu hai thaw ding chauva ei lo ngai hlak mani inthat (suicide) ei ti hi tu tieng tieng hin eini Kristien hai lai a bikin thalai le tleirawl hai lai khawm a hung um zeu zeu el ta hi ngaimaw um tak pakhat a hung ni tah. Ei khawsak le nundan a changkang deu deu a, sienkhawm nun beidawng ei pung deu deu niin an lang. Tukum sung hin Churachandpur District­a khawm tuta hma met khan Don Bosco a inchuklai pasal le nuhmei tleirawl hai chu inkhaihlumin anni le anni an lo inthat, hi ti lo khawm hi Manipur ram sung hmun dang danga khawm tukum sung hin inkhaihlum iemanizat an um tah.
    
Mani inthat (suicide) ei ti hi natna chikhat a ni ve a, khawvel pumpuia hin kumtin mani inthat a nuoi tel an um zie anga sut a ni a, hi lei hin khawvela mihriem thi tamna hai lai a thang phak ve hiel a nih. Mani inthatna hai hi san dang dang a nei thei a, chuonghai laia thenkhat chu­ lungril tiengpang damnawna lei; sukdam thei lo natna hri dang dang leia beidawngna lei; Insung khawsak dan (environment) in a zirnaw lei dam an ni hlak bakah nunghak­tlangval inhmangaina thienghlimlo (unhealthy relationship) lei dam le a dang dang hai an ni hlak. Chun, mani inthat tam tak chu midang chunga an lungsenna mania sengluta mani intheidana lientak an nei lei dam niin lungril tiengpang inchuk hai chun an hril.
    
Mani le mani inthat tum/nuom hai lo hriet lawk theina tlangpui (symtoms) nia mithiem han an hril hai chu­ in theilona, lungril sawl le beidawng, lungril ngaituona fim le tluong tak nei thei lona (impaired concentration), natna hranpa nei chuong lem lova hamhai thut thutna dam, inhawi an lo ti hlakna haia khawm thathona le phurna nei loa lungsen thut thut hai dam hi an nih. WHO sut dan chun kum tinin khawvelah mani inthat maktaduoi khat vel an um anga sut a ni a. America rama chun a tlangpuiin kum tin mani inthat 30,000 vel an um zie a record a nih.
    
Mihriem hai hin ei dam chen ding ei hrietnaw ang bawkin ei thi hun ding tukhawma ei hriet nawh. Sienkhawm thi ding seng senga khawm  mani inthatna hi inveng thei le pumpel thei a ni a, chu ding chun thangpuina indik le hringnun hmasawn dan indik kawkhmu theitu ding an mamaw a, khawvel khawmin a ngaipawimaw leiin ‘World Suicide Prevention Day’ chu kum 2003 a inthawk khan a lo hmang tan ta a nih.
    
Mani inthat nuomna lungril hiel put hai chu an lungril puthmang le nunphungah danglamna hmu ding a um ngei hlak a. Lungril na , Beidawngna, inzakna, inthiemnawna, mani intheidana, mi tukhawmin hmangai lova inngaina, invet el thei dinga inhrietna, mi suknat tina, tangkai le tawmkai loa inngaina le iengkhawm thaw theilo le hlutna hrim hrim nei lova inngaina hai an nei hlak a. An nun a hlim naw a, an taksa le lungril ngaituona a chau a, an thin a sie a, thil hotea khawm an lung a sen phut hlak a, mani inngaisangna a tlahnuoi hlak bawk.
    
Thalai hai laia mani inthatna tlung hlakna san ni dinga ring hai chu insung inenkawl dan le khawsak dana ningintelna nei lei; tulai ei khawsak dan a zalen ta leiin nunghak­tlangval le tleirawl inngaizawng han sex hmang ei uor ta hle ti chu thudik inthup a nih. Hi lei hin tum hram ni loa nau pai (unwanted pregnancy) lei dam a ni thei. Hieng a ni lei hin nu le pa hai khawmin insung enkawlna kawnga le insung ei enkawl dan le ei inrelbawl danah fimkhur taka ei um a tul a. Nau hai ta dinga nghawkum le ningintelum zawng ni lova an nuom le inhnikna zawng annawleh an lungril le ngaituona tlang taka an mi hril theina dinga ei inhawng thil tul ning a tih.
    
Mi tin hin ei lungrila ei pai thil hai hrildawk loa mania ei ip el chun tuor an tak nuom hle a, chu thil chun a thanaw tieng ami thuoi hlak bawk. Hi kawnga mitinin ei mamaw chu ei lungrila thil ei pai hai hril suoka insukthawlna ding ei mamaw a, chu ding chun zaidaw taka inngaithlak tawnna ei mamaw a, nupa karah, nau le nu le pa kara khawm nisien hril inchu el lovin ei lo nghawk deu a ni khawmin inngaithlak pek hram hram hai dam hi thiltha a nih.
    
Mani inthat nuom hiel khawpa lungril na le beidawng ei lo ni chun Pathien ei nei an nawm. A ma bel lova khawvel thil ei bel chun hadamna hmu ngainawng ei tih. Hringna hi Pathien mi pek a ni a, mani thua suktawp chu A theida zawng a ni a, tuolthat lo hram tum ding a nih. Chun, mani inthat hi dawizep thil a ni leiin a tum khawm tum lo ding a nih.

Don't Miss
© all rights reserved
made with by Simon L Infimate