Responsive Ad Slot

Hmasawnna Thar | 13 June, 2015

Saturday, June 13, 2015

/ by VIRTHLI HMAR
Tuolsung

HSA in MDC hai lawmpui
CCPUR: HSA CCPur Jt. Hqrts khawmin ADC, CCPur­a MDC dinga thlang thar mi 24 hai an lawmpuithu an puong a, a bik takin Hmar tawng hmang Pu Lalhrillien, Pu Lalhmangpui, Pu Lalditsang le Pu Lalhossan hai hlawtlingna chu an lawmpui takzet thu an puong a. Ram le hmam rawng an bawlna kawnga Pathien ti dek puma indikna le ringumna kengkaw zinga hmatieng sin thaw dingin HSA chun a ditsak thu a puong a. Chun, Election leia inerna hai popo unau le unau kara inhmelmakna le theidana um lova mitinin thuoitu thlang thar hai thlawptu ni seng dingin HSA CCPur Jt. Hqrts chun a ngen bawk.

SAL Seminar vawisun
CCPUR: Sinlung Academy of Letters (SAL) chun vawisun June 13, 2015, 12 Noon a inthawk hin VTI, Muolhlum, Rengkai, CCPur­ah Pastor Thangngur thi champha vawi 70­na hrietzingna ni fawmin thu le hlaa insukhmasawntuona dingin Seminar hmasa tak huoihawt a tih. Hi huna hin Saptawnga Joycee Kilmer in a phuok ‘TREES’ ti hmar tawng inletsiekna um bawk a tih. Hi huna hin Rev. Dr Rochunga Pudaite chun “Ka tawnhriet’ ti thupui hmangin Bible & translation thuah thu hril a ta, L. Keivom in thu hril bawk a tih.

ZYA GHQ Assembly le Election
CCPUR:Zani 11:00AM khan ZYO Election Chairman inrawinain 33rd Zou Youth Organisation General Assembly­cum­Election nei a nih. Hi huna hin  Kum 2015­19 sunga ZYO GHQ thuoitu dinga ngir  nomination file tukhawm an umnaw leiin ruot (nominate) an ni a. Chuonghai chu President­ Ginkhankhup; Vice President­ Nangzathang; General Secy­ Donglianmang; Asst Secy­Joel Lianmang; Finance Secy­ Khamminlun; Treasurer­Gouzapao; Arts & Culture Secy­Jamsuanmung; Information Secy­Thangchinlam hai an nih. ZYO thuoitu thar dinga ruot hai hi Mr Kamkhanlian, Election Chairman ZYO GHQ in intiemkamna an neitir a, Rev. Khupdoukhen in tawngtaipekna a nei.
            


UZO GHQ President Chinlunthang in hi huna thu a hrilnaa chun, ZYO GHQ thuoitu sunga inhrietthiemnawna um leiin UZO chun nasa takin hma a lak a, sienkhawm thil tha lem ding nia hriet leiin term la um po chu UZO danbu thangsana ZYO dissolved le thuoitu thar ding ruota hung um an nih tiin a hril.

High School a hlangkai dinga ngen
CCPUR: Zani 11:00AM khan Mr Kapneithang, DI of School/Singngat inrawinain a chengnain, Zoveng­ah Behiang khuoa Zogal Memorial Jr. High School chu High School­a upgradation thaw dinga nawrna um le inzawmin meeting nei a nih. Hi huna hin Zogal Memorial Jr. H/S chu High School­a dawmsang dinga ngen sunzawm pei dingin an rel.

ADC­ hai enkawlna dingin fund tlaksam um naw nih­ O.Ibobi Singh
IMPHAL: Zanikhan Congress Bhavan, Imphal­ah ADC Election­a Congress ticket­a MDC dinga thlangtling thar hai lawmpuina inkhawm nei a nih. Hi huna hin Manipur CM O.Ibobi Singh le Deputy CM Gaikhangam han thu an hril. Manipur sawrkar chun Manipur­a Autonomous District Council (ADCs) um hai chu duot takin a enkawl a, la enkawl pei a tih. Thuneina le fund khawm pek an nih. Manipur­a ADC­hai enkawlna ding le hmasawnna sin an thawna dingin fund tlaksam um naw nih. Central­a inthawka State share hung chu pek pei ning an tih tiin CM O.Ibobi Singh chun hi huna thu a hrilna huna a hril. Congress hi party dang hai anga power­a phingtam a ni naw tiin a hril a, Hill districts haia hmasawnna a um theina dingin Congress sawrkar chun kum 22 hnungin ADC election a huoihawt a nih tiin a hril.
            


Manipur sawrkar chun tlangram le phairam biel hai ditsak bik le thlier bik nei lovin a enkawl a, hiengang hin la enkawl pei a tih. Congress Party chu mipuihai ringzo party a ni leiin tuta tuma inthlangnaa khawm khan a tling rawn tak chu Congress Party candidates an nih. Congress candidates 46 an tling. Ukhrul District a inthawk mi 2, Tamenglong district­a inthawk mi 10, Senapati district­a inthawk mji 1, Chandel District­a inthawk mi 11, Sadar Hills a inthawk mi 17 le  Churachandpur District­a intahwk  mi 5 an tling a nih tiin Deputy Chief Minister Gaikhangam in hi huna thu a h rilna huna a hrillang.

Union Minister a hung inzin
IMPHAL: Zanikhan Union Chemical and Fertilizers Minister Anant Kumar chu Imphal­ah a hung inzin a, BJP ticket a thlangtling thar MDC­hai lawmpuina BJP Office, Nitaypat Chuthek, Imphal­a neinaah a thang. Hi huna Anant Kumar in thu a hrilnaah, Manipur hmasawnna dingin sawrkarin theitawp suoin hma a lak a nih tiin a hril. BJP MDC thar hai lawmpuina huna hin BJP Manipur President Th. Chaoba Singh le National Executive Member BJP Tapi  Gao hai khawm an thang.
            
Chun, Manipur CM O.Ibobi Singh leh CIPET Office an va sir a, hi huna hin Anant Kumar chun Manipur a Plastic Park indin a ni ding thu a hril. Hi huna hin Mr Anant Kumar chun CIPET Centre, Takyelpat hmuna hin bawl zo thar hlim ‘Academic and Hostel blocks’ building a hawng a. Central Institute of Plastic Engineering and Technology (CIPET) thilthaw chu lawmum a ti thu hrilin sawrkar thlungpui chun CIPET sukhmasawn le sukchangkangna dingin Rs. 14 crore hung pek a  tum thu a hril. Rs. 9 crores chu nuhmei le pasal hai ta dinga khum 340 le Rs. 4 crores chu hi institute­a hmangruo thar inchawknaa hmang a ni ding thu minister chun a hril.

Lt.  General Rai a hung inzin
IMPHAL: Army Commander Eastern Army Lt. General Manmohan Singh Rai chu zani hmasa khan Imphal­ah a hung inzin a, Manipur a Security ngirhmun a ennawn. Army hai hmalak dan le sin thaw dan hrilin dan zui ding le civil mihai chunga nunrawng lo ding le ruoltha a siem lem dingin Lt. General Rai hin Army hai a hril. Mipuihai khawma Army hai chu an vengtu, muongna, inremna le hmasawnna hung intluntu an nizie hrie dingin a ngen.

Others:
Rema Punjee buoina thuah Peace rally nei
HMARKHAWLIEN: Chotokumpi (Rema Punjee) Hmar khuo Khasi le Dimasa inkawpa run a nina le inzawmin Joint Organisation hmalakna le huoihawtnain zanikhan Cachar pheia khuo 17 haia mipui han Hmarkhawlien­ah lampui hrawna (rally) an nei. Rally­a hin mipui 2500 vel an thang a, Lakhipur SDO (Civil) office chen lampui an hraw a, hi hmuna hin Lakhipui SDO le SDPO hai an inbiekpui a, sawrkar tienga inthawk hmalakna iengkhawm a la um nawna thuah  a tharin memorandum an pek nawk. SDO chun refugee hai fak le dawn ding pek a tiem a, FIR thelut dungzuia hma la dingin an ngen bakah FIR zieklang mi 6 hai chu ni 3 sung ngeia man dingin an ngen a, hma la ngei dingin an tiem bawk.
    
Hieng laizing hin June 11, 2015 khan Hmar Inpui Barak Valley Region hmalaknain Hmar Women Association, Barak Valley Region indin a ni tah. Hi huna hin HWA NC Hills tienga hotuhai khawm an hung thang. HWA Barak Valley region president dingin Mrs Jenis Laltanpui, Gen. Secy in Mrs Madhu Mala hai ruot an nih. (Virthli)

A tul leh Manipur suoksan ding
BANGALORE: Vawinga zet nuhmei boxing­a World Champion lo ni tah M.C. Mary Kom chu Rio Olympics a dingin Bangalore­ah training lain a um mek a. Manipur­a helpawl han Army 18 zet an kap hlum chu pawi a ti thu a hril. Manipur­ah helpawlhai chetna leia buoina a zuolpei a, mihriem chengna dinga a himnaw a, lo thei lova suok a lo tul leh ka chengna state khawm nisienla ka suoksan el ding a nih tiin M.C. Mary Kom (33) chun a hril.

NSCN (IM) rawtna sawrkarin a hnawl
NEW DELHI: Sawrkar thlungpui le inremna dawkan kila inbiekna neizing NSCN(IM) in  tulai hnaia Chandel District, Manipur­a Army 18 zet kap hlumtu NSCN(K) helpawl hai tukdawlna dinga security forces hai thangpui an nuom thu an hril a, sienkhawm sawrkarin a hnawl. Sawrkar thlungpui chun,NSCN(IM) thanglo khawmin Naga helpawlhai kan tukdawl thei tiin an hril.

Myanmar ah helpawl camps 17
NEW DELHI: Myanmar ram sungah India helpawl camps 17 a um niin Indian Intelligence Agencies thusuok chun a h ril. Helpawlhai camps hi Taga Area sunga um le India helpawl, Myanmar a camp neihai hi NSCN(K), ULFA (I), NDFB(S) le Manipur a meitei helpawl group tum tum hai niin Indian Intelligence agencies thusuok chun a hril.

BJP leh an thangruol ding
PATNA: Bihar CM hlui Jiran Ram Manjhi inrawi Hindustani Awam Morcha (HAM) chun Bihar Assembly election hung um dinga hin BJP leh an thangruol ding niin Mr Manjhi chun zani hmasa zantienga New Delhi hmuna BJP President Amit Shah an hmupui zova Chanchinbumihai an hmupui huna a hril. Seat insem dan ding chu a hnunga an la rel ding  thu le JD(U) le RJD alliance hneban chu HAM le BJP thiltum tak ning a tih tiin a hril. Mr Manjhi hi Bihar Chief Minister nina Nitish Kumar inchupui a tum leia thla iemanizat liemtaa kha JD(U) a inthawka hnawtdawk, chu hnunga party thar HAM hi a hung indin a nih.

Myanmar ah Ajit Dofal an zin ding
NEW DELHI: National Security Adviser Ajit Doval chu June 17, 2015 khin Myanmar ah inzin a ta, an President U. Thein Sein thangsain Myanmar ram thuoituhai hang inhmupui a ta, India ram  helpawl, group tum tum, Myanmar ram sunga camp neia um hai hnawtdawk dan ding chungchang a hrilpui ding niin ei thu dawngna chun a hril.

 NSCN (K) danpuoa hnawl dingin
NEW DELHI: India sawrkar chun NSCN(K) chu danpuo a hnawl (ban) dingin hma a lak mek a, hi thua hin Union Cabinet in thutlukna siem vat tang a tih. Tuhin India ramah banned terrorist Organisations 38 an um mek. Hieng laizing hin NSCN(K) chun Army han an cadres tam tak an that nia an hril chu thudiklo a nih tiin an hril. An thi a ni chun an ruong hmu theiin suklang rawhai seh tiin Army hai an cho let.

Tomar AAP a inthawk hnawtdawk el thei
NEW DELHI: Fake Certificate case leia man Delhi Law Minister hlui Jitender Singh Tomar chu Aam Aadmi Party (AAP) a inthawk hnawtdawk ni el theia hril a nih. Hi chungthua thutawp chu party Lokpal chunga pek ni el theia hril a ni bawk. A LLB degree ringawt chu harsatna a ninaw a, a B.Sc degree­a khawm ringhlana a um a. Hi thua hin Delhi CM le AAP Chief Arvind Kejriwal  chu a lungawinaw hle a hril a nih.
             
Hieng laizing hin Jitender Singh Tomar chu zanikhan thu indawn dingin Munger District, Bihar tieng thuoi a nih. Tomar hi Delhi Police han fake law degree case leia thu indawn dinga Munger hmuna an thuoi a nih. Bar Council of Delhi chun Tomar hin Munger­a Institute of Legal Studies College­a inthawk fake law degree hi a lak niin an hril.

Assam Tuilien zuoltieng a pan pei
GUWAHATI: Assam rama tuilien chun kiem nekin zuoltieng a pan pei a, tuchena hin mi nuoi 3 chuong hai chun tuilien leiin harsatna an tuok pha a, ruo a la sur zing bawk leiin  tuilien hin district 15 haiah harsatna an tlun pha a, ruo pil nasa takin a sukchim bawk. Sansuokna sin thawtu dingin NDRF hai thu Tinsukia, Barpeta le Lakhimpur district haiah suok el thei dinga inringsaa sie an ni a, relief camps 5 hawng a ni ta bawk. Brahmaputra vadung khawm Jorhat le Dhubri haia tium inchikna pel zar zarin an luong a, thlai tam tak tuilienin a suksiet ta bawk. Arunachal Pradesh­a district 8 hai chu tuilien leia fepaw thei lovin an um a, fak le dawn an tlasam mek bawk niin ei thu dawngna chun a hril.

MP in thawlawm Rs. 7.81 crore
BHOPAL: Madhya Pradesh sawrkar chun April 25, 2015 nia Nepal rama simkhawlei inhning leia harsatna tuortuhai sawmdawlna dingin mi thahnemngai tum tum haia inthawk  thawlawm Rs. 7,81,30,586 a dawng ta a, a la hung lut zing  bawk tiin Maharasthra Public  Relation department chun ann hril. Donation lut hai hi Nepal ram kuoma pek dingin sawrkar thlungpui kuoma inhlan a ni ding thu Maharashtra CM Shivraj Singh chun a hril a, mipui hai chu phal taka thawlawm pei dingin a ngen.

Delhi Assembly Budget Session
NEW DELHI: Delhi­a Aam Aadmi Party sawrkar­a cabinet meeting chun Assembly Budget session chu June 23­30, 2015 inkar sunga nei dingin an rel a. Budget draft chu Lieutenant Governor kuoma pawmpui dinga thawn a ni tah tiin Delhi Dy. Chief Minister Manish Sisodia chun a hril. Delhi sawrkar chun March thla khan April­June sunga ding Vote­on­Account Assembly­ah a lo phar tah.

Km. 3.9 a inthuk ver a ni tah
AIZAWL: Mizoram­a Maubuang ram sunga thautui laksuokna dinga km. 4.5 a inthuk ver dinga ti laia km. 3.9 cho zo a ni tah. Hnuoi verna hmun hi zani hmasa khan Geology & Mineral Resources minister H Rohluna, parliamentary secretary Joseph Lalhimpuia le  Lt.Col. ZS Zuala han an va sir. Oil chodawkna dinga hnuoi ver hi July 7, 2014­a inthawka tan a ni a, tuta inthawk thla 3 sunga ver zo hman beisei a ni a, sienkhawm pil a chang leiin khawl ha a mawl awl leiin thleng deuzing a tul a, chu thila chun a verna khawl keidawk vawng a tul hlak leiin duthusamin an ver hrat theinaw niin Oil India Ltd. hotuhai chun an hril.Hnuoi vernaa hin nitin Rs. 14 lakh vel an seng phak ang niin Oil India Ltd. chun an hril.

Kashmir hmun 2 ah ISIS le Pak. flag keiphar
SRINAGAR: Kashmir­a chun tu ti hrielo silai chawi han zani hmasaa Tehreek­e­Hurriyat activist Altaf Sheikh an kap hlum dodalnaa zanita Hurriyat Conference chief Syed Ali Shah inrawinaa protest an neinaa hmun pahni haia chun ISIS flag le Pakistan flag keiphar hmu a nih tiin official thusuok chun a hril. Protest huna hin Jamia Masjit a inthawk Nowhatta Chowk chen lampui hrawna nei a ni a, hmun thenkhata ISIS le Pakistan flag keiphar hmu a ni a, mi man ruok chu an la um anwh. Baramulla district­a Sopore hmuna chun rally huna hin security hai leh inbeituona a tlung a, sienkhawm hliemna tuok an um thu hriet a ni nawh.

Degree certificate tehlem
NEW DELHI: Aam Aadmi Party (AAP) thuoitu hlui Rajesh Garg chun Karol Bagh A/C MLA Vishes Garg chu Degree certificate tehlem nei niin an  tum. Kum 2013 a affidavit a pekah graduate niin an h ril a, kum 2014 a affidavit a peklutah Class X pasi niin an hril tiin an tum. Degree certificate tehlem leiin Delhi Law Minister hlui Jitender Singh Tomar chu man le case neiin Police kutah a um mek a nih.

Chinese Billionaire chuongna emergency in Tipura­ah a tum
AGARTALA: China mi hausa tawntaw le multi­billion Dalian Wanda Group hotu tak Wang Jianlin le midang 7 hai chuongna private jet Gulfstream­5 vuongna chu a khawl buoi leiin permission lain zani zingkar 9:30AM khan Agartala hmuna a tum.Wang hi sumdawngna le inzawma India rama hung inzin, Beijing a pan huna hi hi thil hi a tuok a nih. Mr Wang hin  India rama hmasawnna sinthawnaah dollar 5 billion a hung invest ding niin a puong a nih. Wang hi PM Narendra Modi fielna anga ni 4 sung chama India rama hung inzin a nih.

Bangladesh in NE helpawl hai chunga action
SHILLONG: Ni 4 sung aw BSF le BGB han IGP level Border Coordination Conference, BSF Frontier hqrts hmuna an nei hunah BSF chun Bangladesh ram sunga India helpawl hai camps 39 list chu BGB kuta a pek a, Bangladesh Border Guards (BGB) chun India hmarsak (NE) helpawl, an ram sunga inbiruk hai chunga action a lak ngei dingin a mi tiem tiin BSF spokesman Sushil Kumar chun a hril. BGB kuta helpawl camps list peklut hai lai h in ULFA, NSCN (IM), NDFB, PLA, HNLC le NE helpawl group dang dang hai camp a thang tiin Mr Sushil Kumar chun a hril

---------------------------------------------------------------------------------------
VAWISUN THUPUI
“Kei a mi kalzawnga in u m a, ka thu in pawm naw chun, in suolhai zirin a let sariin in chungah hremna intlungtir ka tih.   John 2:17

Editorial
Mihriem hringnun

Thlaichi ei tua, iengang boruok sik le sa am a tuok ding ti hre lova a hung kak suok ang hin mihriem hai hi nu sula inthawk insiengin, ienganga hun lawmum le harsatna am ei tuok ding ti khawm hre hlek lovin khuonu remruotnaa hung piengsuokin,ei la hmu ngai lo rinumna le harsatna chimvel khawvel eng hung hmuin ei hung inthanglien a. Khawvel beidawngna le rinumna ram chu inhawi taka hringnun hmang tumin a chang chun duthu ei sam rawp hlak. Sienkhawm, lungngaina, beidawngna le harsatna chi tum tum hai chun hla thu takah ‘i thang naw chun nau ang ka tlei thei nawh’ ti ni awm hrieuin nitin an min huol vel hlak a, ruoltha han an min phatsan huna khawm a min phatsan ve ngai nawh.
    
Harsatna, beidawngna le lungngaina sumpui a hung zing chang hin chu mihriem hai ta dingin khawvel hringnun lampui ei hrawna kawnga hin thodawk nawk ta lo dinga tluk sawng theina tam tak a um hlak. Chuong hun haia chun ngaituona invak velin sungrilah suol le tha an insuol rawp hlak a. Chu huna suolin hnena a lo chang lem  pha pha ei hringnunin lampui indiklo a hraw hlak. Sienkhawm, thilthain hnena a chang huna ruok chun beiseina thar leh thodawkin  hlawtlingna thar a min tlun hlak.
    
Rangkachak incheina mawi tak ni dingin meiling a fethleng a tul ang hin, mihriem hringnun chun inhawi le hadam lema um theina dingin tuorselna, tumruna, taimakna le thaw tal talna hai neia, mi imu inhnik taka an in lai khawma imu suok lo ienga meng tal tal, thaw tal tal, mi thaw pei lo le mi thaw ngam lo thaw a tul. A ru no no suoka khawvela cheng ei nita leiin a tuorselnaw deu hai ta ding chun khawvel hi rinum zuol pei a ta, ei damsungni chu rinum sawt ei ti zuol pei ding a nih.
    
Ei hung pieng suoka, ei beiseina le duthusam insang hun lai tak chu tleirawl ei hung ni hun lai hi a nih. Hi huna hin ei taksa le pangti a that vanglai a ni bawk leh, kawng iengkima foundation ei rem nghau nghau lai a ni bawk leiin ei beiseina insang tak chun iengang hun khir le harsa am ei tawng ding ti tieng nekin an hawi le a hlimum tiengpang ei thlir lem rawp hlak. Kum a hung fe pei a, hmangaina luongliema Pathien in mihriem hai ta dinga a ruot nuhmei le pasal nupaa insung ei hang indin meu chun, mihriem hringnun hi tuipui damduoia luong zuoi zuoi ang kha a lo ni nawh. Hla siemtu in ‘A chang leh suor sietna hmuna’ a lo ti angin hun khir le tuor harsa tak tak ei tuok hun a hung tlung a. Phur taka thil ei thaw hai beidawngnain a hung khar meu chun ei ta dinga khuo hrim hrim var nawk ta ngai lo ding ang hielin beiseina chu a tawp rawng rawng hlak.
            
Hiengang hun ei tuok chang hin chu mi neka vangduoi lema inngaina le mi tuok ngai lo tuok anga inngaina ei nei lien hle hlak. Mi tam tak chun a tha tieng nekin an thim tieng ei thlir lien lem hlak leiin ei nitin nun chu titthawngna in a sip hlak. Sienkhawm, chuong harsatna le beidawngna hai chu khawvela ei um sunga ei pumpel thei ding an ninaw a, mitinin an lo tuok le, thangthar la hung um pei ding hai khawma an la hung tuok ve ding, Eden Huona ei thlatu Adam le Evi suksuolna leia khawvela mihriem popo suola tlu ta hai tuok le hmasawn dinga siemtu Pathienin tawngsie a mi lo inphur a ni ngang leiin ei pumpel thei ding a um nawh. Pumpel tuma kawitan hraw hai khawmin an pumpel sawng thei chuong nawh.Hi lei hin harsatna khela hlimna le malsawmna, lungngaina khela thlamuongna, tapna khela innuina a um ti hrie a, ei tawnhriet le thil tuok hai a tha zawnga thlirthiem thiemin hi hnuoi rinuma hin hlawtlingna an chang hlak. Zan thim laia ei khawsakna dingin var ei mamaw ang hin, harsatna, beidawngna le buoina tinreng ei chunga a hung tlung huna a ei mamaw tak chu thil thlir thiemna a nih.

Don't Miss
© all rights reserved
made with by Simon L Infimate