Responsive Ad Slot

Hmasawnna Thar | 21 May, 2015

Thursday, May 21, 2015

/ Published by VIRTHLI
Tuolsung
NECA in Class X pass hai lawmpuina hun an hmang
CCPur: North Eastern Children’s Academy (NECA) chun zani May 20, 2015, 11:00AM khan an  School campus­ah tukuma BSEM huoihawtna hnuoia HSLC Exam­a Class X pass hai lawmpuina  hunser an hmang. Hi hun hi Kohran tum tuma thuoituhai  khawmin an uop ve. Upa Dr Bieksang in lawmlutna thucha a hril a, Dr Lalkhawlien Pulamte, Chairman, Managing  Board in thuhrilna le Pu Vincent Shakum, Headmaster, NECA chun Class X pass hai inhmelhriettirna a nei a, student hai hlawtlingna chu hotu hai po po thawkrimna ra le Pathien zar a ni thu a hril a, Rev. Jonathan Pudaite chun tawngtaipekna le infuina thucha a hril. NECA Managing Board han thuhrilna neiin Upa Lalthalien Pakhuongte chun hunkhar tawngtaina a nei.
    


Dr Lalkhawlien Pulamte chun, school chungthua khawlai tawng le mi thuhril ring el lova, thudik hre nuom hai chun Managing board kuoma indawn dingin a ngen a, education chau ni lova naupang hai Pathien thua chawmlien chu school thiltum a nih tia hrilin, school siemthatna dinga nu le pa hai le thangruola thaw tlang dingin a fiel.
            
Tukum HSLC Exam­a khan hi school­a inthawka exam student hai mi 10 1st Division­ah an passed a, mi 5 hai 2nd Division­ah an passed a, an pass percentage 100­ah 100 a nih.

Mimal anga candidate hai dawr an khap
CCPur:  May 19, 2015, 7PM khan Sielmat le Hmarveng, CCPur hai thangruola indin Election  Committee chun Sielmat HYA Hall­ah meeting an nei a, MDC election hung u m ding le inzawmin zaikhata luongtlang dingin an remtih. Hi dungzui hin mi tukhawm, mimal le pawl ang zawnga  candidate hai lo dawr le lo inbiekpui khap tlat ni a, A lo inbiekpui le sum lo la dam an um chun khawsung inthuruolna ditlo anga ngai ning an tih. Hi lei hin mi tukhawm hi inthuruolna inzaa bawse lo dingin V.L. Mawia, Chairman, Joint Committee chun inhriettirna le ngenna a siem.

AR han inruithei leh mi 4 an man
CCPur: May 19, 2015 khan 26 Assam Rifles chun Myanmar mi 3 thangin mi 4 hai chu Songdai  hmuna an man. Mana um Myanmar mi pathum hai chu Siam Mung s/o Gotueng Mung of  Tualkhang; Lein Singh s/o Khenmung of Tualkhang le Khaikheupu Theem s/o Kaihau of Tualkhang hai an ni a, midang pakhat chu  Haukhen Thomte s/o Liandong of Songdai (India) a ni a, an kuta inthawk Fortwin (injection) 673 (packets 56)  le Syringe (IV Set) 9 an man. Mi 34 hai hi an thil man hai leh Police kutah an peklut a, Police chun FIR No. 2 (5)15 SGP­PS U/S 24ND&PS Act, & 14 Foreigners Act hnuoiah case an registered khum.


Zogal Memorial Shield 2015
CCPur:  May 23, 2015, 12:00Noon khin UZO GHQ le CDSA huoihawtnain Public Ground, CCPur­ah “Zogal Memorial Shield 2015 hawngna um a ta, Ginsuanhau, MLA/Singngat chun khuolliena thangin hawng a tih. Hi huna hin L.B. Sona, Chairman, ZC; Chinlunthang, President, UZO GHQ hai  guest of honour le chief host in thang an tih. Zogal Memorial Tourney nei ding le inzawm hin zani 11AM khan CDSA Office­ah Club/Team Managers haileh joint meeting nei a ni a, tournament sunga dan le dun hai  inhrilna le poolwise team selection hai nei a nih. Zogal Memorial tournament a hin teams/Club 25 thang an tih.

A tutu khawm tling inlang hma ei lak tlang a tul: Hrila
TuiThaphai: May 19, 2015, 8PM khan MDC election hung um dinga 19­Saikawt biela candidate Pu Lalhrillien Election Office 5­na ding hawngna Muolvaiphei khuoah nei a ni a, Muolvaiphei community Hall kenglo rak khawpin hi huna hin mipui an fekhawm. Office hawngna le tawngtaina Pastor Buonkhothang in a nei a, hi huna hin Pu Lalhrillien chun mipui hmaah thuhrilna a nei. Mipui ditsakna lei le Pathien zara kum  2010­2015 sung Saikawt biel MDC chair a hluo thei a nina thuah lawmthu a hril bakah a term sunga a sinthaw dan tlangpui hi huna hin mipui hmaa a puong. Mipui le sin thaw tlangpei a la nuom thu, tukum an khingpui ding Pu Darsiemlien Ruolngul (Ind.) le Pi  Rammawi (BJP) hai chu mi tha le mi thahnem ngai an ni thu hrilin, a tu tu khawm mi lo vote tling inla, hma ei laktlang a tul tiin Pu Lalhrillien chun mipui fekhawm hai hmaah a hril. Tuta hma khan Thenmuol, Ngurte, Saikawt (main office) le Hmuntha khuo haiah election office a lo hawng ta tawk.  (LRS)

DC rawiin joint meeting nei
CCPur: June 1, 2015 nia Manipur­a ADC 6 haia MDC election hung um ding le inzawmin Mr Lunminthang Haokip, IAS, DC, CCPur inrawinain zanikhan DC, CCPur Office chamber­ah security meeting nei a nih. Hi huna hin SDOs hai, SP, Addl. SP, Police Officers hai bakah Mr T.K. Simte, MCS, AC to DC, CCPur hai an thang a. MDC Election hung um ding le inzawma CCPur district­a venghimna sin thaw dan ding; Security le Polling duty hai suok dan ding hai an hriltlang.

Class  X pass hai lawmpuina an nei ding
CCPur: May 21, 2015, 2:00PM hin  NKT Jr. High School chun YMA Hall, Kawnpui­ah tukum HSLC Exam­a an school­a inthawka  Class X pass (1st batch HSLC successful candidate) hai lawmpuina le Pathien kuoma lawmthu hrilna hun hmang an tih. Hi huna hin Pu Lungmuana, IAS le JC Ramthanga, IAS han uopin lawmman tum tum semna nei an tih.

DCC/DLRC meeting May 23­ah
CCPur: May 23, 2015, 11AM khin DC’s Office, Churachandpur­a BRGF Hall­ah District Consultative Committee (DCC)/District Level Review Committee (DLRC) meeting nei ning a ta,  Agenda points 11 hriltlang ning a tih tiin Chief Manager, Lead Bank Office, SBI, CCPur, Thoubal & Chandel chun inhriettirna a siem.

TPO 45th  Assembly
CCPur: May 22, 2015, 11:00AM khin Tungdim Phungpi Organisation (TPO) chun Zoumunnuam  Community Hall­ah 45th Annual Assembly­cum­Election nei an tih. Hi huna hin TPO sunga officer tling thar hai Memento inhlanna um bawk a ta, Election Commission inrawinain TPO thuoitu ding thlangna um a tih.

CDSA in CRS a in register dingin
CCPur: All India  Football Federation (AIFF) in inhriettirna a siem dungzuiin Churachandpur district sunga Clubs hai chu Centralized Registration System (CRS) in register seng dingin   Churachandpur District Sports Association (CDSA) chun inhriettirma a siem. CRS a in register lo hai chu State, District annawleh AIFF affiliated tournaments haiah an thang phal ninaw nih.  Player/players inter state Transfer & loan khawm CRS fethlengin transfer window 2015­16 (June 9­August, 2015) sunga thaw ding a ni a. Hi lei hin CRS a in register lo players hai chu transfer phal ninaw nih. CRS registration hi CDSA fethlengin June 30, 2015 chena thaw thei ning a tih tiin CDSA thusuok chun a hril.

RPC NEI KTP Games & Sports
TuiThaphai: RPC NEI KTP, Phairam District chun May 22 - 23, 2015 inkar sung hin Saikot Playground hmun ah Annual Games & Sports 2015 nei an tih. Opening Ceremony May 22 zing dar 10 AM hin nei ning a ta, hin hun a hin Chief Guest Pu Lalramsang Infimate ADC, Bishnupur Dist. le Guest of Honour Rev. Saithanglur Joute Chairman, KTP Standing Committee, Phairam Dist. hai thang an tih. Closing Ceremony May 23 zantieng dar 3:30 PM in Saikot Playground Pavillion hmun a nei ni nawk a ta. Chief Guest Rev. (Dr.) Vanlalnghakthang Gen. Secy., RPC NEI le Guest of Honour Rev. Jacob L. Hmar Youth Co­Ordinator, RPC NEI hai ning an tih. Sun hun a hai inkhelna chi tum tum huoihawt ning a ta. May 23, 2015 zingkar Marathon Race Saidan a inthawk Pasalhai le Lamka RPC Biekin a inthawk Nuhmeihaiin intanin Saikot chen tlan an tih. Chun, Zan hun a hai Saikot RPC Biekin ah hun hmang ni hlak a ta. May 21 zan Talent Hunt le May 22 zan CKTP Conference a Lawmman 1st (Pakhatna) Hlapawlpui a KTP Phairam Dist.­in an lak Lawmna le Talent Hunt Lawmman semna um a ta, Resource Person a thangin Ms. Margaret, Advocate chun Talks on Human Trafficking ti thupui hmangin thu hril a tih.May 23 zan RIMAWI 2014 Result Puongna le Annual G&S Lawmman chi tum tum hai semna um a tih. Hi huna thang ve ding hin Games & Sports Organising Committee 2015 chun ngaina takin mitin an fiel.(LRS)


Headline:
Delhi Lt.   Governor le CM hai power inchu buoina a la fe pei;
 Delhi CM in appointment a pek hai  Lt. Governor in a cancelled
New Delhi: Delhi Lt. Governor Najeeb Jung le Delhi CM Arvind Kejriwal han power insang  nei lem ni an inchuna chu a la fe pei. Lt. Governor Najeeb Jung chun Delhi CM Arvind Kejriwal thil thaw dan chu dan lo le Constitution kal a ni a, an dik naw lem le a thiemnaw lem Arvind Kejriwal  a nih tiin a hril. Chun, Govt. of NCT of Delhi Act le Transaction of Business Rules of the Delhi Government dungzuia thil thaw ka nih tiin Lt. Gen. Najeeb Jung chun a hril bawk. Delhi CM, Arvind Kejriwal khawmin ama chu an dik lem le dan dungzuia thil thaw a ni thu a hril ve.
    
Arvind Kejriwal chun President Pranab Mukherjee khawm an hmupui ta a, Delhi Lt. Governor le an inkar thu an tlun. Chun, Arvind Kejriwal hin zanikhan PM Narendra Modi lekha a thawn a, constitutional Scheme hnuoiah Delhi sawrkar chu ro inreltir (function independently) dingin a ngen a. Najeeb Jung hmangin sawrkar thlungpui chun Delhi sawrkar chunga rorel tum a nih tiin an tum. Delhi Lt. Governor le Delhi CM hai inkara  thunei lem inchuna (power tussle) hi Delhi CM in Delhi acting Chief Secretary dinga Ms Shakuntala Gamlin a ruot (appointment a p ek) a inthawka hung intan a nih.
            
Ni 4 liemta sunga Delhi CM in  appointments a siem hai po po chu zanikhan Delhi Lt. Governor in a cancelled nawk vawng. Hieng thuneitulien pahni haiin power nei lem inchua thil an thawna hin Delhi sawrkar hnuoia bureaucrats ei tihai a sukbuoin an ning a suktel  hle a, bureaucrats 10 hai lem chun Delhi sawrkar puotienga  transfer dingin ngenna an siem hiel a nih.

Imphal
Pawisa a peknaw leia an vuok
Imphal:  Daniel Lungleng (45) s/o Maraotho of Challou Village, U khrul district chu  na taka vuok hliem a ni leiin Advance Hospital, Palace Compound, Imphal­ah enkawl mek a nih. ADC election hung um dinga hin a makpa Shimreingam A. Shimray chu Congress candidate in Chingai bielah a ngir a. Hi lei hin NSCN(IM) in Rs. 4,00,000 an ngen a, sienkhawm a kutah pawisa pek le sie a ninaw thu le pawisa pek ding a neinaw leiin a peknaw a, chu leia  NSCN(IM) hai hin thuoihmanga an vuok niin Daniel Lungleng chun a hril.

Imphal­Ukhrul road­ah bandh a la um
Imphal:  Konsam Kourounganba thina le inzawma Imphal­Ukhrul road a bandh  thawa um chu  sunzawm zing a la nih. Zani khawm khan Khurai­Pangei road khar a nih. Mithiruong khawm lak lovin JNIMS Morgue­ah a la um. OC, Lamlai Police Station chun mithiruong hi vawisun 1PM chena la dingin mithi sunghai an hriettir. Bandh hin thina chungthu le media hai chu a huom sa nawh.

Mipui pungkhawmna ding hmun
Imphal:  Mipuiin lampui hrawna le pungkhawmna an nei huna muong taka dodalna, lampui hrawna le pungkhawmna an neina ding Greater Imphal areas sungah hmun pe dingin zanikhan  High Court of Manipur chun Manipur sawrkar an hriettir.  Hi thil hi Court chun tuta inthawk haptakar 3 sunga sukpuitling dingin state sawrkar an hriettir a nih.

KSO, CCPur in a la hlip nawh
Imphal:  Editor Guild, Manipur in The Sangai Express le ISTV ban an thaw hlip ta dingin ngen hai sienkhawm an la hlip naw thu KSO, CCPur chun zanikhan an hril. Hi thil enfel dingin Volunteers an la siezing thu le hi Ban thlawptuhai kuomah KSO chun lawmthu an hril.

Mission Indradhanush 55% a hlawtling
Imphal:  Manipur Hill districts 4, Churachandpur, Senapati, Tamenglong le Ukhrul haiah Mission Indradhanush first phase a second round chen thawnaah target bituk zat lai 55% chu a hlawtling ta tiin Dr Okram Ibomcha Singh, State Nodal Officer le Director, Manipur Health Services chun a hril. Hi Mission hi April 7, 2015 a thaw tan a nih.

Ni 2 sungin khawsika damnaw mi 40 hospital­ah
Imphal:  Ni 2 liemta sung khan UMANI Centre, Sangaiyumpham­ah khawsika damnaw  mi 40 zet  admit an nih tiin M.V. Abdul Rahanam, President, Lamding Cherapur Homeopathic and UNANI Association chun a hril.

Others
Gogoi Assembly election­a la ngir nawk a tum
Guwahati: Assam Chief Minister Tarun Gogoi (80) chun kum thara Assam Assembly Election hung um dinga khin la ngir nawk nge a tum thu le Congress chun an party khatin a term 4­na dingin Assam­ah sawrkarna an la siem nawk ding a nih, Election hmasawn dingin kan pei tiin zanita Press Conference huna a hril. Congress party chu kan khat in ngir kan ta, majority kan la ni nawk ngei ding a nih, sawrkar siemna dingah party dang thlawpna mamaw nawng kan tih tiin Gogoi chun a hril. Tarun Gogoi hi kum 2001 a inthawk term 3 zet a zawna Assam CM chel ta a nih.

NDA sawrkar kum 1 a tling lawmna
New Delhi:  PM Narendra Modi thuoina hnuoia NDA sawrkar kum khat a tling lawmna May 26, 2015 khin nei ning a tih. Rambung pathum, China, Mongolia le South Korea  ram haia an zin zova New Delhi a hung tlung hnung, May 19, 2015 zan khan Modi chun Union Ministers, Arun Jaitley, Rajnath Singh, Sushma Swaraj, M. Venkaiah Naidu le Nitin Gadkari hai an hmupui a, NDA sawrkar kum khat a tling lawm dan ding thu an hriltlang.

A pasalin a khai hlum
Sambhal: Rajmala (22) of Rajpura chu a pasal Guddu Yadav in a khai hlum. Rajmala hi naupai lai nia hril a nih. Rajmala nu le pa han mo thilsawm dinga a pasal le a sunghai kuoma pek dinga an ngen an pek theinaw leia Guddu Yadav hin a nuhmei hi a that nia hril a nih. Hi thil hi Rajmala pasal hai khuo Lehraratu village a tlung niin Police thusuok chun a hril.

Haryana­ah loneitu tur dawnin an that
Jind:  Haryana  state a Amravati khuoa cheng Subhas (48) chu zani hmasa khan tur dawnin ama le ama an that. Lo acres 9 vela lienah thlai a ching a, tuilien le riel tlain nasa takin a suksiet pek a, Haryana sawrkarin zangnadawmna Rs.7,000 chau a pek a, zangnadawmna a hmu le a bat an hen naw taluo a, a bat thung theinaw beidawnga tur dawna ama le ama inthat a nih tiin a sung han Police ah report an pek.

J&K­ah helpawl han sipai 2 an kap hliem
Srinagar: Zanikhan Jammu and Kashmir a Shopian district sunga Haff Shirmal area­ah  helpawl han 55 Rashtriya Rifles le J&K Police hnuoia Special Operation Group hai thangruola dappui an thaw laiin helpawl han an lo kap a, anni khawmin an kaplet ve leiin iemanichen an inkaptuo a, hi inkapnaa hin Army Jawan 2 an hliem niin Police thusuok chun a hril.

Ruo le thlipui leiin mi 17 an thi
Jaipur: Zani hmasaa Rajasthan state sunga Dholpur, Bharatpur, Bikaner, Sawai Madhopur, Baran, Bundi le Nagaur hai chu ruo le thlipui inthuo hrat takin a nuoi a, in chim, thingkung tlu le  electric post tluin mi 17 zet a del hlum a, mi 80 chuong an hliem pha. Rajasthan CM, Vasundhra Raje chun thina tuok sunghai chu zangnadawmna Rs. 4,00,000 seng pek ning an tih tiin a puong.

Raman Singh le Lalu vengtu NSG lakdawk
New Delhi: Chhattisgarh CM Raman Singh le RJD Chief Lalu Prasad hai vengtua National Security Guard (NSG) hmang hai chu lakdawk ani a, NSG aiin  Central  Reserve Police Force (CRPF) pek an nih. Raman Singh le Lalu hai hi Z+ security hnuoia venghimna pek zawm pei la ning an tih. 

Rel in Tractor a baw leiin mi 10 an thi
Lucknow: Zanikhan Uttar Pradesh­a Bijnor khawpuiah Tractor in Rel lampui a kan lai tak  Rel hung tlanin a baw a, mi 10 an thi bakah midang 30 chuong an hliem. Tractor­a hin Ganga vadunga  programme hmanga fe mi tam takel an chuong a nih. Hliem hai laia 6 hai chu an hliem inrik hle  tiin ei thu dawngna chun a hril.

Meghalaya Governor dingin V. Shanmuganthan
Shillong: Zanikhan BJP thuoitu V. Shanmuganthan chu Meghalaya Governor dingin Raj  Bhavan, Shillong hmuna Meghalaya High Court  Chief  Justice Uma Nath Singh hmaah sesamna a nei. Hi hunsera hin Meghalaya CM, MLA­hai,Civil le Police tienga officer lien hai an thang tawl. V. Shanmugathan hi post­graduate, M.Phil (Political Science) a ni a, Defence, Research and Documentation le Overseas Friends of BJP in­charge sin lo chel hlak a nih.

Road project a dingin Rs. 3 lakh crore
New Delhi:  Tuta kuma India ram pumpui huopa Road projects a hmang dingin sawrkar thlungpui chun Rs. 3 lakh crore a riruong a, nitin double highway km.30 pei bek siem zo tum a nih tiin Union Road Transport and Highways Minister Nitin Gadkari chun a hril. A hmain nitin lampui km. 2 pei siem, tulai hin 12km pei, May ah km. 14 pei le kum 2 zova km. 30 pei siemzo ning a tih tiin Gadkari chun a hril.

Maoist helpawl 4 an inpe
Vishakapatnam: Zanikhan Maoists helpawl 4, Paamgi Chanti, Paamgi Rambabu, Vantala Chinam Naidu le Paamgi Somaraju hai chu District Police,Visakhapatnam ah an inpe. Hieng mi 4 hai hi suolna chi tum tuma inrawlna nei nia hril an nih. Police hmalaknaah kap hlum kan bakah kan sunghai leh muong taka umtlang kan nuom ta leia Police kuta inpe kan nih tiin hieng mi 4 hai hin Police hai kuomah an hril.

Detonators 2500 hmu le man
BAnkura:  Zani hmasa zan khan West Bengal state a Bankura district sunga  Amdanga an ti hmuna Police han Detonators 2500 hmuin an man. Detonators 2500 hai hi fun 500 zeta infun, fun khatah detonators 50 pei a um tiin Sudhir Kumar Nilkanta, SP,  Bankura chun a hril.

Thiem changnaw leh thi chena hremna
Cairo: Egypt President  hlui Mohammed Morsi chu case dang siem khum nawk a nih. Tuta a case thar hi lungin suksiea tlandawk le enthlatu a intum a nih. Hi Case a Court in thiemnaw an changtir chun a hmabak chu khai hlum a nih. Mohammed Morsi hi kum 20 zet lungin intang dinga Court in thiemnaw an changtir tasa a nih.
-------------------------------------------------------------------------------------------------------------
VAWISUN THUPUI
Chuongchun, tuhin chu Krista Isua umhai ta ding chun thiemnaw inchangtirna hrim a u m ta nawh. Krista Isua Hringna Thalrau dan chun suolna le thina dana inthawk chun a mi sansuok ta sih a.  ­ Rom 8:1­2

Editorial
Voluntary retirement
Mizoram sawrkar chun ni kum khan Police Department hnuoia thawk Police hmangtlak ta lo, drugs addict le Zu ngawl invawihai chu an thu le hla lova force Voluntary retirement pek a, an aiah hrisel le tha le thatho taka active service thaw thei dinghai chu State Police Force a lak ni dingin thutlukna a siem a. Amiruokchu, vawisun ni chen hin kha thutlukna kha a tak takin a sukpuitling thu hriet a ni nawh. A thutlukna hi a tha naw chu a ni der nawh. Amiruokchu, a tak taka hang sukpuitling hi chu a ngam naw niin an lang. Hi thutlukna hi a tak takin Mizoram sawrkar hin hang sukpuitling ta ang sienla a kakhawk ding hi a tam taluo leia a taka a sukpuitling ngam naw a ni ring a um.
    
Mizoram sawrkarin a thutlukna hi sukpuitling dingin Order hang insuo ta ngat sienla chu a tuortu dinghai lai hin minister sunghai dam, an party thuoituhai sunghai dam, MLAs sunghai dam, sawrkar officer lien nauhai dam, Mizo society sunga vantlang chunga mi en nauhai dam, an party mi le sa nauhai dam an hung thang ngei ding a ni a. chu huna chun sawiselna hung tam a ta, an sawkar le Party sunga inremnawna le inhrietthiemnawna dam a hung intlun thei ding a ni leiin a takin an thutlukna an la sukpuitling thei naw a ni ring a um.
    
Tulai hnai ela Council of Higher Secondary Education, Manipur hnuoia Class XII result suok le Board of Secondary Education, Manipur hnuoia Class X result suoka khan Govt. School a pasi  um derlona school tam tak an um a. Hieng school­hai hi a vawikhatna chau khawm ni lo, thangkhat deuthaw Class XII le Class X pasi nei ta lo school tam tak an um a, hi kawnga hin state sawrkar a lungril a na hle leiin Govt. School hai laia student a pasi nei der lo haia Zirtirtuhai chu Force voluntary retirement pek ding an ni thu Manipur Education Minister khawmin a hung hrillang ve ta a. Hi thu hi a tak taka sukpuitling a hung ni dim maw ti hi ngaituo tham a tling a nih.
   
Zirtirtuhai Force Voluntary retirement pek ding hiel khawpin tlinnawna le thiemnawna an nei tak tak am? Govt. School po po hi an mamaw tawk seng zirtirtu pek anni am? Infrastructure tam tak an nei a, chuonghai po po chu State sawrkarin a pek tawl am? ti le thildang tam tak hril ding um a tih. Mizoram sawrkarin harsatna a tuok ang khawm hi Manipur sawrkar tuok ding tho a nih. Hi lei hin  Govt. School a kum a tela student Class XII le Class X pasi nei der ta lo School­a zirtirtuhai force voluntary retirement pek ding ti hi chu thil harsa takel, ei state sawrkar khawma a thaw ngam ve lo ding niin an lang.
    
State sawrkar pakhat chun thaw dinga a ti chu thaw thei a tih. Amiruokchu, a thaw ngam hi ring a um nawh. Tulaia Manipur a Law & Order problem hman a chingfel zonaw chun chu neka harsatna le buoina nasa tak hung intluntu ding thil chu a thaw ngam  ring a um nawh. Force retirement hang pe ta ang sienla chu ei state a buoina hungtlung nasat dan ding chu hrilin a siek nawh.
    
Hieng hi ei ngirhmun a ni leiin sawrkar tienga roreltuhai, milien le milal hai hi an tawngbau suokah an fimkhur hle nuom a um.Thiltha po po hi a taka thaw thei vawng a ni nawh ti khawm an hriet a, thaw thei lo ding le thaw ngam lo ding thu hril hi an bansan hmak nuom a um. Ei ram sawrkar hin Order inzaum lo le Notification hmang thei lo ding hi an suo rawn taluo tah. Hi hi state sawrkar muolphona pakhat a nih.



Don't Miss
© all rights reserved
made with by Simon L Infimate