Responsive Ad Slot

Hmasawnna Thar | Feb 07, 2015

Saturday, February 7, 2015

/ Published by VIRTHLI
Union CAF&PD Minister a hung inzin ding
CCPur : Lok Jhanshakti Party (LJP) National President le Union Cabinet minister of Consumer Affairs, Food and Public Distribution (CAF&PD), Ram Vilas Paswan chu Imphal-a zan khat riek dingin February 14, 2015 khin Imphal-ah hung inzin a tih. Political party, NGOs le mi dang dang han PDS chungchanga representation pe nuom han a riekna ding Hotel Imphal hmuna va pek thei ning a tih tiin David Thangboi, Secretary, Information & Publicity, LJP, CCPur District Committee chun thusuok a siem.

Posting-naa in report dingin
CCPur : Kum 2014-a Teachers Rationalization le inzawma CCPur District-a inthawk teachers 200 chuong an thawkna hmun sawnkuola um, mani posting-na hmun thara joining report la pe lo hai chu an hma tieng an thawkna hmun thara joining report pe ding le document tul le pawimaw hai pelut dingin Lalsanglien, ZEO, CCPur chun an hriettir. Joining report pelo hai chunga departmental action lak ning a tih tiin ZEO chun a hril bawk. Rationalization leia sawn teacher thahnemtawk tak chun transfer an nina hi ngaisak lovin joining report khawm an la pek naw niin ei thu dawngna chun a hril.

Sialbu khuoah Health Camp
CCPur : February 13, 2015 khin NRHM/District Health Society le CMO, CCPur hai thangruola huoihawtnain Singngat Sub-Division sunga Sialbu Village-ah Health Camp um a tih. Hi huna hin Dr Thangchinkhup Guite, CMO, CCPur inrawinain doctors 5 le Nurses 5 han damnaw hai enin, damdawi a thlawnin sem bawk an tih. Hi huna hin TB, Leprosy le Immunization Department hai khawm thang an tih.

ASI lak thar han joining report
CCPur : Kum 2009-a Manipur Home Department hnuoia Assistant Sub-Inspector (ASI) lakna uma
result suok a hlawtlingna chang, Churachandpur district- a dinga lak mi 25 hai chun zanikhan SP, CCPur Office-ah joining report an pek tawl.

ICI CK|P thuoi ding hai
CCPur : Independent Church of India (ICI) CK|P kum 3 sung 2015-17 sunga t huoitu dingin hieng a hnuoia hai hi thlang an nih- Chairman- Rev Zothanghrim; V.Chairman- Upa Dr.Zawlthanglien; Secretary- Rev HP Runremthang; Asst. Secretary- Mr. Samuel De Sungte; Fin.Secretary- Rev Joshua L.Thiek; Treasurer- Mr.Ramhlunsang Committee Members- 1.Mr.L Hmingsang Zote; 2. Upa Laibuon; 3.Rev Lalrohlu; 4.Rev.Ramropui.

BJP leader hai hung inzin ding sawn
CCPur : Manipur-a Autonomous Dictrict Councils (ADCs) haia MDC Election hung um dinga February 6, 2015 nia BJP National General Secretary Mr Ram Madhav CCPur district-ah a hung inzin dinga ti chu Delhi Assembly Election thuah remchangnawna leiin a hung inzin ding hun
la hril thei lova sawn a nih tiin BJP CCPur chun an hril.

Anti-Rabies Vaccine mi 111 kap
CCPur : District Hospital, CCPur-a Dog Bite Cell-a chun zanikhan Ui se mi 111 hai a thlawnin Anti-Rabies Vaccine kap an nih. Ui se mi damdawi 111 kap hai laia 6 hai chu case thar an nih. Chun, zanikhan Veterinary Department chun Ui 18 hai Ui invet dangna damdawi an kap.

Class XII Exam Fee Rs. 220/- dingin
CCPur : Class XII Exam hung um ding le inzawma District Level Private Centre Committee meeting chun, tuta hmaa student pakhatah Exam fee Rs. 250/- pei lak dinga ti chu ennawnin student pakhatah Exam fee Rs. 220/- pei lak dingin an rel.

Bank Pass Book hmu
CCPur : UBI, CCPur Branch hnuoia Bank Passbook hmu a ni a, Bank Pass Book sukhmangtu chun Chanchinbua thu insuo man pein Hmasawnna Thar Office- ah lak thei a nih.

RTI/STI training
CCPur : Feb. 10, 2015, 10:30AM a inthawk khin NRHM/DHS huoihawtnain CMO Mini Conference Hallah Nurses hai ta dingin Reproductive Track Infection/ Sexually Transmitted Infection (RTI/STI) training um a tih. Hi huna hin Dr Khenzamung, MO TB Department ; Dr Mary Joy, MO Parbung le Dr Tiken, Skin Specialist, Dist. Hospital hai resource person in thang an tih.

Editorial
Discipline tha hi

Discipline ti hi ei tawng ninaw sienla khawm ei tawng ang ela ei hmang le ei hriet, mimawl tak khawma a umzie ei hriet saptawng thumal a nih. A pawimaw em leia ei tawng anga ei hmang le ei hriet a nih. Discipline hin insung, khawtlang, biekin, inchuknain, mani mimal nun le khawlai hmuna khawm hmun pawimaw tak a hluoin hmun a chang hlak. Mihriem ni si, discipline nei lo le discipline tlasam hai hrim hrimin mihai lawm le mihai ngainat an hlaw ngai nawh. Discipline tha neihai ruok chu mihai ngainat le inza, mi fel le mi tha an hlaw hlak. Hi lei hin nu le pa hai po poin an nauhai chu discipline nei tha dingin ma lovin an inchuktir hlak. Discipline tha nei lo hai chu mi han hril lo le inchuktir ngailo nau niin an ngai hlak. Inchuknain, sakhuo hmun thienghlim, Pathien biekna hmun, Office, sin thawna hmun le khawlai hmuna khawm nisienla discipline hi zui le zawm dinga siem a ni hlak. Discipline nei thatna school, College, Institution hai hrim hrim chun result tha an nei a, advertisement thaw der lo khawmin naupang an dit bak le admit seng lo hiel an nei hlak. Hi lei hin discipline hi a pawimaw a, dan (rule & regulation) ei ti ang ela pawimaw le tangkai a nih. Discipline tha hi hlawtlingna bul pakhat, mihai inza le ngaisang hlawna a nih.

Iengleia discipline hi siem hlak am a na? Mumal tak le umzie nei taka ei um le ei fe theina dinga siem a nih. Khawlai hmun khawm nisienla Discipline bo chun thil tluong takin a fe thei ngai nawh. Discipline hi iengleia ngai pawimaw am ei ni a ei ti chun, midang han an mi thlirna a inthawk ei mizie an min khina a ni bakah iengang mi am ei ni a, mi indik, mi fel, mi ringum, mi taima le Pathien ti mi le inza mi ei ni am ti an min khina a ni bawk. Mi tha le mi fela hrilhai hi discipline nei tha, mi pawi tawk ngai lo, mi theida ding hril ngai lo le a tha zawnga thil ngaituoa thaw hlak mi an nih. Inthununna ngisang mihai hrim hrim chu mi hlawtling, an sin thawna le an thil inchukna haia khawm hotuhai ngainat an hlaw hlak.

Private annawleh Mission School haia chun discipline hi sawrkar school hai nek chun sukkhau a ni hlak. Hi lei hin discipline thua khawm sawrkar school a student hai nek chun private school a student han an nei tha lem a, mi laia um dan le chang dan khawm an thiem bik. Discipline a tha phawt chun student-hai khawm an lekha inchukna kawnga an thiem bik. Hi lei hi ning a tih, sawrkar officers, Ministers, MLAs le kei ka nih inti taphawt chun sawrkar school ah an nauhai admission thaw lovin private le mission school, school fee tamnaah an thaw lem hlak. Inthununna um nawna hmuna chun thil hrim hrim hi a buoi nei nuoi el hlak.

Biekin tha, nal, mawi le ropui takah inkhawmin, silfen mawi le manto tak tak inbel inlakhawm ei inkhawmna biekin sungah discipline a tha si naw chun, inza ei umna a sukhnuoi ding bakah ei biek Pathien khawm sukhmelhem a tih. Pil bang le a chung Ngaidi a bawl, thuomhnaw man tam inbel ding nei lo, sienkhawm discipline tha tak nei hai chu an inlang inzaum lem bakah Pathien hmel a sukmawi lem naw ding maw? Mihriemhai chau ni lovin, mihriemhai bakah khawvel a thil um po po siemtu Pathien ngei khawma discipline tha chu ditin a lawm ve ngei ring a um.

Discipline hin ei ni bakah ei biekin le ei biek Pathien hmel a sukmawiin a sukmawinaw thei a nih. Chuleiin, ei inlang mawina chu ei incheina man to le tulai taktak hai h ini lovin, ei discipline a ni lem ding a nih ti hriet a tha. Ei um dan le Krista chanchin-tha chu inmawi rawp raw seh. Inchuknain, office le hmun dang dang haia discipline ei vawng that ang hin ei Pathien biekna hmuna khawm discipline tha takin vawng ei tiu. Hmun danga hman discipline ei vawng tha chun Pathien biekina discipline nei that chu thil ni ding hrim a nih.


Don't Miss
© all rights reserved
made with by Simon L Infimate