Responsive Ad Slot

Ngurkhawpui (Ngurte at a Glance)

Monday, December 1, 2014

/ Posted by Simon Infimate

HSA Gen. Assembly neina hmasatak khuo le Platinum Jubilee Grand Finale Venue:

- Tv. LRS Puruolte

Kum 1939 laia Hmar Students’ Association (HSA) Gen. Assembly neina hmasatak khuo le HSA Platinum Jubilee Celebration Grand Finale Dec. 11 – 14, 2014 inkar sunga ropui taka neina hmun ding Ngurkhawpui (Ngurte khuo) hung intan dan la hang hril hmasa tete inla. 1909 lai khan Ngurte Lal (Chief) hmasatak Pu Hranghlei le mi thenkhat khawsat dingin Leisen khuo, Tipaimukh biel Manipur a inthawka suokin Tuithaphai an lut a, tuta Thingkangphai khuo sak laia ngaidibil lai khuo an sat a, chu an khuosat chu a hming ah Ngurte an inbuk a, chu hmun a an um lai chun leilet (tuilo) an siem nghal a, Pu Hranghlei hi Tuithaphai a leilet siem hmasatak a nih. Hi hmun a hin kum 2 vel an um hnungin an leilet siemna kawl hnaiin an khuo chu an insawna, tuta Tangmual khuo kawllai Phaizawl a khuo thar an sat nawk a, hi lai hmun a hin iemanichen an um hnungin Valpakawt (Sugnu Road) kawnliem lai an khawsa nawk a, Hun iemanichen hnung a chun Ngurte khuo chu an insawn nawk a, tuta Thenmuol khuo sak tieusiet muol an i ti hlak sak lai met, tuta Tlangpui (Lentlang) ti ta lai khawm an lo um hlak. Khuo thar satin hmun danga insawnhai sien khawm a khuo Lal (Chief) le a khuo mipui thuhmun an ni  leiin a khuo hming chu a pangngai (Ngurte) an in puttir nawk pei a nih. Chuleiin, Vawisunni a Ngurte khuo ti a ei hril le hrietlar tak ta hi kum za chuonga hril a hung ni theina san tak khawm Ngurte Lal (Chief) hmasatakin  khuo a lo sat hmasatak, Ngurte hming put hmasatak a inthawka sui sunzawm peiin a nih ti ei hriet hmasak nuom a um leiin ei hung inzawt kuol met a nih.
Ngurte

Hi khuo hin 19-12-2009 khan Centenary (A Kum Za Tling) Hrietzingna Lung an lo daw ve tah. Bieltu MLA nilaizing, Inzaum Pu TN Haokip in Lungdaw hawngna hi a nei nghe nghe. Tukum hi kum 105 a hmangna ding a lo ni ve nawk der tah. Tuithaphai a Hmar khuo umhai laia chu a upa pawl a hril thei a nih. Ngurte khuo hi Tuithaphai/CCPur Khawpui Simtieng panga um a ni a. CCPur Khawpui a inthawk hi khuo panna lampui hi pahni a um a (Tiddim Road-Nghathal-Ngurte Road  le Sugnu Road-Rengkai-Ngurte Road) , CCPur Police Station/Zero ‘O’ Point a inthawk 6/7 KMs vela hla a um a nih. Ngurte khuo a intan le Tuithaphai ruom laia a hmasatak nina a hau, inchik zing tlak iemanizat lai a um a, a renga suklang vawng seng ninaw sien khawm a khuo ropuina a ni leiin thenkhat suklang inla. Chuonghai chu:

>> Kohran um tanna 1929 (NEIG Mission), hieng hun lai hin Skul hawng tan a nih a, chu taka hotu chu Pastor S. Thangvung (Thangkhawl-pa) a nih.

>> Biekin 1930 in an nei tan.

>> Football tiengpang a khawm an lo duoi naw hle el! Ngurte Team hi Tuithaphai pumpui huop a Football Tournament hmasatak, Sept. 1937 khan Sap Missionary hrietzingna Paul Rostad Loving Cup, Old Churachandpur hmun a inkhelna neia a um hun ah an lo Champion ve ngat a nih.

>> Kuki Students’ Conference (KSC) hmasatakna 1937.

>> Kuki Youth Organisation (KYO) indinna 1938.

>> Hmar Students’ Association (HSA) General Assembly hmasatakna 1939.

>> Young Christian Association (YCA) indinna 1945.

>> Assembly Church Music indinna 1955.

>> Tuithaphai biela Hmar Tawnga Naupang Sunde Sikul (Sunday School) hmang tanna dinga Conference hmasatakna 1954.

>> Kristien Thalai Pawl Conference hmasatakna 1958.

>> EAC Biel pumpui Conference hmasatakna 1967.

>> Naupang Sunde Sikul Conference hmasatakna 1968 (EFCI).

>> ICI Kristien Thalai Pawl General Conference hmasatakna 1981.

>> Ngurte Khawsuok Pawl Sawm pass hmasatak Pi Sumtinkhawl.

>> MA hmasatak Pu Ngurzolien Zote.

>> Pastor hmasatak Rev. Z. Hminglien.

>> Tuithaphai a Registered Nurse hmasatak Pi Laltinkim @Nurse Lalkim (Ama hi HSA Thuoitu hlun Pu Zothanglur Sanate a ni/a pa farnu a nih).

>> Kohran Upa hmasatak chu Vungte (Tawna-pa).

Hril hmai derlo chi Ngurte ropuina iemanizat lai a la um a, chuonghai chu la hang hril nawk inla, Ngurte khuo dettaka hung del tung peiin, Pu Hranghlei (Ngurte Lal hmasatak) chu mi thutak le mi tlawmngai thei tak le mi hmangaina le mi lunginsietna hau tak el a ni leiin Naupang laia inthawka khawvela an i ngai le an muongpui tak, khawvel um sunga an hmu talo ding, an nu le pa’n an maksan naufahra tamtak khawm a lo enkawlin, a lo chawm tlei a nih.

Pu Hranghlei chu khuo dettak a hung nei ta lei chun, ama hi mi lunginsiet thiem mi le mi muongpuium tak el a ni leiin Pu Kaikhawthang chun Ngurte khuo hi belbul le sirsanin, Kum 1934 khan Tuikham khuo chu a hung sat a. Pu Lamkhup chun Ngurte khuo hi belbul le sirsanin, Kum 1947 khan Khuongnung khuo a hung sat nawk a. Pu Singvung chun Ngurte khuo hi belbul le sirsanin, Kum 1947 khan Thenmuol khuo a hung sat ve nawk a. Chun, Pu Khupchinzam chun Ngurte khuo hi belbul le sirsanin, Kum 1948 khan Daizang khuo a hung sat ve nawk ta pei a nih. Hieng a ni lei hin Ngurte khuo chu a lo pawimaw hle ti an lang.

Hieng Ngurte hung belbul le sirsan a khuo sat hai le hin Ngurte hi khuo hmun hran le khuo hming hran lo ni hai sienkhawm khuo khat anga lo umin, lungruol takin an lo khawsa tlang hlak a. Sietni, thatni a hai a neitu tak a inngai sengin an lo um hlak. Vawisunni chen khawm hin hi Ngurte khuo a hin unau hnam chitin an la chengtlang zing a nih.

Dec. 22, 1981 khan Sikpui Ruoi hi khuo a dinga a hmasatak chu HSA Ngurte Unit le Ngurte Youth Club (NYC) hmalakna’n hmang a nih. NYC le Khawtlang thuoituhai inpekzona zarin tuhin hi khuo a hin HSA in Eco Park hlam 12x56 a lien hmun a nei ta bawk. Hi Eco Park hi HSA Gen. HQ chun mipui tadinga hlawk taka hmang a ni ngei theina dingin Manipur Sawrkar a khawm hma a lak mek a. Eco Park Lungphumna khawm Aug. 8, 2013 khan Pi Jacintha Lazarus IAS, Deputy Commissioner, Churachandpur chun a lo nei tah. Hi lai hmun le a sirvel hmun ruok lientak el a ngei hin HSA Platinum Jubilee lawmna le hrietzingna lung (Monolith) inngir dingin inbuotsaina a fe mek a.

Ngurte Ground

Ngurte khuo lutna



Hungtlung ding Dec. 11 – 14, 2014 HSA Platinum Jubilee Celebration Grand Finale: HSA thiltum le thupui hrie zing a, HSA lo indintuhai hniekhnung zui a, ei hnam nunphung mawi tak tak hai suklang a, Khawvel Hmar mipui le hi khuo (Ngurte) le a sevel hai, kohran le khuo hran hran a inthawk tlankhawma hi hun ropui tak mi thuoitlungtu Lalpa ei Pathien hring inpak le chawimawi tlang a, hi ni ropui tak el hi lawm le chen kar nghakhla a um ta hle.


Ei Lalpa le ei Pathien kuomah ropuina um raw se,
A mi thuoi pei...
To God be the Glory, He leadeth me...
HSA Celebrating 75 Years of Serving the Nation
Sinin, Hrilin, Sanin, Thuoiin,
Serve the Nation (Hnam Rawngbawlin)
God bless HSA! HSA Dam Zing Raw Se!



Don't Miss
© all rights reserved
made with by Simon L Infimate