Hmarkhawlien, 16 Nov., 2014: Hmar Students' Association Barak Valley Joint Hqrs huoihawtna hnuoia Platinum Jubilee Celebration ropui takin zani (November 15, 2014) khan Hmarkhawlien ah hmang a nih. Hi ni hin Inchuklai hai ta dinga inelna tha tamtak siem a ni a, Kum tina HSA in a lo pek dawk ta hlak, "Academic Award" Barak Valley sunga HSLC SEBA hnuoia exam na a mark hmu insang tak chu Mr. Lalkumtluong Hmar, PMS English School Hmarkhawlien inhlan a nih. Chun Award thar inchuklai hai ta dinga inelna tha Pu Late. Ngursunthang MIL Award chu Miss Jeny Hmar, Muolhoi khuo inhlan ani bawk. MIL award ti hi Hmar MIL, HSLC exam na a Assam sunga mark hmu insang tak kuoma inhlan dinga tuta kuma inthawka pek dawk tan a nih.
Best Headmaster Award 2013 chu Pu Hrilthankung Sielhnam, Covenant English School Hmarkhawlien kuoma in hlan ani bawk.
Best Headmaster 2014 Pu Gouzalam Gangte, PMS English School & Junior College Hmarkhawlien kuoma inhlan a ni bawk. Hi baka hin mi iemanizat kuoma chawimawina certificate, hnam thila sin lo thaw tha hai kuoma khawm inhlan ani bawk.
