Hmar Literature Society
Meghalaya
October 24, 2014
MIPUI KUOM A INHRIETTIRNA LE NGENNA
Hnam tinin ṬAWNG hrang ei nei seng a; ṬAWNG eiti chuh hawrawp tum tumhai thumal a siem a, chu thumal (ri le kawk hrang hrang nei) siem le remkhawm, umzie neia ziek annawleh ei hrilsuok hlakhai chuh a nih. Hnam nunphung le rohlu mi hriet le hmu theia hnam bulṭhut remtu chuh ṭawng ani leiin ṭawng bovin hnam a um theinaw a, Ṭawng a dam chun HNAM a dam.
Meghalaya-a Hmar mipui chenghai hi hnam dang danghai kara khawsa eini leiin ṭawng inchukna School ei nei venaw a. Sapṭawng School a seilien deu vawng ei ni tawl leiin inchuklaihai chau nilovin nu le pa kum 40 hnuoitieng a tamlem hi ṭawng le ziek thei pher-phuor, hre nelnuol, hmang mumal theilo chen khawm ei um nuolin an lang tah a. Ei hawrawp A AW B… hrelo le inchuklo nana na chun ṭawng thiemngaina a um naw bakah ziek thiem ngaina a um naw reng a nih. Hienga ei fe pei ani chun ṭhang hung thar nawk dinghai ngirhmun ding chuh ngaituo um tak a nih. Ei ruol haiin ei niphung/nina (Identity) an min dawn chang HMAR ka ni a, ka ṭawng chuh Hmar ṭawng ei tinaw thei si nawh.
Ei piengpui or Nu ṭawng hlutzie, humhal a tulzie le a hlutzie ngaituoin ṭawng/literature-a ei hmasawnna ding lampui dap le hma la dingin hnam tadinga mi ṭhahnemngai iemanizat fekhawmin Tarik Ni 10, August 2014 khan Hmar Literature Society, Meghalaya alo indin tah a nih. Tarik Ni 30, August 2014 khan Shillong a hnam pumhuop a Organization hrang hranghai le inhmukhawmna neiin theitawpa hma la tlang ding le infuina thucha tha tak tak ngaithlakna nei ani bawk.
Chuleiin,hmun danga ei unau hai ei hnawtphaknaw khawm a, ei ṭawng hlutna hrea tiem le ziek dan lampui bek kawkhmu tumin HLS, Meghalaya chun Hmar Hawrawp A AW B… tiem le inchukbu “BUHMASA” copy iemanizat zet Manipur-a mi incha thlain kum 2015-a inthawk chuh mipui sukbuoi bek lova inchuk dan ding ngaituo’n hma a lak mek a. Khawtlang Nu le Pa, Kohran tienga ṭhuoitu le Organization hrang hranghai thei ang anga mi lo tlawp ding le a ṭul ang a hma milo la pui dingin Pathien hmingin kan ngenin kan fiel takzet cheu a nih. Hmalak pei dan ding chuh a ṭul angin hung inhriettir pei ning a tih.
Hi Hmar hawrawp tiem le inchukbu “BUHMASA” hi Tv Robert Wilson Thilsong, EFCI, Center Contact No. 9612167059 le Dr Crossthang Sanate, Bawngkang Veng. Contact No.8119002750-a hmu thei ning a tih.
“Hnam humhalna dingin mani ṬAWNG a pawimaw ” ‘
Issued by Inf.& Pub.deptt., HLS-M
