CCPur, August 21, 2014: August 20, 2014 khan Hmar Students’ Association (HSA) CCPur Govt. College Unit Thuoitu ding thlangna chu CCPur College ah nei a nih. Nk. Jenny in Pathien kuomah Tawngtaina a nei zovin Tv. Joseph Lalhmingthang President, HSA CCPur Govt. College Unit (Out Going/OG) in inhmelhrietna hun a hmang a, Tv. Charles Lalenglien Vice President (OG) in thuhmahruoi hrilna a nei zovin, Term hlui a Thuoituhai Inhmelhriettirna member fekhawmhai lai a nei bawk. Chu zo chun Hmar hnam Anthem, “Aw kan Hmar ram...” ti hla ngir pum a sak ruolna nei a ni zovin Inthlangna tan nghal a nih.
Hienghai hi kum 2014 – 2015 sung a Thuoitu dingin President Tv. Timothy D. Sinate, Vice President Tv. Jacob Ramthanei, Secretary Tv. Joseph Lalthazuol, Asst. Secretary Tv. Hosea Lalrochang, Finance Secretary Nk. Kimkim, Treasurer Nk. Roparmawi hai thang ballot paper hmanga thlang tling an nih. Hi hun a hin Tv. Lalthanzau Vice President, HSA CCPur JHQ chu Presiding Officer le Tv. LRS Puruolte i/c Advertising & Media, HSA GHQ PJCC chu Recording Secretary in an thang a, Thuoitu thlang thar a um hai hin hi hun a hin HSA Dan angin Oath Taking an nei nghal.
CCPur College Student Union tuta term a hin HSA chun Secretary Magazine an chang ding niin thu ei dawng bawk. CCPur College HSA hin 16th August 2014 khan HL Daka Memorial Hall, HSA Campus, Rengkai, Tuithaphai, CCPur hmunah Freshers’ Social Meet 2014 chu puithu takin an lo hmang ta bawk. Anni Unit hi Unit inthuruol, hrat tak le entawntlak tak an nih.
Reporter: LRS Puruolte
