Wales, August 19, 2014 (HT): Pray For the World Ministry (PFWM) hnuoia Director, International Ministries sin thaw mek Rev. Dr H.M. Songate chu Wales le London hmun haia rawngbawlna neiin hun a hmang mek a. Wales rama Horeb Baptish Biekin chu ‘Kick boxing Centre’ dingin an inchawk ta bakah Sekwen khuo a mi tho Biekin pakhat chu Sikh han ‘Community Centre’ dingin tuta hma khan an lo inchawk ta a nih tiin Rev.Dr H.M. Songate chun a hril. Wales kohran hi tuta inthawk kum 10-20 hnunga chun a bo ta ding niin an hril vet a, ṭawngaipui an ngai nasa em em a, Revival nasa tak naw chun hang keihar le hang tho thei ding ziezang an nita nawh tiin Dr H.M. Songate chun a hril.
Kum 1904-1905-a Watkin Roberts hai biekin Revival ropui tak tlungna khawm kha a hlui ta hle a, member tar deu vawng 12 an la um a, a tlangpuiin member laia 9 vel an lan khawm thei a. September 7, 2014 khin PFWM International Choir haileh hi hmuna thuhril dingin an mi fiel tiin Dr H.M Songate chun a hril.
PFWM hi Pi Lalremsiem in ei rama Chanchinṭha hung phurluttu Wales/London mipui hai nasa taka ringna kawnga an tlak hnuoi le an Biekin haia khawm inkhawm ding um talo hiel an um bakah Biekin tam tak member um tanaw leia khar le zawr mek an ni nasa taka an vawi leia keihar nawk an hung ni theina dinga an din a ni a, PFWM hmunpui dingin Biekin pakhat an chawk nghe nghe a, hi hmuna hin rawngbawlna nei zing a ni bawk a nih. Rev. Dr H.M. Songate rawngbawlna a hlawtling ngei theina dinga ṭawngṭaipui chu Kohran mipui hai mawphurna a nih.
