Thuhmai Hawngna
Hmar ṭawng hmanghaiin Hnam Hlapui ang deu thawa ei ngai,“Aw kan Hmar ram, Inthim tlang dumduoi, I sungah HMAR kan leng” ti hla ei sak phaa ei lungril mitthlaa ei tinzawn deu hieu hlak chu Manipur state-a Ruonglevaisuo biel (Hmarram, Vangai Tlâng le Tuiruong dung) le NC Hills, Assam-a Jinam Valley (phairuom) hi ni deu tak dingin ring a um. Mizorama Sinlung Hills area hi chu thisen tamtak sênga ei suol mêk a ni leiin a tam lem chu ei la hmin zat naw deu hlek niin an lang.
Manipur-a Ruonglevaisuo biel hi ka piengna ram a ni a chu ka seilienna a ni chie naw leiin hun sawttak ka hmu ta naw hnungin 2004 hnung tieng a'nthawk khan HSA thil leiin a dung-a-khangin ka hrût nawk ta tho a; Hmar biel tieng Tuolbung le Leisen, Vangai Tlang tieng Kharkhuplien le Thingpuikuol ti naw chu khuo lien le inlâr chu ka sir kim deu phuor tah. NC Hills-a Jinam Valley sirna hun remchang ruok chu ka nei thei dèr nawh a; 2009 lai khan Leiri khuo haiin an khuoa Gospel Chanchinṭha a lûtna ‘Golden Jubilee’ lawmna hunser an buotsai ṭumin an mi fiel thuoka chu ka fe thei chuong ta nawh. HSA (GHQ) Education Secretary le Hmar Students’ Education Board Secretary ni bawk, Tv. Joseph Vanropar Tuolor in HSA NC Hills and Karbi Anglong Jt. Headquarters le ṭhangruola Jinam Phairuoma Education Campaign a hung rot chu kan hawk nghal a; May 1, 2014 in Muolhoi-ah Hmar Inpui region inthlangna neipui dinga ruot ka ni bawk leiin chu prokram zo char chu ka ta dinga a remchang thu hrilin ka OK nghal a, thu kan pawtchat chu a ni nghal el a nih.
April 30, 2014 (Imphal-Silchar)
Zingkar dar 7 vela Air India vuongnaa Imphal – Silchar pan dinga In ka suoksan hnung sawtnawteah NC Hills Autonomous Council Executive Member, Pu Laltlansang a phone call ka dawng deu khiet a; ka lungril te te chun, “Hmar Inpui inthlang ding le kan Jinam Valley inzin ding chu a thu a lo inthang hmêl bâk a” tiin ka ngaituo neu neu a. Ka prokram hmasa a chun Silchar airport a'nthawk Hmarkhawlien tieng pan hmasaka, Hmar Inpui regional Headquarters pathum – Vangai, Jiribam le Barak Valley Region hotuhai le informal meeting nei a nih. Sienkhom, ka I hmu tum laia pawimaw ṭhenkhat an um remchang naw leiin chu prokram chu ka ṭhul a, Silchar ka pan thleng ta lem a. Ruotlawk angin chawhnung tieng HLS-Assam ṭhuoituhai leh thu ramtin hrilin kan inpawlthlang a. HLS-Assam hi HSA ṭhuoitu ka ni lai, a ṭulna in a hne ta êm leia rem le rem lo hril loa kan sukthar pui a nia; a ṭhuoituhai inring hman hma’n mawphurna riktakin a hung delchil a, hnam ta ding le thu le hlaa Hmar hai ngirhmun domsangna dinga hmalakna an nei tak tak hmain ‘MIL zirtirtu pakhat hlaw ding kutdawa mi hmaisa tawng’chu an chantawk le sin ropui a hung ni tum el taa, lainat an umin ngaiven an ṭul niin ka hriet reng a nih. Darkar hni deuthaw hohlimna hun hlawk takin kan hmanga; May 14, 2014 hin ṭhuoitu thar ding an inthlang ding a ni bawk a, thafàn a umin ka phur thar hle.
May 1, 2014 (Silchar-Muolhoi-Tuolpui)
Zingkar tho hlimin Silchar a'nthawk Halflong panin Taxi (Tata Indica) in ka suok a. Ringvang thu in lampui hmun thuma ṭhea hmun hni kan tlung ta ding nia ka ngai lai ka motor chuongna chu a thi top a, a thi dàn le a driver pa-in Silchara a ruolhai ka phone hmanga a zuk biek dàn a'nthawk chun zuk siem el chi a ni naw zie chu ka hriet thei nghal a. Muolhoi tienga Hmar Inpui le HSA ṭhuoituhai thil um dàn ka zuk hril nghal a, ka phakna chin an mi hang indawn hlak chun Harangajao ka pel ta ti ka hrieta, Retzawl ka la tlung naw ti ka hriet bawk. A karlaka Hmar khuo tho, Boro Muolkawi chu ka pèl le pèl naw ka hril thei si naw leiin a mi hung indawn dinga private motor hung tir dan dinga an buoi hle ringot el a. Retzawl mihai chun Silchar tieng panga an mi hung zong theia, Boro Muolkawi mihai ta ding ruok chun Silchar tieng am Halflong tieng an mi hung zawng ding ti thuah a buorchuoi nuoi el si. Muolhoi a'nthawk an hung inthok thla ding hlakin hung le fenaah darkar 2 deuthaw a lût ding bawk si!
Chuong lai tak chun Silchar tieng a'nthawk passenger phurna motor (Ford Cruizer) a sunga tlangval ruol bit mapa inthrung hi a hung khiet a, inzak inphak dawn lovin bán pharin ka lo ‘khám’ ṭhuoi a. Ka beisei rak naw sain a chawl a; sienkhawm, a driverpa’n a vai driver chanpui motor siet leia lampui sira ngir chu a hang ngaiven hmasak dan a'nthawk chun keiin ka lo ‘hûi’ leia chawl a ni naw zie ka hriet thei nghal a, chier le sawisêl theina ngirhmunah ka um nawh. Ei ‘value’ ansang khawmin ei ‘rank’ chu an hnuoi nuom hrat hle. Driver pahnihai inbiek thawk khat zoa, passenger anga anni laia inhnaw mi remti pék hràm ding aka zuk ngen chun seat a ruok dèr naw thua a hrila; a sûnga chuong hai khoma mi fesan dinga an tur lai zingin a chunga bèk min chuong tir dingin ka hang ngèn nawk hràm lei chun a remti titi ta a. Inhmaw taka ka bag le motor chung tieng hang lawnkai ka tum phing chun, a sunga chuong tlangval ruol chun ka ṭawng dan a'nthawk Hmar ka ni an hriet ni ngei a ta, ‘Pu, a sûngah hung ṭhung rawh’ tiin an ṭhungna chu min kenin an inhnaw bit ta lem a; ka lawm zie chu hrilin a siek nawh.
Motor intawl dawk hnunga kan hang inbiek zawm chun anni rawi chu Mulhoia Hmar Martyrs’ Trophy football inkhela ṭhang ding, Boro Muokawi team anni thu an mi hrila; “Muolhoia Hmar Inpui prokrama ṭhang ding I ni”? tia an mi dawnna chu, ‘ka ni ngei’ tiin ka sang ringawt a. Minute 5 vel kan zuk tlan hla met chun ka motor sietna chu Retzawl phak hma met chauh hi a lo ni zing ti ka hriet tah a. Muolhoi tienga hotu le ruolṭhahaiin a pakhat khatin phonea an mi hung ngaiven zing lai hrietnawkar Halflong town kan tlung el tah a; ka lawm hle.
Tlangvalhai chu Halflong town sungah thaw ding neu neu an la nei leiin Autorikshaw an mi làk pui a, anni zâra ka prokram pangngaihmang thei ding ka ni leiin ka lawm èm leiin an inkhel huna an refreshment man ding tiin Rs. 1000/- ka pêka, anni khawm an lawm hle. Ka hming le nina indik tak kha ka lo hril tawl naw zie kha kan in chibai fela kan in bye bye zo hnungin ka hriet suoka chu a law dan ding um ta lo a. A hnungah tu’m ka ni ti hrie naw hai sien khawm an khuo hming ka hrieta, Hmar ka ni ti an mi hriet tho leiin pawi ka ti hran chuong nawh. Muolhoi ka tlung chun dar 12 an ri taa; Hmar Inpui prokram kha dar 11:00 a ṭan dinga ti a ni leiin zing bu khawm zawng ta chuong loin hmun pakhatah ka bag ka sie a, election neina ding hall ka pan thleng nghal ta lem a. Election tluongtaka kan nei zo chun zantieng dar 3 hnungin Hmar pasal ṭhenkhatin fiemthu titaka, ‘khawvela hme inhniktak dawta an hril – uisa ṭhing’ (anhnik tak chu Uisa) hmein zîngbu chu ka fak ta ṭawka. Ka zunthlum nei keia neka ngai inkhawkpui le mi ngaiventu, kan nu’n exercise ka làknaw báka fàk le dawn a hun taka ka nei naw zie hi hrie sien chu a ha mi hung rawt khum ngei ka ring. Ip thlat a ṭha!
Muolhoi a'nthawk darkar 3 lam, Tuolpuia zàn bu hnawt le public meeting nei dinga prokram duon sa a ni leiin inhmawtaka kan intawl suok ding rawm ka sawn chu ka ruol dinghai chu an vuoicha ang reng khawp el a. Hmarkhawlien a'nthawka lawnga intawl dinghai ang èm chu ni naw awm tak kan na. Kim thawkhat anga inngaia kan suok ṭèp hnung khawmin darkar 2 deuthaw kan la um a; a tawp a tawpah NC Hills Autonomous Council-a Hmar EM umsun Pu Laltlansang in Gypsy le a driver hung thawlawm le Council Chairman in Bolero Camper (Mini Truck) a hung thawlawm chu keiin ka khala dar 5 pel hret chun Muolhoi chu kan suoksan ta khawng khawng a; zan dar 7:00-a Tuolpui khuoa prokram chu kan nang ta naw ding zie chu a chieng sa. Campaign team hi HSA NC Hills & Karbi Anglong Jt. Headquarters President Pu H. Sangkhumin a min rawi a; Resource Person ang deuhai chu kei thrangin mi 4 kan nia; ka ruolhai chu ka ruol hlui Nk. Lalramhnem Buongpui @Elbee Hmar, HSA GHQ Edn. Secretary Tv. Joseph V. Tuolor le, HSA GHQ Deputy Assembly Secretary Tv. Lalringum Riengsete an nih. Team member danghai chu - NC Hills and Karbi Anglong JHQ Executive Member Pu Nathanael Ngente, Thanga Khawbung, David Tuollai an ni a. Hlasak thiem, Leiri Tlangval Ringsangzuol hai an na; Area Representative Mawia Pudaite in Muolhoi a'nthawk Tuolpui chen a mi zuia Leiri a'nthawk a tawp chenin Area Representative dang, Pu Ropieng Hmar-in a mi zui ve thung.
Darkar 1 vel hnungah Mahur kan tlunga, tlangram lût ding kan ni leiin a hawnpui le mani mimal ration ṭûl zuolhai kan hang lakkhawm sawk sawk zoin Tuolpui pan chun tlâng lam, inkhaw le chîn a chun kan intawl kâi ta nghal a. Zan thimtham lai, ei fena ding lampui chie ei hmu thei leiin rawlkho insang kan hraw a ni ti khawm ka hriet chuong nawh. Sawrkar motor a tawktu taphawtin indoi rak loa an chalai, hlui ṭawp tiengpang, power steering ni lo, tlangram lam, blacktopping an thawna kum paro nitaa motor hang khal chu anhawi dàn a chi a dang khawp el.
Tuolpui kan tlung chun zan dar 9 an ri trep ta a; dar 7 a'nthawka mi lo nghakhai chu kan changchin an hriet ta si naw leiin an lo ṭindar tawl vwng tah hi a lo ni a. Mahur tiengpang a'nthawka Tuolpui khuo lûtna kotsuoa lungphun ang titia ‘welcome plague/board’ an siem a chun a khuo hi Hmarhaiin 1795-a an hluo niin an tarlanga, a proof um chie naw sienkhawm NC Hills-a Hmar khuo hlui/upa pawltak a ni zie chu tukhawmin ei inhmai nawh. Kan tlung le inruol chun ṭawng inringna hmangin an hang inko khawm nawk sawk sawk a, sawtnawte karin hall mawi hmawk khawp nunghak-tlangval, nupui-papui an hung inkhawm el tah a. Resource Person dinga ruot mi 4 hai chun kan subject dinga riruong chu lakruolin minute 15 vél seng kan hril zoa, hlasak dinga kan ṭhuoi Leri khuo tlangvalin hla 2 a sak bawka, formality neu neu hai zoin dar 11 velin prokram kan zo a. HSA Tuolpui Unit Guest House -cum- Office a ngat, Unit ṭhuoituhaiin inhnik mangkhenga an lo buotsai, khawvela hme inhniktak anga mi ṭhenkhat hril, ‘Uisa’, inthak ṭha huntawk tak kan hme a zovin kan riekna dinga an lo buotsai a hai seng an mi thak tawl tah a.
May 2, 2014 (Tuolpui-P.Hmarlusei-N.Hmarlusei-Leiri)
Kan prokram duon dan ang chun zing dar 9:00 in Purana Hmarlusei a nih. Zan kan meng sawt thret a, zingkar tieng pang ruo a hung sur hmir hmer bawk leiin zing tho chu harsa kan ti tawl seng chu a nih. Khawmuol a ṭha naw ṭana, kan fena ding lampui chu a ṭha naw ding nia hrietsa a ni bawk leiin ka motor khal ding chu Joseph in a mi hawphur pui ta deu a; chawp le chilin driver dingin a ram leilung le motor lo hmelhriet ṭhang pakhat, ‘Chuona Changsan’ a hang fiel suok el bok; ni naw sien chu ka hriet ta nawh. Tuolpui khuo hmelhmang la hang bichienga la hang fangkuol met nuom a um hlea chu hun a um der bawk si nawh. NC Hills-a Hmar khuo hlun le inlar chu ‘sipai khuo hmua hmuin’ ka maksan nawk a ngai a nih.
Ka ring ang ngeiin Tuolpui anthawka Jinam Valley panna lampui chu a ṭha naw el an nawh; a turu a nih. Lampui a chin a, cheibawl le siemṭhat a ni nawna chu siem hmasatak kum kha a ni el ka ring. Rawlkho insang tawk tak hraw laia motor tukver anthawka zuk dâk dawk chu insukhmu le hrilmawi chi a ni nawh. Vangduoina chungchuong tuokin ei motor chuongna leh zuk inhlum thla pal inla chu a motor sie ṭawp hnung le mihriem ruong lamlien chen harsa taka zawnkai nawk nèkin Pastor-in pilvung hamkhat thè thla sien, ‘thonawkna nia hung thonawk dingin ka vûi’ a ti el a awlsam lem el thei, ti tiengpang a nih. Lampui chîn le inkhaw ém èm ei hraw lai tak khan a khingtieng anthawk motor dang pakhat hung thlat el sien chu nui inza naw ngawt bawk a tih.
Jinam phairuom biela Hmar khuo hmasatak, N. Hmarlusei kan tlung hmaa unau Zeme-Naga khuo pakhat kan hraw a chun kan hang tlankai zawk a; an tienlai sakhuo zui laia an khawtlang le hnam inkeihruoinaa ‘a kia lung pawimaw’, an ‘Buonzawl/Zawlbuk’ hang hmuin a sûng le puo thla kan hang lâk hràm a. Mi hnamhaiin an hnam rohlu, nunphung le niphung an la ngaihlut dàn, cheibawl dàn le ṭhang la hung thar peihai hmu le hriet ding an vawng ṭhat zing dànhai ka hmu chun ngaituona a mi pèk rawn hle. Hmarhai chun a tirin Khristien sakhuo kha ei làk ursûn hle lei mani ding ei sakhuo hlui zui lai huna ei hnam rohlu le chîng dàn hai po po hmu khawhriin a pawng a puiin ei hnawl tawl ringawt a; a tîr lem chun ei Biekin haiah khuong khom ei laklût ngam naw a ni kha. Ei ram le hnamin Khristien zabili ei hmang hnung a hlak chu a Khristienna nèkin a pawl le kohran ei làk vûng nawk ta lem ang lawi si. Hril sei da’l ei tih.
Dar 10 a pêl hretin Notun Hmarlusei chu kan tlung ta hràm a; a khawchung lem Purana Hmarlusei chu kan prokram hmasa lem a ni leiin lamlien pui (ei ti chu a ngai ve tlat) anthawka an lamlien sat thar, kilometer khat zènzawn chu katei katei, tung mitlîk takmeu a na; hmun khat tak lem chu kawi khata kawi zo lo, a kawi intung ṭhat lai taka a hnung tieng chite intawl thlaka la bei ṭhat ngai hiel a nih; Nasa chu a nasa. Sap pachal, insukphawk nuom ruolin insukmaknaa an hmang hlak lampui nisien awmang lem mei ka ring.
A khuo kan lût fel chun dar 11:00 a hnai thuok tah a. In 30 chuong er chauh khuoin umni khâm meua an mi lo nghak hi a nia, inphalam a um angrenga chu a thaw dan ding dang um ta nghal lo a. Prokram ṭan hma’n bu an min fak tir a; an uisa suong dan chu a danglam hret tah. Kan fâk khawp zo hun sawtnawteah inkhawm an buotsaina, HSA Unit President in tieng kan pan pheia; hun inhawi le induthawtakin kan hmang a. An khuo hi Tuithaphaia Thenmuol khuo ang deuin ‘kohran pakhat (PCI) chauh umna’ a ni leiin khawtlang le kohran prokram siem awlsam an tiin an inthuruol phien a hawi. Jinam Phairuom biela um a ni ringawt a chu tlangrama khuo um an ni leiin an ram (lo neina) khawm a la ṭha tho ning a tih; in tin deuthawin aithing an haua, Kg khatah a khuoah Rs. 60/- in an pêk thei nawk nghal. An lampui intung le kawlkhrawng thu kha chu ienga bêk an ngai naw a hawi. Nuhmei khawma kea lawnin Kg 30 harsa lo takin an phur tung par par el hlak a nih. ‘Pa le pa’ ti hi inthlauna chi dang dang chu a lo um ngei a nih!
Prokram kan hmang zo le inruolin kan inthawkthla nawk nghal a, main road bula um, Notun Hmarlusei khuo a chun chawhnung dar 3 pel metin hun kan hmang nawk ve nghal bawk. Tawi fel tak si le, nei man um tak siin hun kan hmang a, skul naupang, nunghak-tlangval, nupui-papui le tarhai chenin lungril inhawngtakin inkhawma an hung thrang pei a. Hi khuo khawm hi an khawchung tienga hai ang deuin ICI kohran chauh a um ve a, an Pastor quarter dinga an bawl thar ruok chu ka enin ka lai a na. Nui an za teu teu nawh. Hmarhai Pathienthu le kohran lâk dàn thu ramtin ka ngaituo suok nawk phaa, a hnung tienga khuoa ka thuhrilna ṭhenkhat khata ka sam dawk pha bawk. Hi lai thu tak hi a hnungah chipchier deu metin la’n zawt ka tum.
N. Hmarlusei anthawk Leiri khuo chu kea lawn khawma minute 30 lam chauh a ni a. Taksa ram taka ka laibunghai khuo a ni leiin fiemthaw titakin ka ruolhaiin an mi fiem deu tat hlaka; an khuo kan lût tawma ‘welcome board’ an tarna a chie chun ka thla an mi lâk nghe nghe. Khuo kan lût chun anthim deu hmei hmuoi tah a; dar 6-a kan vantlang inkhawm prokram chu bufak hma ni lovin bufak khawp tienga dingin an sawn hlaa, kan tlungna ding chita an lo ruot a chun an mi thak a. Insawp faia bu kan fak seng zo chun prokram hmangna ding Community Hall chu kan pan a, kan tran chun dar 9:00 a hnai thuok tah. Kan fe ding an hriet lei mani ding an khuo ME School le High School zirtirtu (ka hmu po chu vai/Bengali/ Assamese) ruol khawm hi inkhawmna hall a chun discipline nei takin an hung inthrung ve thrap a. Inza in entir takin chibai an mi hung bûka, kan zak letling lem. Anni hai neka kan chunghnung lemna chite khawm a um nawh a; an mi hriet chieng naw lei khawm a ni el thei!
Leiri khuo hi Tuolpui ang thoa NC Hills-a Hmarhai khuo hluo hmasa pawl a ni vea; chanchin khawm a hau hle a; an community hall ruok chu an khuo hming inthang ang huin a pui bèk nawh. A khuo mihai chun Leiri pachal ka ni leiin an mi lo lawm bik mani ding, Hmar Thangsuopuon dâm an min sil tira, ruolhai lakah khawm inphalam um ka ti ang reng. Prokrama thuhrilna huna ka nei lai mawllai huna an khuo papuihai chanchin ṭhenkhat le tulaia Leiri pasal nungchang ṭhenkhat ka hril peka, an lawm tlang dar dar hle. An an mi lo dawngsawng dan le hlutsak leia puon chen an min siltirna thuah lawmum ka ti lai zingin a Pulamte-Leiri zawnga an mi hmu lien hlur chu ka nuom le tum naw tieng pang a ni thu le sung-le-kuo le laibunghai kana an khuo chu ka sir ni lovin Hmar ka nina ang le hnam ṭhuoitu pakhat ka ni vena zar chauh a ni thu ka hril a. Hmarhai hi a pahnam zawnga inkeibing loa a Hmar zawnga ei inkeibum a pawimaw ka ti thu ka hril bawk a; iengtin am an mi ngai ta ding chu. “In community hall hi a thupui naw em leiin a khuo mihaiin a bawl tharna dinga Rs. 100000 in dawlkhawm thei chun Manipur le hmun danga ei laibunghai lai 100000 dang hung dawl pèk ve’ng ka ti cheu” tiin kan tiem pek bok - Mi danghai thik awi lo. Prokram kan hmang zo chun zan dar 12 a hnai thuok tah a, kan lampui hungna ka sawl bawk leiin in kan lawi chun zalhmun rem nghal ka nuom thu ka hrila, khawtlang ṭhuoitu un le papui ruol a mi pan nuomhai khawm ka hnawl kir ta ringawt el a; inphalam a um ruolin inpamum khom ka tia chu a zinga kan fe peina ding le mani taksa hriselna khom ngaituo lo theilo a ni si a.
May 3, 2014 (Leiri-Phaipui-Tattephai)
Zingkar ruo a sur hmer hmer a, anhawi thawkhat vieua chu kha chena kan lampui hraw kha hang ngaituo kir chun ṭhat tieng nékin siet tieng a pan ding zie chu ringvâng thu el an nawh; a ni ngei dingin ngai inla suol naw tak a tih. Zingkar walking malamin ka suok meta, Leiri khuo chu ka hmu ropui tum angin a ropui nawh a; a lawilen khawm anhawi ka ti bèk nawh. An huon haia serthlum kung hai anthawk chun fak le dawn le tangka sum lamdawkna tieng ruol an hnawt bek naw ding zie hriet le hmu thei a nih. Hmarlusei khuo pahnihai le Leiri khuohai hi phairuoma um ni lovin tlang insanga um an nia chu NC Hills Autonomous Council biel inthrenaah Jinam Valley (phairuom) constituency-a an lo sie el chauh hi a ni a ti ka hmusuok a. A phairuom (valley) tak tak, sun dar 12-a kan prokram hmangna ding khuo a suk ngawta chu kea lawn chun darkar 2 lam a ni thu an mi hril a; motor ruok chun a lampui izir ni tâng a tih; zani tuk nèkin vawituk ruo a sûr rawn lem a, lampui a pawr zuol nawk pei lem chun kea darkar 2 lampui chu motor chun sunnithlak intàng thei dàn a um ta thlat.
Zing bu Village Authority-in an mi buotsai kan kîltlang hma chun an khuoa sorkar skul 3 – LP, ME le High School hai chu a building bèk min hmu tir réng rèng an nuom leiin kan hang hmu a. An LP schoola thawktu mi 11 hai chu a khawsung mi vawng an ni leiin ‘substitute’ intirna thu a um nawh. Sienkhawm, naupang ti khawp an nei naw leiin school an kai nawh a, an building chu private-in mi pakhatin a hawa; chu pa chun naupang 120 lai zet a nei naw ang lawi si. A school a chun Nursery, KG-I, KG-II, Class I to V neiin pawl pariet a enkawla chu zirtirtu, ama tiemin 6 chauh an um. An admission fee le monthly tuition fee a lakkhawm zàt ngaituo chun law ngaina a um si nawh; naupang 12 lem chu a thlawn topa a enkol an ni nawk nghal. A ngirhmun ka zuk hriet puia, lungsietum ka ti fèt. Harsatna a um chun a sutkieng dan ding lampui um ngei ding a na, Leiri LP school sukhring le suk changtlung dan ding khawm hi um ngei dingin ka ring a; a khawtlang – VA le HSA bakah HSA NC Hills JHQ le an bieltu MAC (EM) hai an lunginruol phawt chun harsa bèk ka ring nawh!
LP School ral el chu High School a ni leiin vadungte kan kana kan zuk tlung nghala – High School hmel reng reng a put nawh. A inchung chu thlipuiin a hawk a, siemṭhat a la ni naw zinga, a la ni vat hmel nawh. Furniture tlawmte a dung a khangin a uma, hluo lum a ni naw ziet chu hriltam a ngai nawh. A kum tluona hluo lum der naw chu a ni chie naw thu an mi hrila chu hi High Schoola naupanghai chu Class X exam pha Guwahati le Silchara sawrkar le private school ṭhaa naupanghai le hang in ruolsiek ding an ni leiin hawphur pui chu an um ta hrim hrim. Lamtlang tienga an ME school hman hman chu a zie a um ṭhet. An staff quarter pakhat chu zani laia thlipui hrangin a lo hawk pek vea, a chang changa hung hluotu an zirtirtuhai chun class room pakhat an hluoa, an umsung chu an khawsa ve mei mei el hi a lo nih.
Zing bu Leiri Village Authority-in an mi buotsai pek chu phingṭam ngawi hnungin ‘gawp pumin’ kan kîl tlàng a, kan khawpin kan tlai hle. HSA (GHQ) Education Board le HSA NC Hills JHQ inthuoa Jinam Phairuom Education Campaign-a kan biel fang chu kan sirna khuo le kan thuhril ngai haiin an hlawkpui le hlawkpui naw ka hriet nawh; Uiin an mi thawhla’ ding zie chu a chieng. Tu chen khawm hin pathum chun an thi pha tah. Bufak khawp hnung khawmin thu ramtin hrilin kan ‘gawp’ zawm peia; kan prokram nawk ang chun Dar 12-ah Phaipui khuo a nia chu, chu hun a chun Leiri anthawk kan suok thei ṭawk chauh a nih. Mihaiin ngaina le ditsaktaka an nikhat sin chen chaia an mi la hang inbiekpui mawl mawl laia tlan bahrika zuk tlan san pei chu nal lo a.
Lampui chu ka ring ang ngeiin siet tieng le harsat tieng a pan pei a, hmun khat tak a lem chu kan motorhai chu chirhak anthawk ankhatin an intâldawk zo naw leiin mihriem tha hrâtna hmanga namdok an ngai hiel a. Lam suk deu ngawt a ni leiin damte te’n kan intawl suk peia, darkar khat vang hungin chu lai biela khuo lien tak Muollien chu kan tlung a; sienkhom chu khuo chu zingnawk zingkara kan hun hmangna ding chauh a ni leiin kan tlan suok nawk nghal a; sawtnawte hnungah Phaipui tieng pètna lamṭhe kan tlunga, darkar khat vel lawn dingin lamsuk kan hraw ṭan ta nghal bawk.
Ruomau bil a suk zawnga kan hraw lai chun, “Hi chen hi chu ei motor khom kha a hung thei ding vei leh” kan ti thla pei a; phone network hlak um lo, zuk ko ngaina um ta bawk lo a. Darkar chenve vel hnunga chun vadungte kan tlunga, chutaka inthawk chu a tung zawng char char a ni ta ding leiin in warm-up malamin kan inphifaia, ka rawmawl dam tui ka sukhua, kan hun ruot kan hnawtphak naw nasa ta bawk leiin a tung zawng chun kan bei tran nghal a; a sawlum dan chu an ang ta naw trei. Thuok anrang tran. Minute 10 lawn zo zata minute 5 chawl hang rawt biktu ni hlak kha inhawi ta bik lo. A thaw ṭhang deu le zuonzang deuhai le a tawrkawnawnghai kan inhlat deu deu. Intung deu èr awr hraw ding a la um ei hang ena, vân an thieng deu huoi ta chu khuo tlungna ding sawnin ei tha nei po po ei hang fuonkhawma, mawng tienga meikhu suok vângin ei zuk lawn suok hlak chun muol khat dang hraw ding a lo la um zing, huish!. Vawikhat tak lem chu iengdang hril lovin ka thlepthla deu hnawka kalak kara lu phumin kan thuok deu hlup hlup niin ka hriet. Sawl hmél put taka ka kun thlawk thlawk lai thla, Joseph in a mi lo laka, a vangnei a siemin a memory card a sie hrama, tlang hrieta pholang a ni ta nawh.
A hnâr um lo na na na chu a tawpa chun khuo chu dar 3 inri hnai thuokah kan tlung ta khawng khawng a; kan ruolhai a lo lawn hrat le hmasahai chu darkar chenve chuong an lo chawl hadam hman a; a phawirang le hmaivun sa deu um hai sien chu nunghak khawm lo leng hman hiel an tih. Sawtnawte kan chawl hadam hnungin an khuo tontira ME school, prokram an buotsaina tieng chu kan pan a; hun induthaw le ditkhawp lo takin kan hmang nawk ta tho a.
An khuo hi hienga kilkhawr le motor lamlien la tlung lona e ti lovin, mobile network a fie thra vieua anglawi si a nih; a khawmi haiin an fak le dawn, sil le bil le naupang lekha inchuknaa an pawisa sum seng ai ‘top-up’ man dinga an dapral true ding zie chu a chieng. Prokram tlangpui kan hmang zoa hun suktawp a hnai ta nia ka hriet tho bakah phone call dam ka dawng leiin tuol ka suok a. Sana dárin panga a pèl bakah khawmuol a siea, van an rûm deu dur dur a bawk. Zân thimtham hnuoia fe ding kan ni taa, ruopui vanawnin a mi nang vei chun zawngmangsie an hril chu nepte ding kan ni leiin ka hawphur lungril deu hieu a. Prokram hlak kha a khaw mihai khawma an lo inhnikpuiin zawna le comment ding neu neu an lo nei leiin suktawp thei el lovin a um a. Hun kharna ṭawngtrai an hmang zo chun, kan in chibai tawl sawk sawk a, inhmawtaka rawmeiser sitin kan inthoksuok thla ta char char nghal a. Ruo khan a mi la nghak am a ni ti thei dingin a hung sûr el nawh a; sûr vei sien chu vawizana kan prokram el ni lovin zîng le zîng nawka hai chen khawm a suk zero vawng thei dàn a um. A san chu – kan lampui hraw le hraw mekhai hi ‘a pawr chu nasatak’ a ni ding a na; inhawi rawnga motor tlan lut theina ding chi a ni naw kuoi top. Driverhai khan vadungte chen kha an mi lo hung tuok bawk leiin sawtnawte kàr kan tlung thlaa, zân 7 vela Tattephaia prokram nei nawk dingin kan tlan dawk nawk ta nghal a.
Tattephai tlung hma in zing, Pathienni zan inkhawmtrina kan hun hmangna ding Mauchar kan tlan pêl a; sûn dar 12-a kan inkhawmna ding Ramvom kan tlung chen khomin, a khaw nupui Phaipui anthawka keini laia hung inzel ve tiemin Tattephai khawsung chu motor kan tlan lût thei ding le ding naw tukhawmin kan hriet nawh – chungtienga PA(fahai) chauh naw chun. A khawsung lût tawm kilometer 1 vel motora kan hang kai ding chu a khuo mihai khawma an mi hawphur pui tho chu ning a ti, motor nam kai le lampui kawkhmutu dingin an khuo ramri vadung a chun an mi lo hung tuok a. Chuongchun, hawphur rûk deuin vadungte chu kan tlàn kaia, lamtung le inkhawtak el chu kan driverhai huoisen, thiem le tonhriet (experience) na zarin kan tlan tlung thei ta hràm a. A khuo HSA Unit President inah chun kan rêngin kan inpailût a; zan prokram chu zinga zingkara sawn kha anni tieng le keini tieng duthusam a lo ni ve ve leiin kan son a; a hunghai keini mi 10 chuonghai chu kan rêng deuthawin tui kan insil a; An khuo Gaobura chu a lo um remchang nawa chu Assistant Gaobura rawia keini hming bîk lieua ruoi an mi lo buotsai pek chu ṭâm deu ngawia fa dingin Gaobura in tieng chu kan pan a. Hmarhaiin uisa suong dàn style ei lo hau zie ka hriet suok phaa; ei du zâwng khom a lo inang naw rem rem ie. Chi le tui chauh zuk hme bik chu ni theiin ka hriet naw bakah bufâk hun sung chu a sawt naw tho leiin iengtin tin amani ei lo khawp ve thei tho.
(Date 4 – 7 / May / 2014 sunga mi po hi JINAM PHAIRUOM DAIRY – II a ding in ka la zuk sie ṭha)
