Ar Ang Invai El Naw Rawh!

~Joshua Amo (aka Jr.Amo)

Ei hnam hi hang ti nawk phawt ei tih. Hla tieng panga chu ei unau tribal hai lai hin Mizoram ( Lusei ) hai dawttu eini ei inti hlak a, indik vieu dingin keikhawma ringna ka nei. A ni ngei ei kawl le kieng a ei unau khawsakna hmangve tuhai hi hla tieng pang ei hang en chun Gospel, Love Song khawm nisienla hmathuoitu ang deu chu tu chena hin ei la nih. Chuonga hmathuoitu ang deua ei inngai lai chun tu tieng tieng hin chu ei lan ti ngam chie dim aw tiin hang ngaituong ei tieu aw.

Ei la upa naw a chu hang ti veng ei tih, Hmar hla hi khawmuol ka hriet thei tantir anthawkin inhnikna bek bek hi ka la nei ngai naw a tu chen hi chu chu keia hin a lan thlak danglam naw zing niin ka hriet. Amiruokchu, chu ruol ruol chun ei hla hai hi a thatawk am thatawk naw ti chu invawina lientak neitu laia pakhat ve ka ni kan ring bawk. Kan hnik theinaw nasan pakhat hang suklang vat ka tih. Hla hlui le hla thar, Hmar Love Song ei ngai chun thupuia ei inbuk ang hrimin “ Ar Ang Invai ” na tieng deu vawng hi a nih. Ei hang ngai chun hmangaina leia hliem tuora thi el thei ding anga inngaina hla hai dam, mihriem ni ve si a mani mihriem chanpui phunaw zie nasataka inzawtna thu hai dam, a hmangaiin a maksan, a the leia nuor ngawi ngawia uma khawvela beiseina nei ta naw ang hiela umna thu hai dam le a dang dang. Hieng ang hi a ni lei hin ka ngainuom naw ni lovin ka ngai ngam naw ti lang indik lem dingin ka ring. Mi laia hang ngai ding khawma inzak a um annawm ie, a chau thlak taluo deu naw maw hieng ang thu ngawt el hi chu? Hi lei hi a ni ka ngai pei naw na pakhat chu. Nuoma nunghak dang um ta naw ang el a kur-in-kuk el ti dam. Khawsakna lo inthlau vieu sienla khawm inphu nawna ding san a um naw hrim hrim, hmangaina hi ro amanih sum le pai le mihriem tha hratnain amanih ramri a i khang theilo thil a ni ti hi hre thar ei tieu. Ei zuk hril nuom tak chu ei hla hai hi an rieng thei taluo bek beka a mi suk pasie taluo hmangaina rama khawm nisienla maw... Inngai dan a ni ve dim chu...?

Hun lo liemtah le tuta hun chena ei hla hai hi survey thatakin hang thaw inla chu an rieng chie deu vawng hi ni dingin ka ring. Chu leiin tuta thangthar hla phuok thiem tak tak hung inser suok mek tahai hin hi hi hre thar ei tieu, i lungrila hla phuok nuomna amanih i nei a ni chun “ Ar Ang Invai ” ei nghal lovin ‘ ama ’ i hmangai i tawng fuok leia i hlimna thu dam, i hmangai le khawvel inhang hmang china inthawka i khawvel hmang a hadam thu le inhawi i ti zie hai dam hung inzawt ve ta dingin vawisunni hin i lungrila pai tlat dingin unau ka nuompui che.

Eini hmar laia kohran thuoitu pakhat a hming chu hril kher nawng ka ta, ama chun hienghin a ti annawm “ Phu naw phu naw ti naw ro, mihriemin tukhawm phu naw ei nei nawh ” a ti chu indik hlein ka hriet chu tie. A ni ngei ei Pathien ngei khawma ama angpuia a mi siem a ni ti ei hriet bawka phu nawh ti hai ang dam hi chu ti ti, hmang hmang chi ding khawm an nawh. Ngaizawng ka lo nei ve zal taa, ka ti hlak annawm ka ngaizawnghai kuomah khawm “ Nangkhawma i mi phu a keikhawma ka phu che.” Ka phu naw che hi chu ka ti nuom bik ngai der nawh. Kha tieng kha hun sien...

Anrieng tiengpang chu a tam taluo tah a, Hmar hla hi sukrieng taluo bek bek ta naw inla nuom a um tah. Ei unauhai Lusei hai hla zuk hrilkai zau inla “ I hmangaina vangin lawmthu ka hril che, Ka ta’n i rinawm vangin lawmthu ka hril che ” hieng ang thuhai ang dam hi a tha annawm ie. A hmangai kha a ta dingin a ringum em leia lawmthu a zuk hril hai dam chu maw. Eini rawi i phuok nisien chu “ Ka phulo hmangai ka lo tawng che hi ” dam ti rek rawi nawm ei nim. Eini le eini ramri inkhang khum nawng ei ta, nasatakin hma ei hung sawn tan mek ta niin an langa chu leiin ei hla hai khawm inri deu rawpin hang phuok thar tawl ta inla maw. A ngaitu khawm kha a lo luck bek naw khawma intithei hielna khawp vang dam nisien. Beiseina thar le ar anga invai el ta lovin aw!

A hla tieng awna ei hung thaw tak nisienkhawm video zuk hril kai sa met inla. Ei video quality hai a chau thei taluo bek bek khawm hi lungsiet a um thei annawm. Pawisa harsatna chu hril tak loa, a changtu hai khawm hi hang uluk deu ta inla a va tha awm de aw. Nuoma an hman hman ruot le hmang ni awm fahrana en ngam umlo khawp vang video hi ei hau taluo deu ta annawm ie. Video tam deu en tlak um mang lo siem nekin quality tha khak el, a tu mihriem en ding khawma insit um lo rak khawpa tha pakhat pahni chau siem lem inla a tha dingin ring a um. Ei hlawk chuong si naw a maw. Saptawng takin Quality matters an ti hlak an naw...? Ei video settings tulaia a thar tak ei tihai khawm hi widescreen a thaw tum ta bawk inla, widescreen lo video hi chu outdated deu ta niin an lang.

Hun sien la a ru chu kawl em dal ei tih. Tuta inthawk chu inrieng ta lovin inri rawpin, video quality tha takin aw. Thawthei ka neinaw a chu hieng thuhai hi ka lo ngaituo ve hlak annawm.