~Darsanglien KhawbungBible inchuk a hrietna inriltak nei ka ni naw a. Chubaka, khawvel dan khawm inchuka thiemna nei khawm chu ka la ni nawk naw ta pei bawk. Amiruokchu, ka ngaituona le ka lungril suonga nasataka Bûka aum tlat leiin kan khina muola inthawkin hang thailang ve hrim hrim nuomna in a mi tur ut ut leiin ka to bo pui thei naw chu hmangruo a hmang ṭangkaiin tawite’n hang thailang zo ka tih.
LALPA DAN: Ei hmelmahai hmangai, suol chu suol a thung lo ding, ṭhatna a hne lem ding,min bieng khingtieng an ben chun, khingtieng khawm daw ding, hmelma’n fakding anei naw le fakding pek, Unau in thil ei chungah a suksuol chun a vawisari hmun sawmsari ngai dam , adang tamtak ala um hrilseng an nawh. Chulai a la mak nawk zuol a ka hriet chu, ei la hmulo le mit a khawm ieng ang am ana ti ei I hriet naw ei ring bur el hi, chu cho chu an nawh. Lalpa dan a chun ei ring phawt a chu chu zo a chun ei hmu hi a nih. Ringla sandam in um I tih. Amak de aw… ei ring phawt a, chun, sandam ei ni chu. Anih, ringtuhai hi ei ṭawngṭai na ah hai khawm hlawtling a ei in ngai hun a ei hlawtlinga, hlawsam a ei in ngai chun ei hlawsam el a lo nih. Chuleiin, ni ngei a tih, vawisun/zan a ka ṭawngṭai chu kan hnik rak nawh ngei ka bei lui hram hram tak meu meu a ni ti chang khawm ei nei hlak nasan. Chuleiin, Lalpa dan a chu sukchiengna dingin ringna ei nei hi a ṭul a ni, ringna tieng ei in hnuoi phat phat leh thlarau a ei chau hlak a lo nih. Thlarau a hrietna nei a, thawthei ding ni a ei in hriet chu, mihriem I thawthei naw ding ang a in lang khawm thlarau ṭhangpuina chun ei lo thawthei el ta hlak a lo nih. Ni sawmli (40) bu nghei a Lalpa buon ti hai dam chu thil intak tak ding a ngai a nih. Amiruokchu,chungtieng thil thawtheina ei ni ah um ei ring chun ei thawthei pei a lo ni lem. Peter tui chunga a lawn tawm khan thei dingin an ngai hmasa phawt a, chun a lo thei el a, amiruokchu, a ringna a thla hnuoi deu hnung khan chu a pil tum el a nih.
KHAWVEL DAN: Hi khawvel dan ruok hi chu, Lalpa dan le inkal hmak a lo nih. Hmu phawt naw chun ring harsa ei ti el hi, Nâ khawm a ei lo hriet thei, mit ngei khawm a eilo hmuthei bawk, chu khawm chu khawvel dan ah chun a chieng naw a ni, thu lengval mei mei an naw leh mani khelhril ngei khawm atawp a ei beng a hung tlung nawk zet chun, eini ngei khawm a awi um naw taluo a ei ngai chu eilo awi nawk el hlak chu! Chubaka, hnu-sui-na, ah hai khawm an hnung hmu ding le sukchiengtu iemani bek a um naw chun rorelna hmun a khawm thiemchang theina a la um nawk ta pei a nih. Dan siemfawm, mihriem I siem a ni lei in famkim nawna tamtak hmu ding a um, iem a ni bek sukchiengtu ding hnutsie, an naw leh, mantheina dinga chieng fekfawk aum naw chun,thiemnaw zing khawm a thiem chang theina dan chu khawvel dan hi a nih.Hmelmahai hmangai chu thil thei lo tluk a na, suol chu suol bawka thungrul ei nuom bawk, min an mi thaw chun a neka nalem a thungrul ei nuom a, hmelma fak ding a nei naw a fak ding pek tihai lem chu, a teu-vin-ahnai nawh, nasadeu in tuorhai sien ei nuomlem dei.
Khawvel dan a chun, phutawk hremna pek, an naw leh a nep thei met dan in dawp suok tum ding ti hai hi a ni lem chu ti an ziek hai chu,entirnan: Cr.P.C Section 54,162, 164 e.t.c le The Indian Evidence Act, Section 24,25,26 le IPC Sec.330,331-ah Protection Against Cruel Or Inhuman Treatment during Investigation ti chu zieklang a nih.
Amiruokchu, hi hi ei nihai hriet ding a ṭha chu a nih, Krista thisen a, in chawk ei nita tlat lei in, hi khawvel dan hin mi sukbuoi ngai naw sienla, Lalpa dan chu sie chunghnung lem tlat ei ta, chu taka chun famkimna a um si a, khawvel dan in ei thil thawsuol ngaidam nisienlakhawm, Lalpa dan a chun in thiem nawna nei tho tho ei tih. Krista Nau indiktak ei ni phawt chun.
