28 March,2012: Tlangmi tamtakin a zar ei lo zo tah, a bikin Guwahati a Hmar nau hai ta ding lem chun malsawmna hnar lo ni rawp ta hlak Pu Thanghlun Hmar chun vawisun IRS (Indian Revenue Service) ah promotion a lo hmu tah. Ei lawmpui hle a nih.Kum 1989 khan SSC conduct-na hnuoia Inspector of Income Tax Inspector sin a lo zawm a, Departmental Exam passed leiin in kum 2001 khan Income Tax Officer ah a promotion nawk a, Vawisun Government of India in order an suo dungzuiin IRS ah a hlangkai tung ta pei a nih. Hmar nau lai chu Income Tax Inspector a inthawk a IRS kai hmasatak niin ei hriet. Ama hi Panel year 2010-11 IRS pek a nih. April thla hin posting order suok a ta Guwahati, Delhi le Mumbai hmun pakhat taka a posting dinga beisei a nih.
Pu Thanghlun hi sinthawna tieng a hlawtling el bak a kohran tieng khawm mi pawimaw tak niin Guwahati Hmar Christian Fellowship (1992) founding member a lo ni ve a, Fellowship indin a ni a inthawkin mawphurna chi hranhran Vice Chairman, Finance Secretary, Secretary le Thalai Chairman sin ringum taka lo chel ta hlak le tuta Property Secretary sin chellai a nih. Hiengang bawk hin khawtlang tieng khawm Hmar Welfare Society, Guwahati-ah Vice Chairman, Secretary, Treasurer sin lo chel ta hlak le kum 2011 inthawk vawisun chen Chairman sin chellai a ni bawk. Tukum February thla khan ama inrawina hnuoia Guwahati Sikpuiruoi cum Welfare Meet hlawtling takin ei hmanga, an hawi zie khawm kha ei la hriet seng ring a um. A kaisangna ei lawmpui takzet a nih.
~Lalchungsiem Thlawngate Via Facebook
